ভারতকী নহাশিং অসিনা লৈবাক অসিবু মথংগী চহি তরাগী খুজিংদা অৱাংবা থাক্তা পুখৎকদৌরিঃ মন কী বাত্তা প্রধান মন্ত্রী

ঐগী নুংশিজরবা ইরৈবাকচাশিং, খুরুমজরি। চহী ২০১৯গী কায়নবগী পুংজা অদু লাক্লে! নুমিৎ হুমনিগী মনুংদা চহী ২০১৯ কায়নরগনি, অদুগা ঐখোয় চহী ২০২০দা চংনশিনবতা নত্তনা অনৌবা চহী তরাগী খুজিংদা চংশিনগদৌরিবনি। ২১শুবা চহীচাগী অহুমশুবা চহী তরাগী খুজিংদা চংশিনগদৌরিবনি। ঐহাক্না ইরৈবাকচাশিংবু চহী ২০২০গী য়াইফ-পাউজেল পীজরি। লাক্কদৌরিবা চহী তরাগী খুজিংদা শুংসোই শোইদ্রবা ৱাফম অমদি লৈবাক অসিগী চাউখৎ খোংজেলদা ২১শুবা চহীচা অসিদা পোকপা মীওইশিংসু য়াওগদৌরি। মখোয়শিং অসি চহী চা অসিগী ৱাফমশিং খঙলগা চাউরক্লবা ঙাক্তনি। নহাশিং অসিবু ঙসি মখল কয়াগী ৱাহৈনা খঙনরি।  মখোয়শিং অসিবু মিলেনিএলস, জেনরেসন জেদ নত্রগা জেন জী হায়রগা খঙনৈ। ময়াম পুম্নমক্না হৌজিক খঙনরবা ৱাফম অমনা মখোয় অসি সেসিএল মীদিয়া জেনরেসন্নি। ঐখোয় পুম্নমক্না থেংনরিবা খঙনরিবা ৱাফমদি মীরোল অসি য়াম্না হৈ শিংই। মখোয়গী মংলানদি করিগুম্না অনৌবা খরা পাংথোকপনি। মখোয়গী মশাগী ওইবা ৱাখল্লোন লৈ। থোইদোক্না নুংঙাইরিবা ৱাফম অমনা, মরুওইনা ভারতকী মরমদা হায়জগে, হৌজিক অসি নহাশিং অসি অনৌবা সিস্তেম অমা হেক হৌদোকপদা, নহাশিং অসি হেক্তমক পামই। পাম্বগা লোইননা মদুবু ফোলো তৌই অদুগা করিগুম্বদা সিস্তেম অদু ফজনা রেস্পোন্স তৌরকতবা তারগদি মখোয় খোয়রাংনৈ অদুগা থৌনা লৈনা সিস্তেম অদুদা ৱাহংসু হংই। ঐহাক্তি মসি য়াম্না ফৈ হায়না খল্লি। ৱাফম অমদি শোইদ্রে, নহাশিং অসি সিস্তেমেতিক ওইদবা অসি য়াম্না পামদে। মখোয়না নুপী নুপা, ঐগী মীগী, কাংলুপ নাইবনচিংবা অসি পামদে। এয়ারপোর্ত নত্রগা সেনিমা হোলনচিংবা মফমশিংদা কনাগুম্বনা ক্যু থুগাইরকপা মতমদা য়ানিংদবা ফোংদোরকপা অসি নহাশিং হেক্তা ওইরম্মি। ঐখোয়না য়াম্না তোইনা থেংনবা ৱাফম অমনা অসিগুম্বা থৌদোক অমা থোকপা মতমদা নহা অমনা খুদক্তা মোবাইল ফোন অমা পুথোক্লগা খুদক্তা ভিদিও অমা হেক্তা শেমই। ভিদিও অদু উনা উনা ভাইরেল ওইরকই, অরানবা তৌরিবা মী অদুসু মথন্তা ইকায়জবা ফাওরকই। ঐহাক্না তৌরিবা অসি য়াম্না লাল্লে হায়বা খঙজরকই, মতৌ অসুম তৌনা নহাশিং অসিনা অনৌবা ৱাখল্লোন অমগা লোয়ননা য়ুগ অমা শেমগৎলি। ঙসি ভারতনা মীরোল অসিদগী আশা কয়া তৌরি, নহাশিং অসিনা লৈবাক অসিবু অৱাংবা থাক্তা পুখৎকদৌরিবনি। স্বামি বিবেকানন্দনা হায়বিরম্মি, মহাক্না হায়বিরম্বা অসি “ঐহাক্না অনৌবা মীরোলবু থাজৈ, মখোয়শিং অসিদগী ঐগী থৌমী থোরক্কদৌরিবনি।” নহাশিংগী মরমদা স্বামিজীনা মখা তানা হায়বিখি, “নহা ওইবা হায়বা মতম অসিগী মমল লেপ্পা ঙমলোই লোইননা মসিবু শিংথাবা ঙম্লোই।” মসি পুন্সিগী খ্বাইদগী মমল য়াম্লবা তাঙ্কক অমনি। ঐখোয়গী তুংগী পুন্সি অসি মতৌ করম্না লেনবগে হেয়বদু নহা ওইরিঙৈগী লেনখিবা পুন্সিগী মখা য়াম্না পোল্লি। বিবেকানন্দজীগী মতুং ইন্না নহা হায়বসি ইনর্জী অমসুং দাইনামিজম্না থল্লি লোয়ননা অহোংবা কয়া পুরক্নবগী থৌনাগা লোয়নৈ। ঐহাক্না থাজৈ, ভারত্তা হন্দক্কী চহী তরাগী তাঙ্কক অসি নহাশিংগী চাউখৎপা পুরকপদা নত্তনা নহাশিং অসিগী তৌবা ঙম্বগী থৌনা অসিনা ভারত চাউখৎপগা লোয়ননা অনৌবা ভারত অমা শেম্বদা মীরোল অসিনা থোইদোক্না শরুক য়াগনি। লাক্কদৌরিবা জনুৱারী ১২, বিবেকানন্দগী মপোক নুমিৎ অসিদা লৈবাক অসিনা নহাশিংগী নুমিৎ পাংথোকপা মতমদা, নহা খুদিংমক্না চহী তরা অসিগী মনুংদা মশাগী ওইবা থৌদাংগী মরমদা শুংশোই শোইদনা ৱাখল খনগদবনি। চহী তরা অসিগীদমক করিগুম্বা খরা শুংশোই শোইদনা ৱাশক্কদবনি।

