প্রধান মন্ত্রী শ্রী নরেন্দ্র মোদীনা ঙসি কেরলাগী তিরুবনন্থপুরমদা লুপা করোর ৮,৮০০ গী ওইগদবা ভিজিঞ্জম ইন্তরনেস্নেল দীপৱাতর মল্তিপর্পজ সীপোর্ত লৈবাক্কী মফমদা কত্থোকখ্রে। তিল্লিবা মীয়ামগী মফমদা ভগবান অদি শঙ্করাচার্য়গী মপোক কুমওনগী য়াইফরবা পুংফমগী য়াইফ পাউজেল পীরদুনা, প্রধান মন্ত্রীনা চহি অহুমগী মমাঙদা, সেপ্তেম্বর থাদা, মহাক্না অদি শঙ্করাচার্য়গী পোক্নফম লমদমদা চৎচনবগী তাঞ্জা ফংখি হায়খি। মহাক্কী পার্লিয়ামেন্তরী কন্সতিতুএন্সী কাসিগী বিস্বানাথ ধাম কমপ্লেক্সতা অদি শঙ্করাচার্য়গী অচৌবা মীতম অমা খিনবদা মহাক্না নুংঙাইবা ফোঙদোকখি। খিল্লিবা মীতম অসিনা অদি শঙ্করাচার্য়গী মপান নাইদ্রবা ৱাখল লৌশিং অমদি তাকপি তম্বিরম্বশিংগী মফমদা কৎচবা শ্রদ্ধাঞ্জলিই অমা ওইনা লেপ্লি। উত্তরাখন্দগী শেংলবা কেদরনাথ ধামদা অদি শঙ্করাচার্য়গী শেংলবা মীতম অমা মায়খুম হাংদোকপগী খুদোংচাবসু মহাক্না ফংখি হায়না মহাক্না মখা তানা ফোঙদোকখি। কেদরনাথ লাইশঙগী থোঙ মহাকপু নীংজবশিংগী মফমদা হাংদোক্তুনা ঙসি অসি অখন্নবা নুমিৎ অমসু ওইরি হায়না প্রধান মন্ত্রীনা ফোঙদোকখি। প্রধান মন্ত্রী মোদীনা কেরলাদগী হৌরকপা অদি শঙ্করাচার্য়না লৈবাক্কী কাচিন কোয়া থুংনা মোনাস্তরীশিং লিংখত্তুনা লৈবাকপু মীৎকপ থোকহনখি হায়বা ৱাফম থমখি। মহাক্না হোৎনরম্বশিংনা অপুনবা লাইনিংগী মঙাল ফংবা ভারত অমগী য়ুম্ফম থোল্লমখি হায়না মহাক্না ফোঙদোকখি।
শ্রী মোদীনা ওইথোকপা য়াবা কয়ানা থল্লবা পাক চাউরবা সমুদ্রনা নাকল অমদা, অদুগা মহৌশা লাইরেম্বীগী পুক্নিং হুনা নীংথিরবা শক্লোন কয়ানা নাকল অমদা লৈদুনা ফজবগী মতিক হাপ্লি হায়খি। পুম্নমকসিগী মরক্তা, ভিজিঞ্জম দীপ-ৱাতর সী পোর্তনা মতমসিগী চাওখৎ থৌরাংগী খুদম অমা ওইনা লেপ্লি হায়খি। মহাক্না কেরলা অমদি লৈবাক পুম্বগী মীয়ামগী মফমদা অসিগুম্লবা মশক নাইরবা মায় পাকপা অসিগীদমক নুংঙাইবা ফোঙদোকখি।
ভিজিঞ্জম দীপ-ৱাতর সী পোর্ত অসি লুপা করোর ৮,৮০০০ চঙনা শেমগৎপনি হায়রদুনা, প্রধান মন্ত্রীনা ত্রান্সসিপমেন্ত হব অসিগী কেপাসিতী অসি লাক্কদৌরিবা চহিশিংদা শরুক অহুম হেনগত্তুনা মালেমগী খ্বায়দগী চাউবা কার্গো জহাজশিং অপনবা লৈতবা য়ৌরকপা য়ারগনি হায়খি। ভারতকী ত্রান্সসিপমেন্ত ওপরেসনগী ৭৫% দি মপান লৈবাক্কী হিথাংফমশিংদা তৌরমদুনা, লৈবাকসিগী ওইনা শেন্থোক য়াম্না মাঙলম্মি হায়খি। ফীভম অসি হৌজিক্তি হোংলক্লগনি হায়রদুনা, ভারতকী শেলনা হৌজিক্তী ভারত্তা শীজিন্নরগনি অমদি মতম অমদা লৈবাক্কী ৱাংমদা চৎলম্বা ফন্দশিংনা কেরলা অমদি ভিঝিঞ্জম মীয়ামগী অনৌবা শেন্মিৎলোনগী খুদোংচাবশিং শেম্লগনি হায়খি।
