প্রধান মন্ত্রী, শ্রী নরেন্দ্র মোদীনা ঙসি হরিয়ানাগী রেৱারীদা লুপা করোর ৯৭৫০ হেনবগী চাউখৎ থৌরাংগী প্রোজেক্ত কয়া লৈবাক মীয়ামদা খুৎশিন্নবগা লোয়ননা উরেপ উয়ুং তমখ্রে। প্রোজেক্তশিং অসিদা অর্বান ত্রান্সপোর্ত, হেল্থ, রেল অমসুং তুরিজমগা মরী লৈনবা মরু ওইবা সেক্তর কয়া য়াওরি। শ্রী মোদীনা ঙসিগী থৌরমদা উৎখিবা একজিবিসন অমসু য়েংখি।
প্রধান মন্ত্রীনা ঙসিগী মীয়ামদা ৱা ঙাঙবদা থৌনা ফবশিংগী লমদম রেৱারীগী মফমদা ইকায়খুম্নবা উৎখিবগা লোয়ননা লমদমসিগী মীয়াম্না মহাকপু নুংশিবীরিবা অসিগী মতাংদা পনখি। পি.এম.গী কেন্দিদেত ওইনা খ্বাইদগী অহানবা ওইনা রেৱারীদা ইং ২০১৩দা পাংথোকখিবা মহাক্কী প্রোগ্রাম অমসুং মীয়াম্না য়াইফ থৌজাল পীখিববু মহাক্না নীংশিংখি। মীয়ামগী থৌজাল অসিনা মহাক্কী খ্বাইদগী চাউবা পাঙ্গলনি হায়না মহাক্না হায়খি। ভারতনা মালেমগী ওইনা অৱাংবা থাক্তা য়ৌরিবা অসি মীয়ামগী থৌজালগী মতেংদগীনি হায়না মহাক্না হায়খি। মহাক্কী য়ু.এ.ই. অমসুং কতারগী খোঙচৎকী মতাংদা পাউদম্লদুনা, ভারতনা মালেমগী ফম্বাক্তা ফংলিবা ইকায় খুম্নবা অমসুং মীনুংশি অসিদি ভারত মীয়াম্না ফংহনবনি হায়না প্রধান মন্ত্রীনা মখা তাখি। চপ মান্নবা মতৌ ওইনা, G20, চন্দ্রয়ান, অমসুং ভারতকী শেন্মিৎলোন্না ১১শুবা থাক্তগী ৫শুবা থাক্তা লাকখিবগী মায় পাক্লবা থৌওংশিং অসিসু মীয়াম্না শৌগৎপদগী ফংবা ঙমখিবনি হায়না মহাক্না হায়খি। লাক্কদৌরিবা চহিশিংদা ভারতপু মালেমগী খ্বাইদগী অহুমশুবা চাউবা শেন্মিৎলোন ওইহন্নবা মীয়াম্না থৌজানবীয়ু হায়না মহাক্না হায়খি।
লৈবাক অসিনা বিকশিৎ ভারত অমা ওইনবা হরিয়ানানা চাউখৎপগী মথৌ য়ানা তারি হায়না প্রধান মন্ত্রীনা হায়খি। হরিয়ানাগী চাউখৎ থৌরাংগীদমক্তা খুৎলায় মতিক চানা লৈবা হোস্পিতাল শাবগা লোয়ননা রোদৱে অমসুং রেলৱে নেতৱর্ক মোদর্নাইজেসন তৌনবা চাউরাক্না লুপা করোর ১০,০০০গী চাউখৎ থৌরাংগী প্রোজেক্ত কয়া ঙসি লৈবাক মীয়ামদা খুৎশিন্নবগা লোয়ননা উরেপ উয়ুং তমখিবশিংগী মতাংদসু মহাক্না পনখি। চাউখৎ থৌরাংগী প্রোজেক্তশিংগী মিং পল্লদুনা, প্রধান মন্ত্রীনা এমস রেৱারী, গুরুগ্রাম মেত্রো, অনৌবা ত্রেন অমসুং রেল লাইন কয়া অমগা লোয়ননা এক্সপরেন্সিএল ম্যুজিয়ম – অনুভব কেন্দ্র জ্যোতিসারগী মতাংদা পাউদমখি। অনুভব কেন্দ্র জ্যোতিসারগী মতাংদা প্রধান মন্ত্রীনা পাউদম্লদুনা, মসিনা ভগ্বান শ্রী কৃষ্ণনা ভগবদ গীতাদা পীরম্বা পাউতাক কয়াবু মালেমদা খঙহনবগা লোয়ননা হরিয়ানানা ভারতকী চৎনবীদা শরুক তম্লিবা কয়া অমসু মালেমগী মফমদা খঙহনগনি হায়খি। ঙসিগী চাউখৎ থৌরাংগী প্রোজেক্তশিং অসিগীদমক্তা প্রধান মন্ত্রীনা হরিয়ানাগী মীয়াম্বু থাগৎখি।
