প্রদান মন্ত্রী, শ্রী নরেন্দ্র মোদীনা ঙসি ভিদিও পাউজেলগী খুত্থাঙদা গোৱাদা পাঙথোকপা জি২০ তুরিজম মন্ত্রীশিংগী মীফমদা ৱা ঙাংখ্রে।
তিল্লিবা মীয়ামদা ৱা ঙাঙলদুনা, প্রধান মন্ত্রীনা ইনক্রেদিবল ইন্দিয়াগী ৱাখল্লোনবু হৌদোকখি অমদি তুরিজম মন্ত্রীশিং অসি মালেমগী ওইনা দোলর ত্রিলিয়ন অনিগী সেক্তর পায়জরবসু তুরিস্ত অমা ওইবগী খুদোংচাবা তাঙনা ফংই। জি২০- তুরিজম মন্ত্রীশিংগী মীফম অসি ভারতকী অচৌবা লমকোইবশিংগী পুক্নিং চিংশিনফমশিংগী মরক্তা অমা ওইরিবা গোৱাদা পাঙথোক্লি হায়রদুনা, প্রধান মন্ত্রীনা মীথুংশিংগী মফমদা মখোয়না অরুবা ৱাফম কয়া খন্নরিবদুদগী মতম খরা কাইথোক্তুনা গোৱাগী মহৌশাগী ফজবা অমদি লাইনিংগী মাইওনশিংবুসু য়েংননা মতম লৌবিয়ু হায়খি।
প্রধান মন্ত্রীনা ভারতকী তুরিজম অসি অরিবা সংস্কৃৎকী ৱারোল ‘অতিথী দেবো ভবহ’ হায়বদি ‘মীথুংনা লাইগী মশক্নি’ হায়বসিদা য়ুম্ফম ওইবনি হায়খি। তুরিজম অসি কোইবখক নত্তে পুক্নিং লুপশিনবা এক্সপরিএন্স অমনি হায়না শ্রী মোদীনা হায়খি। “ঈশৈ-নোংমাই নৎত্রগা চীঞ্জাক, কলা নৎত্রগা নাৎপু ওইরবসু, ভারতকী খেন্নবা মশকশিং অসি তশেংনা নীংথিজৈ। হিমালয়গী অৱাংবা চীংদোলদগী শোঙলবা উমং ফাওবা, অকংবা লৈকংলাদগী ফজরবা সমুদ্র খোঙপান ফাওবা, এদভেঞ্চর স্পোর্তসতগী হীরী কোনফম মফমশিং ফাওবদা, ভারত্তা মীপুম খুদিংমক্কী করিগুম্বা অমদি অদুমক লৈ,” হায়না প্রধান মন্ত্রীনা ফোঙদোকখি। ভারতনা মাগী জি-২০ প্রেসিদেন্সী মনুংদা লৈবাক পুম্বদা তোঙান তোঙানবা মফম ১০০দা মীফম ২০০গী ময়াদা শীন্দুনা অমনা অমদগী খেন্নবা মহাওশিং পীরি হায়না প্রধান মন্ত্রীনা পাউদমখি। “করিগুম্বা অদোম্না মীফমশিং অসিগীদমক ভারত্তা হান্ননা লাকখ্রবা অদোমগী মরূপ মপাংশিংদা হংলবদি, এক্সপরিএন্স অমত্তা কৈদৌঙৈদসু মান্নরম্লোই হায়না ঐনা থাজৈ,” হায়না মহাক্না মখা তাখি।