ঐগী নুংশিজরবা ইরৈবাকচাশিং, কন্যকুমারিদা বিবেকানন্দজীনা লাইনিংলম্বা নুংজাও অদুদা শাবা রোক মেমোরিএল অদু চহী য়াঙ্খৈ মপুং ফারে। হৌখিবা চহী ৫০ অসিদা মফম অসি ভারতকী ওইনা চাউথোকচবা মফম অমা ওইনা লৈরক্লি। কন্যকুমারি অসি লৈবাক অসিগী অমদি মালেম অসিগী ওইনা পুক্নিং চিংশিনবা মফম অমা ওইনা লৈরক্লি। জাতি অসিবু নুংশিজবা মীওইশিংগীদমক মফম অসি লাইফম অমগী মশক ওইরি। স্বামিজীগী নিংশিং খুভম অসিনা লম কোইবা লাকপী মীওই খুদিংমক্কী পুক্নিংদা ইরৈবাকপু নুংশিবগী ৱাখল্লন পোকহল্লি। লৈত লাইরশিংবু মতেং পাংবা হায়বা লাইশোল অসি পাংথোক্নবগী লম্বেল তাক্লি। মফম অদুদা চৎলুবা মীপুম খুদিংমক্কী পুক্নিংদা লৈবাক অসিগীদমক করিগুম্বা খরা পাংথোক্নিংবগী ৱাখল ফাওহল্লি।

ঐখোয়গী ইকায় খুম্নজরবা রাস্ত্ররতিসু চহী ৫০ শুরবা রোক মেমোরিএল অদু চৎলুই। অদুগা হেন্না নুংঙাইবা অমনা ঐখোয়গী উপ রাস্ত্রপতিসু গুজরাতকী রন ওফ কচ্ছতা পাংথোকপা মরুভুমীগী অথোইবা কুমহৈ হৌদোকপা চৎলুই। ঐখোয়গী রাস্ত্ররতি অমসুং উপ রাস্ত্রপতিসু ভারতকী মরুওইবা লম কোইফমশিংদা চৎলি, ইরৈবাকচাশিংসু মখোয়গী খুদুং ইন্দুনা শোইদনা চৎপীয়ু।