‘মোদীগী গেরেন্তী’গী মতাংদা লৈবাক অমসুং মালেমদা ঙাঙনরিবা অসিগী মতাংদা পাউদম্লদুনা, প্রধান মন্ত্রীনা রেৱারীনা ‘মোদীগী গেরেন্তী’বু অহানবা ওইনা উখিবা লমদম্নি হায়খি। লৈবাক্কী মিংচৎকীদমক্তা মফমসিদা পীখিবা গেরেন্তী অমসুং ঐখোয়না মিৎনা উবা ফংলবা অয়োধ্যাগী শ্রী রাম মন্দিরগী মতাংদা মহাক্না পাউদমখি। চপ মান্নবা থৌওং অমা ওইনা, পি.এম. মোদীনা পীখিবা গেরেন্তীগী মতুং ইন্না আর্তিকল ৩৭০বুসু লৌথোকখি। “ঙসিদি, নুপী, শোত্থরবা, দলিত, ত্রাইবেলশিংনা জম্মু কশ্মিরদা মশাগী ফংফম থোকপা হক ফংলে”, মহাক্না হায়খি।
এক্স সর্ভিসমেনশিংগী মফমদা ‘ৱান রেঙ্ক ৱান পেন্সন’গী গেরেন্তী অমা মহাক্না রেৱারীদা পীখিববু প্রধান মন্ত্রীনা নীংশিংলদুনা হৌজিক ফাওবদা লুপা করোর লাক্ষ ১ পীখ্রে অমসুং মসিগী মনুংদগী হরিয়ানাগী এক্স সর্ভিসমেন কয়ানা মসিগী কান্নবা ফংখ্রে হায়না মহাক্না হায়খি। প্রধান মন্ত্রীনা রেৱারীদা OROPকী বেনেফিশরীশিংনা হৌজিক ফাওবদা লুপা করোর ৬০০ ফংনখ্রে হায়না পাউদমখি। মমাংগী সরকারনা OROPকীদমক্তা শুপ্নগী লুপা করোর ৫০০ খাক্লম্মি, মসিদি রেৱারীদা লৈবা এক্স সর্ভিসমেনশিংগী ইমুংনা ফংবা শেনফমদগী তাথৈ হায়না মহাক্না হায়খি।
ঙসিগী উরেপ উয়ুং তম্বগী থৌরম অসিনা রেৱারীদা এমস শাগনি হায়বগী গেরেন্তী মপুং ফাহল্লে। প্রধান মন্ত্রী মশামক্না রেৱারীগী এমস শঙ্গাগনি হায়বগী থাজবা পীখি। মসিনা অনা লাইয়েংবা হেন্না নুংঙাইহনবগা লোয়ননা লোকেল মীয়াম্না দাক্তর ওইবগী খুদোংচাবসু হেন্না ফংগনি হায়না মহাক্না হায়খি। রেৱারী এমস অসিনা ২২শুবা এমস ওইগনি হায়না ফোংদোক্লদুনা, পি.এম. মোদীনা হৌখিবা চহি ১০দা অনৌবা এমস ১৫ হাংদোকপগী অয়াবা পীখ্রবনি হায়না মহাক্না হায়খি। হৌখিবা চহি ১০গী মনুংদা লৈবাক অসিদা অনৌবা মেদিকেল কোলেজ ৩০০ হেন্না হাংদোকখ্রবনি। হরিয়ানাগী ওইনসু, জিলা খুদিংদা মেদিকেল কোলেজ অমা লৈহনবগী থবক কন্না চত্থরিবনি।
