জনুৱারী ১৮দা বাইব্রেন্ত গুজরাত গ্লোবেল সমিৎ-২০১৯গী নাকলদা প্রধান মন্ত্রী নরেন্দ্র মোদীনা উজবেকিস্তানগী রাস্ত্রপতিগা সাভকাত মিরজিয়োয়েভকা নাকল অনিগী ওইনা উনখ্রে। মসিগী মমাংদা, জনুৱারী ১৭তা রাস্ত্রপতিগা মিরজিয়োয়েভনা অৱাংবা থাক্কী মীহুৎ কাংবু অমা লুচীংদুনা গান্ধীনগরদা থুংলবদা গুজারাতকী রাজ্যপাল ও পি কোহলিনা তরাম্না ওকখি।
উনবা অদুদা প্রধান মন্ত্রী মোদীনা রাস্ত্রপতিগা মিরজিয়োয়েভ অমসুং মহাক্কী মীহুৎ কাংবু অদু গুজরাত্ত তরাম্না ওকখি।
২০১৮গী সেপ্তেম্বর ৩০দগী ওক্তোবর ১ ফাওবদা রাস্ত্রপতিগা মিরজিয়োয়েভ ইকোন কোন্ন ভারত্তা লাক্লম্বা খোঙচৎ অদু মখোয় উনখ্রেবা অদু নৌহৌননা নীংশিংখি। খোঙচৎ অদুদা লৌখিবা ৱারেপশিং থবক ওইনা পাংথোকপগীদমক প্রধান মন্ত্রীনা মহাক্কী অপেনবা ফোংদোকখি। খোঙচৎ অদুদা উজবেকিস্তানগী অন্দিজান লমদম অমসুং গুজরাতকী মরক্ত মতেং পীন্নবা এম ও য়ু খুৎয়েক পীনখিবা অদু নীংশিংলদুনা প্রধান মন্ত্রী নরেন্দ্র মোদীনা উজবেক্কী মীহুৎ কাংবু অদুদা অন্দিজান লমদমগী রাজ্যপাল য়াওরকপা অদু পনখি অমসুং রাস্ত্রপতিগা মিরজিয়োয়েভকী খোঙচৎ অসিনা মরম ওইদুনা উজবেকিস্তান অমসুং ভারত অনিগী মরক্ত অমসুং অন্দিজান অমসুং গুজরাত অনিগী মরক্ত লৈনরিবা মরি মখা তানা কনখৎহল্লগনি হায়না পনখি।
২০১৯গী জনুৱারী ১২-১৩দা উজবেকিস্তানগী সামরকান্দদা ফোরেন মিনিস্তরগী থাক্ত অহানবা ইন্দিয়া-সেন্ত্রেল এসিয়া দাইলোগ পাংথোকপদা মহাক্না মতেং পাংবগীদমক প্রধান মন্ত্রী মোদীনা রাস্ত্রপতিগা মিরজিয়োয়েভ থাগৎখি। মীফম অদুদা অফগানিস্থানদা শান্তি অমসুং চাউখৎপা পুরক্নবা শৌগৎনব মরুওইবা ৱাফম কয়া খন্নখি।
বাইব্রেন্ত গুজরাত সমিৎ শরুক য়ানবা চেবাউ পীরকপগীদমক রাস্ত্রপতিগা মিরজিয়োয়েভনা প্রধান মন্ত্রী থাগৎখি। ভারত্তা শেন হেন্না থাদনবা উজবেকিস্তান্না য়াম্না লুম্না লৌরি হায়না প্রধান মন্ত্রীদা মহাক্না পাউমখি। আই তি, ইজুকেসন, ফার্মাসিউতিকেলস, হকশেল, লৌউ-শিংউ, তুরিজম অমসুং অতৈ মরুওইবা সেক্তরশিংদা ভারতকা মতেং পীন্নবা হোৎনরি হায়না মহাক্না মখা তাখি।
অহানবা ইন্দিয়া-সেন্ত্রেল এসিয়া দাইলোগ মাইপাক্না পাংথোকপগীদমক রাস্ত্রপতিগা মিরজিয়োয়েভনা প্রধান মন্ত্রী থাগৎখিঅমসুং মসিনা ময়াই থংবা এসিয়া লমদমদা ভারতকী মরুওইবা অদু হেনগৎহল্লগনি অমসুং অফগানিস্তানদা শান্তি থম্না পু্ন্না থবক তৌমিন্নবগী মরুওইবা অদু পনখি।
ভারতকী দরকার ওইবা ইনর্জি ফংনবা মতম শাংনা য়ুরানিয়ম ওর কন্সেনত্রেদশিং ভারতকী এতোমিক ইনর্জি বিভাগ অমসুং উজবেকিস্তানগী নোভোই মিনরেলস এন্দ মেতাল্লুরজিকেল কম্পেনি অনিগী মরক্ত পীন্নবা য়ানচে খুৎশীন্নবা অদু লুচীংবা অনিনা শরুক য়াখি।
এক্সপোর্ত ইমপোর্ত বেঙ্ক ওফ ইন্দিয়া অমসুং উজবেকিস্তান সরকার অনিগী মরক্ত য়ু এস দোল্লর মিলিয়ন ২০০গী লাইন ওফ ক্রেদিৎকী য়ানচে অমা খুৎয়েক পীনবা অদু লুচীংবা অনিনা তরাম্না ওকখি। রাস্ত্রপতিগা মিরজিয়োয়েভনা ভারত্তা লাক্লম্বা খোঙচৎ মনুংদা প্রধান মন্ত্রী নরেন্দ্র মোদীনা মাংজৌননা উজবেকিস্তানগী ওইনা য়ু এস দোল্লর মিলিয়ন ২০০গী লাইন ওফ ক্রেদিৎ লাওথোকখ্রবনি।
