প্রধান মন্ত্রী শ্রী নরেন্দ্র মোদীনা ঙসি INS বিক্রান্ততা দিৱালী পাংথোকপগী থৌরমদা আর্মদ ফোর্সেস পর্সনেলশিংদা ৱা ঙাংখ্রে। ঙসি অসি য়াম্না শিংথানীংঙাই ওইবা নুমিৎনি, য়াম্না শিংথানীংঙাই ওইবা মীকুপ অমনি অমসুং য়াম্না শিংথানীংঙাই ওইবা শক্তম অমনি হায়না পল্লদুনা শ্রী মোদীনা হায়খি মদুদি নাকল অমরোমদা পাক চাউরবা সমুদ্র অমসুং নাকল অমরোমদা ভারত মচাগী থৌনা ফরবা লান্মীশিংগী মপাঙ্গল অদু লৈরি। মহাক্না হায়খি মদুদি নাকল অমরোমদা লোইনাইদ্রবা ঈপাক অমসুং ঙমখৈ লৈতবা থৱানমিচাক অদু উবা ফংলি, অতোপ্পা নাকল অমরোমদা অচৌবা মতিক ময়াই লৈরবা INS বিক্রান্তকী শক্তম অদু উৎলি। প্রধান মন্ত্রীনা হায়খি মদুদি সমুদ্রদা তারিবা নুমিৎ মঙালগী অরংবা অসি দীপাৱলিগী মতমদা থৌনা ফরবা লান্মীশিংনা চুখৎপা থাওমৈগী মঙালগা পাংখক ওইদুনা থাওমৈ পরেং অমা শেম্মি। মহাক্না হায়খি মদুদি ইন্দিয়ন নেভীগী থৌনা ফরবা পর্সনেলশিংগী মরক্তা দিৱালী পাংথোকপা ফংবা অসি লাইবক ফবনি।
INS বিক্রান্ততা মহাক্না অহিং অমা লেনখিবা অদু নীংশিংলদুনা, প্রধান মন্ত্রীনা হায়খি মদুদি মসিগী এক্সপরিয়েন্স অসি ৱাহৈনা ফোংদোকপা হায়বসি অরুবা অমনি। মহাক্না হায়খি মদুদি সমুদ্রদা অচিকপা অহিং অমসুং নুমিৎনা থোরকপা অসিনা দিৱালী অসি মওং কয়া অমদা অখন্ননা কাওঙমদ্রবা ওইহল্লি। INS বিক্রান্ততগী প্রধান মন্ত্রীনা লৈবাক অসিগী নাগরিক করোর 140দা দিৱালীগী য়াইফ-পাউজেল পীখি।
INS বিক্রান্ত লৈবাক মীয়ামদা খুৎশিন্নখিবা মতম অদু নীংশিংলদুনা শ্রী মোদীনা হায়খি মদুদি মতম অদুদা মহাক্না হায়খি মদুদি - বিক্রান্ত অসি য়াম্না চাউই, পাক চাউই, পেনোরামিক ওই, তোপ-তোপ্পা অমসুং অখন্নবা অমনি। প্রধান মন্ত্রীনা হায়খি, "বিক্রান্ত অসি লানগী জহাজ অমা খক্তা নত্তে, মসি 21শুবা চহিচাগী ভারতকী কন্না হোৎনবগী, হৈশিংবগী, ইম্পেক্ত অমসুং কম্মিতমেন্তকী খুদম অমনি।" মহাক্না নীংশিংখি মদুদি লৈবাক অসিনা লৈবাক অসিদা শাজবা INS বিক্রান্ত ফংখিবা নুমিৎ অদুদা, ইন্দিয়ন নেভীনা কোলোনিএল লিগেসিগী মরুওইবা খুদম অমা থাদোকখি। মহাক্না হায়খি মদুদি ছত্রপতি শিবাজী মহারাজনা ইথিল পীরদুনা নেভীনা অনৌবা ফ্লেগ অমা শীজিন্নখি।
