ঙসি প্রধান মন্ত্রী শ্রী নরেন্দ্র মোদীনা জোরদানগী নিংথৌ অবদুল্লাহ সেকেন্দগা উনখ্রে। অল হুসেনিয়া পেলেসতা থুংলবদা, মহাক্না জোরদানগী নিংথৌ অবদুল্লাহ সেকেন্দনা তরাম্না ওকখি অমসুং চৎনবীগী মতুংইন্না ওকপগী থৌরম অমা পাংথোকখি।
লুচিংবা অনি অকক্নবা অমসুং মীহুৎ কাংবুগী থাকশিংদা উনখি। মমাঙদা উনখিবশিং অমসুং ৱারি শানখিবশিং মখোয়না নিংশিংনখি অমসুং লৈবাক অনিগী মরক্ত লৈনরিবা অফবা অমসুং পুৱারি ওইরবা মরীশিং খন্নখি। লৈবাক অনিগী মরক্ত কুতিনিগী মরী লৈনরকপা চহি ৭৫ মপুংফারকপগী শরুক অমা ওইনা খোঙচৎ অসি পাংথোকপা মখোয়না পনখি, মসি পুৱারি ওইরবা খোঙচৎনি। ভারত-জোরদানগী মরীশিং মখা তানা ফগৎনবা মহাক্না পাংথোকখিবা থবকশিংগীদমক প্রধান মন্ত্রীনা জোরদানগী নিংথৌ থাগৎপা ফোঙদোকখি। ভারতনা তেরোরিজমগী মথক্ত চৎথরিবা লাল নিংথৌনা মপুংফানা শৌগৎপা ফোঙদোকখি অমসুং মখল খুদিংমক্কী তেরোরিজম অমসুং মসিগী থবকশিং য়াম্না কন্না য়ানিংদবা ফোঙদোকখি। নিংথৌগী লমজিং মখাদা তেরোরিজম, এক্সত্রিমিজম অমসুং রেদিকেলাইজেসন লাকশিল্লিবা অমসুং মালেমগী শান্তি পুরক্নবা পায়খৎলিবা থবকশিং প্রধান মন্ত্রীনা থাগৎপা ফোঙদোকখি। ললোন-ইতিক অমসুং শেন থাদবা; দিফেন্স অমসুং সেকুরিতি; রিন্যুএবল ইনর্জি; হার অমসুং লৌউ-শিংউ; ইন্নোবেসন, আই.তি অমসুং দিজিতেল তেক্নোলোজিশিং; ক্রিতিকেল মিনরেলশিং; ইনফ্রাষ্ট্রকচর; হকশেল অমসুং ফার্মা; লাইরিক-লাইশু অমসুং কেপাসিতি; তুরিজম অমসুং হেরিতেচ; অমসুং নাৎ অমসুং মীগা মীগা লৈনবা মরীশিংদা লৈবাক অসি মখা তানা পুন্না থবক তৌমিন্ননবা লম্বীশিং লুচিংবা অনিনা খন্নখি। জোরদনা ভারতকা ললোন-ইতিক পাংথোকপা অহুমশুবা খ্বাইদগী চাউবা লৈবাক ওইনা, মথং চহি ৫ দা লৈবাক অনিগী ললোন-ইতিক য়ু.এস দোল্লার বিল্লিয়ন ৫ দা হেনগৎহন্নবা পান্দম থম্নবা প্রধান মন্ত্রীনা হৌদোকখি। জোরদানগী দিজিতেল পেমেন্ত অমসুং ভারতকী য়ুনাইতেদ পেমেন্ত ইন্তরফেস (য়ু পি আই) গী মরক্ত পুন্না থবক তৌমিন্ননবসু প্রধান মন্ত্রীনা ফোঙদোকখি। জোরদান ভারত্ত হার পীবা মরুওইবা লৈবাক অমনি অমসুং ভারতকী দরকার ওইবা ফোস্পেৎ হার পীনবা জোরদানদা মখা তানা শেন থাদনবা লৈবাক অনিমক্কী কম্পেনিশিং খন্নখি।
লুচিংবশিংনা লমদম লমদমগী অমসুং মালেমগী থৌদোক-ৱাথোকশিংগী মতাংদা খন্নখি। লমদম অসিদা শান্তি অমসুং তুংদু-লৈতবা হঞ্জিল্লকপগী মরুওইবা মখোয়না অমুক হন্না খন্নখি। লমদম অসিদা তুংকোইনা শান্তি পুরক্নবা পায়খৎলিবা থবকশিংদা ভারতনা শৌগৎপা প্রধান মন্ত্রীনা অমুক হন্না ফোঙদোকখি।
খোঙচৎ অসিদা, নাকল অনিনা নাৎ, রিন্যুএবল ইনর্জি, ঈশিংগী থবকশিং, দিজিতেল পব্লিক ইনফ্রাষ্ট্রকচর অমসুং পেত্রা অমসুং ইল্লোরাগী মরক্ত তুইনিং এগ্রিমেন্তগী হিরমশিংদা এম.ও.য়ুশিং য়ানবা পুরকখ্রে। হায়রিবা এগ্রিমেন্তশিং অদুনা ভারত-জোরদানগী মরীশিং ফগৎহনগনি। ৱারি শানরবা মতুংদা প্রধান মন্ত্রী ইকায়খুম্নবা উৎতুনা জোরদানগী নিংথৌ অবদুল্লাহ সেকেন্দনা চাক্লেন অমা শীনখি। ভারত্ত লাক্নবা প্রধান মন্ত্রীনা জোরদানগী নিংথৌ অবদুল্লাহ সেকেন্দদা চেপাউ পীখি অমসুং মহাক্না য়াখ্রে।
