য়োর এক্সিলেন্সী রাষ্ট্রপতি মেহমুদ অব্বাস
পেলেস্তাইন অমসুং ভারতকী মীহুৎশিং,
মীদিয়াগী মীহুৎশিং, ইচল-ইচে অমসুং মরূপ-মপাংশিং,
সবাহ অল-খের [গুদ মোর্নিং]
ভারতকী প্রধানমন্ত্রী অমগী অহানবা খোংচৎ ওইনা রামল্লাদা লাকপা অসি নুঙাইবা ৱাফম্নি ।
রাষ্ট্রপতি অব্বাসনা, ঐহাকপু ইকায় খুম্নবিদুনা ফোংদোকখিবা ৱাহৈশিং অমসুং ঐহাক অমসুং ঐহাক্কী খোংলোইশিংবু হরাও তয়াম্না ওকপিখিবা অদুগীদমক অদোম্বু থাগৎচরি ।
এক্সেলেন্সী, ঙসি অদোম্না ইফমদা থমোয় শেংনা পেলেস্তাইনগী খ্বাইদগী ৱাংবা ইকাই খুম্নবা অদু লানথোকপিরে । মসি ভারত পুম্বগী চাওথোকচনীংঙাইনি অমসুং ভারতকীদমক্তা পেলেস্তাইনগী মরূপ ওইবা অদুগী খুদম্নি । ভারত অমসুং পেলেস্তাইগী মরক্তা লৈরিবা মতম কুইরবা অমসুং অচেৎপা মরী অদু মতম্না পুদুনা লাক্লে । পেলেস্তাইনগী য়াইফনবা ঐখোয়না পাংলিবা মতেং অসি ঐখোয়গী ফোরেন পোলিসীদা মতম পুম্নমক্তা মকোক্তা লৈরি ।
মরম অদুনা, ঙসি রামল্লা অসিদা ভারতকী মতম কুইনা লোইনরক্লবা মরূপ রাষ্ট্রপতি মেহমুদ অব্বাসকা পুন্না লেপমিন্নবা অসিদা অপেনবা ফাওই । মমাং চহিগী মে থাদা নই দিল্লীগী খোংচৎ মনুংদা মহাকপু তরাম্না ওকচবগী তঞ্জা অদু ঐহাক্না ফংজখি । ঐখোয়গী মরূপ ওইবগী মরী অমসুং ভারতকী মপাং ওইবগী অনৌবা খোংথাং অসিদা ঐহাক নুঙাইবা ফাওই । খোংচৎ অসিদা অবু অমরগী মংফমদা ইকোক নোন্দুনা ইকায় খুম্নজবগী তঞ্জা অদু ফংজরে । মহাক মতম অদুগী মকোকথোংবা লুচীংবশিংগী মরক্তা অমনি । পেলেস্তাইনগী স্ত্রগলদা মহাক্কী থৌদাং অথোইবনি । অবু অমর ভারতকীশু অথোইবা মরূপ ওইরম্মী । ঐহাক্না অমুক হন্না অবু অমরবু ইকোক নোন্না ইকাই খুম্নবা উৎচরি ।
ইচল ইচে অমসুং মরূপ মপাংশিং,
পেলেস্তাইনগী মীয়াম্না লেপ্পা নাইদনা খুদোং চাদবা অমসুং অৱাবা কয়া মায়োক্নরি । ফিভমশিং অসি মায়োক্ননবা নুংগুম্লবা অকনবা পাঙ্গল অদুনা মশক তাক্লি । খুদোং চাদবা অমসুং অৱাবা কয়াগী মরক্তা অদোম্না মাংলোমদা চংশিল্লিবা অসি থাগৎনীংঙাইনি । অদোমগী ৱাখল্লোন অমসুং হেন্না ফবা হয়েংগীদমক অদোম্না থাজবগা লোয়ননা হোৎনরিবা অদুদা ঐহাক্না পুক্নীং থৌগৎচরি । পেলেস্তাইনবু লৈবাক অমা ওইনা শেমগৎলকপদা ভারতনা কুইরবা মতমদগী মখোয়গীদমক লেপ্তুনা লাক্লি । ঐখোয়গী মরক্তা ত্রেনিং, তেক্নোলোজী, ইনফ্রাস্ত্রকচর দিব্লপমেন্ত, প্রোজেক্ত এসিস্তেন্স অমসুং বজেতরী সপোর্তকী লমদা মতেং পীনরি । ঐখোয়গী অনৌবা থৌরাংগী শরুক অমা ওইনা রামল্লাদা ঐখোয়না তেক্নোলোজী পার্ক্কী প্রোজেক্ত অমা পায়খৎলে, হৌজিক মদু শেমগৎ শাগৎপগী থবক চৎথরি । মসি শেম শাবা হেক লোইবগা, থবক ফংহনবদা পুক্নীং থৌগৎপা অদুগুম্লবা স্কিল অমসুং সর্বিস সেন্তরগী মওংদা থবক তৌরগনি ।
