পোপ ফ্রান্সিসনা জর্জ কোবাকাদ হোলি রোমান কেথোলিক চর্চগী কার্দিনেল অমা ওইনা হাপখিবা অসি চাউথোকচবা অমনি: প্রধান মন্ত্রী
মখোয়না লৈরিবা ফিবম নত্ত্রগা মখোয়না মায়োক্নরিবা অৱাবা থিদনা, লৈবাক অসিগী মীয়াম অশোই-অঙাম থোকহন্দবা হায়বসি লৈবাক অসিগী থৌদাংনি হায়না ঙসিগী ভারতনা লৌরি: প্রধান মন্ত্রী
লৈবাক অসিগী মপান লৈবাক্কী থৌশিলদা লৈবাক্কী য়াইফনবা অমসুং মীওইবগী য়াইফনবা অনিমক ভারতনা মরুওইনা লৌরি: প্রধান মন্ত্রী
বিকসিত ভারত অমগী মঙলান শোইদনা মঙফাওনগনি হায়বগী থাজবা ঐখোয়গী নহারোলনা ঐখোয়দা পীরে: প্রধান মন্ত্রী
লৈবাক অসিগী তুংগীদমক ঐখোয় খুদিংমক্না লৌগদবা মরুওইবা থৌদাং অমা লৈরি: প্রধান মন্ত্রী
ঙসি প্রধান মন্ত্রী শ্রী নরেন্দ্র মোদী নিউ দিল্লিগী সি.বি.সি.আই সেন্তরদা কেথোলিক বিসোবস কনফরেন্স ওফ ইন্দিয়া (সি বি সি আই) না শীনবা খৃষ্টমাস থৌরম শরুক য়াখ্রে। ভারত্ত কেথোলিক চর্চকী হেদক্বাতরদা প্রধান মন্ত্রী অমনা অসিগুম্বা থৌরম অমা শরুক য়াগদবা অসি হন্দক্কী অসিনা অহানবনি। প্রধান মন্ত্রীনা কার্দিনেলশিং, বিসোপশিং অমসুং চর্চগী শক্নাইরবা লুচিংবশিং য়াওনা খৃষ্টিয়ান ফুরুপকী লুচিংবশিংগশু ৱারি শানখ্রে।
নুংঙাইরবা খৃষ্টমাস অমগীদমক লৈবাক অসিগী মীয়াম অমসুং মালেম শীনবা থুংবগী খৃষ্টান ফুরুপতা য়াইফ-পাউজেল পীরদুনা, প্রধান মন্ত্রীনা হায়খি নুমিৎ খরগী মমাঙদা মহাক য়ুনিয়ন মিনিস্তর জর্জ কুরিয়ানগী য়ুমদা খৃষ্টমাস থৌরম শরুক য়াখ্রে অমসুং ঙসি, কেথোলিক বিসোবস কনফরেন্স ওফ ইন্দিয়ানা শীনবা থৌরম অসি শরুক য়াবা অসি মহাক্কী লাইবক ফবনি। সি.বি.সি.আইগী ৮০শুবা মপোক কুমওন পাংথোকপগা লোয়ননা থৌরম অসি মরুওইবা অমা ওইরে। শিংথানিঙাই ওইরবা খুমাঙচাউশিনবা অসিদা সি.বি.সি.আই অমসুং মসিগী চৎমিন্নরিবা খুদিংমক প্রধান মন্ত্রীনা থাগৎপা ফোঙদোকখ্রে।
প্রধান মন্ত্রীনা হায়খি হৌখিবা চহিদা প্রধান মন্ত্রীগী য়ুমদা সি.বি.সি.আইগা লোয়ননা মহাক্না খৃষ্টমাস পাংথোকখি অমসুং ঙসিনা ময়াম পুম্নমক সি.বি.সি.আই কেম্পসতা পুল্লে। ইস্তর মনুংদা মহাক সেক্রেদ হার্ত কেথেদ্রেল চর্চতা চৎখি অমসুং অদোম্না তরাম্না ওকপগীদমক ঐগী তৌবীমল খঙবা উৎচরি। চহি অহুমগী মনুংদা ঐখোয় অনিরকশুবা উনবা ওইনা-চহি অসিগী অঙানবা শরুক্ত ইতালিদা জি-৭ মীফম মনুংদা ঐনা পোপ ফ্রান্সি উনবা ফংখিবা মীনুংশি অদুগা চপ মান্না ঐ ফাওরি। সেপ্তেম্বরদা মহাক্না নিউ য়োর্কতা কার্দিনেল পৈত্রো পারোলিন উনখ্রে। মখোয়গা উনখিবা অসিনা মীয়ামগী থবক তৌনবা ইথিল অমসুং থৌনা পীখি।
