মাল্দিব্সকী রাস্ত্রপতিগী ভারত খোংচৎ মনুংদা প্রধান মন্ত্রীনা প্রেস্তা পীখিবা ৱারোল

য়োর এক্সিলেন্সী,

রাস্ত্রপতি সোলিহ,

মাল্দিবতগী লেংবীরকপা ইকাই খুম্নজরবা মন্ত্রীগন লোইননা লেংশিনবীরিবা পুম্নমক,

রাস্ত্রপতি সোলিহ অদোম্বু, শ্রীমতী সোলিহ অমসুং অদোমগী মীহুৎ কাংলুপকী মীহুৎ পুম্নমকপু ভারত্তা তরাম্না ওকচবদা ঐহাক নুংঙাইবা পোকচরি। মাল্দিব রিপব্লিক্কী রাস্ত্রপতিগী ফম পাইরকপদা অদোম্বু অমুক্কা হন্না নুংঙাইবা ফোংদোকচরি। মাল্দিব খক্কীদা নত্তনা, মালেম পুম্বদা দেমোক্রেসিগীদমক অদোমনা লৌখৎপীখিবা খোংথাং অদু তমজনীংঙাইনি। হৌখিবা থাদা অদোম্বু ৱাশক লৌবগী থৌরমদা ঐনা শরুক য়াজখিবা অদু ঐগীদমক্তা নত্তনা, ভারতকীদমক্তা য়াম্না ইকাই খুম্ননীংঙাই ওইবা ৱাফম অমনি। রাস্ত্রপতিগী ফম পাইরবা থা অমগী মনুংদা অদোমগী মপান খোংচৎকীদমক ভারতপু খনবীরে। মসি ঐখোয়গীদমক্তদি য়াম্না ইকাই খুম্নবীবা অমদি চাউথোকচনীংঙাই ওইবা মরম অমনি। অদোমগী খোংচৎ অসিদগী ভারত–মাল্দিবকী মরি অদুগী য়ুম্ফম ওইরিদা চেৎলবা থাজনবা অমসুং মরূপকী মমি অদু উবা ফংলি। ঐখোয়গী মরূপ–মপাং ওইবগী মরি অসি শুপ্নগী ঐখোয়গী লৈফম নক্নরুবা খক্নসু নত্তে। সমুদ্রগী ইথক্না ঐখোয়গী তোর্বান্দশিংবুসু শম্নহল্লি।

পুৱারী, চৎনবী–নাৎ, ললোন–ইতিক অমসুং খুন্নাইগী ওইবা মরি অসিনা ঐখোয়বু মতম পুম্বদা নক্না পুসিনবীরি। লৈবাক অনিগী মীয়ামনা ঙসি দেমোক্রেসীদা মখোয়গী লাইনীং অমসুং থাজবা অসিনা মরক্তা চেৎশিনবা ওইহল্লি। অদোমগী খোংচৎ অসিনা লৈবাক অনিগী মরক্তা মরি অসিগী পুৱারীদা অনৌবা তাঙ্কক অমগী অহৌবা ওইরগনি।

মরূপশা,

ঙসি রাস্ত্রপতি সোলিহগা লোইননা নুংশি চান্নবা অমসুং মরূপ–মপাং ওইবা মওংদা য়াম্না মাই পাক্না ৱারী ময়াম অমা শান্নরে। ঐখোয়না লৈবাক অনিগী মরক্তা থাইনদগী লৈরক্লবা মরি অসি চেৎশিলহন্নবা লোইননা মরূপ–মপাং ওইবগী মরি অসি হেন্না মশক থোকহন্নবগীদমক থম্নখিবা ঐখোয়গী ৱাফম অদু অমুক হন্না পন্নখি।

এক্সিলেন্সী,

অদোমগী সরকারগী পিপল–সেন্ত্রিক দিবেলপমেন্তকী ভিজন অদুবু ঐনা থাঙ্গৈশেংনা থাগৎপা ফোংদোকচরি। অচেৎপা মরূপ অমদি য়ুমলোন্নবা অমা ওইনা মাল্দিবনা চাউখৎনবা থৌনীজরি। মাল্দিবকী মীয়ামগী পুন্সিদা অহোংবা পুরক্নবগীদমক অদোমগী সরকারগী ফিদম্নীংঙাই ওইরবা স্কিমশিং অসিবু মাই পাকহনবদা অমদি মাল্দিবতা চাউখৎ–থৌরাংগী মীওইবগী মশক হায়বদি হ্যুমেন ফেস অদু হেন্না ময়েক শেংহন্নবগীদমক অদোম্না হোৎনরিবা অসিদা, ভারতনা মতম পুম্নমক্তা অদোম্বু শৌগৎচরি।

 
ঐহাক নুঙাইবা ফাওই মদুদি ফোংদোক্লিবা ৱাফমশিং অসিগী মশক ওইনা, মাল্দিবকী খুন্নাইগী–শেনমিৎলোনগী চাউখৎ–থৌরাংগীদমক বজেৎ সপোর্ত, করেন্সী স্বেপ অমসুং কন্সেস্নেল লাইন ওফ ক্রেদিৎ ওইনা, অমেরিকাগী দোলর বিলিয়ন ১.৪গী শেনগী তেংবাং, ভারতনা মাল্দিবতা পীরগনি।

