প্রধান মন্ত্রী শ্রী নরেন্দ্র মোদীনা ঙসি অসামগী গুৱাহাতিদা এদভান্তেজ অসাম 2.0 ইনভেস্তমেন্ত এন্দ ইনফ্রাস্ত্রকচর সম্মিৎ 2025 হৌদোকখ্রে। থৌরম অদুদা মকোক থোংবা মীওই পুম্নমকপু তরাম্না ওক্লদুনা শ্রী মোদীনা হায়খি, "ইস্ত ইন্দিয়া অমসুং নোর্থ ইস্ত ইন্দিয়া ঙসি তুংলমচৎকী অনৌবা খোঙচৎ অমা হৌরে অমসুং এদভান্তেজ অসাম অসি অসামগী থোইদোক হেন্দোকপা পোতেন্সিএল অমসুং মালেমগা লোয়ননা খুমাং চাউশিনহন্নবা মেগা ইনিসিয়েতিব অমনি।" ভারতকী চাউখৎ-থৌরাংদা নোংপোক থংবা ভারতনা লৌখিবা মরুওইবা থৌদাং অদুগী পুৱারীনা খুদম ওইরি হায়না মহাক্না মখা তাখি। প্রধান মন্ত্রীনা হায়খি, "ঙসি ঐখোয়না ভিক্সিৎ ভারতকী মায়কৈদা খোঙজেল য়াংনা চংশিল্লি। নোংপোক থংবা ভারত অমসুং অৱাং-নোংপোক লমদমনা মখোয়গী অশেংবা পোতেন্সিএল অদু উৎলগনি।" এদভান্তেজ অসাম অসি চপ মান্নবা ৱাখল্লোন অদুগী শক্তম অমনি হায়না মহাক্না হায়খি অমসুং অসিগুম্বা চাউরবা থৌরম অমা পাংথোকপগীদমক অসামগী সরকার অমসুং মুখ্য মন্ত্রীবু থাগৎপা ফোংদোকখি। মহাক্না 2013গী মহাক্কী ৱাহৈশিং নিংশিংখি, মদুদা মহাক্না হায়খি মদুদি "এ ফোর অসাম" অসি চৎনবী অমা ওইরক্কদবা অদু কুইদ্রে।
“মালেমনা খুদোংচাদবশিং মায়োক্নরবসু, এক্সপর্তশিংনা অমত্তা ওইনা অচেৎপা ৱাফম অমদা য়ানরে: ভারতনা খোঙজেল য়াংনা খুমাং চাউশিল্লি”, হায়না প্রধান মন্ত্রীনা হায়খি। মহাক্না অকনবা ৱাফম থমখি মদুদি ঙসিগী ভারতনা চহিচা অসিগী লাক্কদৌরিবা চহি 25গীদমক তুং কোইগদবা মীৎয়েংগা লোয়ননা থবক তৌরি। ভারতকী নহা ওইরিবা মীশিং অদুদা মালেমনা চাউনা থাজবা থম্লি হায়না মহাক্না ফোংদোকখি। নহা ওইরিবা মীশিং অদু য়াম্না থুনা স্কিল লৈবা অমসুং ইন্নোভেতিব ওইরক্লি। মহাক্না ভারতকী নিও-মিদ্দল ক্লাসতা চাউখৎলক্লিবা থাজবা অদুসু পনখি। মখোয়না লাইরবদগী অনৌবা আশাগা লোয়ননা থোরক্লি। পোলিতিকেল স্তেবিলিতী অমসুং পোলিসী কন্তিন্যুতীদা মতেং পাংলিবা ভারতকী মীওই করোর 140দা মালেমনা থাজবা থম্লি হায়না পল্লদুনা শ্রী মোদীনা রিফোর্মশিং পাংথোক্নবা ভারতকী লৈঙাক্লোনগী মতাংদা পনখি। মসিগী মথক্তা, মহাক্না পনখি মদুদি ভারতনা মাগী লোকেল সপ্লাই চেনশিং মপাঙ্গল কনখৎহল্লি অমসুং মালেমগী তোঙান তোঙানবা মফমশিংগা লোয়ননা ফ্রী ত্রেদ এগ্রীমেন্তশিং তৌরি। মহাক্না নোংপোক এসিয়াগা লোয়ননা মপাঙ্গল কনবা কন্নেক্তিবিতী অমসুং অনৌবা খুদোংচাবশিং পুরক্লিবা ইন্দিয়া-মিদ্দল ইস্ত-য়ুরোপ ইকনোমিক কোরিদোরগী মতাংদসু পনখি।
