ঐহাক্না নখোয় পুম্নমক্না ঙাংবা ৱাশিং তাবদা য়াম্না নুংঙাইবা পোকই অমসুং ঙসি ঐহাক্কা মন্ত্রী ওইমিন্নরিবা পীয়ুসজী, সঞ্জয়জী, অমসুং অতৈশিংনা ঐখোয়গী ইরক্তা য়াওবদা ঐহাক্না নুংঙাইবা পোকচৈ। লৈবাক শিনবা থুংবদগী ‘তোইকাথোন’দা শরুক য়ারিবা মরুপশিং, মশক নাইবা মীওইশিং অমসুং ঙসি প্রোগ্রাম অসি য়েংলিবশিং...
য়েংঙু ঐখোয়গীসিদা হায়না লৈ – ‘সাহসে খলু শ্রী: ৱসতি’ হায়বদি থৌনা খক্তদা নুংঙাই য়াইফবা ঙম্মি হায়বনি। শীংনবনা থল্লবা মতম অসিদা অহানবা তোইকাথোন পাঙথোক্লিবা অসিনা মসিগী ৱাখল্লোন অসি হেন্না মপাঙ্গল কনখৎহল্লি। ঐখোয়গী পীক্লিবা মরুপশিংদগী হৌরগা, ওজাশিং, স্তার্ত-অপশিং অমসুং ওন্তাপ্রিনোশিংনা ‘তোইকাথোন’ অসিদা থৱায় য়াওনা শরুক য়াখি। অহানবা ওইনা তীম লিশিং অমা মখাই হেনবনা গ্রান্দ ফিনালেদা শরুক য়ারি মসিমক্না আশানা থল্লবা তুংলমচৎ অমা লৈ হায়বা তাক্লি। মসিনা শান্নপোৎশিং অমসুং গেমশিংগী মতাংদা আত্মনির্ভর ভারত অভিয়ানসু মপাঙ্গল কনখৎহল্লি। মসিদা মরুপ খরদগী য়াম্না ফবা আইদিয়াশিংসু থোরকখি। ঐহাক্কী মরুপ খরগা ৱারী শাবগী খুদোংচাবসু ঐহাক্না ফংকি। মসিগীদমক ঐহাক্না অমুক হন্না নুংঙাইবা ফোঙদোকচরি।
মরুপশিং,
হৌখিবা চহি ৫-৬ অসিদা হেকাথোন্না লৈবাক অসিগী সমস্যাশিং কোকহন্নবা অচৌবা প্লেৎফোর্ম অমা ওইদুনা লাকখি। মসিগী নুংগী ওইবা ৱাখল্লোন অদুদি – লৈবাক অসিগী তৌবা ঙম্বা অদু পুথোকপা, মদুগী মীদিয়ম অমা পীবনি। লৈবাক অসিগী শীংনবশিং অমসুং সোল্যুসনশিংগা ঐখোয়গী নহারোলগা হকথেংননা কন্নেক্ত তৌহন্নবা হোৎনখি। কন্নেক্ত অসিনা মপাঙ্গল কল্লবা মতমদা ঐখোয়গী নহারোলগী শক্তিগী হৈশিংবা অদুসু মাংদা থোরকই অমসুং লৈবাক অসিদা হেন্না ফবা সোল্যুসনশুংসু ফংঙি। লৈবাক অসিগী অহানবা ‘তোইকাথোন’গী পান্দমসু মসিনি। ঐহাক্না নীংশিংলি মদুদি ঐহাক্না শান্নপোৎশিং অমসুং দিজিতেল গেমিংগী লমদা আত্মনির্ভর ওইনবা অমসুং লোকেল সোল্যুসনগীদমক নহা ওইরিবা মরুপশিংদা অপীল তৌখি। মসিগী পোজিতিব রেস্পোন্স অমা লৈবাক অসিদা উবা ফংলি। অদুম ওইনমক মীওই খরনা মসিদা শান্নপোৎ খক্তনি লৈরিবা মসিগী মতাংদা য়াম্না হকচিন্না খন্ন-নৈনবগী করি মথৌ তাবগে? হায়না ফাওবসু য়াওরি। তশেংবদি, শান্নপোৎশিং, গেমশিং, ঐখোয়গী পুক্নিং-ৱাখলগী পাঙ্গল, ঐখোয়গী