নুংশিজরবা ইরৈবাকচাশিং, ঐখোয় তোঙান তোঙানবা কোলেজ, য়ুনিভর্সিতী অমসুং স্কুলশিংদা মহৈ তমই অদুগা মহৈ তম্বা লোইরবা মতুংদা এলুমনাই নুমিৎ অসি য়াম্না নুংঙাইবা নুমিৎ অমনি। নহাশিং অসি এলুমনাই নুমিৎতা চহী ১০, ২০, ২৫ মমাংগী থৌদোক কয়া নিংশিংবদা পুমঙাও ঙাওই। করিগুম্বদা এলুমনাই নুমিৎ অসি থোইদোক্না পুক্নিং চিংশিন্নিঙাই ওইবা নুমিৎসু য়াওরকই। ইরৈবাকচাশিংসু মায়কৈ অসোমদা পুক্নিং চংবা দরকার ওইরকপা য়াওই। এলুমনাই নুমিৎ অসি তশেংবদি অরীবা মরূপশিংগা উন্নবা, মমাংঙৈগী ৱাফম কয়া নিংশিংবা ময়াম অসিগী ওইবা তোঙানবা নুংঙাইবা নুমিৎ অমনি। ময়াম অসিগা লোয়ননা করিগুম্বা শেয়ার্দ পর্পজ অমা য়াওরবা, করিগুম্বা ৱাশক অমগা লোয়ননা ইমোস্নেল এতেচমেন্ত অমা য়াওরগদি মসিগী থোইদোকপা মগুন অমা হেঙ্গৎলক্কনি। এলুম্নাই গ্রুপনা মখোয়গী স্কুলশিং অদুগীদমক করিগুম্বা খরা পাংথোকপা ময়াম্না থেংনবিরমগনি। অফবা লাইব্রেরী অমা শাবিবা য়াওই, কনাগুম্বনা থক্ননবা ঈশিংগী খুদোংচাবা থম্বিবা য়াওই, অনৌবা কা খরা শাবিবসু য়াওই লোইননা স্পোর্তস কমপ্লেক্স শাবিবসু য়াওই। মশাগী পুন্সিদা মী অমা ওইনবা শেমলকপা মফম অদুগীদমক করিগুম্বা খরা পাংথোকপা ঙম্বগীদমক মপুক্নিংদা অপেনবা পোকই। ৱাখল্লোন অসি মীপুম খুদিংমক্কী পুক্নিংদা লৈ, লৈফমসু থোকই। ঐহাক ঙসি করিগুম্বা থোইদোকপা থবক অমা ময়ামগী মাংদা থমজগে। নুমিৎ খরগী মমাংদা মীদিয়াদা বিহারগী নোংচুপ চম্পারন জিলাগী ভৈরবগঞ্জ হেল্থ সেন্তরগী ৱাফম অমা তাবদা ঐহাক কয়াগী মতিক নুংঙাইজবগে হায়বদা ৱাফম অসি ময়ামদা থমদ্রবদি ঐহাক লৈবা ঙম্লোইদৌরি। ভৈরবগঞ্জ হেল্থ সেন্তর অসিদা লেম্না হেল্থ চেকঅপ তৌহন্নবা অকোইবগী খুঙ্গংশিংদগী মীওই লিশিং কয়া তিনখি। ৱাফম অসিবুদি ময়ামদা করিসু ঙক্না থোক্লরোই, মসিবু করি অনৌবা ৱাফম্নো হায়না খনবিরমগনি। অদুবু অদোম্না খনবিরিবা অদু লাল্লে হায়না হায়জগে, মসিদা অনৌবা ৱাফম য়াম্না য়াওই। করিনো হোয়বদু ঐহাক পাউদমজগে। থৌরম অসি লৈঙাক্না শিনবা নত্তে, লৈঙাক্কা করি অমত্তা মরী লৈনদে। মসি মফম অদুগী কে.আর. হায়স্কুলগী হান্নগী মহৈরোইশিংগী এলুম্নাই নুমিৎতা পায়খৎপা খোংথাংনি। অদুগা থৌরম অসিগী মমিং সনকল্প ৯৫ হায়না থোনখি। সনকল্প ৯৫ হায়বগী ৱাহন্থোক্তি হায়স্কুল অদুগী ১৯৯৫ বেতচকী মহৈরোইশিংগী ৱাশক, বেতচ অদুগী মহৈরোইশিংনা অলুম্নাই মীৎ অমা পাংথোকখি। মদুদা করিগুম্বা তোঙানবা ময়ামগা মান্নদবা থবক অমা পায়খৎসি হায়না খন্নখি। মদুদা হান্নগী মহৈরোইশিং অদুনা সমাজকীদমক করিগুম্বা খরা পায়খৎসি হায়না লেপ্নখিবগা লোয়ননা পব্লিক হেল্থ এৱারনেস পায়খৎখি। মসিদা বেতিয়াগী সরকারগী মেদিকেল কোলেজ অমসুং হোস্পিতালশিংসু য়াওশিনখি। মসিগী মতুংদদি মীয়ামগী হকশেল অসি অচৌবা খোংচৎ অমগী শক্তম লৌখি। লাইয়েংমন লৌদবা, লেম্না হিদাক পীবা অমসুং মীয়ামদা পাফমশিং খঙহনবা অসি সনকল্প নাইতীফাইবকা তঙাই ফদবা ওইরে। ঐখোয়না মতম চুপ্পদা হায়দুনা লৈরিবা ৱাফম অমদি লৈবাক অসিগী মীওই অমনা খোংথা অমা চৎপদা লৈবাক অসিনা খোংথাং কোতি ১৩০ মাংলোমদা চৎকদৌরিবনি। অসিগুম্বা ৱাফম অমা সমাজতা উবা মতমদা মীয়াম পুন্না নুংঙাইবা পোকই লোইননা করিগুম্বা খরা তৌনিংবগী ৱাখল্লোন পীরি। বিহারগী বেতিয়াগী হান্নগী মহৈরোইশিংগী কাংলুপকী হেকশেলগী শেবা অসিগা মান্নবা থবক অমা উত্তর প্রদেশকী পুলপুরগী নুপীশিংনা পাংথোকখি।

