প্রধান মন্ত্রীনা য়ুম্লোন্নরিবা লৈবাক ১০ মদুদি অফঘানিস্তান, বাঙ্গলদেশ, ভুতান, মালদ্বিপ, মোরিশস, নেপাল, পকিস্তান, সেশেলস, স্রী লঙ্কাগী হকশেলগী লুচিংবশিং, এক্সপর্তশিং অমসুং ওফিসিএলশিং অমদি ভারতকী ওফিসিএলশিং অমসুং এক্সপর্তশিংগা লোইননা পাঙথোকপা “কোবিদ-১৯ মেনেজমেন্ত: থেংনখিবা থৌদোক, অফবা থবকশিং অমসুং মাংদা লৈরিবা লম্বী” হায়বা ৱার্কশোপ অমদা ঙসি ৱা ঙাংখ্রে।
প্রধান মন্ত্রীনা লৈবাকশিংগী হেল্থ সিস্তেমশিংনা লাইচৎ মনুংদা অমদি মী য়াম্না কুংনা তাবা লমদমশিংদা লৈরিবা খুদোংচাদবা কোহন্নবা অপুনবা রেস্পোন্সকা লোইননা খুৎশম্নদুনা হোৎনখিবগী মওং অদুবু থাগৎখ্রে।
প্রধান মন্ত্রীনা লাইচৎ অসি লান্থেংনবদা খুদক্কী মথৌ তাবা শেল পীনবা কোবিদ-১৯ ইমর্জেন্সী রেস্পোন্স ফন্দ শেমখিবা অমসুং হিদাল-লাংথক, পি.পি.ই. অমসুং তেস্ত তৌনবা খুৎশু-খুৎলাই –রিসোর্সশিং অসি সিয়র তৌখিবা অসি নীংশিংখ্রে। মহাক্না তেস্ত তৌবা, লাইনা শন্দোকপা লাকশিনবা অমসুং মেদিকেল ৱেস্ত মেনেজমেন্তগী মতাংদা থেংনখিবা অমসুং তমশিনখিবা খ্বাইদগী অফবা থবকশিং অদু অমনা অমদা সিয়র তৌনখি হায়নসু পাউদমখ্রে। “মসিগী চুংশিন্নবগী ৱাখল্লোন অসি লাইচৎ অসিদগী ফংখিবা খ্বাইদগী মরু ওইবা অমনি। ঐখোয়গী অরোৎ লৈতবা অমসুং অখঙবা কনবা অসিনা মালেমদা ঐখোয়না শিবগী চাং খ্বাইদগী নেম্বা লৈবাকশিংগী মনুং চনবা ঙমখি। মসি থাগৎফম থোকই। ঙসিদি ঐখোয়গী লমদম অসিগী অমসুং মালেমগী থাজবশিংনা খোঙজেল য়াংনা বেক্সিন কাপ্পদা মিৎয়েং থমখি। হিরম অসিদসু ঐখোয়না চপ মান্ননা মতেং পাংনবা অমসুং চুশিন্নবা তাই।” হায়না প্রধান মন্ত্রীনা ফোঙদোকখ্রে।
লৈবাকশিংদা পান্দম অসি ফংনবা ৱাহং হংলদুনা প্রধান মন্ত্রীনা হেল্থ ইমর্জেন্সীশিং থোরকপা মতমদা লৈবাক অতোপ্পনা হায়জরকপা মতুং ইন্না ঐখোয়গী রিজন অসিগী মনুংদা ঐখোয়গী দোক্তরশিং অমসুং নর্সশিংনা থুনা চৎপা য়ান্নবগীদমক্তা অখন্নবা ভিজা স্কীম অমা শেম্নবা অপাম্বা ফোঙদোকখ্রে। মেদিকেলগী অথু-অকায়গীদমক রিজনেল এয়র এম্ব্যুলেন্স এগ্রিমেন্ত অমা লৈহন্নবা ঐখোয়গী সিবিল এভিএসন মন্ত্রালয়শিং পুন্না থবক তৌমিন্নবা য়াগদরা? হায়নসু মহাক্না হংখ্রে। ঐখোয়গী মীয়ামগী মরক্তা কোবিদ-১৯ বেক্সিনশিংগী কান্নবা ফংবগী মতাংদা দেতা খোমজিনবা, শেম-শাবা অমসুং দেতা নৈন্নবগী রিজনেল প্লেতফোর্ম অমা ঐখোয়না শেম্বা য়াগদরা? হায়না মহাক্না ৱাখল্লোন ফোঙদোকখ্রে। মখা তারদুনা মহাক্না হংখি ঐখোয়না মসিগা মান্ননা তুংদা থোরক্কদবা লাইচৎশিং ঙাকথোক্নবগীদমক তেক্নোলোজিনা মতেং পাংবা ইপিদিমিওলোজি শেম্নবা ঐখোয়না রিজনেল নেতৱার্ক অমা শেম্বা য়াগদরা?
কোবিদ-১৯ অসিগী মতুংদসু মাই পাকখ্রবা পব্লিক হেল্থ পোলিসীশিং অমসুং স্কীমশিংগী মতাংদা মতেং পাংননবা প্রধান মন্ত্রীনা অপাম্বা ফোঙদোকখ্রে। মহাক্না হায় ভারতকী আয়ুশমান ভারত অমসুং জন আরোগ্যা স্কীমশিং অসি লমদম অসিগী কেস-স্তদীশিংদা কান্নগনি। “করিগুম্বা ২১শুবা চহিচা অসি এসিয়াগী চহিচা ওইবা তারবদি, খা এসিয়াগী লৈবাকশিং অমসুং ভারত মহাসাগরগী ইথৎতা লৈরিবা লৈবাকশিংগী মরক্তা পুনশিন্দ্রবদি মসি ওইথোক্লোই। লাইচৎ মনুংদা নখোয়না উৎখিবা লমদম অসি অমতা ওইবগী থৌনা-লিংজেল অদুনা অসিগুম্বা অপুনবা অসি ওইথোকপা য়াই হায়না তাকখ্রে।” হায়না ফোঙদোক্লদুনা প্রধান মন্ত্রীগী ৱারোল লোইশিনখি।
