প্রধান মন্ত্রী শ্রী নরেন্দ্র মোদীনা ঙসি কানানাস্কিসতা G7 সম্মিৎকী আউৎরীচ সেসনদা শরুক য়াখ্রে। মহাক্না "ইনর্জি সেক্যুরিতী: অহোংবা লাক্লিবা মালেম অসিদা এক্সেস অমসুং এফোর্দেবিলিতী লৈহন্নবা দাইভর্সিফিকেসন, তেক্নোলোজী অমসুং ইনফ্রাস্ত্রকচর" হায়বা সেসন অমদা ৱা ঙাংখি। মহাক্না কানাদাগী প্রধান মন্ত্রী ঐচ.ই. মিস্তর মার্ক কার্নীনা বর্তন তৌরকপা অমসুং G7না চহি 50 মপুং ফারকপদা নুংঙাইবা ফোংদোকখি।
মহাক্কী ৱারোলদা, প্রধান মন্ত্রীনা হায়খি মদুদি ইনর্জী সেক্যুরিতী অসি তুংলমচৎকী মীরোলশিংনা থেংনগদবা মরুওইবা শিংনবশিংগী মরক্তা অমনি। ইনক্লুসিব গ্রোথকীদমক ভারতনা লৌরিবা অচেৎপা ফিরেপ অদু শন্দোক্না তাক্লদুনা মহাক্না হায়খি মদুদি, এভাইলেবিলিতী, এক্সেসিবিলিতী, এফোর্দেবিলিতী অমসুং এসেপ্তেবিলিতী অসি ভারতকী ইনর্জী সেক্যুরিতীগী থৌওংগী য়ুম্ফম ওইরিবা প্রিন্সিপলশিংনি। মহাক্না মখা তানা হায়খি মদুদি ভারত অসি মালেমগী খ্বাইদগী য়াংনা চাউখৎলক্লিবা মরুওইবা ইকোনোমী অমা ওইরবসু, মসিনা মতমগী মাংওইননা মাগী পেরিসকী অচেৎপা ৱাফমশিং মায় পাক্না মপুং ফাহনখ্রে। তুং কোইনা চৎনবা য়াবা অমসুং গ্রীন ওইবা তুংলমচৎ অমগীদমক ভারতনা অচেৎপা ফিরেপ লৌরি হায়না পল্লদুনা মহাক্না হায়খি মদুদি ভারতনা ইন্তর্নেস্নেল সোলর এলাইন্স, কোলিসন ফোর দিজাস্তর রেসিলিয়েন্ত ইনফ্রাস্ত্রকচর, গ্লোবেল বাইওফু্এল্স এলাইন্স, মিসন লাইফ অমসুং ৱান সন- ৱান ৱার্ল্দ- ৱান গ্রিদ অসিনচিংবা মালেমগী ওইবা খোঙথাং কয়া পায়খৎলে।
মালেমগী তোঙান তোঙানবা মফমশিংদা লৈরক্লিবা অকিবা অমসুং চয়েৎনবা অসিনা গ্লোবেল সাউথকী লৈবাকশিংদা অকায়বা পীরি হায়না প্রধান মন্ত্রীনা ফোংদোকখি। মালেমগী থাক্তা গ্লোবেল সাউথকী ভোইস তাহন্নবা ভারতনা থৌদাং লৌরি হায়না মহাক্না ফোংদোকখি। মহাক্না হায়খি মদুদি মালেমগী কম্ম্যুনিতীনা তুং কোইবা তুংলমচৎ অমগীদমক অখন্নবা মীৎয়েং থম্লবদি মালেম অসিনা গ্লোবেল সাউথকী প্রাইওরিতিশিং অমসুং খন্ননিংঙাই ওইবা ৱাফমশিং অদু খঙবা য়াম্না মরু ওই। সেক্যুরিতীগী শিংনবশিংদা মরুওইবা পীরদুনা, মহাক্না লৈবাকশিংদা তেরোরিজমগা লান্থেংননবা মালেমগী থাক্তা হোৎননবা হায়খি। তেরোরিজমগী মায়োক্তা লান্থেংনবদা মালেমগী মীয়াম্না ভারতপু চাউনা মতেং পাংবীবগীদমক থাগৎপা ফোংদোক্লদুনা