লোইলম লৈঙাক মমাঙদা, ভারতনা চহি চা কয়া নুংঙাই য়াইফনা পাল্লম্মি হায়রদুনা, মতম অমদা ভারতনা মালেমগী জি.দি.পি.গী চাউরবা শরুক অমা পায়রম্মি হায়না শ্রী মোদীনা ফোঙদোকখি। মতমদুদা ভারতপু অতোপ্পা লৈবাকশিংদগী তোঙান্না মশক নাইনা লৈহল্লম্লিবা অসি মাগী মেরিতাইম কেপাসতী অমদি হিথাংফম ময়োল্লমশিংদা লৈরম্বা শেন্মিৎলোনগী থবক থৌওংশিং অদুনি হায়খি। হায়রিবা মেরিতাইমগী মপাঙ্গল অমদি শেন্মিৎলোন চাউখৎপগী ফীভম অসিদা কেরলানা মশক থোকপা থৌদাং লৌরম্মি হায়রদুনা, মহাক্না মেরিতাইম ত্রেদতা কেরলানা পুৱারিদা লৌরম্বা থৌদাংশিং শিংথাখি, অমদি অরাবিয়ন সমুদ্রগী খুত্থাঙদা ভারতনা লৈবাক কয়াগা মরুওইবা লল্লোন ইতিক্কী মরীশিং শেম্লম্মি হায়খি। কেরলাদগ জহাজশিংনা লৈবাক কয়াদা পোৎ-চৈ পুথোক পুশিন তৌদুনা মফমসিদা মালেমগী লল্লোন ইতিক্কী মরুওইবা মফম অমা ওইহল্লি হায়খি। “ঙসি ভারত লৈঙাক্না হায়রিবা শেন্মিৎলোনগী মতিক্কী মরম অসিবু মখা তানা মপাঙ্গল কনখৎহন্নবা খোঙফম চেৎনা লেপ্লি,” হায়না মহাক্না মখা তাখি, অমদি “ভারতকী সমুদ্র খোঙবালগী স্তেতশিং অমসুং হিথাংফমগী ময়োল্লমশিংনা চাওখৎপা ভারত অমগী মরুওইবা মফম ওইরক্কনি,” হায়না ফোঙদোকখি।
“ইনফ্রাস্ত্রকচর অমদি ইজ ওফ দুইং বিজিনেস পুন্না য়োকখৎমিন্নরবা মতমদা হিথাংফমগী শেন্মিৎলোনগী মতিং মপুং ফানা ফুদোকহনবা ঙমগনি, হায়রদুনা, প্রধান মন্ত্রীনা মসিনা হৌখিবা চহি ১০ অসিদা ভারত লৈঙাক্না শেমগৎলকখিবা হিথাংফম অমদি ঈশিং লম্বীগী খুজিল থৌরাংগী ব্লুপ্রিন্ত অদুনি হায়খি। লৈঙাক অসিনা ইন্দস্ত্রীগী থবক থৌরমশিং অমদি স্তেতশিং মায়কৈ শুনা চাওখৎহন্নবগী হোৎনরিবশিং খোঙজেল য়াঙ্খৎহল্লে হায়খি। ভারত লৈঙাক্না স্তেত লৈঙাকশিংগা খুৎশম্নদুনা সাগরমালা প্রোজেক্তকী মখাদা হিথাংফমগী ইনফ্রাস্ত্রকচর ফগৎহল্লে অমদি হিথাংফমগী কন্নেক্তিবিতী মপাঙ্গল কনখৎহল্লে হায়না মহাক্না মখা তাখি। অপনবা লৈতবা কন্নেক্তিবিতী লৈহন্নবা পি.এম. গতিশক্তিগী মখাদা ঈশিং লম্বী, রেল লম্বী, হায়ৱে, অমদি নোংথক্কী লম্বীশিং খোঙজেল য়াঙনা পুনশিনবগী থবক পায়খৎলি হায়না মহাক্না ফোঙদোকখি। ইইজ ওফ দুই বিজিনেসদা পুরক্লিবা রিফোর্মশিং অসিনা হিথাংফম অমদি ইনফ্রাস্ত্রকচর সেক্তরদা শেল হেন্না চাউনা থাদহল্লে হায়খি। ভারত লৈঙাক্না ভারতকী সমুদ্রদা চৎলিবা মীওইশিংগী মতাঙদা লৈরিবাক পথাপশিংদা অহোংবা পুরক্তুনা মশক থোক্না কান্নবা উবা ফংলি হায়না প্রধান মন্ত্রীনা হায়খি। ইং ২০১৪ দা, ভারতকী সমুদ্রদা চৎপা মীশিং লাখ ১.