প্রধান মন্ত্রী, শ্রী নরেন্দ্র মোদীনা মার্চ ১৭কী নুংমিৎয়ুংবা পুং ১২ তাবা মতমদা ভিদিও কনফরেন্সিংগী খুত্থাংদা লাল বহাদুর শাস্ত্রি নেস্নেল একাদমী ওফ এদমিনিস্ত্রেসন (এল.বি.এস.এন.এ.এ.)দা ৯৬শুবা কম্মন ফাউন্দেসন কোর্স লোইশিনবগী থৌরমদা ৱা ঙাংগনি। প্রধান মন্ত্রীনা অনৌবা স্পোর্ত কমপ্লেক্স অমা শঙ্গাবগা লোয়ননা হেপ্পী ভেলী কমপ্লেক্সপুসু লৈবাক মীয়ামদা শিন্নগনি।
৯৬শুবা ফাউন্দেসন কোর্স অসি মিসন করমায়োগীগী ৱাখল্লোন্দা য়ুম্ফম ওইবা অনৌবা পেদাগোজী অমসুং কোর্স দিজাইনগা লোয়নবা এল.বি.এস.এন.এ.এ.দা চত্থবা অহানবা কম্মন ফাউন্দেসন কোর্স অমনি। বেৎচ অসিদা সর্ভিস ১৬ অমসুং রোয়ল ভুতান সর্ভিসেস ৩ (এদমিনিস্ত্রেতিব, পুলিস অমসুং ফোরেস্ত)দগী ও.তি. ৪৮৮না শরুক য়াবনি।
নহারোলশিংনা অয়াম্বা ওইবা বেৎচ অসিগী অনৌবা থৌওং অমসুং নুংঙাইবা থবক পাংথোক্নিংবগী ইথিলবু মতিক চানা শিজিন্ননবগীদমক্তা মিসন করমায়োগী ৱাখল্লোন্না লমজিংবা কোর্স অমগী মওং শেমখিবনি। সবকা প্রয়াসকী ইথিলগা লোয়ননা পদ্মা এৱার্দ ফংলবশিংগা ৱারী-ৱাতাই শাবা অমসুং ভারতকী খুঙ্গংগী মপুং ওইবা থৌওং কয়া থেংনহন্নবা খুঙ্গংশিংদা চৎপগী খুত্থাংদা ওফিসর ত্রেনীশিংবু মহৈরোই/নাগ্রিক্তগী মীয়ামগী তসেংবা সেবা তৌবা মীওইদা ওন্থোকপা হায়বসিদা অহেনবা মিৎয়েংসু থম্লি। ওফিসর ত্রেনীশিংনা মনুং হঞ্জিনবা/ঙমখৈগী মফমশিংদা লৈবা মীওইশিংনা থেংনরিবা খুদোংচাদবশিংবু তসেংনা খঙনবগীদমক্তা মফমশিং অসিদা চৎখি। লেপ্তনা থাক খায়দুনা মহৈ তম্বা অমসুং ইশানা লমজিংদুনা মহৈ তম্বগী ৱাখল্লোনগা মরী লৈননা করিকলম অসিগীদমক্তা মোদ্যুলার এপ্রোচ ইনখি। ত্রেনীশিংবু ‘পরিখানা অরুম্বা পোৎলুম পীবা’ মতৌদগী ‘থৱাই য়াওবা অমসুং নহা ওইবা সিভিল সর্ভেন্ত’ অমদা ওন্থোকপগী থৌওংবু ঙাক্লৌ পীনবগীদমক্তা হেল্থ তেস্তকী মথক্তা ফিৎনেস তেস্তশিংসু পাংথোকখি। ওফিসর ত্রেনী ৪৮৮ খুদিংদা ক্রাব মাগাগী অহানবা থাক্কী ত্রেনিং অমসুং তোঙানবা মশান্না কয়াগী ত্রেনিংসু পীখি।
