প্রধান মন্ত্রী নরেন্দ্র মোদীনা ঙসি নুমিৎ য়ুংবা মতমদা বঙ্গলাদেশকী রাস্ত্রপতি শ্রী মুহম্মদ অব্দুল হমিদকা হাইদরাবাদ হাউসতা উনখ্রে।
মীফম মনুংদা লুচিংবা অনিনা লৈবাক অনিগী লৈনরিবা মরীদা অপেনবা ফোংদোক্নখি। ভারতকী খোংচৎতা লাকখিবা রাস্ত্রপতিনা মশা লাকপা ঙমখিদ্রবা প্রধান মন্ত্রী শৈখ হসিনাগী মায়কৈদগী নুংঙাইবা ফোংদোকপগী পাওজেল পীখি। মহাক্না বঙ্গলাদেশ সরকারগী মায়কৈদগী লৈবাক অদুদা লাকপীনবা প্রধান মন্ত্রীগী মফমদা বার্তন তৌখি। বার্তন অদু তরাম্না ওকখি। লুচিংবা অনিমক্না দিপ্লোমেসী চেনেলগী খুত্থাংদা মতম লেপথোক্নবদা য়ানখি।
প্রধান মন্ত্রী শ্রী নরেন্দ্র মোদীনা হায়খি মদুদি বঙ্গলাদেশকী নীং তম্বগী লানফমদা লৈনখিবা লৈবাক অনিগী মরী অদু ভারতকী ওইনা খ্বাইদগী মরু ওইবা ওইরি। হৌখিবা চহী মঙাদা লৈবাক অনিমক্না ঙমখৈ পরিং লেপথোকপনচিংবা পন্দুনা লৈরম্লবা ৱাফম কয়া ৱারোইশিন পুকপদা চাউনা খুমাং চাউশিবা ঙম্লে। প্রধান মন্ত্রীনা বঙ্গবন্ধু শৈখ মুজিবুর রহেমানগী চাম্মা শুবা মপোক কুমওন (২০২০দা পাংথোক্কদৌরিবা) অমসুং ২০২১দা পাংথোক্কদৌরিবা বঙ্গলাদেশনা নীং তমখিবগী ৫০ শুবা কুমওন থৌরমদা পুন্না হোৎনমিন্নবগী শরুক ওইনা ভারত অমসুং বঙ্গলাদেশকী মরী অসি অনৌবা থাক অমদা পুখৎপগী মরুওইবা অদু কন্না পনখি।
বঙ্গলাদেশকী রাস্ত্রপতি ২০১৯গী মে ৩০দা পাংথোকখিবা ভারতকী অনৌবা সরকারগী ৱাশক লৌবগী থৌরমদা শরুক য়ানবা ভারতকী খোংচৎতা লাকখিবনি। শক্নাইরবা মীথুংলেন অসি ২০১৪গী দিসেম্বর থাদা ভারত রাজ্যগী খোংচৎতা লোয়ননা ইন্তর্নেস্নেল সোলর এলাইন্সকী অহানবা মীফমদা শরুক য়ানবগীদমক ২০১৮গী মার্চ থাদা ওফিসিয়েল ওইবা খোংচৎতা ভারত্তা হান্ননা লাকখ্রে।