পোপ ফ্রান্সিনা কার্দিনেলগী মিংথোল পীখ্রবা শক্নাইরবা কার্দিনেল জর্জ কোবাকাদ হন্দক মহাক্কা উনখিবা অদু প্রধান মন্ত্রীনা নিংশিংখি অমসুং মহাক্না হায়খি মদুদি থৌরম অসি শরুক য়ানবা য়ুনিয়ন মিনিস্তর জর্জ কুরিয়ান্না লুচিংবা অৱাংবা থাক্কী মীহুৎ কাংবু অমা ভারত সরকারনা থাখি। ভারতমচা অমনা অসিগুম্বা মাইপাকপা পুরকপদা, লৈবাক শীনবা থুংনা চাউথোকচবা ফাওরি। মসিগী মাইপাকপা অসিগীদমক ঐনা অমুক হন্না কার্দিনেল জর্জ কোবাকাদ থাগৎপা ফোঙদোকচরি।
হৌখিবা থৌদোক কয়া নিংশিংলদুনা, প্রধান মন্ত্রীনা হায়খি চহি ১০ গী মমাঙদা লালনা শোকহল্লবা অফগানিস্থান্দগী ফাদর অলেক্সিস প্রেম কুমার কল্লকখিবা অদু অপেনবা ওইখি। ফাদর অলেক্সিস প্রেম কুমার থা নিপাল ফাজিন্দুনা থমখি অমসুং খুদোংথিবা ফিবম কয়া মায়োক্নরবশু, তেক্ত কাইদনা মহাক য়ুমদা পুরক্নবা সরকারনা হোৎনখি। ঐখোয়না মাইপাকপা মতমদা মহাক্কী ইমুং-মনুংনা হরাওবগী খোঞ্জেল অদু ঐনা কৈদৌঙৈদা কাউবা ঙম্লোই। গল্ফত খুদোংথিবা তারকপা মতমদা নর্সশিং কন্নবা ঐখোয়না হোৎনখিবশিং অদু অচৌবা মাইপাকপনি। হায়রিবা থবকশিং অদু শুপ্নগী কুতনিতিগী থবক খক নত্তে, মসি ইমুং-মনুংগী মীওইশিং অমুক পুরক্নবা থম্মোয়গী ওইবা থবকশিংনি। ঙসিগী ভারত্ত, ভারতমচা অমা নত্ত্রবশু, অৱাবা তারকপা মতমদা মখোয় কনবা অসি লৈবাক অসিগী থৌদাংনি হায়না খন্নরি।
প্রধান মন্ত্রীনা হায়খি লৈবাক অসিগী মপান লৈবাক্কী থৌশিলদা লৈবাক্কী য়াইফনবা অমসুং মীওইবগী য়াইফনবা অনিমক ভারতনা মরুওইনা লৌরিবা অদু কোবিদ-১৯ লাইচৎ মনুংদা উৎথোক্লে। লৈবাক কয়ানা মখোয় মশাগী ফনবা খল্লিঙৈদা, ভারতনা মশাগী ওইজবা থাদোক্তুনা লৈবাক ১৫০ হেন্না মতেং পাংখি, হিদাক-লাংথকশিং অমসুং তিকাশিং থাখি। মসি মালেমগী অফবা অমা ওইখি, গুয়ানাগুম্বা লৈবাকশিংনা তৌবীমল খঙবা উৎলকখি। লৈবাক অসিগী অৱাং-তেংবাং কয়া পীরকপগীদমক ইথৎ লৈবাকশিং, পেসিফিক লৈবাকশিং অমসুং কেরিব্বিয়ান লৈবাকশিংনশু থাগৎপা ফোঙদোকখি। মীওইবা খুন্নাইগী য়াইফনবা খনবা ভারতকী থবকশিং অসিনা ২১শুবা চহিচাদা মালেমগী ফিবম ফগৎনবা শেম-শারি।