প্রধান মন্ত্রীনা মমাংগী অমসুং হৌজিক্কী সরকারগী ফত্তবা অমসুং অফবা লৈঙাক্কী মতাংদা মহাক্না চাংদম্নখি অমসুং হরিয়ানাদা হৌখিবা চহি ১০দগী দবল ইঞ্জিন সরকারনা পান্দুনা লাক্লি হায়বা ৱাফমসু ফোংদোকখি। লাইরবশিংগী য়াইফ য়ুম্বালগীদমক্তা কেন্দ্র সরকারনা শেম্বা পোলিসী ইন্দুনা চৎপগী হীরমদা হরিয়ানানা খ্বাইদগী মকোক থোংনা চৎলি হায়না মহাক্না পাউদমখি। হরিয়ানানা লৌউ-শিংউগী সেক্তরদা শাহৌ লৌরিবা অমসুং রাজ্যসিগী ইন্দস্ত্রীনা পাকথোক চাউথোক্লিবা অসিগী মতাংদা মহাক্না পনবদা য়াওখি। রেল, রোদ নত্ত্রগা মেত্রো সর্ভিস ওইরো, খা হরিয়ানাদা মমাংগী দিকেদ কয়াদা লৈরমদবা হীরম কয়াদা হৌজিক চাউখৎ থৌরাংগী খোঙজেল লাক্লিবা অসিগী মতাংদসু মহাক্না পনখি। দিল্লী মুম্বাই এক্সপ্রেসৱেগী দিল্লী-দৌসা-লালসোত সেক্সনগী অহানবা ফেজ অসি হান্ননা শঙ্গাখ্রে, মসিনা ভারতকী খ্বাইদগী শাংবা এক্সপ্রেসৱে ওইরিবা, অমসুং হরিয়ানাগী গুরুগ্রাম, পলৱল অমসুং নুহ জিলা ফাওদুনা চৎলিবা অসিগী মতাংদসু মহাক্না পনখি।
ইং ২০১৪গী মমাংদা হরিয়ানাগী রেলৱেগী বজেৎনা চাউরাক্না লুপা করোর ৩০০ ওইরম্মি, অদুবু, হৌখিবা চহি তরাগী মনুংদা বজেৎ অসি লুপা করোর ৩০,০০০ য়ৌনবা হেনগৎখ্রে হায়না প্রধান মন্ত্রী মোদীনা পাউদমখি। রোহতক-মেহাম-হান্সীগী অনৌবা রেল লাইন অমসুং অম্বালা কেন্ত-দাপ্পরগুম্বা লাইনগী দব্লিং তৌবগী মতাংদা মহাক্না পল্লদুনা, মসিনা ইজ ওফ লিবিং অমসুং ইজ ওফ দুইং বিজনেস অনিমক ফগৎহনবগা লোয়ননা মীয়ামদসু কান্নবা য়াম্না পীগনি হায়না মহাক্না হায়খি।
নহাশিংদা থবক্কী অহেনবা খুদোংচাবা কয়া পীরিবা মলতিনেস্নেল কম্পেনী চা কয়াগী হৌজিক লৈফম ওইরিবা রাজ্য অসিগী ঈশিংগা মরী লৈনবা শিংনবা কয়াগী ৱারোইশিন পুরকপগীদমক্তা রাজ্য সরকারগী থবক থৌরমশিংবু প্রধান মন্ত্রীনা থাগৎখি।
পি.এম. মোদীনা হরিয়ানানা তেক্সতাইল অমসুং এপ্পারেলগী হীরমদা মশাগী চাউরবা মমিং অমা থম্বা ঙম্লে অমসুং রাজ্যসিনা ভারতকী ওইনা কার্পেতকী চাদা ৩৫ হেন্না এক্সপোর্ত তৌরি অমসুং গার্মেন্তকী ওইনা চাদা ২০ মেন্যুফেকচরসু তৌরি হায়খি। হরিয়ানাগী তেক্সতাইল ইন্দস্ত্রীবু চাউখৎহল্লিবা স্মোল স্কেল ইন্দস্ত্রী কয়াগী মতাংদা পল্লদুনা, প্রধান মন্ত্রীনা পানিপৎ অসিদি হেন্দলুম পোত্থোক্কীদমক্তা, ফরিদাবাদনা তেক্সতাইল প্রদক্সনগীদমক্তা, গুরুগ্রাম্না রেদীমেদ গার্মেতকীদমক্তা, সোনিপৎনা তেক্নিকেল তেক্সতাইলগীদমক্তা অমসুং ভিৱানীনা নন- ৱুভন তেক্সতাইলগীদমক্তা মমিং চৎলি হায়না ফোংদোকখি। হৌখিবা চহি ১০দা কেন্দ্র সরকারনা MSME অমসুং স্মোল স্কেল ইন্দস্ত্রীশিংদা লুপা করোর লাক্ষ কয়াগী শেলগী তেংবাং পীখিবগী মতাংদা প্রধান মন্ত্রীনা পনখি, মসিনা অরিবা স্মোল স্কেল ইন্দস্ত্রী অমসুং কোত্তেজ ইন্দস্ত্রীশিংদা মপাঙ্গল হাপখিবগা লোয়ননা রাজ্যসিদা অনৌবা ইন্দস্ত্রী লিশিং কয়া অমা লিংখৎপা ঙমহনখি হায়না মহাক্না মখা তাখি।