অসামদা পাংথোকখিবা মীফম অদুদা উবা ফংখিবগুম্না ভারতকীদমক মালেমগী ওইনা থাজবা হেনগৎলক্লিবা অদু পল্লদুনা শ্রী মোদীনা হায়খি, "ভারতকী চাউখৎপদা অসামগী থৌদাং লেপ্তনা হেনগৎলক্লি।" এদভান্তেজ অসাম সম্মিৎকী অহানবা ইদিসন অসি 2018দা পাংথোকখি। মতম অদুদা অসামগী শেন্মিৎলোন অসি লুপা করোর লাখ 2.75 ওইখি। ঙসিদি, অসাম অসি চাউরাক্না লুপা করোর লাখ 6গী ইকনোমী লৈবা রাজ্য অমা ওইখ্রে হায়না মহাক্না ফোংদোকখি। মখোয়গী সরকারগী মখাদা, অসামগী ইকনোমী অসি চহি তরুক্কী মনুংদা শরুক অনি হেনগৎলে হায়না মহাক্না অকনবা ৱাফম থমখি। মসিগী মথক্তা, মহাক্না হায়খি মদুদি মসি কেন্দ্র অমসুং রাজ্যগী মখোয়গী সরকারশিংগী দবল ইফেক্তনি। অসামদা লৈরিবা ইনভেস্তমেন্ত কয়ানা অসামবু লোইনাইদ্রবা ওইথোকপা য়াবা রাজ্য অমা ওইহল্লে হায়না মহাক্না ফোংদোকখি। প্রধান মন্ত্রীনা হায়খি মদুদি অসাম সরকারনা এজুকেসন, স্কিল দিবেলপমেন্ত অমসুং হেন্না ফবা ইনভেস্তমেন্ত এনভাইর্নমেন্ত অমা শেমগৎপদা মীৎয়েং থম্লি। মহাক্কী সরকারনা হৌখিবা চহিশিংদা কন্নেক্তিবিতীগা মরী লৈনবা ইনফ্রাস্ত্রকচরদা পাক-শন্না থবক পায়খৎলে হায়না মহাক্না পনখি। মহাক্না খুদম অমা পীরদুনা হায়খি মদুদি 2014গী মমাংদা ব্রহ্মপুত্রা তুরেলগী মথক্তা চহি 70দা শাখিবা থোং অহুমখক্তমক লৈরম্মি। অদুম ওইনমক, হৌখিবা চহি 10 অসিদা, অনৌবা থোং মরি শাখ্রে। মসিগী থোংশিং অসিগী মনুংদা অমা ভারত রত্ন ভুপেন হাজারিকাগী মিংদা মিংথোনখি। শ্রী মোদীনা হায়খি মদুদি 2009 অমসুং 2014গী মরক্তা, অসামদা রেলৱেজকীদমক লুপা 2,100গী বজেৎ ফংখি অদুবু মখোয়গী সরকারনা অসামগী রেলৱেজকী বজেৎ অসি শরুক মরি হেনগৎতুনা লুপা করোর 10,000দা হেনগৎহনখি। অসামদা রেলৱে স্তেসন 60 হেন্না মোদর্নাইজ তৌরি হায়না মহাক্না মখা তাখি। অৱাং নোংপোক্কী অহানবা সেমি হাই স্পীদ ত্রেন হৌজিক গুৱাহাতি অমসুং ন্যু জলপাইগুরিগী মরক্তা মথৌ তৌরি হায়নসু মহাক্না পনখি।