লৈবাক অনিগী মরক্তা কনেক্তিবিতী অসি হেন্না ফগৎহন্নবগীদমক্তসু ভারতনা মপুং ফানা তেংবাং পীগনি। হেন্না ফবা কনেক্তিবিতীদগী গুদ্স অমসুং সর্বিসেস, ইফোর্মেসন, ৱাখল্লোন, চৎনবী–নাৎ অমসুং মীয়াম্না পীথোক–পীশিন তৌনবা হেনগৎহল্লগনি। হকশেল, হ্যুমেন রিসোর্স দিবেলপমেন্ত, ইনফ্রাস্ত্রকচর, এগ্রিকলচর, কেপাসিতী বিল্দিং, আই.সি.তী. অমসুং তুরিজমদসু ঐখোয়না শরুক য়ামিন্নবা অসি হেন্না চেৎশিলহন্নবগীদমক ঐনা রাস্ত্রপতি সোলিহদা থাজবা পীখি। 

ঐখোয়না মথংগী চহি মঙাদা মাল্দিবকী মীয়ামগী ত্রেনিং অমসুং কেপাসিতী বিল্দিংগীদমক্তা অহেনবা সিৎ লিশিং অমা পীনবগীসু ৱারেপ লৌরে। ঐখোয়গী মীয়ামগী মরক্তা নুংশি–চান্নবা অসি ঐখোয়গী মরি অসিগী থোইদোকপা মরম অমনি। মরম অসিনা ঐখোয়না অনৌবা ভিসাগী য়ানা চেরোলদা খুয়েক পীনববু তরাম্না ওক্লি।

মাল্দিবতা অরোন–অথুপ লৈতবা, অরাইবা অমসুং কাংলোনশিংদা য়ুম্ফম ওইবা লৈঙাক্কী ভিজন ভারতকী ললোন–ইতিক তৌরিবশিংদা তরাম্না ওক্নীংঙাই ওইরবা পাউজেল অমা পীজরি। রাস্ত্রপতিজী, ভারতনা চাউথোকচরি মদুদি ঐখোয়গী মরূপ–মপাং ওইরিবা অমসুং য়ুমলোন্নরিবা মাল্দিবনা “এস.দি.সি.”গী থাক্তা ময়াই ওইবা চাগা লাকপা লৈবাক অমা ওইবগী খুদম অদু ঙাক্তুনা থম্লি। অমসুং মাল্দিবকী মাই পাকপা অসি, সস্তেনেবল দিবেলপমেন্ত অমসুং ক্লাইমেৎ চেঞ্জগী অরুবা শিংনবা লৈন লৈননি। মরম অসিনা ভারত অমসুং মাল্দিবগী মরক্তা মেরিতাইমগী কোওপরেসনগী তোঙান তোঙানবা মাইকৈশিংদা অমগা অমগা তেংবাং পীনবা হেনগৎহনবদা ঐখোয়না অয়াবা পীজরি।

এক্সিলেন্সী,

কমনৱেল্থতা অমুক্কা হন্না য়াওননবগী অদোমগী ৱারেপ অদুবু ঐখোয়না তরাম্না ওকচরি। ঐখোয়না মদুদা চেৎনা শৌগৎচরি। ঐখোয়না ইন্দিয়ন ওসিন রিম এসোসিএসন (আই.ও.আর.এ.)গী ইমুং–মনুংদসু অদোম্বু তরাম্না ওকচরি। রাস্ত্রপতি সোলিহ অমসুং ঐনা, মসিদসু য়ানবা ফোংদোক্নখি মদুদি হিন্দ মহাসাগরগী লমদমদা ইং–তপ্পা অমসুং ঙাক–শেল ঙাক্তুনা থম্নবগদমক্তা ঐখোয়না ঐখোয়গী তেংবা পীনবা অসি হেন্না কনশিলহনবগী তঙাইফদবা লৈ। লৈবাক অনিগী শোইদ–ঙামদবা অসি অমগা অমগা মরি লৈনৈ। লমদম অসিদা তংদু লৈতানবগীদমক অমনা অমগী য়াইফনবা অমনা অমগী অৱা নুংঙাইদা ৱাখল চংনবদসু ঐখোয়না য়ানরে।

মসিগা লোইননা, অমনা অমদা অৱাবা পীগদবা অসিগুম্বা থৌওং অমা হেক্তগীদমক্তা ঐখোয়না ঐখোয়গী লৈবাকশিংবু শিজিন্নহল্লোই। ঐখোয়গী লমদমগী চাউখৎ–থৌরাং অমসুং তংদু লৈতাবদা ভারত অমসুং মাল্দিব অনিগী মরক্তা মান্ননা হৈনবী লৈরি অমদি শরক য়ামিন্নরি। ঐনা মাল্দিব অমসুং ঐখোয়গী লমদমদা ভারত অমসুং মাল্দিবকী মরিগী লোইবা নাইদবা ওইথোকপা য়াবশিং অদু মপুং ফানা চাউখৎহন্নবা অসিগুম্বা মঙাল নাইবা তুংলমচৎ অমগীদমক্তা রাস্ত্রপতি সোলিহগা লোইননা পুন্না থবক তৌমিন্নবা পাম্মি। মদুগী কান্নবা অদু মপুং ফানা লৈবাক অনিগী মীয়াম্না অমসুং লমদম অসিগী মীয়ামদা ফংহনবা পাম্মি।

হন্না হন্না থাগৎচরি।