নুপীশিং অসিনা পাংথোকপা থবক্না উৎলিবদি অপুনবা ৱাশক অমগা লোয়ননা চংশিল্লবদি ঙমদবা হায়বা অমা লৈররোই। মতম খরগী মমাংদা নুপীশিং অসি শেলগী অৱাবা মায়োক্নরম্মি অদুম ওইনমক মখোয়না সমাজকীদমক করিগুম্বা খরা পাংথোক্নিংবগী ৱাখল্লোন ফাওখি। নুপীশিং অসিনা কাদিপুরগী সেল্ফ হেল্প গ্রুপকা পুল্লগা শেন্দল শাবা তমখি। মসিনা মখোয়গী মখোংদা য়ুবা তিঙ্খং ঙাকথোকচবতা নত্তনা ইমুংগী মতেং পাংবা ঙমই। গ্রামিন অজিবিকা মিসনগী মতংগা লোয়ননা মফম অদুদা শেন্দল শাবগী প্লান অমসু লিংখৎলে, মফম অদুনা অনৌবা মেছিনগী মতেংনা শেন্দল শাই।

ঐহাক্না মফম অদুগী পুলিস অমসুং মখোয়গী ইমুংগী মীওইশিংবু থাগৎপা ফোংদোকচরি। মখোয়না মশাগী অমসুং মখোয়গী ইমুংগী মীওইশিংগীদমক নুপীশিং অসিনা শাবা শেন্দল লৈবিদুনা মখোয়গী পুক্নিং থৌগৎপীরি। ঙসি নুপীশিং অসিগী ৱাশক্না মখোয়গী ইমুংগী শেনমিৎলোন ফগৎলকপগা লোয়ননা মখোয়গী পুন্সি মহিং ফগৎলকই। ফুলপুরগী পুলিসশিংগী ৱাফম অসি তাবদা ঐহাক্না ওগস্ত ১৫দা লাল কিলাদগী হায়খিবা ৱাফম অমা নিংশিংবিরমগনি। ঐহাক্না ইরৈবাকচাশিংদা ইরমদমগী পোত্থোক শিজিন্নসি হায়না হায়জখি। ঙসি অমুক্কসু ঐহাক্না হায়জগে, ইরমদমগী পোত্থকশিং অসিবু পুক্নিং থৌগৎপীয়ু। ইশাগী পোৎ লৈবা মতমদা ইরমদমগী পোত্থোক্না মাং থাবিয়ু। ঐখোয়গী পোত্থোকশিং অসিগীদমক্তা ঐখোয় চাউথোকচবা ঙম্লোইদ্রা? ৱাখল্লোন অসিনা ঐখোয় ইরৈবাকচা মশেল নুংশিনবগী ৱাখল্লোন ওইরকপসু য়াই।

মরূপশিং, মহাত্ম গান্ধীনা ইরমদমগী পোত্থোক অসিবু মীওই লাখ কয়াগী মৈরা ওইনা উৎখি। লাইরবদগী লাইরবা অমগী পুন্সিগী চাউখৎপগী পাম্বৈনি খনখি। চহী চামগী মমাংদা গান্ধী জীনা মীয়ামগী ইহৌ অমা হৌদোকখি। মদুগী পান্দমদি ভারতকী পোত্থোকশিংবু শৌগৎপনি। ইরোমদোম লেপচবগী পাম্বৈ অসি গান্ধী জীনা তাকপীখি। চহী ২০২২দা ঐখোয় নিংতম্বা চহী ৭৫ মপুং ফাগদৌরিবনি। ঙসি ঐখোয়না নিংতম্বগী শোর হোল্লিবা নিংতম্বা ভারত অসি ওইহল্লক্নবা থৌনা ফবা কয়ানা হনবা লৈতনা হোৎনবিখিবগী লোয়ননা থৱাই কয়ানা পোন্থা পীখিবনি। নিংতম্বা পামজবা কয়া অদুগী কত্থোকপা অমসুং লাইনিং লাইশোন্না নিতম্বা ফংলিবনি। চাউখৎলবা, নুংঙাইরবা, চাবা থকপা ৱাৎত্রবা মংলান অমগা লোইনবা মশিং থিঙমদ্রবা লান্মী কয়াগী কত্থোকচমন্না ঐখোয়না ঙসি নিংতম্না নুংঙাইনা লৈরিবনি।                   

ঐগী নুংশিজরবা ইরৈবাকচাশিং, লাক্কদৌরিবা চহী ২০২২ নিতম্বগী চহী ৭৫ ফাওবা অমসুং চহী অনি অহুম অসিদা ঐখোয়গী ইরমদমগী পোত্থোক লৈশি হায়না ৱাশকপীয়ু। ভারত্তা শাজবা ঐখোয়গী ইরৈবাকচাশিংগী হুমাংমলগা লোয়নবা পোৎশকশিং অসি লৈবিবা ঙমগদ্রা? ঐহাক্না হায়জরিবা অসি য়াম্না অশাংবা মতমগী নত্তে, শুপ্নতগী চহী ২০২২ ফাওবগীনি, নিতম্বগী চহী ৭৫শুবা ফাওবদনি, অদুগা থবক অসি লৈঙাক্কী ওইহনগুমসি। মফম কয়াদা নহাশিং থোরক্তুনা ওর্গনাইজেসনশিং শেম্বিয়ু, ময়ামদা ভাব তাহন্নবা হোৎনবিয়ু। ইরমদমগী পোত্থোক লৈবিদুনা নিংতম্লবা ভারত অসি নুংঙাইরবা ভারত অমা ওইহন্নবা মংলান অসিগা লোয়ননা চংশিল্লসি।