প্রধান মন্ত্রীনা হায়খি প্রভু খৃষ্টনা নুংশিবা, নুংশিন্না হিংমিন্নবা অমসুং মচিন-মনাও ওইবগী পাউজেল পীরি। হন্দক জর্মনিদা খৃষ্টমাসকী কৈথেল অমদা থৌদোকখিবা থৌদোক অমসুং শ্রী লঙ্কাদা ২০১৯ দা ইস্তর বোম্বিং থোকখিবগা লোয়ননা, খুন্নাইদা হিংশা অমসুং অকায়-অতোয় থোকপা হেনগৎলকপদা মহাক অৱাবা ফাওহল্লে অমসুং লৈখিদ্রবশিংগী মফমদা ইকায়খুম্নবা উৎচরি।
প্রধান মন্ত্রীনা হায়খি মদুদি মসিগী জুব্লি ইয়র হৌদোকপগা লোয়ননা চহি অসিগী খৃষ্টমাস অসিনা অমুক্কা হেন্না অখন্নবা ওইরে। বাইবল অসি থৌনা অমসুং শান্তিগী হৌরকফম অমা ওইনা উরি। ঐখোয়শু থাজবা অমসুং অফবা খনবনা লমজিংলি। মীওইবা খুন্নাইগী থাজবা, হেন্না ফবা মালেম অমগী থাজবা অমসুং শান্তি, চাউখৎপা অমসুং নুংঙাই-য়াইফবগী থাজবা থম্লি।
প্রধান মন্ত্রীনা হায়খি হৌখিবা চহি ১০ দা ভারত্ত মীওই মিল্লিয়ন ২৫০ লায়রবা কোক্লে, লায়রবা কোকহনবা ঙম্লে হায়বগী থাজবা লৈরে। ভারত ১০শুবা খ্বাইদগী চাউবা ইকোনোমি ওইরম্বদগী ৫শুবা খ্বাইদগী চাউবা ইকোনোমি ওইরে, মসি ঐখোয়গী মশানা মশাবু থাজবা অমসুং অৱা-অনা মায়োক্নবা ঙম্বগী খুদম অমনি। চাউখৎপগী তাঙ্কক অসিনা তুংগীদমক অনৌবা থাজবশিং পীরে, স্তার্দ-অপশিং, সাইন্স, স্পোর্তস অমসুং ওন্ত্রেপ্রেনিউয়রশিপ য়াওনা তোঙান-তোঙানবা হিরমশিংদা নহারোলশিংগী খুদোংচাবশিং পীরে। মশাবু থাজবনা লৈরবা ভারতগী নহারোলশিংনা লৈবাক অসি চাউখৎহল্লি, বিকসিত ভারত অমগী মঙলান মঙফাওনবা ঙম্নবা ঐখোয়দা থাজবা পীরে।
হৌখিবা চহি ১০ দা নুপীশিংদা শিংথাবা য়ানা শক্তি পীরে অমসুং ওন্ত্রেপ্রেনিউয়রশিপ, দ্রোনশিং, এভিএসন অমসুং আর্মদ ফোর্সশিংগুম্বা হিরমশিংদা মশক থোকপা থবকশিং পাংথোক্লে। নুপীশিংগী ফিবম ফগৎহন্দনা লৈবাক অমতা চাউখৎপা ঙম্লোই হায়বা মখোয় চাউখৎপা অসিনা তাক্লে। নুপী মশিং হেন্না শিন্মী ওইনা অমসুং শীনফম কয়াদা শরুক য়ারে অমসুং মসিনা ভারতকী তুংগী অনৌবা থাজবা পুরক্লে।
প্রধান মন্ত্রীনা হায়খি হৌখিবা চহি ১০ দা ভারতনা মোবাইল অমসুং সেমিকন্দক্তর শাবগী হিরমশিংদা শিংথাবা য়ানা খুমাঙচাউশিল্লে। লৈবাক অসি মালেমগী তেক্নোলোজিগী মফম অমা ওইরে। তেক্নোলোজি অমসুং ফিনেতক্কী খুৎথাংদা লৈবাক অসিনা লায়রবশিংগী ফিবম ফগৎহল্লে অমসুং অনৌবা এক্সপ্রেসৱেশিং, খুঙ্গংগী লম্বীশিং অমসুং মেত্রো রুতশিংগা লোয়ননা মমাঙদা অমুক্ত ওইখিদ্রিবা খোঙজেলদা ইনফ্রাস্ত্রকচরশিং শেমগৎলে। হায়রিবা মাইপাকপশিং অসিনা ভারতকী তুংগী থাজবা লৈহল্লে অমসুং লৈবাক অসিনা য়াংনা চাউখৎলকপা অমসুং খুদোংচাবা কয়া লৈরিবা অসিদা থাজবা অমগা লোয়ননা হৌজিক মালেম্না ভারত্ত য়েংলি।