২৫ গী মখাদা লৈরম্বনি। ঙসিদি মশিং অসি লাখ ৩.২৫ গী মথক্তা লৈখ্রে। ভারতনা হৌজিক্তি মালেমগী ওইনা সমুদ্রগী লম্বীদা চত্থোক চৎশিন তৌবা মীশিং খ্বায়দগী য়াম্বা লৈবাক অহুমগী মনুংদা চল্লে হায়না মহাক্না ফোঙদোকখি।
দেকেদ অমগী মমাঙদা, জহাজশিংনা হিথাংফমদা মতম কুইনা ঙাইদুনা লৈরম্মি, অমদি মদুনা পোৎ লৌথবগী থবক্তা নীংথিনা পন্থহল্লম্মি হায়রদুনা, অসুম্না পন্থরিবা অসিদা বিজিনেস, ইন্দস্ত্রী, অমদি মপুং ওইনা শেন্মিৎলোন্দা শোকহল্লম্মি হায়না শ্রী মোদীনা হায়খি। হৌজিক্তি ফীভম অসিদা অওনবা লাক্লে, অমদি হৌখিবা চহি ১০সিদা ভারতকী অচৌবা হিথাংফমশিংনা জহাজকী তর্ন-এরাউন্দগী মতম ৩০% ফাওবা হন্থহন্দুনা ওপরেস্নেল ইফিসিএন্সী ফগৎহল্লে। হিথাংফমগী মতিং হেনগৎহনবনা মরম ওইরগা, ভারতনা হৌজিক্তি অতেনবা মতমগী মনুংদা হান্নদগী য়াম্না হেন্বা কার্গো ভোল্যুম পায়দুনা লৈবাক্কী লোজিস্তিক্স অমদি ত্রেদ কেপেবিলিতীশিং মপাঙ্গল কনখৎহল্লে হায়না মহাক্না ফোঙদোকখি।
“ভারতকী মেরিতাইমগী মায় পাকপা অসি দেকেদ অমা চুপ্না অশানবা মীৎয়েঙগা লোয়ননা হোৎনরকপা অদুগী মহৈনি,” হায়না প্রধান মন্ত্রীনা ফোঙদোক্লদুনা, হৌখিবা চহি ১০ সিদা, ভারতনা মাগী হিথাংফমগী কেপাসিতী শরুক অনি হেনগৎহল্লে অমদি মসিগী নেস্নেল ৱাতরৱেজ শরুক নিপান থোক্না পাকথোক চাউথোকহল্লে হায়খি। ঙসিদি, ভারতকী হিথাংফম অনি মালেমগী মকোক থোংবা হিথাংফম ৩০গী মনুং চল্লে, অদুগা লোজিস্তিক্স পর্ফোর্মেন্স ইন্দেক্সতা ভারতকী রেঙ্কিংসু ফগৎলে হায়খি। মসিগী মথক্তা, ভারতনা হৌজিক্তি মালমেগী ওইনা জহাজ শাবা মকোক থোংবা লৈবাক ২০গী মনুংসু চল্লে। লৈবাকসিগী মচং ওইবা ইনফ্রাস্ত্রকচর মপাঙ্গল কনখৎহল্লবা মতুংদা, হৌজিক্তি মালেমগী লল্লোন ইতিক্তা ভারতকী স্ত্রেতেজিক পোজিসনদা মীৎয়েঙ অমুক থম্লক্লে হায়না প্রধান মন্ত্রীনা মখা তানা ফোঙদোকখি। চাওখৎপা ভারত অমগী পান্দমশিং ফংননবা ভারতকী মেরিতাইম স্ত্রেতেজী য়াৎলিবা মেরিতাইম অমৃৎ কাল ভিজন হৌদোক্লে হায়নসু মহাক্না লাউথোকখি। ইন্দিয়া-মিদ্দল ইস্ত-য়ুরোপ ইকনমিক কোরিদোর লিংখৎনবা ভারতনা অচৌবা লৈবাক কয়াগা খুৎশম্ননা চৎমিন্নখিবা জি-২০ সম্মিতকী মরমদা মহাক্না নীংশিংখি, অমদি কোরিদোর অসিদা কেরলাগী মরুওইবা থৌদাংশিং ফোঙদোক্লদুনা, থৌশিল অসিদগী স্তেত অসিনা চাউনা কান্নবা ফংগনি হায়খি।