মহাক্না পহলগাম তেরোরিস্ত এতেক অসি ভারত খক্তদা নত্তনা মীওইবা খুন্নাই পুম্বদা খুদোংথীবা অমা ওইখি হায়না ফোংদোকখি। মহাক্না তেরোরিজমবু মতেং পাংলিবা অমসুং শৌগৎলিবা লৈবাকশিংগী মায়োক্তা অকনবা থবক লৌখৎনবা হায়খি। তেরোরিজমগা মরী লৈনবা থবকশিংদা দবল স্তেন্দর্দশিং লৈহন্দবা অমসুং তেরোরিজমবু শৌগৎপশিংবু থৌগৎতনবা হায়না মহাক্না মখা তানা পনখি। তেরোরিজম অসি মীওইবা খুন্নাইগীদমক অচৌবা খুদোংথীবা অমনি হায়না পল্লদুনা প্রধান মন্ত্রীনা মালেমগী মীয়ামদা খন্থনবা তঙাইফদবা ৱাহংশিং থমখি:
- লৈবাক অমনা তার্গেৎ ওইরবা মতমদা খক্তা তেরোরিজমনা পীবা শাথিবা খুদোংথিবশিং অসি লৈবাকশিংনা খঙগদোইরা?
- তেরর চত্থরিবশিং অমসুং মাগী ভিক্তিমশিং অসি করম্না মান্নৈ হায়না লৌগনি?
- তেরোরিজম অসি মালেমগী ইন্সতিত্যুসনশিংনা তুমিন্না য়েংদুনা লৈরদ্রা?
প্রধান মন্ত্রীনা তেক্নোলোজী, AI অমসুং ইনর্জীগী মরক্তা লৈনরিবা মরী অদুগী মতাংদসু ৱা ঙাংখি। AIনা ইফিসিএন্সী অমসুং ইন্নোবেসন প্রমোৎ তৌবদা য়াম্না মরু ওইবা খুৎলাই অমা ওইরক্লবসু, তেক্নোলোজী অসি মশাদা ইনর্জী য়াম্না চংই অমসুং মসি ক্লিন অমসুং গ্রীন ইনিসিয়েতিবশিংগী থোংদা মতৌ করম্না তুং কোইনা চৎকদগে হায়বদু স্ত্রেতেজী শেম্বা মরু ওই। তেক্নোলোজী প্রমোৎ তৌবদা ভারতকী হ্যুমেন-সেন্ত্রিক এপ্রোচকী মতাংদা পল্লদুনা মহাক্না হায়খি মদুদি তেক্নোলোজী অমহেক্তনা ইফেক্তিব ওইনবগীদমক মীচম প্রজাগী পুন্সিদা ভেল্যু পুরকপা তাই। মহাক্না হায়খি মদুদি AIগা মরী লৈনবা গ্লোবেল গভর্নান্সকী ইসুশিং অসি AIগী খন্ন-নৈনবা অমসুং লম অসিদা ইন্নোবেসন প্রমোৎ তৌবদা মরু ওই। মহাক্না হায়খি মদুদি AIগী মতম অসিদা মরুওইবা মিনরেলশিংগী সেক্যুরিতী অমসুং রেসিলিয়েন্ত সপ্লাই চেন লৈবা অসি য়াম্না মরু ওই। প্রধান মন্ত্রীনা মখা তারদুনা হায়খি মদুদি ভারত্তা মগুন লৈবা অমসুং তোঙান তোঙানবা দেতা মরাং কাইনা লৈরি, মসি রেস্পোন্সিবল AIগীদমক মরু ওই।
তেক্নোলোজীনা লমজিংবা মালেম অসিনা তুং কোইবা তুংলমচৎ অমা ফংনবগীদমক লৈবাকশিংগী মরক্তা হেন্না নকশিন্ননা তেংবাং পীনবা মথৌ তাই হায়না প্রধান মন্ত্রীনা অকনবা ৱাফম থমখি। মসি ফংনবগীদমক, মীওইবা অমসুং গ্রহ অসি চাউখৎপগী ময়াইদা থমগদবনি। সেসন অসিদা থমখিবা পি.এম.গী ৱারোল মফমসিদা য়েংবা য়াগনি [Link]