রেৱারীগী বিশ্বকর্মশিংগী ব্রাসকী থবক হৈবা অমসুং হেন্দিক্রাফতা হৈথোই শিংথোইবগী মতাংদা পল্লদুনা, প্রধান মন্ত্রীনা শিনফম ১৮গা মরী লৈনবা মখোয়গুম্বা আর্তিসানশিংগী ওইনা পি.এম.-বিশ্বকর্মা য়োজনা হৌদোকখিবগী ৱাফম পনখি। লৈবাক্কী বেনেফিশরী লাক্ষ কয়ানা য়োজনা অসিগী শরুক ওইরি অমসুং ঐখোয়গী নাৎকী আর্তিসান অমসুং মখোয়গী ইমুংশিংগী পুন্সিদা অহোংবা পুরক্নবগীদমক্তা সরকারনা লুপা করোর ১৩,০০০ চাদিং তৌরি হায়না মহাক্না পাউদমখি।
“মোদীগী গেরেন্তী অসিদি বেঙ্কতা গেরেন্তী পীবা ঙমদবা মীওইশিংগীদমক্তনি”, প্রধান মন্ত্রীনা হায়খি অমসুং অপীকপা লৌমীশিংদা পি.এম. কিসান সম্মান নিধী পীবা, লাইরবা, দলিত, শোত্থরবা অমসুং ও.বি.সি. খুন্নাইশিংদা কোলেতরেল য়াওদবা লোন পীবগী মুদ্র য়োজনা অমসুং স্ত্রীত ভেন্দরশিংগী পি.এম. স্বনিধী য়োজনা পীবগী থৌওংশিং পনখি।
রাজ্যসিগী নুপীশিংগী য়াইফ য়ুম্বালগী মতাংদা পল্লদুনা, প্রধান মন্ত্রীনা হরিয়ানাগী নুপী লাক্ষ কয়া য়াওরিবা সেল্ফ হেল্প গ্রুপশিং য়াওনা লৈবাক পুম্বগী নুপী করোর ১০বু অমত্তা ওইনা পুরকপগা লোয়ননা গ্যাস কন্নেক্সন লেম্না পীবা অমসুং য়ুম্থোং খুদিংদা তোতি পাইপকী খুত্থাংদা অশেংবা ঈশিং ফংহনবগী থবকশিং পনখি। হায়রিবা সেল্ফ হেল্প গ্রুপশিং অসিদা লুপা করোর কয়াগী শেনফমগী তেংবাং পীখিবগী মতাংদসু মহাক্না পনখি। হৌজিক ফাওবদা লৈবাক্কী নুপী করোর অমা হেনবনা লাক্ষপতি দিদি ওইনখ্রে অমসুং মখোয়গী মশিং অসিবু করোর ৩দা হেনগৎহন্নবা হন্দক্কী বজেৎকী থৌরাংশিংগী মতাংদসু প্রধান মন্ত্রীনা পাউদমখি। প্রধান মন্ত্রীনা নামো দ্রোন দিদি স্কিমগী মতাংদসু পনখি, মসিগী মখাদা নুপী কাঙলুপশিংবু লৌউবদা দ্রোন শিজিন্নবগী ত্রেনিং পীরি অমসুং মসিনা মখোয়গী চাগা তানবগী অহেনবা পাম্বৈ অমসু ওইরি।
