জম্মু অমসুং কাশ্মীরদা ঙসিগী মহাক্কী অনিশুবা খোংচৎতা প্রধান মন্ত্রী শ্রী নরেন্দ্র মোদী জম্মুদা চৎখ্রে। রাজ্য অসিদা ইনফ্রাস্ত্রকচরদা ইনোৎ অমা পীনবা দিবেলপমেন্ত প্রোজেক্তশিংগী পরিং অমা মহাক্না মায়খুম হাংদোকখি। প্রধান মন্ত্রী নোংমগী ওইবা খোংচৎতা ঙসি লেহ, জম্মু অমসুং শ্রীনগরদা চৎলি।
জম্মুগী খোংচৎ অসি প্রধান মন্ত্রীনা বিজয়পুর সাম্বাদা এইম্সকী উরেপ উয়ুং তমদুনা খুদম থমখি। শ্রী মোদীনা হায়খি মদুদি এইম্স অসি লিংখৎপনা মীয়ামদা ক্বালিতী হেল্থকেয়ার ফংহল্লগনি অমদি লমদম অসিদা হেল্থকেয়ার প্রোফেস্নেলগী অৱাৎপা লৈরিবা অসি মেন্সিল্লগনি। অথুবা মতমদা রাজ্যগী মেদিকেল কোলেজদা অতোপ্পা সিৎ ৫০০ হাপচিল্লগনি হায়না প্রধান মন্ত্রীনা লাওথোকখি।
ঙসি কথুৱাদা ইঞ্জিনীয়ারিং এন্দ তেক্নোলোজীগী য়ুনিবর্সিতী ইন্সতিত্যুৎ শঙ্গাবা মতমদা প্রধান মন্ত্রীনা মহাক্কী নুঙাইবা অদু ফোংদোকখি মদুদি জম্মুগী নহাশিংনা ই.দবল্যু.এস. কোতা চাদা ১০দগী কানবা ফংলগনি।
মহাক্না জম্মুদা ইন্দিয়ান ইন্সতিত্যুৎ ওফ মাস কমুনিকেসনগী নোর্দন রিজনেল সেন্তর কেম্পস শানবগীদমকসু উরেপ উয়ুং তমখি। তি.এম.এ.তি. জম্মু কেম্পস অসি একাদেমিক চহী ২০১২-১৩দা লিংখৎখি অমদি মতম অদুদগী তেম্পোরেরী বিলদিং অমদগী মথৌ তারি।
প্রধান মন্ত্রীনা জম্মুগী কিশ্তৱারদা ৬২৪ মেগা ৱাৎ কিরু হাইদ্রোইলেক্ত্রিক প্রোজেক্ত অমসুং ৮৫০ মেগা ৱাৎ রাত্লে হাইদ্রো ইলেক্ত্রিক প্রোজেক্তকীদমক উরেপ উয়ুং তমখি। মহাক্না হায়খি, “লমদম অসিদা অনৌবা প্রোজেকশিং অসিনা নহাশিংদা থবক ফংহল্লগনি।” সৌভাগ্য স্কিমগী মখাদা জম্মু অমসুং কাশ্মীরদা লৈরিবা ইমুং খুদিংদা চাদা ১০০ মৈ ফংহল্লে হায়নসু প্রধান মন্ত্রীনা লাওথোকখি।
প্রধান মন্ত্রীনা কাশ্মীর ভেল্লীদা কাশ্মীরি মাইগ্রেন্ত এমপ্লোইশিংগীদমক ত্রান্সিৎ একোমোদেসন শানবগীদমক উরেপ উয়ুং তমখি। দিসপ্লেস কাশ্মিরিশিংবু পোস্ত ৩০০০দা থবক পীনবা থবক পায়খৎলি হায়না মহাক্না লাওথোকখি। মহাক্না হায়খি, “পন্দিৎশিংনা মখোয় মশাগী ময়ুম থাদোক্তুনা চৎপা তাখিবা ফিভমশিং অদু ভারতনা কাওথোকপা লৈরোই।” মহাক্না হায়খি মদুদি য়ুমলোন্নবা লৈবাক্না অৱাবা তাহল্লিবা মখোয়শিং অদুগা লৈবাক অসিনা পুন্না লেপমিন্নগদবনি।
প্রধান মন্ত্রীনা নেস্নেল রিভর কঞ্জার্বেসন প্লান (এন.আর.সি.পি.)গী মখাদা দেবিকা অমসুং তাৱি তুরেলশিংগী পোল্লুসন হন্থহনবদা মীৎয়েং থম্বা প্রোজেক্তকী উরেপ উয়ুং তমখি। প্রোজেক্ত অসি ২০২১গী মার্চ ফাওবদা লোইশিন্নবা মতম লেপ্লি।
প্রধান মন্ত্রীনা হায়খি মদুদি ঐখোয়গী লান্মীশিংগী সেফতীগীদমক ঙমখৈ পরিংদা বঙ্কর ১৪০০০ শাখ্রে। মহাক্না মখা তাখি মদুদি মমাংগী সরকারনা লুপা কোতি ৫০০গী গ্রান্ত অমগা লোয়ননা ও.আর.ও.পি. পেলহন্নবা হোৎনখি, ঐখোয়না লুপা কোতি ৩৫০০০ এলোত তৌখ্রে।
ঙসিগী জম্মু খোংচৎকী অতোপ্পা ৱাফমশিং অদুদি প্রধান মন্ত্রীনা সেজৱালদা চেনাব তুরেল মথক্তা ১৬৪০ মীতর স্পান দবল লেন ব্রিজকী উরেপ উয়ুং তমখি। প্রোজেক্ত অসিনা সেজৱল অমসুং ইন্দ্রি পাত্তিয়ানগী মীয়ামগীদমক অতোপ্পরা রুৎ অমা ফংহল্লগনি। থোং অসি শাবা লোইবনা সেজৱল অমসুং ইন্দ্রি পাত্তিয়ানগী মরক্তা অরাপ্পা মমাংদা কিলোমীতর ৪৭ ওইরম্বা অদু কিলোমীতর ৫দা হন্থহল্লগনি। থৌরম মনুংদা প্রধান মন্ত্রীনা হায়খি মদুদি, জম্মু অমসুং কাশ্মীরদা কনেক্তিবিতী ফগৎহন্নবা লুপা কোতি ৪০০০০ কায়থোকখ্রে।