ঐগী নুংশিজরবা ইরৈবাকচাশিং, লৈবাক অসিগী মীওই খুদিংমক মরোমদোম লেপচদুনা নুংঙাইরবা পুন্সি মহিং অমগা লোইননা হিংবা ঙম্বা হায়বসি ঐখোয় খুদিংমক্কী ওইনা য়াম্না মরুওইবা ৱাফম অমনি। ঐহাক্না অহানবা মক্তদা খন্ননিংলিবা ঐগী পুক্নিং চিংশিনখিবা ৱাফম অমদি জম্মু কাশ্মির অমসুং লদাখকী হিমায়ৎ থৌরম অসিনি। তশেংবদি হিমায়ৎ অসি স্কিল দিবেলপমেন্ত অমদি থবক পীবগা মরী লৈনৈ। মসিদা চহী ১৫দগী ৩৫ ফাওবগী নহারোলশিংনা শরুক য়ারি। মখোয় অদু মরম অমা নত্রগা অমনা মরম ওইরগা মহৈ তম্বা মপুং ফাদনা স্কুল কোলেজ থাদোকখিবা ঙাক্তনি।

ঐগী নুংশিজরবা ইরৈবাকচাশিং, ময়াম্না থোইদোক্না নুংঙাইবিগদবা ৱাফম অমদি থৌরাং অসিগী মনুং চন্না হৌখিবা চহী অনি অসিদা নহা লিশিং তরানিপালবু তোঙান তোঙানবা ত্রেদ হুমফুতরা তরেৎতা ত্রেনিং পীখ্রে। মসিগী মনুংদা চাউরাক্না মীওই লিশিং মঙা থবক ফংখ্রে অদুগা ময়াম অমনা মশানা মশাবু থবক পীনবগী মায়কৈরোমদা চংশিল্লি। হিমায়ত প্রোগ্রামনা মখোয়গী পুন্সিদা অহোংবা পুরক্লবা মীওইশিংগী ৱারী তাবদা থোইদোক্না পুক্নিং নুংশিবা ৱাফম ঙাক্তনি।

প্রবীন ফতিমা তামিলনাদুগী তিরুপুরগী গার্মেন্ত য়ুনিৎ অমদা প্রমোসন ফংলবা মতুংদা সুপরভাইজর কম কোওর্দিনেতর ওইরে। চহী অমগী মমাদা মহাক কার্গিলগী পিক্লবা খুঙ্গং অমদা লৈরম্মি। ঙসি মহাক্কী পুন্সিদা অহোংবা কয়া অমা লাক্লে। মহাক মশাদা নত্তনা ইমুং পুম্বা শেনমিৎলোন ফগৎলে। প্রবীন ফতিমাগুম্না হিমায়ৎ প্রোগ্রাম্না লেহ লদাখকী মীওই কয়া ইচানুপী কয়া অমগী পুন্সিদা অহোংবা পুরক্লে। মখোয় পুম্নমক তামিলনাদুগী ফার্ম অদুদা থবক তৌরি। মসিগা চপ মান্ননা হিমায়ৎ প্রোগ্রাম অসিনা দোদা জিলাগী ফিয়াজ অহমদকীদমকসু খুদোল অমা ওইখি। ফিয়াজ ২০১২দা ক্লাস ১২ পাস তৌবনি অদুম ওইনমক অনাবা অমনা মরম ওইরগা মহৈ তম্বা লোইশিনা ঙমখিদে। ফিয়াজ চহী অনি থম্মোইগী লৈনা নাখি। মসিনা মখোয়গী ইমুং য়াম্না ৱাখি। মমৈথংদা মহাক হিমায়ৎতগী মতেং ফংখি। হিমায়ৎকী খুত্থাংদা আই.তি.ই.এস. হায়বদি ইনফোর্মেসন তেক্নোলোজী ইনেবল সর্বিসেসতা ত্রেনিং ফংবগা লোয়ননা হৌজিক পঞ্জাবতা থবক তৌরি।