প্রধান মন্ত্রীনা হায়খি, "INS বিক্রান্ত ঙসিদি আত্মনির্ভর ভারত অমসুং মেদ ইন ইন্দিয়াগী মপাঙ্গল লৈবা খুদম অমা ওইরে।" সমুদ্রগী ময়োল্লমদা খোঙচৎ চৎলিবা লমদমসিদা শাবা INS বিক্রান্ত অসিনা ভারতকী লান্মীগী থৌনা অদু উৎলি। মহাক্না নীংশিংখি মদুদি থা খরনিগী মমাংদা, বিক্রান্তকী মিংনা পাকিস্তানগী মীপুম খুদিংমকপু তুম্বা য়াহনখিদে। প্রধান মন্ত্রীনা হায়খি মদুদি INS বিক্রান্ত অসি লানগী জহাজ অমনি অমসুং মসিগী মমিং অসিমক্না য়েক্নবগী থৌনা অদু লোইশিনবা ঙম্বগী মতিক চেল্লি।
থৌরম অসিদা প্রধান মন্ত্রীনা ভারতকী লান্মীশিংদা মহাক্কী অখন্নবা সলাম পীখি। মহাক্না হায়খি মদুদি ভারতকী লান্মীনা পীরকপা থাজবা, ভারতকী এয়র ফোর্সনা উৎখিবা অখন্নবা হৈশিংবা অমসুং ভারতকী লান্মীগী থৌনা, সর্ভিস অহুম অসিগী মরক্তা অখন্নবা কোওর্দিনেসনগা লোয়ননা, ওপরেসন সিন্দুরগী মতমদা পাকিসস্তানবু খুদক্তা সরেন্দর তৌহনখি। মহাক্না হায়খি মদুদি থৌদাং লৌরিবা পর্সনেল পুম্নমক্না অসি তশেংনা থাগৎফম থোকই।
শ্রী মোদীনা ফোংদোকখি মদুদি করিগুম্বা য়েক্নবশিংনা মাংলোমদা চঙশিল্লকপা মতমদা অমসুং লান হৌরকপা মতমদা, মনিংতম্না লান্থেংনবগী পাঙ্গল লৈবা নাকল অদু মতম পুম্নমক্তা মাংজিল থারি। মহাক্না অকনবা ৱাফম থমখি মদুদি আর্মদ ফোর্সেস মপাঙ্গল কনখৎহন্নবা, মশা-মরোমদোম লেপচবা অসি তঙাইফদে। প্রধান মন্ত্রীনা হৌখিবা চহি তরা অসিদা ভারতকী ফোর্সশিংনা মশা-মরোমদোম লেপচবা ঙম্নবগী মায়কৈদা লেপ্পা লৈতনা খুমাং চাউশিল্লকপগীদমক চাউথোকচবা ফোংদোকখি। মহাক্না পনখি মদুদি আর্মদ ফোর্সশিংনা পোৎলম লিশিং কয়া ইম্পোর্ত তৌরোই হায়না মশক খঙদোকখ্রে, মসিনা মরম ওইদুনা মরুওইবা মিলিতরী ইক্বিপমেন্ত অয়াম্বা হৌজিক লৈবাক অসিদা শাজবা ওইরি। হৌখিবা চহি 11দা, ভারতকী দিফেন্স প্রদক্সন অসি শরুক অহুম হেনগৎখ্রে, মমাং চহিদা লুপা করোর লাখ 1.5 হেনখ্রে হায়না মহাক্না ফোংদোকখি। অতোপ্পা খুদম অমা পল্লদুনা শ্রী মোদীনা লৈবাক মীয়ামদা হায়খি মদুদি 2014দগী হৌদুনা ভারতকী শিপয়ার্দশিংনা নেভীদা লৈবাক অসিদা শাবা লান্মীগী জহাজ অমসুং সবমেরিন 40 হেন্না দেলিভর তৌখ্রে। মহাক্না মখা তাখি মদুদি হৌজিক্কী ওইনা, চাংচৎতা, অনৌবা ইন্দিজিনস ৱারশিপ নৎত্রগা সবমেরিন অমা নুমিৎ 40 খুদিংগী নেভীদা ইন্দক্ত তৌরি।