ভারতকী মেরিতাইম ইন্দস্ত্রীবু অনৌবা পন্দোল তম্না পুখৎপদা প্রাইভেত সেক্তরগী মরুওইবা থৌদাংগী মরমদা ৱা ঙাংলদুনা, শ্রী মোদীনা পব্লিক-প্রাইভেত পার্ত্নরসিপকী মখাদা, হৌখিবা চহি ১০সিদা লুপা করোর লিশিং কয়াগী শেনফম থাদখ্রে হায়খি। খুৎশম্ননা চৎমিন্নরিবা অসিনা ভারতকী হিথাংফমশিংবু মালেমগী থাক্তা পুখৎপদা নত্তনা মখোয়বু তুংগীদমক শেম শাদুনা থম্লে হায়খি। প্রাইভেত সেক্তরনা শরুক য়াশিল্লকপনা ইনোভেসন পুরক্লে অমদি ইফিসিএন্সী হেনগৎহল্লে হায়না মহাক্না ফোঙদোকখি।
ভারতনা কোচিদা জহাজ শাফম অমদি শেম্বগী ক্লস্তর শেমগৎপগী মায়কৈদা মাঙদা চঙশিল্লি হায়না প্রধান মন্ত্রীনা ফোঙদোকখি। মসি লোইশিল্লক্লবা মতমদা, ক্লস্তর অসিনা অনৌবা থবক্কী খুদোংচাবা কয়া শেমগত্তুনা, কেরলাগী হৈথোই শিংথোইবশিং অমদি নহাশিংগী মফমদা চাওখৎনবগী ফম্পাক অমা পীগনি হায়খি। ভারতনা মাগী জহাজ শাবগী মতিং হেনগৎহন্নবা মঙলান চাউবা পান্দমশিং থম্লি হায়না প্রধান মন্ত্রীনা হায়খি। চহি অসিগী কেন্দ্র বজেত্তা ভারত্তা অচৌবা জহাজ শানবগী থৌওং য়োকখৎনবা অনৌবা থৌরাং অমা হাপ্লে, মসিনা মেনুফেকচরিং সেক্তরদা ফনা য়াম্না ইনোৎ হাপ্লগনি। থৌশিল অসিনা এম.এস.এম.ই.শিংদা হকথেংননা কান্নবা পীদুনা লৈবাক থুংনা থবক পীনবা অমদি ওন্ত্রপ্রিন্যুরসিপকী খুদোংচাবা কয়া চাউনা পুরক্কনি হায়খি।
“তশেংনা চাওখৎপা হায়বসি ইনফ্রাস্ত্রকচর শেমগৎলপা, লল্লোন ইতিক পাকথোক চাউথোকহল্লবা, অমদি মীচম মীয়ামগী তঙায় ফদবা মথৌ তাবশিং ফংহল্লবা মতমদা ওইগদৌরিবনি,” হায়না ফোঙদোক্লদুনা প্রধান মন্ত্রীনা কেরলাগী মীয়াম্না হৌখিবা চহি ১০ সিদা হিথাংফমগী ইনফ্রাস্ত্রকচরখক্তা নত্তনা, হায়ৱে, রেল লম্বী, অমদি এয়রপোর্তকী লমদসু চাওখৎপগী অয়াঙবা খোঙজেল উবা ফংলি হায়খি। চহি কয়া পন্দুনা লৈরুরবা কোল্লম বাইপাস অমদি অলাপ্পুঝা বাইপাসকুম্না পপ্রোজেক্তশিং ভারত লৈঙাক্না খুমাঙ চাওশিনহল্লে হায়খি। কেরলাদা মতমগা চুনবা বন্দে ভারত ত্রেনশিং ফংহন্দুনা লমদমসিগী ত্রান্সপোর্ত নেতৱর্ক অমদি কন্নেক্তিবিতীসু মপাঙ্গল কনখৎহল্লে হায়নসু মহাক্না ফোঙদোকখি।
