ঙসি নই দিল্লীদা প্রধান মন্ত্রীনা জে.পি. মোরগান ইন্তর্নেস্নেল কাউন্সিলগী মেম্বরশিং উনখ্রে। ২০০৭গী মতুংদা ভারত্তা ইন্তর্নেস্নেল কাউন্সিলগী মীফম পাংথোকপা হন্দক্কী অসিনা অহানবনি।
ইন্তর্নেস্নেল কাউন্সিল অসিদা ব্রিতিশকী হান্নগী প্রধান মন্ত্রী তোনী ব্লেয়র, ওস্ত্রেলিয়াগী হান্নগী প্রধান মন্ত্রী জোন হোৱার্দ, হান্নগী য়ু.এস. সেক্রেতরী ওফ স্তেত হেনরী কিসিঙ্গর অমসুং কন্দোলিজা রাইজ, হান্নগী দিফেন্স সেক্রেতরী রোবর্ত গেৎস, জেমী দিমোন (জে.পি. মোরগান চেস), রতন তাতা (তাতা গ্রুপ) অমসুং নেস্তলে, অলিবাবা, অলফা, ইবরদোলা, ক্রাফ হৈজগী মীহুৎশিং য়াওরি।
ভারত্তা লাকপগীদমক তরাম্না ওকলদুনা, প্রধান মন্ত্রীনা ভারত অসি ২০২৪দা য়ু.এস. দোল্লর ত্রিল্লিয়ন ৫গী ইকোনোমী অমা লৈহন্নবা পান্দম থম্লিবা অদুগী মতাংদা খন্নখি। প্রধান মন্ত্রীনা হায়খি মহাক্কী সরকারনা পায়খৎলিবা মরুওইবা থৌশিলশিংগী মনুংদা মালেমগী থাক্কী ইনফ্রাস্ত্রকচরশিং শেমগৎপা অমসুং মমল হোংবা অনা-লায়েংগী থবকশিং ফগৎহনবা অমসুং অফবা মগুন লৈবা এজুকেসন ফংহনবা য়াওরি।
সরকারগী থৌশিল শেম্বদা মীয়াম্বু শরুক য়াহনবা হায়বসি লেংদবা অমা ওইরি। মপান লৈবাক্কী থৌশিলগী মতাংদা, ভারতনা নক্নবা মরূপশিং অমসুং য়ুম্লোন্নবশিংগা লোয়ননা অফবা অমসুং মরম চাবা মালেমগী কাংলোন অমা লৈহন্নবা মখা তানা পুন্না থবক তৌমিন্নগনি হায়না প্রধান মন্ত্রীনা ফোংদোকখি।