প্রধান মন্ত্রীনা হায়খি মদুদি বাইবলনা ঐখোয়দা অতোপ্পগী পোৎলমশিং পুনবা তাকপীরি, কনাগুম্বা অমগী সেবা তৌনবা ঐখোয়গী পুক্নিং থৌগৎলি অমসুং অমনা অমগী য়াইফনবা থৌদাং লৌনবা হায়রি। মসিগী ৱাখল্লোন অসিগা লোয়ননা, মীয়ামগী থবক তৌবদা মহৈলোয়শঙশিং অমসুং লুপশিংনা মরুওইবা থৌদাং অমা লৌরি, অনৌবা স্কুলশিং লিংখৎতুনা, লাইরিক-লাইশুগী খুৎথাংদা মীয়ামগী ফিবম ফগৎহন্দুনা নত্ত্রগা হকশেলগী থবকশিং পায়খৎতুনা মীয়ামগী য়াইফনবা থবকশিং পাংথোকলি। হায়রিবা থবকশিং অসি অপুনবা থৌদাংনি।
প্রধান মন্ত্রীনা অমুক হন্না হায়খি মদুদি যিষু খৃষ্টনা মালেমদা মীনুংশি খঙবা অমসুং মশাগী ওইজবা থিদনা থবক তৌনবা লম্বী তাক্লি। ঐখোয়না খৃষ্টমাস পাংথোক্লি অমসুং হায়রিবা গুনশিং অসি ঐখোয়গী পুন্সিগী শরুক ওইহন্নবা অমসুং মতম পুম্নমক্ত ঐখোয়গী থৌদাংনা মরুওইনা লৌনবা যিষু নিংশিংলি। মসি ঐখোয় ইশাগী থৌদাং খক নত্তনা খুন্নাইগী থৌদাং অমসুনি। ঙসি, লৈবাক অসি ‘সবকা সাথ, সবকা বিকাস, সবকা প্রায়স’ গী ৱাখল্লোনগা লোয়ননা মাঙলোমদা চঙশিল্লি। মমাঙদা কৈদৌঙৈদা তমখিদ্রিবা হিরম কয়া লৈরি, অদুবু মীওইবা অমগী মীৎয়েংদা মখোয় য়াম্না দরকার ওই। ঐখোয়না সরকারগী অচেৎপা নিয়মশিং অমসুং চৎন-কাংলোনশিং লৌথোক্লে। মীয়ামগী অনিংবা খঙবা অসি ঐখোয়না পেরামিতর অমা ওইহল্লে। লায়রবা মীওই খুদিংমক লেংদ্রবা য়ুম অমা ফংহল্লে, খুঙ্গং খুদিংমক ইলেক্ত্রিসিতি ফংহল্লে, মীয়ামগী পুন্সিগী অমম্বশিং কোকহল্লে, অফবা থক্নবা ঈশিং ফংহল্লে, শেন লৈতদবগী কনাগুম্বা মীওই অমতা লায়েংবা ঙমদবা অদু লৈহন্দ্রে। অসিগুম্বা থবকশিং অমসুং অসিগুম্বা লৈঙাক শুকশোই শোইদনা ফংহনবা মীয়ামগী ইহুল খঙবা লৈঙাক অমা ঐখোয়না শেমগৎলে।
প্রধান মন্ত্রীনা হায়খি সরকারগী থবকশিংনা তোঙান-তোঙানবা ফুরুপশিংগী ফিবম শিংথাবা য়ানা ফগৎলে। পি.এম অৱাস য়োজনাগী মখাদা নুপীশিংগী মমিংদা য়ুমশিং শারে, মসিনা মখোয়গী ফিবম ফগৎহল্লে। নারী শক্তি বন্দন এক্তনা নুপীশিং সংসদতা শরুক য়াবা হেনগৎহল্লে। মতম অমদা ফিবম চাদনা লৈরম্বা দিবয়াংজনশিং হৌজিক মীয়ামগী ইনফ্রাস্ত্রকচরদগী হৌরগা থবক পীবা ফাওবদা মরুওইনা লৌরে। লৈবাক ঙাকপদা মীয়ামগী ইহুল খঙবা অসি শেন-থুম চাউখৎহনবদা য়াম্না মরুওই, মসি ঐখোয়না তোখায়বা ফিসরিজ মিনিস্ত্রি অমা লিংখৎপা অমসুং কিষান ক্রেদিদ কার্দগুম্বা থৌরমশিং উবা ফংলে অমসুং মতস্যা সম্পদা য়োজননা ঙামী মিল্লিয়ন কয়াগী ফিবম ফগৎহল্লে অমসুং শেন-থুমগী ফিবম ফগৎহল্লে।