অসামদা এয়র কন্নেক্তিবিতী য়াম্না থুনা পাকথোক চাউথোকহনবগী মতাংদা পল্লদুনা প্রধান মন্ত্রীনা হায়খি মদুদি 2014 ফাওবদা, ফ্লাইতশিং অসি রুত তরেৎখক্তদা মথৌ তৌরম্মি, অদুবু হৌজিক্তি রুত 30 রোমদা ফ্লাইতশিং মথৌ তৌরি। মসিগী পাকথোক চাউথোকপা অসিনা লোকেল ইকনোমীদা চাউনা ইনোৎ পীরি অমসুং নহারোলশিংদা থবক ফংহন্নবগী খুদোংচাবা কয়া পীরি হায়না মহাক্না হায়খি। শ্রী মোদীনা অকনবা ৱাফম থমখি মদুদি অহোংবা অসি ইনফ্রাস্ত্রকচর খক্তদা অকক্নবা ওইদে, অদুবু হৌখিবা চহি তরা অসিদা শান্তিগী য়ানচে কয়া অমা খুৎয়েক পীনখিবা অমসুং মতম শাংনা লৈরম্বা ঙমখৈগী ৱাফমশিং লোইশিনখিবা অসিনা আইন অমসুং কাঙলোনগী মতাংদা মমাংদা অমুক্তা ওইখিদ্রিবা মওংদা ফগৎলকপা উবা ফংলে। অসামগী মফম খুদিংমক্তা, নাগরিক খুদিংমক্তা অমসুং নহারোল খুদিংমক্না রাজ্য অসিগী চাউখৎ-থৌরাংগীদমক চোকথবা লৈতনা থবক তৌরি হায়না মহাক্না ফোংদোকখি।
“ভারতনা শেন্মিৎলোনগী সেক্তর খুদিংমক্তা অমসুং থাক খুদিংমক্তা মশক থোকপা রিফোর্মশিং পায়খৎলি অমসুং ইজ ওফ দুইং বিজিনেস হেনগৎহন্নবা লেপ্পা লৈতনা হোৎনরি অমসুং ইন্দস্ত্রী অমসুং ইন্নোভেসন কলচর প্রমোৎ তৌনবা মপুং ওইবা ইকোসিস্তেম অমা শেম্লে”, হায়না শ্রী মোদীনা ফোংদোকখি। মহাক্না হায়খি মদুদি স্তার্ত-অপশিংগীদমক্তা অফবা পোলিসীশিং শেম্লে, PLI স্কিমশিংগী খুত্থাংদা মেন্যুফেকচরিং অমসুং অনৌবা মেন্যুফেকচরিং কম্পনীশিং অমসুং MSMEশিংগীদমক্তা তেক্স কোকপীরে। লৈবাক অসিগী ইনফ্রাস্ত্রকচরদা সরকারনা চাউনা শেন থাদবগী ৱাফমসু মহাক্না পনখি। ইন্সতিত্যুস্নেল রিফোর্ম, ইন্দস্ত্রী, ইনফ্রাস্ত্রকচর অমসুং ইন্নোভেসনগী অপুনবা অসিনা ভারতকী চাউখৎপগী য়ুম্ফম ওইরি হায়না প্রধান মন্ত্রীনা ফোংদোকখি। মহাক্না হায়খি মদুদি অসামদসু মসিগী খুমাং চাউশিল্লকপা অসি উবা ফংলি। অসাম অসি দবল ইঞ্জিনগী খোঙজেল য়াংনা খুমাং চাউশিল্লি। অসামনা 2030 ফাওবদা দোল্লর বিলিয়ন 150গী ইকনোমী অমা ওইহন্নবা পান্দম থম্লে হায়না মহাক্না পনখি। অসামগী হৈথোই-শিংথোইরবা মীওইশিং অমসুং মখোয়গী সরকারগী থৌনা অসিনা মরম ওইরগা অসামনা পান্দম অসি ফংবা ঙমগনি হায়না মহাক্না থাজবা থমখি। অসাম অসি খা-নোংপোক এসিয়া অমসুং ভারতকী মরক্তা থোং অমা ওইনা থোরক্লি হায়না পল্লদুনা শ্রী মোদীনা হায়খি, মসিগী ওইথোকপা য়াবা অসি মখা তানা হেনগৎহন্নবা, সরকারনা অৱাং-নোংপোক্কী ত্রান্সফোর্মেতিব ইন্দস্ত্রিএলাইজেসন স্কিম, 'উন্নতী' হৌদোক্লে। 