তুরিজম সেক্তরদা ভারতনা হোৎনরিবশিং অসি তুরিজমগী মালেমগী থাক্কী মচাক মথুমশিং শেমগৎপগা লোয়ননা লমদমসিগী ইনাক খুল্লবা পারী পুরীগী লনথুম ঙাক শেনবদা য়ুম্ফম ওইবনি হায়না প্রধান মন্ত্রীনা ফোঙদোকখি। ভারতনা মালেমগী অচৌবা লাইনিং খুদিংমক্কী লাই খুরুম্বা লাকপশিংগী পুক্নিং চিংশিল্লি হায়রদুনা, প্রধান মন্ত্রীনা স্পিরিচুএল তুরিজম শেমগৎপা অসিসু মীৎয়েঙ চঙলিবা হীরমশিংগী মনুংদা অমনি হায়খি। অচৌবা লাইনিংগী মফম অমা ওইরিবা বরানসীগী শেংলবা ময়োল্লমদা শেমগৎলিবা মচাক মথুমশিং অসিনা লাই খুরুম্বা লাকপা মীশিং শরুক তরা হেনগৎহন্দুনা ঙসিদি মিলিয়ন ৭০ য়ৌরে হায়না মহাক্না পাউদমখি। ভারতনা লমকোইবশিংগী অনৌবা পুক্নিং চিংশিনফমশিং শেমগৎলি হায়রদুনা মহাক্না শঙ্গাখিবা চহি অমগী মনুংদা লম কোইবা মীওই মিলিয়ন ২.৭গী পুক্নিং চিংশিনখিবা, মালেমগী খ্বায়দগী ৱাংবা মীতম ওইরিবা, স্তেচু ওফ য়ুনিতীবু খুদম ওইনা পীখি। হৌখিবা চহি মাপনসিদা ঐখোয়না লৈবাকসিগী তুরিজমগী অপুনবা ইকোসিস্তেম শেমগৎপদা অখন্নবা মীৎয়েঙ থম্লি হায়না প্রধান মন্ত্রীনা হায়খি। “ত্রান্সপোর্ত ইনফ্রাস্ত্রকচরদগী হোস্পিতালিতা সেক্তর অমদি স্কিল দিভেলপমেন্ত ফাওবদা, অমদি ঐখোয়গী ভিজা সিস্তেম ফাওবদা, ঐখোয়না তুরিজম সেক্তরবু ঐখোয়গী রিফোর্মগী মরুওইবা মীৎয়েঙফম ওইনা থম্লি”, হায়না শ্রী মোদীনা হায়খি। হোস্পিতালিতী সেক্তর অসিনা অতৈ সেক্তরশিংগা চাংদম্নবদা নুপী অমদি নহা মশিং হেন্না থবক পীদুনা মসিদা থবক পীনবা, পুম্নমক্কী ওইবা খুন্নাই অমদি শেন্মিৎলোন চাওখৎহন্নবগী মতিং চাউনা লৈ হায়না মহাক্না ফোঙদোকখি। সস্তেনেবল দিভেলপমেন্ত গোলশিং খোঙজেল য়াঙনা ফংনবগীদমক তুরিজম সেক্তরগী মরু ওইববুসু ভারতনা শকখঙলি হায়না প্রধান মন্ত্রীনা হরাওবা ফোঙদোকখি।
গ্রীন তুরিজম, দিজিতেলাইজেসন, স্কিল দিভেলপমেন্ত, তুরিজম এম.এস.এম.ই., অমদি দেস্তেনেসম মেনেজমেন্ত হায়রিবা অমগা অমগা মরী লৈনবা মরুওইবা হীরমশিংসিদা ভারতকী অমদি মালেমগী খা থংবা শরুক্কী প্রাইওরিতীশিংগী মমি তারি হায়না প্রধান মন্ত্রীনা ফোঙদোকখি। শ্রী মোদীনা ইনোভেসনবু মথৌ হাপ্নবগীদমক আর্তিফিসিএল ইন্তলিজেন্স অমদি ওগমেন্তেদ রিএলিতীনচিংবা নৌনা থোরক্লিবা তেক্নোলোজীশিং হেন্না পাক চাউনা শীজিন্ননবা ৱাফম থমখি অমদি ভারতনা লৈবাকসিদা ঙাঙনরিবা তোঙান তোঙানবা লোলশিংগী রিএল-তাইম ৱাহন্থোক পীবা ঙমহন্নবা আর্তিফিসিএল ইন্তলিজেন্সগী লমদা থবক পায়খৎলি