ঙসি প্রধান মন্ত্রীনা “মীওইবা খুন্নাইগী মীচং মীখায় নাইদবা অমসুং থোঙ মান্নবা তুংলমচৎ অমা- ক্রিতিকেল মিনরেলশিং; লৈবাকমচা তাবা থবক; আর্তিফিসিএল ইন্তিলিজেন্স” হায়বা হিরমদা জি-২০ গী অহুমশুবা সেসন্দা ৱা ঙাংখ্রে। অরুবা তেক্নোলোজিশিং য়োকখৎপগা লোয়ননা মরুওইবা অহোংবা অমা পুরক্নবা প্রধান মন্ত্রীনা তকশিনখ্রে। মহাক্না হায়খি অসিগুম্বা তেক্নোলোজশিং শীজিন্নবা অসি শেন ফংবা খক্তগী মহুত্ত মীওইবগী য়াইফনবা, লৈবাকশিংগী ওইবা খক নত্তনা মালেমগী ওইনবা অমসুং অকক্নবা মোদেলশিং খক ওইবগী মহুত্ত ওপন সোর্ছ ওইগদবনি। মসিগী পান্দম অসি ভারতকী তেক্নোলোজিগী থবকশিংদা চৎনরে অমসুং মসিগী ফলশিংনা কান্নবা য়াম্না পীরে, মসি স্পেসগী থবকশিং, এ.আই নত্ত্রগা দিজিতেল পেমেন্তশিংদা ওইবা য়াই।
আর্তিফিসিএল ইন্তিলিজেন্সগী মতাংদা প্রধান মন্ত্রীনা হায়খি মীওই খুদিংমক খুদোংচাবা ফংহনবা, অপুনবা মীশিংগী থাক্ত স্কিল লৈহনবা অমসুং দাইত্ব লৈনা শীজিন্নবদা ভারতকী থবকশিং য়ুম্ফম ওইরি। ইন্দিয়া-এ.আই মিসনগী মখাদা, লৈবাক অসিগী মীওই খুদিংমক এ.আইগী কান্নবশিং ফংহন্নবা পান্দমগা লোয়ননা অৱাংবা থাক্কী কম্পুতিং কেপাসিতি শেমগৎলি। এ.আই মালেমগী য়াইফনবা থবক্ত শীজিন্নগদবনি। অরোন-অথুপ লৈতবা, মীওইবগী অশোইবশিং য়েংশিনবা, অশোই-অঙাম থোক্তনবা দিজাইন তৌবা অমসুং লান্নবা শীজিন্নবা থিংবগী ফিদমশিংদা য়ুম্ফম ওইদুনা মালেমগী য়ানবা অমা পুরক্কদবনি। এ.আইনা মীওইবগী তৌবা ঙম্বশিং হেনগৎহনগদবনি, অরোইবা ৱারেপশিং মীওইবা মশানা লৌজগদবনি। ‘ সর্ভজনম হিত্য, সর্ভজনম সুখ্য’ (খুদিংমক য়াইফনবা, খুদিংমক হরাওনবা) হায়বা থিমদা ফেব্রুৱারি ২০২৬ দা ভারতনা এ.আই ইম্পেক্ত সম্মিৎ য়ুম্বু ওইগনি অমসুং মসিদা জি-২০ লৈবাকশিং শরুক য়ানবা চেপাউ পীজরি।
প্রধান মন্ত্রীনা হায়খি আর্তিফিসিএল ইন্তিলিজেন্সগী যুগ অসিদা, ঐখোয়গী থৌওংশিং ‘ঙসিগী থবকশিং’ দগী ‘হয়েংগী তৌবা ঙম্বশিং’দা য়াংনা হোংবগী তঙাইফদবা অমা লৈরে। ন্যু দিল্লি জি-২০ মীফমদা হৈথোই-শিংথোইবা মীওইশিং চৎথোক-চৎশিনগী থবক শিংথাবা য়ানা পায়খৎখ্রে অমসুং লাক্লিবা চহিশিংদা হৈথোই-শিংথোইবা মীওইশিং চৎথোক-চৎশিনগী মতাংদা মালেমগী ঙাক্লৌ অমা শেমগদবনি।
ভারতকী পাউজেল অমসুং থাজবদি মালেমগী য়াইফনবনি-তুংকোইনা চৎনবা য়াবা চাউখৎপা, থাজবা য়াবা ললোন-ইতিক, নিয়ম চুম্বা ফাইনান্স অমসুং মীওই খুদিংমক নুংঙাই য়াইফবা চাউখৎপগীদমক ভারতনা লেপ্লি হায়না ফোঙদোকপগা লোয়ননা প্রধান মন্ত্রীগী ৱারোল লোইশিনখি।