“ব্রহ্মোস অমসুং আকাশকুম্বা মিসাইলশিংনা ওপরেসন সিন্দুরগী মতমদা মখোয়গী তৌবা ঙম্বশিং অদু উৎখ্রে। মালেমগী লৈবাক কয়া অমা হৌজিক হায়রিবা মিসাইলশিং অসি লৈনীংবগী মীৎয়েং থমলক্লি", হায়না প্রধান মন্ত্রীনা হায়খি। মহাক্না হায়খি মদুদি ভারতনা আর্মদ ফোর্সেস অহুমমক্কীদমক খুৎলায় অমসুং ইক্বিপমেন্ত মপান্দগী থাদোকপগী তৌবা ঙম্বশিং শেমগৎলি। শ্রী মোদীনা হায়খি, "ভারতকী পান্দমদি মালেমগী খ্বাইদগী মকোক থোংবা দিফেন্স এক্সপোর্তরশিংগী মরক্তা য়াওবা হায়বসিনি।" হৌখিবা চহি তরা অসিদা ভারতকী দিফেন্স এক্সপোর্ত অসি শরুক 30 হেনগৎলে হায়না মহাক্না ফোংদোকখি। মহাক্না মসিগী মায় পাকপগী মরম অসি দিফেন্স স্তার্ত-অপশিং অমসুং ইন্দিজিনেল দিফেন্স য়ুনিৎশিংগী কন্ত্রিব্যুসনশিংনি হায়না ফোংদোকখি।
প্রধান মন্ত্রীনা হায়খি মদুদি শক্তি অমসুং তৌবা ঙম্বগা মরী লৈননা ভারতকী চৎনবী অসি মতম পুম্নমক্তা "জ্ঞানয় দানয় চ রক্ষনয়" হায়বা ৱাখল্লোন অসিদা য়ুম্ফম ওইদুনা লাক্লি। মসিগী ৱাহন্থোক্তি ঐখোয়গী সাইন্স, চাউখৎপা অমসুং শক্তি অসি মীওইবা জাতিগী সেবা অমসুং ঙাক-শেনবদা কত্থোকপনি। লৈবাকশিংগী শেন্মিৎলোন অমসুং চাউখৎপা অসি মেরিতাইম রুতশিংদা য়াম্না মখা পোল্লিবা ঙসিগী ইন্তর কনেক্তেদ মালেম অসিদা, মালেমদা তংদু লৈতাবা লৈহন্নবা হোৎনবদা ভারতকী নেভীনা মরুওইবা থৌদাং অমা লৌরি হায়না মহাক্না অকনবা ৱাফম থমখি। মালেমগী ওইল সপ্লাইগী চাদা 66 অমসুং কন্তেনর শিপমেন্তকী চাদা 50 ভারত মহাসাগরগী থোংদগী চৎলি হায়না শ্রী মোদীনা ফোংদোকখি। মহাক্না হায়খি মদুদি ভারতকী নেভী অসি হায়রিবা লম্বীশিং অসি ঙাক-শেনবগীদমক ভারত মহাসাগরগী গর্জিয়ন ওইনা থবক তৌরি। মসিগী মথক্তা, মিসনদা য়ুম্ফম ওইবা দিপ্লোইমেন্ত, এন্তি-পাইরেসী পেট্রোলশিং, অমসুং হ্যুমেনিতরিয়ান ওপরেসনশিংগী খুত্থাংদা, ভারতকী নেভীনা লমদম অসিদা গ্লোবেল সেক্যুরিতী পার্তনর অমা ওইনা থবক তৌরি।
প্রধান মন্ত্রীনা হায়খি, "ভারতকী ইথৎশিংগী ঙাক-শেনবা অমসুং অপুনবা ওইহনবদা ভারতকী নেভীগী অচৌবা থৌদাং লৈ।" মহাক্না জনুৱারী 26তা লৈবাক অসিগী ইথৎ খুদিংমক্তা লৈবাক্কী ফিরাল চিংখৎনবা মতম খরগী মমাংদা লৌখিবা ৱারেপ অদু নীংশিংখি। নেভীনা লৈবাক অসিগী ৱারেপ অসি মপুং ফাহনখি অমসুং ঙসি ভারতকী ইথৎ খুদিংমক্তা নেভীনা মচু অহুমগী ফিরাল চাউথোকচবা পোক্তুনা পাইহল্লি হায়না শ্রী মোদীনা ফোংদোকখি।