'উন্নতী' স্কিম অসিনা অসাম য়াওনা অৱাং নোংপোক লমদম পুম্বদা ইন্দস্ত্রী, ইনভেস্তমেন্ত অমসুং তুরিজম খুমাং চাউশিলহল্লগনি হায়না মহাক্না ফোংদোকখি। মহাক্না ইন্দস্ত্রীগী পার্তনরশিংদা স্কিম অসিগী মপুং ফানা কান্নবা লৌনবা অমসুং অসামগী অপুনবা পোতেন্সিএল অদু শীজিন্ননবা হায়খি। প্রধান মন্ত্রীনা হায়খি মদুদি অসামগী মহৌশাগী ওইবা রিসোর্সশিং অমসুং স্ত্রেতেজিক ওইবা মফম অসিনা ইনভেস্তমেন্তকীদমক পাম্নবা মফম অমা ওইহল্লি। অসামগী চা অসি অসামগী পোতেন্সিএলগী খুদম অমনি হায়না পল্লদুনা মহাক্না হায়খি মদুদি মসিনা হৌখিবা চহি 200দা গ্লোবেল ব্রান্দ অমা ওইরক্লি, মসিনা অতোপ্পা সেক্তরশিংদা চাউখৎপগী ইথিল পীরি।
মালেমগী শেন্মিৎলোনদা চাউনা অহোংবা লাক্লিবা অসিগী মতাংদা পল্লদুনা, মালেমগী ওইনা মপাঙ্গল কনবা সপ্লাই চেনগী দিমান্দ হেনগৎলক্লিবা অসিদা প্রধান মন্ত্রীনা হায়খি, "ভারতনা মেনুফেকচরিং সেক্তরদা খুমাং চাউশিলহন্নবা মিসন মোদতা থবকশিং পায়খৎলি।" মেক ইন ইন্দিয়া ইনিসিএতিবকী মখাদা ফার্মাস্যুতিকেল্স, ইলেক্ত্রোনিক্স অমসুং ওতোমোবাইলগুম্বা সেক্তরশিংদা মমল হোংবা মেনুফেকচরিং প্রমোৎ তৌবদা মীৎয়েং থম্লি হায়না মহাক্না অকনবা ৱাফম থমখি। মহাক্না হায়খি মদুদি ভারতকী ইন্দস্ত্রীনা দোমেস্তিক দিমান্দশিং মপুং ফাহনবতা নত্তনা মালেমগী কৈথেলশিংদা মেন্যুফেকচরিং এক্সেলেন্সকী অনৌবা বেঞ্চমার্কশিংসু শেমগৎলি। অসামনা হায়রিবা মেনুফেকচরিং রিভোলুসন অসিদা মরু ওইবা থৌদাং অমা লৌরি হায়না মহাক্না পনখি।
অসামনা মতম পুম্নমক্তা মালেমগী ললোন-ইতিক্তা শরুক য়াদুনা লাক্লি হায়না পল্লদুনা শ্রী মোদীনা হায়খি মদুদি ঙসিদি, ভারতকী লমদা লৈবা নেচরেল গ্যাস পুথোকপগী 50%দি অসামদগী লাক্লি অমসুং হৌখিবা চহিশিংদা অসামগী রিফাইনরীশিংগী কেপাসিতীদা মশক থোক্না হেনগৎলক্লি। ইলেক্ত্রোনিক্স, সেমিকন্দক্তরশিং অমসুং গ্রীন ইনর্জীগুম্বা সেক্তরশিংদা অসামনা খোঙজেল য়াংনা খুমাং চাউশিল্লি হায়নসু মহাক্না ফোংদোকখি। সরকারগী পোলিসীশিংগী মতুং ইন্না অসাম অসি হাই-তেক ইন্দস্ত্রীশিং অমসুং স্তার্ত-অপশিংগী হব অমা ওইরক্লি হায়না মহাক্না অকনবা ৱাফম থমখি।
