ঙসি নই দিল্লীদা প্রধান মন্ত্রী শ্রী নরেন্দ্র মোদীনা মোরিসসকী প্রধান মন্ত্রী প্রবিন্দ জুগনৌথ উনখ্রে। লনাই ওইনা ভারত্তা লাকখিবা খোঙচৎ অমদা প্রধান মন্ত্রী প্রবিন্দ জুগনৌথনা মহাক্কী লোয়নবী কোবিতা জুগনৌথ লোয়নরকখি।
মহাক অমুক হন্না মীখলদা খল্লকপদা প্রধান মন্ত্রী মোদীনা প্রধান মন্ত্রী প্রবিন্দ জুগনৌথপু থাগৎখি। লৈবাক অনিগী মরক্ত লৈনরিবা নাকল অনিগী মরী অমসুং মরূপ-মপাং ওইবা মখা তানা কনখৎহন্নবা মহাক্না থাজবা পীবগীদমক প্রধান মন্ত্রী প্রবিন্দ জুগনৌথনা প্রধান মন্ত্রীবু থাগৎখি।
মেত্রো এক্সপ্রেস প্রোজেক্ত, ই এন তি হোস্পিতাল, সোসিয়েল হাউসিং প্রোজেক্ত য়াওনা মোরিসস্তা পায়খৎলিবা চাউখৎ-থৌরাংগী প্রোজেক্তশিংদা ভারতনা মতেং পাংবগীদমক প্রধান মন্ত্রীবু প্রবিন্দ জুগনৌথনা থাগৎপা ফোংদোকখি। হিরম খুদিংমক্ত মোরিসস য়াংনা চাউখৎলকপগী মতাংদা প্রধান মন্ত্রী প্রবিন্দ জুগনৌথনা পাউদমখি অমসুং অনৌবা তার্ম অসিদা ভারতকা মতেং পীনবা হেনগৎহন্নবা মহাক্না মরুওইবা ৱাফমশিং থমখি। মসিগী থবক অসিদা ভারতনা মরুওইবা থৌদাং লৌগনি হায়না মহাক্না থাজবা থমখি।
প্রধান মন্ত্রী মোদীনা হায়খি তংদু লৈতাবা অমসুং নুংঙাই-য়াইফবা মোরিসস অমা ওইহন্নবা ভারতনা থম্মোয় শেংনা শৌগৎলিবা অসিদা মোরিসসকী মীয়াম অমসুং সরকারনা শৌগৎকনি।
নাকল অনিগী অচেৎপা মরি শেমগৎনবা য়াম্না নক্না থবক তৌমিন্নবা অমসুং নাকল অনিনা পাম্নবা হিরমশিংদা য়ুমফম ওইদুনা অনৌবা মতেং পীনবা য়াবা হিরমশিং থিদোকপা হায়না লুচিংবা অনিনা য়ানখি।