হিমায়ৎ মিসনদগী কান্নবা ফংলবা লৌশিং লৈরবা নহাশিংনা জম্মু কাশ্মিরদা অহোংবা পুরকপদা অচৌবা থৌদাং লৌখি। মসিনা জম্মু কাশ্মিরগী মীয়াম অমদি হিমায়ৎ প্রোগ্রাম, লৈঙাক, ত্রেনিং পার্তনর, থবক পীগদৌরিবা কম্পেনিশিংগী মরক্তা লৈনরিবা মরী অদু নিংথিনা কুপলি। থৌরম অসিনা জম্মু কাশ্মিরগী নহাশিংগী ৱাখলদা অনৌবা থৌনা হাপতুনা য়াংনা চংশিন্নবগী লম্বী য়াৎপা হৌখি।  

ঐগী নুংশিজরবা ইরৈবাকচাশিং, হৌখিবা তারিক ২৬তা ঐখোয়না চহী তরা অসিগী অরোইবা সুর্য়গ্রহন উখ্রে। সুর্য়গ্রহন অসিগা মরী লৈননা মাইগোভ পোর্তেলদা রিপুন্না অসুম্না কমেন্ত ইবীরকই। মহাক্না “খুরুমজরি, ঐগী ইমিং রিপুন কৌই। ঐ নোর্থ ইস্ততগীনি, অদুগা খা ভারত্তা থবক তৌরি। ঐনা অদোমদা ৱাফম অমত্তং সেয়ার তৌজনিংই। ঐনা সুম নিংশিংবদা ঐখোয়গী লমদদি অতিয়া অসি তরু তনানবনা মরম ওইদুনা পুং কয়া অতিয়াদা থোক্লিবা থৱানমীচাক য়েংদুনা লেল্লি। থৱানমীচাক য়েংবসি ঐহাক য়াম্না পামজৈ। হৌজিক্তি থবক ইনখাং তৌরবনিনা অচিনবা দেল্লী রুতিন্না মরম ওইদুনা মসিদা অপাম্বা অসি পাংথোকপা কয়া ঙমদ্রে। হিরম অসিদা অদোমগী মোৎ অমতং পামজৈ। থোইদোক্না এস্ত্রোনোমী অসি নহাশিংদা করম্না পাংহনগদগে।”

ঐগী নুংশিজরবা ইরৈবাকচাশিং, ঐঙোন্দা সজেসন কয়া পীরকই, অদুবু অসিগুম্বা সজেসন অসিদি ঐঙোন্দা অহানবনি। সাইন্সতা অমদি অতৈ হিরমশিংদা ৱারী শান্ননবা তঞ্জা কয়া ফংলে। থোইদোক্না নহাশিংনা হায়জরকপদগী ৱারী শান্ননবা তঞ্জা কয়া ফংলে। অদুবু হিরম অসিদদি অমুক্তা খন্নদ্রি। হন্দক্তা তারিক ২৬তা সুর্যগ্রহন তখিবা অসিদা ময়ামসু খঙনিংলমগনি। ইরৈবকচাশিং থোইদোক্না ঐগী মরূপ নহাশিংনা তৌবগুম ঐসু সুর্য়গ্রহন য়েংবা পামখি। অদুবু দিল্লীগী অতিয়াদা লৈচিলনা খনখিবনা মরম ওইদুনা নিংথিনা উবা ফংখিদে। অদুবু তি.ভি.দা কোঝিকোদ অমসুং ভারতকী অতৈ মফমশিংদা ওইরিবা সুর্য়গ্রহনগী ফজরবা ফোতোশিং উবা ফংখি। নুমিৎ অসি লংত্রিক লংবা খুদোপকুম উখি। নুমিৎসিদা অখঙ অহৈশিংদগী ঐনা খঙজহৌবা অমনা থা অসি পৃথীবিদগী য়াম্না লাপ্পা মরম্না মানা নুমিৎপু মপুং ফানা খনজিনবা ঙমদে। মরম অসিনা খুদোপকী শক্তম ওইরিবনি। মসিগী সুর্য়গ্রহন অসি এনুলর সোলর ইক্লিপস অসিবু বালে গ্রহন নত্রগা কুন্দল গ্রহন হায়নসু খঙনৈ। গ্রহনগী ৱাফম অসি লাকপদা ঐখোয় অসি পৃথীবিদা লৈরগা শুন্দ্রংদা কোইরিবনি হায়না খল্লি। শুনতরং অসিদা নুমিৎ, থা অমদি অতোপ্পা গ্রহশিংনচিংবা এস্ত্রোনোমিকেল ওবজেক্তশিংনা কোয়রি। থাগী মমিদগী ঐখোয়না গ্রহনগী তোঙান তোঙানবা শক্তম উবা ফংই। মরূপশিং ভারত্তা এস্ত্রোনোমী সাইন্সতদি য়াম্না কুইরে অমদি য়াম্না মতিক ময়াই লৈরম্মি। অতিয়াদা তগুপ তরেং ঙাল্লিবা থৱানমীচাকশিংগা ঐখোয়গা লৈনরিবা মরী অসি ঐখোয়গা ঐখোয়গী সভ্যতাগা লৈনরিবা মরীগুম য়াম্না লীরবনি। ময়াম্নসু খঙবীরম্লগনি মদুদি ভারত্তা ফজ ফজরবা জন্ত্র মন্ত্র কয়া লৈরি। জন্ত্র মন্ত্রশিং অসিগা এস্ত্রোনোমীগা য়াম্না নক্নবা মরী লৈনৈ। অফাওবা অর্য়ভতকী ময়ামগা মান্নদবা হৈ-শিংববু খঙদবা কনা য়াওবগে।