হৌখিবা বজেৎতা কেন্দ্র সরকারনা নমরুপ-4 প্লান্তকীদমক অয়াবা পীখ্রে হায়না পল্লদুনা প্রধান মন্ত্রীনা হায়খি মদুদি য়ুরিয়া পুথোকপা প্লান্ত অসিনা তুংলমচৎতা অৱাং-নোংপোক অমসুং লৈবাক অসিগী দিমান্দ মপুং ফাহল্লগনি। মহাক্না হায়খি, "অসামনা নোংপোক থংবা ভারতকী মরুওইবা মেনুফেকচরিং হব অমা ওইরক্কদবা নুমিৎ অদু কুইদ্রে" পান্দম অসি ফংনবা কেন্দ্র সরকারনা অসামগী রাজ্য সরকারদা মপুং ফানা মতেং পাংলি হায়না মহাক্না অকনবা ৱাফম থমখি।
21শুবা চহিচাগী মালেমগী চাউখৎপা অসি দিজিতেল রিভোলুসন, ইন্নোভেসন অমসুং তেক্নোলোজিগী খুমাং চাউশিল্লকপদা য়ুম্ফম ওই হায়না পল্লদুনা, শ্রী মোদীনা হায়খি, "ঐখোয়না হেন্না নীংথিনা শেম-শারিবা, মালেমগী ওইনা ঐখোয়না হেন্না মপাঙ্গল কনখৎলগনি।" সরকারনা 21শুবা চহিচাগী পোলিসী অমসুং স্ত্রেতেজীগা লোয়ননা মাংলোমদা চংশিল্লি হায়না মহাক্না মখা তাখি। মহাক্না হৌখিবা চহি তরা অসিদা ইলেক্ত্রোনিক্স অমসুং মোবাইল মেন্যুফেকচরিংদা ভারতনা চাউনা খুমাং চাউশিল্লকপগী মতাংদা পনখি অমসুং সেমিকন্দক্তর মেন্যুফেকচরিংদা মায় পাকপগী ৱারী অসিবু অমুক হন্না পাংথোক্নবা অপাম্বা ফোংদোকখি। অসাম অসি ভারত্তা সেমিকন্দক্তর মেনুফেকচরিংগী মরুওইবা মফম অমা ওইনা চাউখৎলক্লি হায়না প্রধান মন্ত্রীনা চাউথোক্না ফোংদোকখি। অৱাং নোংপোক্কী তেক্নোলোজীগী চাউখৎপা হেনগৎহনগদবা অসামগী জাগিরোদতা তাতা সেমিকন্দক্তর এসেমব্লী এন্দ তেস্ত ফেসিলিতী হৌদোকখিবা অদুসু মহাক্না পনখি। সেমিকন্দক্তর সেক্তরদা ইন্নোভেসনগীদমক IITগা পুন্না থবক তৌমিন্নবগী অমসুং লৈবাক অসিদা সেমিকন্দক্তর রিসর্চ সেন্তর অমা শেমগৎনবা হৌজিক পায়খৎলিবা থবকশিং মহাক্না পনখি। প্রধান মন্ত্রীনা পান্দম থমখি মদুদি চহি তরাগী লোইশিল্লকপদা ইলেক্ত্রোনিক সেক্তরগী ভেল্যু অসি দোল্লর বিল্লিয়ন 500 য়ৌগনি। মহাক্না থাজবগা লোয়ননা হায়খি, "ভারতকী খোঙজেল অমসুং পাক চাউবগা লোয়ননা লৈবাক অসিনা সেমিকন্দক্তর পুথোকপদা অচৌবা শক্তি অমা ওইনা থোরক্কনি, মীওই মিলিয়ন কয়াদা থবক ফংহল্লগনি অমসুং অসামগী শেন্মিৎলোনদা কান্নবা ফংহল্লগনি।”