ভারত লৈঙাক্না কেরলা চাওখৎপনা ভারতকী মপুং ওইবা চাওখৎপদা থৌদাং য়ারি হায়বা ৱাখল্লোনসিদা চেৎনা থাজবা থম্লি হায়না শ্রী মোদীনা ফোঙদোকখি। লৈঙাক অসিনা কোওপরেতিব ফেদরেলিজমগী ৱাখল্লোন্দা থবক পায়খত্তুনা, হৌখিবা দেকেদ অসিদা মরুওইবা খুন্নাইগী পেরামিতরশিংদা কেরলাগী খোঙজেল লৈহন্নবা হোৎনদুনা লাক্লি হায়খি। মহকা্না জল জীবন মিসন, উজ্জ্বল য়োজনা, অয়ুস্মান ভারত, অমদি প্রধান মন্ত্রী সুর্য়গর ফ্রী ইলেক্ত্রিসিতী স্কীম্নচিংবা কেরলাগী মীয়ামদা কান্নবা পীরিবা তোঙান তোঙানবা থৌশিলশিংগী মরমদা ৱাফম কয়াসু ফোঙদোকখি।
ঙামীশিংগী য়াইফ থৌরাংনা মরুওইবা ৱাফম অমা ওইরি হায়রদুনা, প্রধান মন্ত্রীনা ব্লু রিভোলুসন অমদি প্রধান মন্ত্রী মতস্য সম্পদ য়োজনাগী মখাদা লুপা করোর চা কয়াগী ওইগদবা প্রোজেক্তশিং কেরলাগীদমক সেংসন তৌরে হায়খি। মহাক্না পোন্ননি অমদি পুথিয়প্পা য়াওনা ঙা ফাফম হার্বরশিং মতমগা চুনবা মওংদা শেমগৎনবা ৱাফমসু ফোঙদোকখি। মসিগী মথক্তা, মহাক্না কেরলাগী ঙামী লিশিং কয়াদা কিসান ক্রেদিত কার্দ পীদুনা মখোয়বু লুপা করোর চা কয়াগী শেলগী তেংবাং ফংবা ঙমহল্লে হায়নসু ফোঙদোকখি।
কেরলা অসি মতম পুম্বদা পুকচেল খোয়জেল তিন্নবা অমদি খাঙবা কনবগী লমদম ওইদুনা লাক্লি হায়রদুনা, চহিচা কয়াগী মমাঙদা, মালেমগী খ্বায়দগী লিবা চর্চশিংগী মনুংদা অমা ওইরিবা সেন্ত থোমাস চর্চ মফমসিদা লিংখৎখি হায়না শ্রী মোদীনা ফোঙদোকখি। হন্দক নুমিৎ খরনিগী মমাঙদা পোপ ফ্রান্সিসনা লৈখিদবা, মহাক্কী কাউঙম্লরোইদবা খোঙ্গুল অমা থম্লমবা অসিনা মালেম পুম্বদা মীয়ামগী পুক্নিংদা অৱাবনা থলহনখিববু মহাক্না নীংশিংখি। রাস্ত্রপতী দ্রৌপদী মুর্মুনা মহাক্কা লৈরোন চনবা থৌরমদা ভারতকী মহুৎ শিন্দুনা শরুক য়াখি, অমদি লৈবাক্কী মহুৎ শিল্লগা ইকায়খুম্নবা উৎখি হায়না মহাক্না মখা তাখি। কেরলাগী শেংলবা লমদম অসিদগী লৈখিবদা অদুগীদমক অৱাবা ফোঙদোক্লিবা মীওইশিংগী মফমদা শ্রী মোদীনা মহাক্কী মায়কৈদগীসু অমুক হন্না নুংঙাইতবা ফোঙদোকখি।
পোপ ফ্রান্সিসকী মফমদা শ্রদ্ধাঞ্জলি কৎলদুনা, অমদি খৃস্তিয়ন চৎনবীদা পুম্নমক কোনশিন্নবা মহাক্না থৌগলগী ৱাখল্লোনগা লোয়ননা হোৎনরম্ববু শিংথারদুনা, প্রধান মন্ত্রীনা মালেম অসিনা মহাক্না লৌরম্বা থৌদাংশিংবু মতম পুম্বদা নীংশিংদুনা লৈহৌরগনি হায়খি। মহাক্না মাগী লনাই ওইনা থেংনরকখিবশিং পাউদমখি, অমদি পোপ ফ্রান্সিসকা উননবা তাঞ্জা কয়ারক হন্না ফংবগীদমক তৌবিমল খঙবসু ফোঙদোকখি। মহাক্কী মফমদগী মহাক্না অখন্নবা মীনুংশি ফংখি অমদি মীওইবা খুন্নাই, থৌগল, অমসুং ইং তপ্পগী মরমদা খন্নখিবশিং মতম পুম্বদা থম্মোয়নুংদা লৈহৌরগনি অমদি মখোয়না মহাকপু পুক্নিং থৌগত্তুনা লৈগনি হায়না প্রধান মন্ত্রীনা ফোঙদোকখি।