ক্রিএরিবিতী অমসুং ঐখোয়গী শেন্মীৎলোন হায়রিবা অসিদা অকাইবা থোকহনবা লম কয়া লৈ। মরম অসিনা হীরমশিং অসিগী মরমদা ৱারী শান্নবসু চপ মান্ননা মরু ওই। ঐখোয় পুম্নমক্না খংঙি মদুদি করিগুম্বা অঙাংশিংগী অহানবা মহৈলোইশঙ অসি ইমুং-মনুংনা ওইরবদি, অহানবা লাইরিক অমসুং অহানবা মরূপ অসি মসিগী শান্নপোৎশিং অসিনা ওইগনি। অঙাংশিংনা খুন্নাইগা অহানবা ওইনা পাউ ফাওনবা অসি শান্নপোৎশিং অসিগী খুত্থাংদা ওই। অদোমনা উবিরম্লগনি মদুদি অঙাংশিংনা শন্নাপোৎশিংগা ৱারী শান্নদুনা লৈম মখোয়দা ইনস্ত্রক্সন পী, মখোয়দা থবক তৌহল্লি। মরমদি মসি অমরোমদা খুন্নাই অসিদা মখোয়গী পুন্সি হিংবগী অহৌবা অমা ওইরি। অসুম্না শান্নপোৎশিং, বোর্দ গেমশিং অসি মখোয়গী স্কুলগী পুন্সিদসু মরু ওইবা সরুক অমা তপ্না-তপ্না ওইরকই, মসি তাকপী-তম্বীবগী মীদিয়ম অমা ওইরকই। মসিগী মথক্তা শান্নপোৎশিংগা মরী লৈনবা অতোপ্পা য়াম্না চাউবা লম অমা লৈ, মসি মীপুম খুদিংমক্না খঙবা মথৌ তাই। মসি শান্নপোৎশিং অমসুং গেমিংগী লমগী শেন্মীৎলোন – তোইকোনোমী অদুনি। ঙসি ঐখোয়না ৱারী শাবা মতমদা গ্লোবেল তোই মার্কেৎ অসি দোলর বিলিয়ন ১০০গী ময়া নক্না লৈ। মসিদা ভারতকী শরুক অসি শুপ্নগী দোলর বিলিয়ন অমা মখাইগী ময়া নক্না লৈ। ঙসি ঐখোয়গী মথৌ তাবগী মতুং ইন্নসু শান্নপোৎকী চাদা ৮০গী ময়া মপালদগী পুশিল্লক্লি। হায়বদি মসিদা লৈবাক অসিদগী লুপা করোর কয়া মাপলদা চৎহল্লি। মসিগী ওইরিবা ফীভম অসিদা অহোংবা পুরকপা য়াম্না মথৌ তাই অমসুং মসি স্তেতিস্তিক্সকী ৱা খক্তা নত্তনা সেক্তর অসিনা হৌজিকমক চাউখৎপা পুরক্নবগী খ্বাইদগী মরু ওইরিবা লৈবাক অসিগী শরুক য়াদুদা য়ৌহনবা ঙম্বগী মতিক ময়াই লৈ। খুঙ্গং, লায়রবা, দলিৎ, ত্রাইবেল মীয়াম মশিং য়াম্না য়াওবা শান্নবগা মরী লৈনবা ঐখোয়গী স্মোল-স্কেল ইন্দস্ত্রী, ঐখোয়গী কলা, ঐখোয়গী আর্তিসেনশিং লৈজৈ। কম্পনীশিং অসিনা ঐখোয়গী অরিবা চৎনবী, ঐখোয়গী সংস্কৃতিবু য়োকখৎতুনা মখোয়গী মমল য়াম্লবা কলাগা লোইননা মখোয়গী য়াম্না অকক্নবা রসোর্সশিং অসিগা লোইননা মখোয়না শান্নপোৎশিং শারি। মসিদসু ঐখোয়গী ইচে-ইচল, ঐখোয়গী ইচানুপীশিংনা অচৌবা থৌদাং অমা লৌরি। শান্নপোৎকা মরী লৈনবা সেক্তর চাউখৎলকপদা অসিগুম্বা নুপীশিংগা লোইননা অরাপ-অরাপ্পা