প্রধান মন্ত্রীনা হায়খি মদুদি ভারতনা খোঙজেল য়াংনা খুমাং চাউশিল্লকপগা লোয়ননা গ্লোবেল সাউথকী লৈবাক পুম্নমকসু খুমাং চাউশিল্লক্নবা হোৎনরি। মহাক্না হায়খি মদুদি ভারতনা "মহাসাগর মেরিতাইম ভিজন"দা থবক তৌরি অমসুং লৈবাক কয়াগী চাউখৎ থৌরাংগী পার্তনর অমা ওইরি। মহাক্না অকনবা ৱাফম থমখি মদুদি মথৌ তাবা মতমদা, ভারতনা মালেমগী মফম অমা হেক্তদা হ্যুমেনিতরিয়ন এসিস্তেন্স পীনবা শেম-শারি। অফ্রিকাদগী হৌরগা খা-নোংপোক এসিয়া ফাওবদা, খুদোংথিবা থোকপা মতমদা, মালেম অসিনা ভারতপু মালেমগী মরুপ ওইনা লৌই। শ্রী মোদীনা 2014দা, য়ুম্লোন্নরিবা মালদিপসনা ঈশিংগী অৱাবা মায়োক্নরকপা মতমদা, ভারতনা 'ওপরেসন নীর' হৌদোকখিবা অদু নীংশিংখি অমসুং নেভীনা লৈবাক অসিদা অরুবা ঈশিং য়ৌহনখি। 2017দা শ্রী লঙ্কাদা শাথিরবা ঈশিং-ঈচাউ থোকখিবা মতমদা, ভারতনা ইহান হানবা ওইনা মতেং পাংখি। 2018দা, ইন্দোনেসিয়াদা সুনামিগী খুদোংথীবা থোকখ্রবা মতুংদা, ভারতনা ইন্দোনেসিয়াগী মীয়ামগী মতেং পাংদুনা রিলিফ অমসুং রেসক্যু ওপরেসনশিং পাংথোকখি। মসিগা মান্ননা, ম্যান্মারদা থোকখিবা য়ুহার হাবা ওইরবসু নৎত্রগা 2019দা মোজাম্বিক অমসুং 2020দা মাদাগাস্কারদা থোকখিবা অৱাবা ওইরবসু, ভারতনা মফম খুদিংমক্তা সেবা তৌবগী ৱাখল্লোনগা লোয়ননা মতেং পাংখি।
শ্রী মোদীনা হায়খি মদুদি ভারতকী লান্মীশিংনা, মতম মতমগী ওইনা, মপান লৈবাক্তা লৈরিবা মীওইশিংবু সেফ ওইনা পুথোক্নবা থবক পায়খৎলি। য়েমেনদগী হৌরগা সুদান ফাওবদা, মতম অমসুং মফম খুদিংদা, মখোয়গী থৌনা অমসুং মতিক-মগুন অসিনা মালেম শীনবা থুংনা লৈরিবা ভারত মচাশিংগী থাজবা হেনগৎহল্লি। ভারতনা মিসনশিং অসিগী খুত্থাংদা মপান লৈবাক্কী মীওই লিশিং কয়াগী পুন্সিসু কনবা ঙম্লে হায়না মহাক্না অকনবা ৱাফম থমখি।
শ্রী মোদীনা হায়খি মদুদি, “ভারতকী আর্মদ ফোর্সশিংনা লৈবাক অসিগী কংফাল, সমুদ্র অমসুং নোংথক্কী লম খুদিংমক্তা অমসুং ফিভম খুদিংমক্তা লৈবাক অসিগী সেবা তৌরি”। মহাক্না হায়খি মদুদি ভারতকী সমুদ্রগী ঙমখৈ অমসুং ললোন-ইতিক্কী স্বার্থ ঙাক্নবা নেভীনা সমুদ্রদা মথৌ তৌরি, অদুগা এয়র ফোর্সনা অতিয়া ঙাক-শেনবদা লেপ্পা লৈতনা হোৎনরি। কংফালদা, নুংশা য়াকলবা মরুভুমিদগী হৌরগা উনগী গ্লেসিয়র ফাওবা, লান্মীনা BSF অমসুং ITBPগী পর্সনেলশিংগা লোয়ননা নুংজাওগুম্না লেপ্লি। তোঙান তোঙানবা ফ্রন্তশিংদা SSB, আসাম রাইফলস, CRPF, CISF, অমসুং ইন্তেলিজেন্স এজেন্সীশিংগী পর্সনেলশিংনা ভারত ইমাবু থৌনা লৈনা সেবা তৌরি হায়না মহাক্না মখা তানা খঙহনখি। প্রধান মন্ত্রীনা নেস্নেল দিফেন্সতা মরুওইবা থৌদাং লৌরিবা ইন্দিয়ন কোস্ত গার্দশিংবুসু থাগৎপা ফোংদোকখি। ভারতকী কোস্তলাইন অয়ুক-নুমিদাং ঙাক-শেনবগীদমক মখোয়না নেভীগা লোয়ননা লেপ্পা লৈতনা থবক তৌমিন্নবগী ৱাফমসু মহাক্না পনখি। নেস্নেল সেক্যুরিতীগী অচৌবা মিসন অসিদা মখোয়গী কন্ত্রিব্যুসন অসি য়াম্না চাউই হায়না মহাক্না ফোংদোকখি।
