লৈবাক অসিদা হৌজিক ওইরিবা কোবিদ-১৯ অমসুং ইনফ্লুয়েঞ্জাগী ফিবম অসিদা হকশেলগী দরকার ওইবা মচাক-মথুমশিং অমসুং লোজিস্তিক্সকী শেম-শারিবশিং, তিকা থাবগী খোঙজংগী ফিবম, অনৌবা কোবিদ-১৯ ভেরিয়েন্তশিং অমসুং ইনফ্লুয়েঞ্জা মখলশিং থোরকপা অমসুং মখোয়না মীয়ামগী হকশেলদা পীরিবা চৈথেংশিংগী মতাংদা খন্ননবা প্রধান মন্ত্রী শ্রী নরেন্দ্র মোদীনা লুচিংদুনা ঙসি অৱাংবা থাক্কী মীফম অমা পাংথোকখ্রে। হৌখিবা চয়োল অনি অসিদা লৈবাক অসিদা কোবিদ-১৯ কেসশিং অমসুং ইনফ্লুয়েঞ্জা কেসশিং মশীং হেনগৎলক্লিবা অসি য়েংলগা অৱাংবা থাক্কী হন্না য়েংশিনবগী মীফম পাংথোকপনি।
মালেমগী হৌজিক ওইরিবা কোবি-১৯গী ফিবম য়াওনা ভারত্তা কেস মশীং হেনগৎলক্লিবা অসিগী মতাংদা হেল্থ অমসুং ফেলিমি ৱেলফিয়ার মিনিস্ত্রিগী সেক্রেতরিনা মপুংফানা পাউদমখি। মার্চ ২২,২০২৩গী অরোইবা চয়োল ফাওবদা ভারত্তা নোংমদা কেস ৮৮৮গী চাংদা অনৌবা কেসশিং হেনগৎলকপা অমসুং চয়োলগী পোজিতিপ ওইবগী চাং ০.৯৮ ওইরকপগী মতাংদা প্রধান মন্ত্রীদা পাউদমখি। অদুবু, হায়রিবা চয়োল অসিদা মালেমগী ওইনা নোংমদা কেস লাখ ১.০৮ লৈখি।
দিশেম্বর ২২,২০২২দা পাংথোকখিবা কোবিদ-১৯গী ফিবম হন্না য়েংশিনবগী মীফমদা প্রধান মন্ত্রীনা পীখিবা পাউতাকশিং থবক ওইনা পায়খৎপগী মতাংদা পাউদমখি। মরুওইবা কোবিদকী হিদাক ২০ ফংহনবা অমসুং মমল, অতোপ্পা হিদাক ১২, বফর দ্রগ ৮ অমসুং ইনফ্লুয়েঞ্জাগী হিদাক ১গী মতাংদা য়েংশিল্লে হায়না প্রধান মন্ত্রীদা খঙহনখি। দিশেম্বর ২৭,২০২২দা হোস্পিতাল ২২,০০০দা মোক দ্রিল অমশু পাংথোকখ্রে অমসুং মতুং তারকপদা হোস্পিতালশিংনা হেন্না ফগৎনবা থবক কয়া পায়খৎখ্রে।
হৌখিবা থা খর অসিদা লৈবাক অসিদা ওইরিবা ইনফ্লুয়েঞ্জাগী ফিবম অমসুং ঐচ ১ এন ১ অমসুং ঐচ ৩ এন ২ কেস মশীং য়াম্না হেনগৎলকপগী মতাংদা প্রধান মন্ত্রীদা পাউদমখি। ইন্সাকোগ জিনোম সিক্বেন্সিং লেবোরেতোরিশিংদা পোজিতিপ সেম্পলশিংগী হোল জিনোম সিক্বেন্সিং হেনগৎহন্নবা প্রধান মন্ত্রীনা ওফিসিএলশিংদা পাউতাক পীখি। মসিনা করিগুম্বা অনৌবা মখলশিং থেংনরবদি খোঙ্গুল লিবা অমসুং মতম চানা থবক লৌখৎপদা মতেং পাংগনি।
হোস্পিতালশিংদা অনাবশিং, দোক্তরশিং অমসুং হেল্থ ৱার্করশিং অপুনবা ওইনা মাক্স উপ্পা য়াওনা কোবিদকী চৎন-কাংলোনশিং ইন্নবা প্রধান মন্ত্রীনা তকশিনখি। অহলশিং অমসুং মশাগী অতোপ্পা লায়না লৈবা মীওইশিং মীয়াম তিনবা মফমশিংদা পুনবা মতমদা মাক্স উপ্নবা পাউতাক পীনবা মহাক্না তকশিনখি।
রাজ্যশিংদা আই.আর.আই/সারি কেসশিং য়েংশিন্নবা, ইনফ্লুয়েঞ্জা, সার্স-কোভ-২ তেস্ত তৌনবা অমসুং এদেনোভাইরস য়েংশিন্নবা মহাক্না পাউতাক পীখি। হোস্পিতাল খুদিংমক্তা ইনফ্লুয়েঞ্জা অমসুং কোবিদ-১৯গী দরকার ওইবা হিদাক-লাংথকশিং অমসুং লোজিস্তিক্স ফংহন্নবা লোয়ন্না ফমুং অমসুং হকশেলগী মীওইশিং মতিক চানা থম্নবা প্রধান মন্ত্রীনা পাউতাক পীখি।
মীফম অদুদা প্রধান মন্ত্রীনা হায়খি কোবিদ-১৯ লাইচৎ লোইগদবা য়াম্না ৱাৎলি অমসুং লৈবাক শীনবা থুংনা চাংনাইনা লাইচৎ অসিগী ফিবম য়েংশিনবা দরকার ওই। লাল্লোং ৫ হায়বদি তেস্ত-ত্রেক-ত্রিৎ-ভেক্সিনেসন অমসুং কোবিদকা চুনবা চৎন-কাংলোন, লেব সর্ভিলেন্স হেনগৎহনবা অমসুং সারিগী কেস খুদিংমক তেস্ত তৌবা হায়রিবা অসি মখা তানা পাংথোক্কদবনি। ঐখোয়গী হোস্পিতালশিং অথু-অকায়গী থবক খুদিংমক্কী থৌরাং তৌদুনা লৈনবা চাং নাইনা মোক দ্রিলশিং পাংথোক্কদবনি।
রেস্পিরেতোরি হায়জিন ঙাক্নবা অমসুং কোবিদকা চুনবা চৎন-কাংলোনশিং ইন্নবা প্রধান মন্ত্রীনা মীয়ামদা পাউতাক পীখি।
মীফম অদুদা প্রধান মন্ত্রীগী প্রিন্সিপাল সেক্রেতরি শ্রী পি.কে মিশ্রা, নিতি অয়োগ মেম্বর(হকশেল) দোক্তর ভি.কে পাউল, কেবিনেদ সেক্রতরি শ্রী রজিব গৌবা, হেল্থ অমসুং ফেমিল ৱেলফিয়ারগী সেক্রতরি, ফার্মাসিউতিকেলসগী সেক্রতরি অমসুং বাইওতেক্নোলোজিগী সেক্রেতরি, আই.সি.এম.আরগী দি.জি শ্রী অমিত খারে, প্রধান মন্ত্রী ওফিসকী এদভাইজর অমসুং অতোপ্পা সেনিয়ার ওফিসিএলশিং শরুক য়াখি।