মফমশিংদা লৈরিবা ঐখোয়গী ত্রাইবেলশিং অমসুং লায়রবা মরুপশিংদসু চাউনা কান্নবা ফংগনি। অদুবু মসি ঐখোয়গী লোকেলগী শান্নপোৎশিং অসিগী ভোকেল তৌবা মতমদা খক্তা ওইথোক্কনি, লোকেলগীদমক ভোকেল তৌবা মথৌ তাই অমসুং মখোয়বু হেন্না ফগৎহন্নবা, গ্লোবেল মার্কেৎতা চাংদম্নবা ঙম্বগী থাক্তা য়ৌহন্নবা ঐখোয়না থৌনা হাপকনি। মসিগীদমক অনৌবা মোদেলশিং পুথোক্নবা অনৌবা ৱাখল্লোন পুথোকপদগী শেল থাদরক্নবা হোৎনবা য়াম্না মরু ওই। অনৌবা আইদিয়াশিং ইনক্যুবেৎ তৌবা মরু ওই। করম্না অনৌবা স্তার্ত-অপশিং থৌগৎকনি অমসুং ত্রেদিস্নেল তোই করম্না শাগনি, করম্না অনৌবা তেক্নোলোজী, অনৌবা মার্কেৎ দিমান্দ লৈহনগনি হায়বা অসিসু মথৌ তাই। মসিগী ৱাখল্লোনা অসিনা ‘তোইকাথোন’গুম্বা থৌরমদা ইথিল পীরি।
মরুপশিং,
মমল অহোংবা দেতা অমসুং ইন্তরনেত চাউখৎলকপনা ঙসি লৈবাক অসিগী খুঙ্গং কয়া য়ৌশিন্দুনা লৈবাক অসি দিজিতেল ওইনা কন্নেক্ত তৌরি। অসিগুম্বা ফীভম অসিদা ফিজিকেল গেম অমসুং শন্নাপোৎশিংগা লোইননা ভর্চ্যুএল, দিজিতেল অমসুং ওনলাইন গেমিং অনিমক্তা লৈরিবা ভারতকী মতিক ময়াই অসি লেপ্তনা হেনগৎলক্লি। অদুবু ঙসি মার্কেৎতা ফংলিবা ওনলাইন নত্ত্রগা দিজিতেল গেমশিং অসিগী মনুংদা অয়াম্বগী কনসেপ্ততি ভারতকী ওইদে, ঐখোয়গী ৱাখল্লোনগা চান্নদে। মসিদা য়াওরিবা অয়াম্বা গেমশিংগী কনসেপ্ত অসি ভাইওলেন্স থৌগৎপা নত্ত্রগা মেন্তেল স্ত্রেস ওইনবগী মরম ওইরি হায়বা নখোয়নসু খঙলে। মরম অসিনা মসিগী অতোপ্পা কন্সেপ্ত দিজাইন তৌবা অসি ঐখোয়গী থৌদাংনি, মসি ভারতকী খ্বাইদগী অফবা ৱাখল্লোন অদুদা য়ুম্ফম ওইহনগদবনি, মসি অউনবা মীওইবা খুন্নাইগী য়াইফনবগা মরী লৈনহনগদবনি, মসি তেক্নিকেল ওইনা খ্বাইদগী ফবা ওইগদবনি, মসিদা নুংঙাইবা অমসুং হকচাং ফনা থম্বা হায়বা অনিমক অসি থৌগৎকদবনি। কম্পিতিসন মরাং কাইনা লৈ। ঐখোয়না ভারতকী মসিগী শক্তি অসি ‘তোইকাথোন’দা ময়েক শেংনা উবা ফংঙি। মসিদা খল্লবা আইদিয়াদসু মেথ্স অমসুং কেমেস্ত্রীবু লায়থোকহন্নবা কন্সেপ্ত য়াওরি, অমসুং মসিগা লোইননা ভেল্যু বেজ সোসাইতী অসি মপাঙ্গল কনখৎহন্নবা আইদিয়াসু য়াওরি। হৌজিক আই কোঙ্গনিতো গেমিংগী অদোমনা পীরিবা কন্সেপ্ত অসিদা ভারতকী চপ মান্নবা শক্তি অদু য়াওরি। য়োগগা ভি.আর. অমসুং এ.