হায়খি। লৈঙাক, ওন্ত্রপ্রিন্যুর, ইনভেস্তর অমদি একাদমিয়াশিংগী মরক্তা খুৎশম্ননা চৎমিন্নবনা তুরিজম সেক্তরদা তেক্নোলোজী শীজিন্নববু খোঙজেল য়াঙখৎহনগনি হায়বগী থাজবা মহাক্না ফোঙদোকখি। তুরিজম কম্পেনীশিংগী বিজিনেস রিগুলেসন কোমথোকহন্নবা অমদি ফাইনান্স অমদি স্কিল দিভেলপমেন্ততা শেল থাদবগী লমদা মখোয়গী এক্সেস হেনগৎহনবদা মতেং পাংনবা ৱাফমসু প্রধান মন্ত্রীনা হৌদোকখি।
“তেরোরিজম্না খাইদোকই অদুবু তুরিজম্না পুনশিল্লি”, হায়না প্রধান মন্ত্রীনা ফোঙদোকখি। তুরিজমদা পুন্সিগী শিনফম কয়াদা লৈবা মীওইশিংবু পুনশিন্নদুনা পুকচেল খোইজেল তিন্নবা খুন্নাই অমা শেম্নবগী মতিং লৈ হায়না মহাক্না হায়খি। খ্বায়দগী ফবা থৌওংশিং, কেস স্তদীশিং অমদি পুক্নিং থৌগৎনিংঙাই ওইবা ৱারীশিং পুনশিন্নরিবা অসিগুম্বা মখলগী অহানবা প্লেতফোর্ম ওইরিবা জি২০ তুরিজম দেসবোর্দ অসি য়ু.এন.দব্লিউ.তি.ও.গা খোঙবু ওইদুনা শেমগৎমিন্নরি হায়না শ্রী মোদীনা হরাওবা ফোঙদোকখি। ‘গোৱা রোদমেপ’কী মখাদা খন্ন-নৈনরিবা অসিনা তুরিজমগী অহোংবা পুরকপগী মপাঙ্গল ফুদোকহন্নবগী অপুনবগী থৌওংবু হেন্না মথৌ হাপকনি হায়বগী থাজবা প্রধান মন্ত্রীনা ফোঙদোকখি। “ভারতকী জি২০ প্রেসিদেন্সীগী মোত্তো, ‘বসুদৈব কুতুম্বকম’ – ‘মালেম অমা, ইমুং অমা, তুংলমচৎ অমা’ হায়রিবসি মালেমগী তুরিজমগী মোত্তো অমা অদুমক ওইবা য়াই” হায়না মহাক্না মখা তাখি।
প্রধান মন্ত্রীনা গোৱাগী লাক্কদৌরিবা কুমহৈ সাও জাও কুমহৈগী মরমদা পল্লদুনা, ভারত অসি কুমহৈগী লমদম্নি হায়খি। মথঙ চহিদা পাঙথোক্কদৌরিবা জেনেরেল মীখলগী মতাঙদা পল্লদুনা, প্রধান মন্ত্রীনা মীথুংশিংদা দিমোক্রেসীগী মমা ওইরিবা লৈবাকসিদা মীওই বিলিয়ন অমরোম্না থা অমা চুপ্না দিমোক্রেতিক ভেল্যুশিংদা লৈরিবা মখোয়গী থাজবা চেৎশিনহন্দুনা শরুক য়াগদৌরিবা দিমোক্রেসীগী কুমহৈ অসিবু মীৎয়েঙ তাবিরনবা হায়খি। “ভোতিং বুথ মিলিয়ন অমা হেন্না লৈদুনা, অদোম্না কুমহৈ অসিগী খেন্নবা মশকশিং য়েংননবগী মফমগী অৱাৎপা অমত্তা লৈরোই,” হায়না প্রধান মন্ত্রীনা হায়খি। দিমোক্রেসীগী কুমহৈ মনুংদা ভারত্তা লেঙলক্নবা পাউজেল পীদুনা মহাক্কী ৱারোল লোইশিনখি।