প্রধান মন্ত্রীনা হায়খি, "ভারতনা হৌখিবা চহি তরা অসিদা মাগী অকোয়বগী ফিভমগী থৌদাংবু খঙনা পোলিসীগী ৱারেপ লৌরি অমসুং মালেমনা ভারতকী রিন্যুএবল ইনর্জী মিসনবু মোদেল প্রাক্তিস অমা ওইনা লৌরি।" মহাক্না হায়খি মদুদি ভারতনা হৌখিবা চহি 10দা সোলর, ৱিন্দ অমসুং সস্তেনেবল ইনর্জী রিসোর্সশিংদা চাউনা ইনভেস্তমেন্ত তৌখ্রে। মসিনা ইকোলোজিকেল কম্মিতমেন্তশিং মপুং ফাহনবতা নত্তনা লৈবাক অসিগী রিন্যুএবল ইনর্জী পুথোকপগী কেপাসিতী অসি শরুক কয়া হেনগৎহনখ্রে হায়না মহাক্না মখা তাখি। শ্রী মোদীনা হায়খি মদুদি লৈবাক অসিনা 2030 ফাওবদা রিন্যুএবল ইনর্জী কেপাসিতী 500GW হাপ্নবা পান্দম থম্লি। মহাক্না হায়খি মদুদি সরকারনা 2030 ফাওবদা চহিগী গ্রীন হাইদ্রোজেন পুথোকপগী চাং মিলিয়ন মেত্রিক তন 5 য়ৌহন্নবা মিসন অমদা থবক তৌরি। লৈবাক অসিদা হেনগৎলক্লিবা গ্যাস ইনফ্রাস্ত্রকচর অসিনা দিমান্দ হেনগৎহল্লে অমসুং গ্যাসতা য়ুম্ফম ওইবা শেন্মিৎলোনগী সেক্তর পুম্নমক খোঙজেল য়াংনা চাউখৎলক্লি হায়না পল্লদুনা শ্রী মোদীনা হায়খি মদুদি অসামনা মাগী খোঙচৎ অসিদা য়াম্না কান্নবা ফংলি। সরকারনা PLI স্কিমশিং অমসুং গ্রীন ইনিসিএতিবশিংগীদমক পোলিসীশিং য়াওনা ইন্দস্ত্রীশিংগীদমক পাম্বৈ কয়া শেমখ্রে হায়না মহাক্না অকনবা ৱাফম থমখি। রিন্যুএবল ইনর্জী সেক্তরদা অসামনা লুচিংবা রাজ্য অমা ওইরকপা পাম্মি হায়না মহাক্না ফোংদোকখি অমসুং ইন্দস্ত্রীগী লুচিংবশিংবু অসামগী পোতেন্সিএল মেক্সিমাইজ তৌনবা হায়খি।
2047 ফাওবদা ভারতপু চাউখৎলবা লৈবাক অমা ওইহনবদা নোংপোক থংবা ভারতনা মরু ওইবা থৌদাং লৌগনি হায়না পল্লদুনা শ্রী মোদীনা হায়খি, "ঙসি অৱাং-নোংপোক অমসুং নোংপোক থংবা ভারতনা ইনফ্রাস্ত্রকচর, লোজিস্তিক্স, লৌউ-শিংউ, তুরিজম অমসুং ইন্দস্ত্রীদা খোঙজেল য়াংনা খুমাং চাউশিল্লি।" মহাক্না থাজবা ফোংদোকখি মদুদি মালেম অসিনা লমদম অসিনা ভারতকী চাউখৎ থৌরাংগী খোঙচৎতা মাংজিল থানা চংশিনগনি। অসামগী খোঙচৎ অসিদা শরুক য়ামিন্ননবা মহাক্না মীপুম খুদিংমক্তা হায়খি। অসাম অসি মালেমগী খা থংবা শরুকশিংদা ভারতকী তৌবা ঙম্বশিংবু অনৌবা থাক্তা পুখৎপা রাজ্য অমা ওইহন্নবা পুন্না হোৎনমিন্ননবা মহাক্না হায়খি। প্রধান মন্ত্রীনা ইনভেস্তরশিং অমসুং ইন্দস্ত্রীগী লুচিংবশিংগী থাজবা হেনগৎহনখি। মহাক্না হায়খি মদুদি মহাক্না ভিক্সিৎ ভারতকী খোঙচৎ অসিদা মখোয়না শরুক তম্বা অদুদা মপুং ফানা মতেং পীনবা লেপ্পী।