আই. তেক্নোলোজী পুনশিন্নদুনা অনৌবা গেমিং সোল্যুসন অমা মালেমদা পীবা হায়বা অসি য়াম্না অফবা খোঙথাংনি। মসিগা মান্ননা অয়ুর্বদকা মরী লৈনবা বোর্দ গেমশিং অসিসু অরিবা অমসুং অনৌবা নীংথিনা পুনশিন্নরি। মীকুপ খরগী মমাংদা ৱারী ৱাতাই শাবা মতমদা নহারোলশিংনা হায়খিবা অদুগুম্না কম্পিতিতিব গেমশিংনা য়োগ অসি মালেম শিনবা থুংনা য়ৌহনবদা চাউনা মতেং ওইবা য়াগনি।
মরুপশিং,
ঙসি মালেমনা ভারতনা হৌজিক তৌবা ঙম্বা, ভারতকী কলা-সংস্কৃতি, ভারতকী খুন্নাই অসি হেন্না খঙবা পাম্লি। মসিদা ঐখোয়গী শান্নপোৎশিং অমসুং গেমিং ইন্দস্ত্রীনা অচৌবা থৌদাং অমা লৌবা য়াগনি। ঐহাক্না নহা ওইরিবা ইন্নোভেতর অমসুং স্তার্ত-অপ খুদিংদা ৱাফম অমা কাউদনবা হায়জনীংঙি। ভারতকী আইদিয়া অমসুং ভারতনা তৌবা ঙম্বা অদু মালেমদা য়ৌহনবদা নখোয়গী থৌদাং লৈ। নখোয়না ঐখোয়গী এক ভারত, শ্রেস্থা ভারত্তগী হৌরগা বসুধৈবা কুতুম্বকম ফাওবগী ঐখোয়গী লোইবা নাইররোইদবা ৱাখল্লোন অসি হেনগৎহনবসু নখোয়গী থৌদাংনি। ঙসি লৈবাক অসিনা নীংতমখিবগী চহি ৭৫শুবা কুমওন পাল্লন তৌরিবা মতম অসিদা শান্নপোৎশিং অমসুং গেমিংগা মরী লৈনবা ইন্নোভেতরশিং অমসুং ক্রিএতরশিংগী ওইনা অচৌবা খুদোংচাবা অমনি। নীংতম ইহৌগা মরী লৈনবা ৱারী কয়া লৈ, হায়রিবা অসি মাংদা পুথোকপা মথৌ তাই। ঐখোয়গী নীংতম লান্মীশিংগী থৌনা অমসুং লুচিংখিবগী থৌদোক কয়া অদু শান্নপোৎশিং অমসুং গেমশিংগী কন্সেপ্তশিংগী মোদেল ওইহনবা য়াগনি। তুংলমচৎকা ভারতকী মীয়ামগী মরাক্তা অচেৎপা মরী অমা নখোয়না ওইরি। মরম অসিনা ঐখোয়গী ভারত মচা ওইবগী হীরম খুদিংমক হৌগৎলক্লিবা চারোনশিং পুক্নিং চিংশিন্নীংঙাই ওইবা অমসুং ইন্তরেক্তিব ওইবা মওংদা অসিগুম্বা শান্নপোৎশিং অমসুং গেমশিং দিবেলপ তৌবদা ঐখোয়না মীৎয়েং চংবা য়াম্না মরু ওই। ঐখোয়না ঐখোয়গী শান্নপোৎশিং অসি মীয়ামদা শরুক য়াবা, নুংঙাইহনবা অমসুং লৌশিং পীবা ওইহনগদবনি। নখোয়গুম্বা নহা ওইরিবা ইন্নোভেতরশিং অমসুং ক্রিএতরশিংদগী লৈবাক অসিবা ৱাংনা আশা তৌরি। নখোয়গী পান্দমশিংদা শোইদনা মাইপাক্কনি হায়না ঐহাক্না থাজৈ অমসুং নখোয়গী মঙলানশিং অদু মঙফাওনবা ঙম্নবা হোৎনৌ। অমুক হন্না ঐহাক্না নখোয় পুম্নমক্না তোইকাথোন মাইপাক্না পাঙথোকহনবগীদমক থাগৎপা ফোঙদোকচরি অমসুং য়াইফ-মঙ্গোল পীজরি।
থাগৎচরি!