“হরিয়ানা অসিদি নীংথিরবা খুদোংচাবা কয়াগী রাজ্যনি”, প্রধান মন্ত্রীনা হরিয়ানাগী খ্বাইদগী অহানবা ওইনা ভোত থাদগদৌরিবা মীওইশিংগী তুংগী য়াইফরবা মতম লৈরগনি হায়বদা মিৎয়েং চঙলদুনা পাউদমখি। দবল ইঞ্জিন সরকার অসিনা হরিয়ানাবু চাউখৎপা রাজ্য অমা ওইহন্নবা অমসুং তেক্নোলোজী, তেক্সতাইল, তুরিজম নত্ত্রগা ত্রেদ ওইরো, সেক্তর খুদিংদা থবক্কী অহেনবা খুদোংচাবা লৈহন্নবা কন্না হোৎনরি হায়না মহাক্না মীয়ামগী পুক্নিং চীংশিনখি। “হরিয়ানানা ইনভেস্তমেন্ত তৌবগী অফবা রাজ্য ওইরক্লি অমসুং ইনভেস্তমেন্ত হেনগৎপা হায়বনা থবক্কী অনৌবা খুদোংচাবা কয়া লাকহনবনি”, প্রধান মন্ত্রীনা মহাক্কী ৱারোল লোইশিনবা ওইনা ফোংদোকখি।
হরিয়ানাগী রাজ্যপাল, বন্দারু দত্তাত্রেয়া, মুখ্য মন্ত্রী, শ্রী মনোহর লাল খত্তরসু ঙসিগী থৌরমসিদা হরিয়ানা সরকারগী মন্ত্রী অসুং এম.এল.এ.শিং অমদি অতোপ্পা মীথুংলেনশিংগা লোয়ননা শরুক য়াখি।
বেকগ্রাউন্দ
প্রধান মন্ত্রীনা লুপা করোর ৫৪৫০ রোম চঙনা পায়খৎকদবা গুরুগ্রাম মেত্রো রেল প্রোজেক উরেপ-উয়ুং তমখ্রে। কিমি ২৮.৫ শাংবা প্রোজেক অসিনা মিল্লেনিয়ম সিতি সেন্তরদগী উদোগ বিহার ফেজ-৫ ফাওবা শম্নগনি অমসুং সাইবর সিতি ময়াদা মাউলসারি এভেনিউ স্তেসন্দা হৌজিক লৈরিবা রেপিদ মেত্রো রেল গুরুগ্রামগী মেত্রো নেতৱার্কতা পুনশিনগনি। মসিনা দ্বারকা এক্সপ্রেসৱেদা স্পুর অমশু লৈগনি। মীয়ামদা মালেম থাক্কী মহৌশাগী অকোয়বগী ফিবম শোকহন্দবা মাস রেপিদ অর্বান ত্রান্সপোর্ত সিস্তেমশিং লৈহন্নবা প্রধান মন্ত্রীগী মঙলান থবক ওইনা পাংথোক্নবা মাইকৈদা থাংজিনবা মরুওইবা খোঙথাং অমনি।
লৈবাক শীনবা থুংনা মীয়ামগী হকশেলগী মচাকশিং ফগৎহন্নবা প্রধান মন্ত্রীগী পান্দমগী শরুক অমা ওইনা, হরিয়ানাগী রেৱারিদা এ.আই.আই.এম.এস শানবা উরেপ-উয়ুং তমখ্রে। এ.আই.আই.এম.এস রেৱারি অসি রেৱারিগী মাজ্রা মুস্তিল ভালখি খুঙ্গংদা লম একর ২০৩দা শেমগৎকদবনি। মসিদা ফমুং ৭২০গী হোস্পিতাল কমপ্লেক্স, সিত ১০০গী মেদিকেল কলেজ, সিত ৬০গী নর্সিং কলেজ, ফমুং ৩০গী অয়ুস ব্লোক, ওজা অমসুং স্তাফকী ক্বাতর, য়ু.জি অমসুং পি.জি মহৈরোয়শিংগী হোস্তেল, অহিং য়ারেকফম, গেস্ত হাওস অমসুং ওদিতোরিয়ম অসিনচিংবা য়াওরি। প্রধান মন্ত্রী শ্বাস্থ্যা সুরক্ষা য়োজনা(পি এম এস এস ৱাই)গী মখাদা লিংখৎপা এ.আই.আই.এম.এস রেৱারিনা হরিয়ানাগী মীয়ামদা মগুন লৈবা অনা-লায়য়েংগী খুদোংচাবশিং ফংহনগনি। খুদোংচাবশিংগী মনুংদা কার্দিওলোজি, গাস্ত্রো-ইন্তেরোলোজি, নেফ্রোলোজি, উরোলোজি, নিউরোলোজি, নিউরোসর্জরি, মেদিকেল ওনকোলোজি, সর্জিকেল ওনকোলোজি, ইন্দোক্রাইনোলোজি, বর্ন অমসুং প্লাস্তিক সর্জরি য়াওনা স্পিলিএলিস্ত ১৭ অমসুং সুপরস্পিসিএলিস্ত ১৭ য়াওরি। ইন্সতিতুৎ অসিদা ইন্তেন্সিপ কিয়ার য়ুনিত, ইমর্জেন্সি অমসুং ত্রোমা য়ুনিত, মোদুলার ওপরেসন থিয়েতর ১৬, দাইগ্নোস্তিক লেবোরেতোরিশিং, ব্লদ বেঙ্ক, ফার্মসিগী খুদোংচাবশিংশু লৈগনি। হরিয়ানাদা এ.