অসামগী রাজ্যপাল শ্রী লক্ষ্মন প্রসাদ আচার্য়, অসামগী মুখ্য মন্ত্রী শ্রী হিমন্ত বিশ্ব শর্মা, কেন্দ্রগী মন্ত্রীশিং দা. এস জয়শঙ্কর, শ্রী সর্বানন্দ সোনোৱাল, শ্রী জ্যোতিরাদিত্য সিন্ধিয়া, ত্রিপুরাগী মুখ্য মন্ত্রী, দা. মনিক সাহা, কেন্দ্রগী রাজ্য মন্ত্রী, শ্রী পাবিত্রা মার্গেরিতা অমসুং অতোপ্পা শক্নাইরবশিংসু থৌরম অদুদা শরুক য়াখি।
বেকগ্রাউন্দ
এদভান্তেজ অসাম 2.0 ইনভেস্তমেন্ত এন্দ ইনফ্রাস্ত্রকচর সম্মিৎ 2025 গুৱাহাতিদা ফেব্রুৱারী 25দগী 26 ফাওবা পাংথোক্লগনি। মসিদা হৌদোকপগী সেসন অমা, মিনিস্ত্রিএল সেসন তরেৎ অমসুং থিমেতিক সেসন 14 য়াওরি। মাগী ইন্দস্ত্রীএল ইভোলুসন, গ্লোবেল ত্রেদ পার্তনরশিপশিং, চাউখৎলক্লিবা ইন্দস্ত্রীশিং, অমসুং MSME সেক্তরদা মীৎয়েং থম্বগা লোয়ননা একজিবিতর 240 হেনবনা শরুক য়ারিবা রাজ্য অসিগী ইকনোমিক লেন্দস্কেপ উৎলিবা মপুং ফাবা একজিবিসন অমসু উৎকনি।
তোঙান তোঙানবা ইন্তর্নেস্নেল ওর্গনাইজেসনশিং, মালেমগী লুচিংবশিং অমসুং ইনভেস্তরশিং, পোলিসী মেকরশিং, ইন্দস্ত্রী এক্সপর্তশিং, স্তার্ত-অপশিং অমসুং মহৈরোইশিং য়াওনা অতৈ কয়ানা সম্মিৎ অসিদা শরুক য়াগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
Even in global uncertainty, one thing is certain - India's rapid growth. pic.twitter.com/pafoyECFUa
— PMO India (@PMOIndia) February 25, 2025
We have built a complete ecosystem to promote industry and an innovation-driven culture. pic.twitter.com/yV5yM2WpvK
— PMO India (@PMOIndia) February 25, 2025
India is driving its manufacturing sector in Mission Mode. pic.twitter.com/2e4X1ZRH3Z
— PMO India (@PMOIndia) February 25, 2025
The global progress depends on the digital revolution, innovation and tech-driven progress. pic.twitter.com/X2dnjZkSDs
— PMO India (@PMOIndia) February 25, 2025
Assam is becoming a crucial hub for semiconductor manufacturing in India. pic.twitter.com/5gkLE5ql1J
— PMO India (@PMOIndia) February 25, 2025
The world sees our Renewable Energy Mission as a model practice. pic.twitter.com/nV17gBJdHN
— PMO India (@PMOIndia) February 25, 2025