মহাক্না সুর্য়গ্রহনগা লোয়ননা চন্দ্রগ্রহনগী মরমদা শন্দোক্না তাকপীরম্মি। মদুসু দর্শনিক ওইবা অমসুং অঙ্কগী মীৎয়েংদনি। মহাক্না পৃথীবিগী মমি অমসুং চাউবগী শক্তম অসি করম্না হোংবগে হায়বদু অঙ্কগী মীৎয়েংদা উৎখি। মহাক্না গ্রহনগী মতম অমসুং কদায় ফাওবা তৌগদগে হায়বদুগী মরম অদুসু য়াম্না মমুৎ তানা তাকপীরম্মি। মাগী ছাত্র ভাস্করনসু ৱাখল্লোন অসিবু মখা তানা নৈনদুনা ময়ামদা খঙহন্ননবা কন্না হোৎনখি। মমৈথংদা তরামরি অমসুং তরামঙা শুবা শতাবদীদা কেরলাদা সংগ্রম গ্রামগী মাধবনা য়ুনিভর্সতা লৈরিবা গ্রহশিংগী লৈফম তাকলম্মি। অহিংদা উরিবা অতিয়া অসি শুপ্নগী লাংতক্নবগী হীরম অমা ওইবতা নত্তনা অঙ্কগী মীৎয়েংলোমদা য়েংলুবদসু য়াম্না মরুওইবা হৌরকফম অমনি। চহী খরগী মমাংদা ঐহাক্না “প্রি-মোদর্ন কুতচি নেভিগেসন তেক্ননিক্স ভোয়েজেস” হায়বা লাইরিক অমা ফোংখি। লাইরিক অসি মালমগী দাইরীনি হায়বা য়াই। মালম হীহোনবা অমনি। মহাক্না থেংনরকপশিং অদু মহাক্না দাইরীদা ইশিল্লি। হৌজিক্কী মতমদা মালমগী লাইরিক মদুসু গুজরাতকী ময়েক্তা ইবা খুৎয়েক, মসিদা অরিবা নেভিগেসনগী মরমদা শন্দোক্না তাক্লি। মসিদা অতিয়া, থৱানমীচাকশিং মখোয়গী খোংচৎ মসিনা সমুদ্রদা চৎপা মতমদা মায়কৈ তাকপা মদুসু শন্দোক্না হায়রম্মি। লমথুংফম ফাওবগী লম্বী থৱানমীচাক্না তাকই।

ঐগী নুংশিজরবা ইরৈবাকচাশিং, এস্ত্রোনোমীগী লমদা ভারত অসি অদুক্কী মতিক খুমাং চাউশিল্লি অমদি লময়ানবনি। ঐখোয়গীদি পুনেগী মনাক্তা অচৌবা মীতর ৱেব তেলেস্কোব লৈ। মসিদসু নত্তনা কোদাইকানাল, উদাগামন্দলা, গুরু শিখর অমসুং হানলে লদাখতসু শক্তি লৈরবা তেলেস্কোব লৈ। ২০১৬তা বেলজিয়মগী মতম অদুগী প্রাইম মিনিস্তরগা ঐহাক্না নাইনিতালদা মীতর ৩.৬ ৱাংবা দেবাস্থল ওপ্তিকেল তেলেস্কোব শঙ্গাখি। মসি এসিয়াগী খ্বাইদগী চাউবা তেলেস্কোবনি। ইসরোগী মনাক্তা এস্ত্রোসেত কৌবা এস্ত্রোনোমিকেল সেতেলাইত লৈ। নুমিৎকী মরমদা থিজিন্নবগীদমক্তা ইসরোনা অদিত্য কৌবা অমা পুথোক্কদৌরি। এস্ত্রোনোমী সাইন্স অসিদা ঐখোয়গী গ্যনবু ওইরে, অনৌববু ওইরে, মসি ঐখোয়না খঙগদবনি অমসুং মসিগীদমক্তা চাউথোকচগদবনি। ঐখোয়গী অনৌবা সাইন্তিস্তশিং অসিদা সাইন্তিফিক হিস্তরীগী মরমদা খঙবতা নত্তনা এস্ত্রোনোমীগী তুংগী লম্বীদসু চাউখৎহন্নিবগী অপাম্বদু উবা ফংই।

ঐখোয়গী লৈবাক্তা প্লানেতোরিয়ম, অহিংগী অতিয়াবু খঙবগা লোয়ননা থৱানমীচাক য়েংনিংবগী অপাম্বা হেঙ্গৎহন্নিবগী অপাম্বসু হেঙ্গৎহন্নবা হোৎনরি। মীওই খরদি মখোয়গী য়ুমথক অমসুং বেলকোনীশিংদা এমেচর তেলেস্কোব খিল্লি। থৱানমীচাক য়েংবনা রুরেল কেম্প অমদি রুরেল পিকনিক্কী মফম চাউখৎহনবা য়াই।