প্রধান মন্ত্রীনা হায়খি মদুদি ভারতকী সেক্যুরিতী ফোর্সশিংগী থৌনা অমসুং মতিক-মগুনগী মতুং ইন্না লৈবাক অসিনা মাওইস্ত তেরোরিজম মুত্থৎপগী মরুওইবা মাইলস্তোন অমা ফংলে। মহাক্না হায়খি মদুদি ভারত অসি হৌজিক্না নক্সাল-মাওইস্ত এক্সত্রিমিজমদগী মপুং ফানা নীংখা তম্বগী মায়কৈদা চংশিল্লি। 2014গী মমাংদা, দিস্ত্রিক্ত 125 রোম্না মাওইস্তকী হিংসানা শোকহল্লম্মি; ঙসিদি, হায়রিবা মশিং অসি দিস্ত্রিক্ত 3 খক্তদা য়াম্না শাথীনা শোকহল্লি অদুগা মশিং অসি 11 খক্তদা হন্থরে। শ্রী মোদীনা হায়খি মদুদি হৌজিক্তি জিলা 100 হেনবনা মাওইস্ত তেররগী মমিদগী মপুং ফানা থোরক্লে অমসুং অহানবা ওইনা নীংথিনা শ্বর হোনবা হৌরে অমসুং দিৱালী পাংথোক্লি। মহাক্না অকনবা ৱাফম থমখি মদুদি চহি কয়াগী মতুংদা মীওই মিলিয়ন কয়ানা চাউখৎ-থৌরাংগী মেনস্ত্রীমদা চংশিল্লক্লি। মাওইস্তশিংনা লম্বী, স্কুল, হোস্পিতাল অমসুং মোবাইল তাৱরশিং শাবদা অথিংবা থমখিবা মফমশিংদা, হৌজিক হাইৱেশিং শারি অমসুং অনৌবা ইন্দস্ত্রীশিং থোরক্লি। ভারতকী সেক্যুরিতী ফোর্সশিংগী কত্থোকপা, অমসুং থৌনানা মরম ওইদুনা মসিগী মাইপাকপা অসি ওইথোকপা ঙম্লে হায়না মহাক্না ফোংদোকখি। অসিগুম্বা জিলা কয়াদা মীয়াম্না অহানবা ওইনা দীপাৱলী পাংথোকপা অসিদা প্রধান মন্ত্রীনা নুংঙাইবা ফোংদোকখি। মহাক্না মখা তাখি মদুদি GST বচেৎ উৎসবকী মনুংদা হায়রিবা মফমশিং অসিদা রেকোর্দ ওইবা য়োনবা অমসুং লৈবগী থবকশিং পাংথোক্লি। মাওইস্ত তেররনা কন্সতিত্যুসনগী ৱা ঙাংবদা ফাওবা অথিংবা থমখিবা জিলাশিংদা, স্বদেশীগী মন্ত্র অসি হৌজিক শন্দোরক্লি।
“ভারতনা খোঙজেল য়াংনা খুমাং চাউশিল্লি অমসুং নাগরিক করোর 140গী মঙলানশিং মপুং ফাহল্লি। গ্রাউন্দতগী স্পেস ফাওবদা, মতম অমদা ৱাখলনা লাম্বা ফংদবা মাইপাকপশিং হৌজিক্তি মঙফাওনরক্লি," হায়না প্রধান মন্ত্রীনা অকনবা ৱাফম থমখি। মহাক্না লৈবাক অসিগী চাউখৎপা, খুমাং চাউশিল্লকপা, অহোংবা লাকপা অমসুং চাউখৎপা অমসুং থাজবা হেনগৎলক্লিবা অসিগী মতাংদা পনখি। লৈবাক শেমগৎপগী অচৌবা থবক অসিদা