জম্মু আৰু কাশ্মীৰৰ দ্বিতীয় পৰ্যায়ৰ ভ্ৰমণত প্ৰধানমন্ত্ৰী শ্ৰী নৰেন্দ্ৰ মোদীয়ে আজি জম্মু ভ্ৰমণ কৰে৷ তেওঁ ৰাজ্যখনৰ আন্তঃগাথনিমূলক দিশক উদগণি যোগাই কেইবাটাও উন্নয়নমূলক প্ৰকল্প মুকলি কৰে৷ প্ৰধানমন্ত্ৰীয়ে আজিৰ দিনটোত লেহ, জম্মু আৰু শ্ৰীনগৰ ভ্ৰমণ কৰে৷
জম্মু ভ্ৰমণত প্ৰধানমন্ত্ৰীগৰাকীয়ে ছাম্বাৰ বিজয়পুৰত এইমছৰ আধাৰশিলা স্থাপন কৰে৷ তেওঁ কয় যে এইমছ স্থাপনে অঞ্চলটোৰ জনসাধাৰণক উন্নতমানৰ চিকিৎসা সেৱা প্ৰদান কৰিব আৰু স্বাস্থ্যসেৱা খণ্ডৰ পেছাদাৰী লোকৰ অভাৱ দূৰ কৰিব৷ প্ৰধানমন্ত্ৰীয়ে ঘোষণা কৰে যে ৰাজ্যিক মেডিকেল কলেজত শীঘ্ৰে পুনৰ ৫০০ আসন সংযোজিত কৰা হ’ব৷
কাথুৱাত ইঞ্জিনিয়াৰিং আৰু প্ৰযুক্তি বিশ্ববিদ্যালয় উদ্বোধন কৰি প্ৰধানমন্ত্ৰীয়ে সন্তুষ্টি প্ৰকাশ কৰে যে জম্মুৰ যুৱ প্ৰজন্ম ‘সাধাৰণ শ্ৰেণীৰ দৰিদ্ৰ লোকৰ বাবে ১০% সংৰক্ষণ’ নীতিৰ পৰা উপকৃত হ’ব৷
প্ৰধানমন্ত্ৰীয়ে জম্মুৰ কুশৱাৰত ৬২৪ মেগাৱাটযুক্ত কিৰু জলবিদ্যুৎ প্ৰকল্প আৰু ৮৫০ মেগাৱাটযুক্ত ৰাটল জলবিদ্যুৎ প্ৰকল্পৰ আধাৰশিলা স্থাপন কৰে৷ তেওঁ কয় যে নতুন বিদ্যুৎ প্ৰকল্পসমূহে অঞ্চলটোৰ যুৱ প্ৰজন্মৰ মাজত কৰ্মসংস্থাপন সৃষ্টি কৰিব৷ সৌভাগ্য আঁচনিৰ অধীনত জম্মু আৰু কাশ্মীৰত ১০০% পৰিয়ালে বিদ্যুতৰ সুবিধা লাভ কৰিছে বুলিও তেওঁ ঘোষণা কৰে৷
ইফালে, কাশ্মীৰ উপত্যকাত কাম কৰি থকা কাশ্মীৰী প্ৰব্ৰজক কৰ্মচাৰীসকলৰ বাবে নিৰ্মাণ কৰি থকা ট্ৰানজিট আৱাসগৃহৰ আধাৰশিলা স্থাপন কৰে প্ৰধানমন্ত্ৰী মোদীয়ে৷ সিচঁৰিত হৈ থকা কাশ্মীৰীসকলক ৩০০০ পদত নিয়োগ কৰিবলৈ চৰকাৰে ব্যৱস্থা গ্ৰহণ কৰিছে বুলি তেঁও ঘোষণা কৰে৷ ‘কাশ্মীৰী পণ্ডিতসকলে কি পৰিস্থিতিত ঘৰ এৰিবলৈ বাধ্য হৈছিল, সেয়া ভাৰতবৰ্ষই কেতিয়াও পাহৰি নাযায়৷ চুবুৰীয়া ৰাষ্ট্ৰত উৎপীড়নৰ বলি হোৱা লোকসকলৰ সৈতে দেশবাসী সদায় আছে৷’—প্ৰধানমন্ত্ৰীয়ে কয়৷
ৰাষ্ট্ৰীয় নদী সংৰক্ষণ পৰিকল্পনাৰ অধীনত দেৱীকা আৰু টাৱি নদীৰ প্ৰদূষণ হ্ৰাসৰ লক্ষ্যৰে আৰম্ভ কৰা প্ৰকল্পৰো প্ৰধানমন্ত্ৰীয়ে আধাৰশিলা স্থাপন কৰে৷ ২০২১ৰ মাৰ্চৰ ভিতৰত এই প্ৰকল্পসমূহ সমাপ্ত কৰাৰ লক্ষ্য লোৱা হৈছে৷
প্ৰধানমন্ত্ৰীয়ে কয় যে আমাৰ সৈনিকৰ সুৰক্ষাৰ বাবে সীমান্তত ১৪০০ বাংকাৰ নিৰ্মাণ কৰা হৈছে৷ পূৰ্বৰ চৰকাৰে ৫০০ কোটিৰে ‘এক পদবী এক পেঞ্চন’ নীতিক প্ৰতাৰণা কৰি আছিল, কিন্তু আমি ইয়াৰ বাবে ৩৫০০০ কোটি মোকলাই দিছো৷
জম্মু ভ্ৰমণৰ আন এক উল্লেখনীয় দিশ হিচাপে প্ৰধানমন্ত্ৰীয়ে সজ্বলত চেনাব নদীৰ ওপৰত নিৰ্মাণ হ’বলগীয়া ১৬৪০ মিটাৰৰ দ্বৈত পথৰ দলঙৰ আধাৰশিলা স্থাপন কৰে৷ অনুষ্ঠানত প্ৰধানমন্ত্ৰীয়ে কয় যে জম্মু আৰু কাশ্মীৰৰ যোগাযোগ ব্যৱস্থা উন্নত কৰিবলৈ ৪০০০০ কোটিৰ অনুদান আগবঢ়োৱা হৈছে৷