স্কুল কোলেজ খরদি এস্ত্রোনোমী ক্লবনচিংবসু লিংখৎলি অমদি অসিগুম্বা খোংথাং অসি পুক্নিং থৌগৎকদবনি।

ঐগী নুংশিজরবা ইরৈবাকচাশিং, ঐখোয়না ঐখোয়গী পার্লিয়ামেন্ত অসিবু দেমোক্রেসীগী লাইশংনি হায়না খল্লি। ঐনা ঙসি ৱাফম অমা য়াম্না চাউথোক্না হায়জনিংই মদুদি ময়াম্না খনবনা ময়াম্না থাবিরকপা মীহুৎশিং অদুনা হৌখিবা চহী ৬০গী চৎনরোল অদু থুগাইরে। হৌখিবা থা ৬ অসিদা ১৭শুবা লোক সভাগী হাউস অনি অসি য়াম্না অফবা মওংদা লাক্লি। লোক সভানা চাদা ১১৪ থবক তৌখি, রাজ্য সভানা চাদা ৯৪ থবক তৌখি। মসিগী মমাদা বজেৎ সেসন্দা চাউরাক্না চাদা ১৩৫ থবক তৌখি। নুমিদাং অথেং অথেংবা ফাউবা পার্লিয়ামেন্ত ফমখি। মরম অসিনা এম.পি. খুদিংমক থাগৎনিঙাই ওই। ময়াম্না থাবিরকপা মীহুৎশিংনা হৌখিবা চহী ৬০গী রেকোর্দ থুগায়রে। থবক য়াম্না তৌবা অসিনা ভারত্তা দেমোক্রেসীগী থৌনা অমদি মসিবু থাজৈ হায়বসি তাকপনি। ঐনা হাউস অনিমক্কী লৈবিরিবা মেম্বরশিং, পোলিতিকেল পার্তীশিংবুসু হন্না-হন্না থাগৎচরি।

ঐগী নুংশিজরবা ইরৈবাকচাশিং, নুমিৎ, পৃথীবি, থাগী খোংচৎনা শুপ্নতংগী গ্রহন থোকহনবা নত্তে। অতোপ্পা পোৎলম কয়া অমসু মসিগা মরী লৈনরি। ঐখোয়না খঙই মদুদি নুমিৎকী খোংচৎকী মতুং ইন্না জনুৱারীগী ময়াই চল্লকপদা ভারত পুম্বদা কুমহৈ ফিয়োং কয়া পাংথোকই। পঞ্জাবতগীনা তামিল নাদু, গুজরাত্তগীনা অসাম ফাওবা কুমহৈ কয়া লৈরি। জনুৱারীদা মকর সংক্রান্তি অমসুং উত্তরায়ন য়াম্না চাউনা পাংথোকই। মসিবু ইনর্জীগী খুদম্নি হায়না খঙনৈ। মতম অসিদা পঞ্জাবতা লোহরি, তামিল নাদুদা পোঙ্গল, অসামদা মাঘ বিহু পাংথোকই। কুমহৈশিং অসি লৌমীশিংগী চাউখৎপা অমদি মহৈ-মরোংগা য়াম্না মরী লৈনৈ। মসিনা ভারতকী য়ুনিতী অমদি দাইভর্সিতীগী মরমদা নিংশিংহল্লি। পোঙ্গলগী অরোইবা নুমীত্তা অথোইবা তিরুভালুৱরগী কুমওন পাংথোকপগী খুদোংচাবদু ফংই। নুমিৎ অসিদা অফাওবা অইবা লাইনিংবা লম্বোইবা তিরুভালুৱরনা মপুন্সি কত্থোকখি।

ঐগী নুংশিজরবা ইরৈবাকচাশিং, ঙসি অসি ২০১৯গী অরোইবা মন কী বাতনি। ২০২০দা ঐখোয় অমুক উন্নসি। অনৌবা চহী, অনৌবা দিকেৎ, অনৌবা ৱারেপ, অনৌবা থৌনা, অনৌবা ৱাখল, অনৌবা ইনোৎ, লাক্লো মাংদা চংশিল্লসি। ৱারেপ মপুং ফাহন্নবগীদমক্তা থবক পাংথোকপা ঙম্বা তাই। য়াম্না লাপনা চৎকদৌরিবনি, তৌগদবা য়াম্না ৱাৎলি। লৈবাক অসিবু অনৌবা অৱাংবা থাক্তা পুখৎসি। ইরৈবাকচা কোতি ১৩০গী নুপা থোকপা থৌদাংদা, থবকশিংদা, মখোয়গী ৱারেপতা থাজবা থমসি। লাক্লো ঐখোয় মাংদা চংশিল্লসি। থাগৎচরি, য়াইফ-পাউজেল পীজরি।