প্রধান মন্ত্রীনা হায়খি লাল কিলাদগী ঐনা “সবকা প্রায়াস” নত্ত্রগা অপুনবগী থবক্কী মতাংদা ৱা ঙাংখি অমসুং লৈবাক্কী তুংগীদমক লনাই মীওই খুদিংমক্কী থৌদাংগী মরুওইবা অদু ফোঙদোকখি। খুন্নাইগী খনবা ভারতমচাশিংনা শ্বাছ ভারতগুম্বা খোঙজংশিং ফগৎহন্দুনা নুপীশিং অমসুং অঙাংশিংগী লু-নানবা অমসুং হকশেলগী ফিবম ফগৎহল্লে। মিল্লেতশিং য়োকখৎপা, খুৎহৈবশিং শৌগৎপা স্কিমশিং পায়খৎলে অমসুং “এক পের মা কে নাম” খোঙজংনা মালেম ইমা অমসুং ঐখোয়গী ইমাশিং অনিমক ইকায়খুম্নবা উৎপা হেনগৎলে। হায়রিবা থবকশিং অসিদা খৃষ্টান ফুরুপকী মীওই কয়াশু থৱায় য়াওনা শরুক য়ারি। হায়রিবা অপুনবা থবকশিং অসি বিকসিত ভারত অমা শেমগৎনবা তঙাইফদবনি।
লোইশিল্লকপদা, প্রধান মন্ত্রীনা হায়খি অপুনবা থবকশিংনা লৈবাক অসি চাউখৎহনগনি হায়বগী মহাক্কী থাজবা থম্লি। বিকসিত ভারত অসি ঐখোয়গী পান্দমনি অমসুং অপুনবা থবক্না মসি ঐখোয়না ফংবা ঙমগনি। তুংগী মীরোলশিংগীদমক তুংগী অফবা ভারত অমা ঐখোয়না থম্লম্বা অসি ঐখোয়গী থৌদাংনি। খৃষ্টমাস অমসুং জুব্লি ইয়রগীদমক ঐনা অদোমগী মফমদা অমুক হন্না ঐগী য়াইফ-পাউজেল পীজরি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
It is a moment of pride that His Holiness Pope Francis has made His Eminence George Koovakad a Cardinal of the Holy Roman Catholic Church. pic.twitter.com/9GdqxlKZnw
— PMO India (@PMOIndia) December 23, 2024
No matter where they are or what crisis they face, today's India sees it as its duty to bring its citizens to safety. pic.twitter.com/KKxhtIK4VW
— PMO India (@PMOIndia) December 23, 2024
India prioritizes both national interest and human interest in its foreign policy. pic.twitter.com/OjNkMGZC6z
— PMO India (@PMOIndia) December 23, 2024
Our youth have given us the confidence that the dream of a Viksit Bharat will surely be fulfilled. pic.twitter.com/OgBdrUEQDl
— PMO India (@PMOIndia) December 23, 2024
