প্রধানমন্ত্রী শ্রী নরেন্দ্র মোদীনা ঙসি মহাক্কী কুনতরেৎ শুবা প্রগতি – আইসিতিদা য়ুম্ফম ওইবা, প্রো-এক্তিব গোবর্নেন্সকীদমক মল্তি-মোদেল প্লেতফোর্ম অমসুং মতম চানা থবক পাইখৎপগী মতাংদা ৱারী ৱাতাইগী থৌরম অমা পাংথোকখ্রে।
হৌজিক ফাওবদা পাংথোকখিবা প্রগতিগী মীফম ২৬ তা লুপা কোতি লাখ ১১ হেনবগী অপুনবা ইনবেস্তমেন্ত অমগা লোয়ননা প্রোজেক্তশিংগী অপুনবা রিভ্যু অমা য়েংখি। সেক্তরশিংগী রেঞ্জ অমদা মীয়ামগী ৱাকৎশিংগী মতাংদা লৌখিবা ৱারেপশিংসু য়েংশিনখি।
ঙসি কুনতরেৎ শুবা মীফমদা প্রধান মন্ত্রীনা রেলৱে, লম্বী-থোং অমসুং পৱার সেক্তরশিংদা ইনফ্রাস্ত্রকচর প্রোজেক্ত নিপালগী প্রোগ্রেসশিং নৌহৌনা য়েংশিনখি। প্রোজেক্তশিং অসি বিহার, ঝার্খন্দ, ছত্তিসগর, মধ্য প্রদেশ, হিমাচল প্রদেশ, উত্তর প্রদেশ, উত্তরাখন্দ, মহারাষ্ট্রা, ওরিষা, চান্দিগর, অন্ধ্র প্রদেশ, দিল্লী, গুজরাত, রাজস্থান, ৱেস্ত বেঙ্গোল, সিক্কিম অমসুং অরুনাচল প্রদেশ য়াওনা তোঙান তোঙানবা রাজ্যশিংদা শন্দোক্লি।
প্রধান মন্ত্রীনা হৌজিক দিস্ত্রিক্ত/রিফরেল হোস্পিতালশিংদা শৈদাংলিবা অনৌবা মেদিকেল কোলেজশিং লিংখৎনবা স্কিমশিং ইমপ্লিমেন্ত তৌবগী প্রোগ্রেস নৌহৌনা য়েংশিনখি।
প্রধান মন্ত্রীনা হায়খি মদুদি ২০১৪ গী এপ্রিল ১৪দগী ২০১৮গী মে ৫ ফাওবা চত্থখিবা গ্রাম স্বরাজ অভিয়ানগী অহানবা ফেজনা খুঙ্গং ১৬,০০০ হেনবদা কেন্দ্র সরকারগী মরুওইবা স্কিম তরেৎ মায় পাক্না ইমপ্লিমেন্ত তৌবদা চাওনা মায় পাকপা ফংখি। গ্রাম স্বরাজ অভিয়ানগী অনিশুবা ফেজ অসি শোত্থরিবা জিলাশিংদা লৈরিবা খুঙ্গং ৪০,০০০ হেনবদা হৌজিক চত্থবা হৌরে হায়না মহাক্না ফোংদোকখি। মসিগা মরি লৈননা আগস্ত ১৫ ফাওবদা খ্বাইদগী ফবা ওইথোকপা য়াবা মহৈশিং ফংনবগী মায়কৈদা থবক তৌনবা মহাক্না কেন্দ্র সরকার অমসুং রাজ্য সরকার অনিমক্কী ওফিসার পুম্নমক্তা খংহনখি।
সৌভাগ্য য়োজনাগী মখাদা হৌজিক ফাওবগী প্রোগ্রেস অদুদা প্রধান মন্ত্রীনা থাগৎপা ফোংদোকখি অমদি লেপখিবা মতমগী মনুংদা ইমুং কোতি ৪ দা ইলেক্ত্রিসিতি কনেক্সন ফংহন্নবগী তার্গেৎ অদু ফংনবা হোৎনবা য়াবা পুম্নমক হোৎননবা হায়খি।