রামল্লাদা ইনস্তিত্যুত ওফ দিপ্লোমেসী শেমগৎ শাগৎপদশু ভারতনা মতেং পাংলি । সংস্থান অসিনা পেলেস্তাইনগী নহা ওইরিবা দিপ্লোমেতশিং অদুগীদমক মালেমগী থাক্তা ত্রেনিং ফংনবা মফম অমা ওইরগনি হায়না ঐখোয়না থাজবা থম্লি । খোংচৎ অসিগী মনুং চন্না ঐখোয়না ঐখোয়গী দিব্লপমেন্ত কোওপরেসনবু মাংলোমদা পুদুনা চৎপা অসিদা ঐহাক নুঙাইবা ফাওই । ভারতনা পেলেস্তাইন্দা হকশেল অমসুং এজুকেস্নেল ইনফ্রাস্ত্রকচর অমসুং ৱুমেন এমপৱার্মেন্ত সেন্তর অমদি প্রিন্তীং প্রেস অমা লিংখৎনবা প্রোজেক্তশিংদা শেল থাদখিগনি । বাইলেতরেল থাক্তা ঐখোয়না মিনিস্ত্রীয়েল লেভেল জোইন্ত কমিসন মীতিংগী খুত্থাংদা ঐখোয়গী লৈনরিবা মরী অসি হেন্না চেৎশিনহনবদা য়ানরে ।
অহানবা ওইনা মমাং চহিদা ভারত অমসুং পেলেস্তাইনগী নহা ওইরিবা দেলিগেসনশিংগী মরক্তা একচেঞ্জ তৌনখি । ঐখোয়গী নহাশিংদা শেল থাদবা অমসুং মখোয়গী স্কিল দিবেলপমেন্ত অমসুং মরী লৈনবশিংদা মতেং পাংবা অসি অহানবা খোংথাং অমনি ।
পেলেস্তাইনগুম্না ভারতসু নহা য়াম্না লৈবা লৈবাক্নি । ঐখোয়না ভারতকী নহাশিংগীদমক থম্লিবা এস্পিরেসন অদুমক পেলেস্তাইনগী নহাশিংগী তুংগী য়াইফনবা থম্লি । ঐহাক্না মসি লাওথোকপদা নুঙাইবা ফাওই মদুদি চহি অসিদগী নহাশিং একচেঞ্জ তৌবগী মশিং ৫০দগী ১০০ ওইরগনি ।
ইচল ইচে অমসুং মরূপ মপাংশিং,
ঙসি ঐখোয়না খন্ন নৈনখিবা অদুদা, ঐহাক্না রাষ্ট্রপতি অব্বাসকী মফমদা অমুক হন্না থাজবা পীখি মদুদি ভারতনা পেলেস্তাইনগী মীয়ামগী য়াইফনবা লেপ্লি । ভারতনা পেলেস্তাইনবু তংদু লৈতাবা মনিং তম্বা লৈবাক অমা ওইরক্নবা আশা তৌরি ।
রাষ্ট্রপতি অব্বাস অমসুং ঐহাক্না হৌজিক ওইরিবা লৈবাক মনুংগী অমসুং অকোয়বগী দিব্লপমেন্তা খন্ন-নৈনখি মদুনা পেলেস্তাইনগী শান্তি, সেক্যুরিতীগা মরী লৈনরি । ভারতনা রিজন অসিদা শান্তি অমসুং তংদু লৈতাবা পুরক্নবা চাওনা থাজবা থম্লি ।
য়োর এক্সিলেন্সী, অদোমগী নিংথিজরবা তরাম্ন ওকপগী মতৌ অসিগীদমক লমন তোনশিঞ্জরে । ঐহাক্না ভারতকী প্রজা বিলিয়ন ১.২৫গী মায়কৈদগী পেলেস্তাইন মীয়ামগী চাওখৎপা অমসুং মায়পাকপা অদুগীদমক য়াইফ পাওজেল পীজরি ।
থাগৎচরি ।