আর্মদ ফোর্সশিংনা মরুওইবা থৌদাং অমা লৌরি হায়না মহাক্না ফোংদোকখি। শ্রী মোদীনা ফোর্সশিং অসি করেন্ত ফোল্লোৱরশিং খক্তা নত্তে, মখোয়দা মাইকৈ লমজিংনবগী মতিক লৈ, মতমবু লমজিংবা ঙম্বগী, লোইনাইদ্রববু লান্থোকপা ঙম্বগী, অমসুং খুদুম চনবা ঙমদবা অদু খুদুম চনবা ঙম্বগী মতিক অদু লৈ হায়না ফোংদোকখি। মহাক্না হায়খি মদুদি ঐখোয়গী লান্মীশিংনা খোঙফম চেৎনা লেপ্পীবা চীংদোনশিং অসি ভারতকী মাই পাকপগী য়ুম্বী ওইনা লৈহৌরগনি অমসুং মখোয়গী মখাদা লৈবা সমুদ্রগী অচৌবা ঈচেলশিংনা ভারতকী মাইপাকপগী কোন্থাংনা নিল্লী। হায়রিবা মাইপাকপশিং অসিগী মরক্তা, অমত্তা ওইবা খোঞ্জেল অমা থোরক্লি - "ভারত মাতা কী জয়!" থাজবা অমসুং থৌনা অসিগা লোয়ননা, প্রধান মন্ত্রীনা অমুক্কা হন্না ময়াম পুম্নমক্তা দিৱালীগী য়াইফ পাউজেল পীদুনা ৱারোইশিন পীখি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
INS Vikrant is not just a warship.
— PMO India (@PMOIndia) October 20, 2025
It is a testimony to 21st-century India's hard work, talent, impact and commitment. pic.twitter.com/cgWn0CfVFm
INS Vikrant is a towering symbol of Aatmanirbhar Bharat and Made in India. pic.twitter.com/ncLnADlYbG
— PMO India (@PMOIndia) October 20, 2025
The extraordinary coordination among the three services together compelled Pakistan to surrender during Operation Sindoor. pic.twitter.com/g4kaFJGkeu
— PMO India (@PMOIndia) October 20, 2025
Over the past decade, our defence forces have steadily moved towards becoming self-reliant. pic.twitter.com/Iwr9jDJjuo
— PMO India (@PMOIndia) October 20, 2025
Our goal is to make India one of the world's top defence exporters: PM @narendramodi pic.twitter.com/yve7p4b0Dy
— PMO India (@PMOIndia) October 20, 2025
The Indian Navy stands as the guardian of the Indian Ocean. pic.twitter.com/vRnJibLfza
— PMO India (@PMOIndia) October 20, 2025
Thanks to the valour and determination of our security forces, the nation has achieved a significant milestone. We are eliminating Maoist terrorism. pic.twitter.com/AaGUqbMgIm
— PMO India (@PMOIndia) October 20, 2025