আই.আই.এম.এস লিংখৎপা অসিনা হরিয়ানাগী মীয়ামদা অপুনা, মগুন লৈবা অমসুং অৱাংবা থাক্কী অনা-লায়য়েংগী খুদোংচাবশিং ফংহনগনি।
প্রধান মন্ত্রীনা কুরুক্ষেত্রা, জয়তিসরদা নৌবা শাবা ‘অনুভাব কেন্দ্র’ অমা শঙ্গাখ্রে। মিউজম অসি লুপা করোর ২৪০ রোম চঙনা লিংখৎপনি। মিউজম অসি লম একর ১৭ পাক-চাউই অমসুং মনুংদা ইসক্বার ফিত ১০০০,০০০ হেন্না পাক-চাউই। মসিদা মহাভারত অমসুং পুন্সিদা গীতাগী পাউতাকশিং ময়েক শেংনবা উবা ফংগনি। মিউজম অসিদা ওগমেন্তেদ রিএলিতি(এ আর), ৩-দি লেজর অমসুং প্রোজেক্সন মেপ্পিং য়াওনা অৱাংবা থাক্কী অনৌবা তেক্নোলোজি শীজিন্নদুনা য়েংবা লাকপা মীওইশিং নুংঙাইহনগনি। কুরুক্ষেত্রা, জয়তিসর অসি ভাগবান কৃষ্ণনা অর্জুন্দা লোম্বা নাইদ্রবা ভাগবদ গীতাগী লৌশিং তাকপীখিবা শেংলবা মফমনি।
প্রধান মন্ত্রীনা তোঙান-তোঙানবা রেলৱে প্রোজেকশিং উরেপ-উয়ুং তমখ্রে অমসুং মীয়ামদা কত্থোকখ্রে। উরেপ-উয়ুং তমখ্রবা প্রোজেকশিংগী মনুংদা রেৱারি-কাথুৱাস রেল লাইন(কিমি ২৭.৭৩) দবল ওনখৎপা; কাথুৱাস-নারনাউল রেল লাইন(কিমি ২৪.১২) দবল ওনখৎপা; ভিৱানি-দোভ ভালি রেল লাইন(কিমি ৪২.৩০) দবল ওনখৎপা অমসুং মনহেরু-বৱানি খেরা রেল লাইন(কিমি৩১.৫০) দবল ওনখৎপা য়াওরি। রেলৱে লাইনশিং অসি দবল ওইহনবা অসিনা লমদম অসিদা রেল ইনফ্রাস্ত্রকচর ফগৎহনগনি অমসুং মী পুবা অমসুং পোৎ-চৈ পুবা রেল অনিমক মতম চানা চেনবদা মতেং পাংগনি। প্রধান মন্ত্রীনা লৈবাক মীয়ামদা রোহতাক-মেহাম-হান্সি রেল লাইন(কিমি ৬৮) কৎথোক্কনি, মসিনা রোহতাক অমসুং হিসারগী মরক্তা চৎপগী মতম হন্থহনগনি। মহাক্না রোহতাক-মেহাম-হান্সি সেক্সন্দা ত্রেন অমশু লমথাগনি, মসিনা রোহতাক অমসুং হিসার লমদমদা রেল পেসেঞ্জরশিং কান্নবা পীগনি।
विकसित भारत बनाने के लिए हरियाणा का विकसित होना बहुत ज़रूरी है: PM @narendramodi pic.twitter.com/06onISw92h
— PMO India (@PMOIndia) February 16, 2024
आज पूरा विश्व भारत में निवेश के लिए उत्सुक है।
— PMO India (@PMOIndia) February 16, 2024
और निवेश के लिए हरियाणा एक उत्तम राज्य बनकर उभर रहा है: PM @narendramodi pic.twitter.com/U6nrCMt2gx