থৌরমদুদা তিল্লিবা পুম্নমক্কী মফমদা য়াইফ পাউজেল পীরদুনা, শ্রী মোদীনা কেরলাবু মালেমগী মেরিতাইম ত্রেদগী অচৌবা মফম অমা ওইনা মীৎয়েঙ থম্লগা অনৌবা থবক লিশিং কয়া পীবা ঙম্লক্কনি হায়খি। পান্দম অসিবু মাঙদা পুখৎনবা ভারত লৈঙাক্না স্তেত লৈঙাকশিংগা পুন্না থবক পায়খৎমিন্ননবা লেপ্লি হায়না মহাক্না অমুক হন্না ফোঙদোকখি। কেরলাগী মীয়ামগী তৌবা ঙম্বা মতিংদা থাজবা থম্লি হায়রদুনা শ্রী মোদীনা মহাক্কী ৱারোল লোইশিনখি অমদি, “ভারতকী মেরিতাইম সেক্তরনা অনৌবা পন্দোল লোম্লগনি” হায়নসু হায়খি।
কেরলাগী গভর্নর, শ্রী রাজেন্দ্র বিস্বানাথ অর্লেকর, কেরলাগী মুখ্য মন্ত্রী শ্রী পিনারায়ি বিজয়ন, কেন্দ্র মন্ত্রী, শ্রী সুরেস প্রভু, শ্রী জোর্জ কুরিএনসু থৌরমদুদা অতৈ মীথুংশিংগা লোয়ননা শরুক য়াখি।
বেকগ্রাউন্দ
লুপা করোর ৮,৮০০ চঙনা শেমগৎখিবা ভিঝিঞ্জম ইন্তরনেস্নেল দীপৱাতর মল্তিপর্পজ সীপোর্ত অসি, বিক্সিত ভারতকী অঅপুনবা মঙলানগী শরুক অমা ওইনা ভারত্তা শাজবা মেরিতাইম সেক্তরগী খুমাং চাওশিনবা অওনবা পুরকপগী শক্তম উৎলিবা লৈবাকসিগী অহানবা অখন্নবা কন্তেনর ত্রান্সসিপমেন্ত পোর্তনি।
স্ত্রেতেজিক ওইনা মরুওইবা ভিঝিঞ্জম হিথাংফম অসি মালেমগী লল্লোন ইতিক্তা ভারতকী মপাঙ্গল কনখৎহনগদবা, লোজিস্তিক্স ইফিসিএন্সী হেনগৎহনগদবা, অমদি কার্গো ত্রান্সসিপমেন্তকীদমক মপান লমগী হিথাংফমশিংদা তাংবগী চাং হন্থহনগদবা মরুওইবা প্রাইওরিতী প্রোজেক্ত অমা ওইনা শকখঙখ্রবনি। মসিগী মিতর ২০ গী ময়াদা লুবা মহৌশাগী ওইবা দীপ দ্রাফ্ত অমদি মালেমগী খ্বায়দগী চিনবা সমুদ্রগী লল্লোন ইতিক্কী লম্বী পরিং নক্না লৈবনা মরম ওইরগা মসিনা মালেমগী লল্লোন ইতিক্তা ভারতকী মফম হেন্না চেৎশিনহল্লি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
Tribute to the great Adi Shankaracharya. pic.twitter.com/HjtH1v0GG4
— PMO India (@PMOIndia) May 2, 2025
India's coastal states and our port cities will become key centres of growth for a Viksit Bharat. pic.twitter.com/HuDnlbeLiI
— PMO India (@PMOIndia) May 2, 2025
Boosting multi-modal connectivity. pic.twitter.com/SZqAkOMCTN
— PMO India (@PMOIndia) May 2, 2025
The world will always remember Pope Francis for his spirit of service: PM @narendramodi pic.twitter.com/NaIi6W9MCf
— PMO India (@PMOIndia) May 2, 2025
