ঙসি ভিদিও কনফরেন্সকী খুৎথাংদা প্রধান মন্ত্রী শ্রী নরেন্দ্র মোদীনা ৱার্ল্দ সস্তেনেবল দিবলপমেন্ত সমিৎ ২০২১ হৌদোকখ্রে। সমিৎ অসিগী পান্দমদি ‘ঐখোয়গী তুংগী ফিবম অমুক হন্না মশক তাকপা: পুম্নমক্কী লু-নানবা অকোয়বগী ফিবম লৈহনবা’ হায়বনি।
থৌরম অদুদা ৱা ঙাংবদা তেরি থাগৎলদুনা প্রধান মন্ত্রীনা হায়খি ঐখোয়গী হৌজিক অমসুং তুংগীদমক অসিগুম্বা মালেমগী মীফম অসি মরুওই। লাক্কদৌরিবা মতমদা মীওইবা খুন্নাইগী চাউখৎপা অসি পোৎশক অনিনা মশক তাক্কনি। অহানবা পোৎশক্না ঐখোয়গী মীয়াম হকচাং ফনা লৈবনি । অনিশুবনা ঐখোয়গী মালেম অসিগী অফবা হকশেলনি অমসুং অনিমক মরি লৈনৈ।
মহাক্না হায়খি মালেম অসি মশা ফনা লৈহন্নবা ৱা খন্ননবা মফম অসিদা ঐখোয় পুনবনি। ঐখোয়না মায়োক্নরিবা শিংনবা অসি পাক-চাউরে। ঐখোয়না থেংনরিবা অৱাবশিং অসি মহৌশাদগী লৈরক্লবা পাম্বৈশিংনা কোকহনবা ঙম্লোই। হৌজিক য়াম্না দরকার ওইরিবা অসি ঐখোয়গী নহারোলশিংগীদমক অমসুং তুংকোইনা চৎনগদবা চাউখৎ-থৌরাংগী থবক পায়খৎনবা অনৌবা ৱাখল্লোন পুথোকপা অসিনি।
প্রধান মন্ত্রীনা হায়খি অইং-অশাগী খল হোংলকপা থিংনবা ক্লাইমেত জজতিস পুরক্নবা থবক পায়খৎকদবনি। লায়রবশিংদা মীনুংশিগী মিৎয়েং য়েংবগা লোয়ন্না চাউখৎপা পুরকপগী পান্দম্না ক্লাইমেত জজতিসকী ইথিল পীরি। ক্লাইমেত জজতিসকী ৱাহন্থোক্তি চাউখৎলক্লিবা লৈবাকশিং চাউখৎনবা মফম অমা পীবনি। ঐখোয় খুদিংমক্না ঐখোয় অমমমগী অমসুং অপুনবগী থৌদাং মশক খঙলবদি ক্লাইমেত জজতিসকী অচুম্বা ফংবা ঙমগনি।
মহাক্না হায়খি ভারতকী পান্দমদি থবক ওইনা পাংথোকপনি। মীয়ামগী থবকশিংগী থৌনা অসিনা ঐখোয়না পীখিবা থাজবশিং পাংথোক্নবা অমসুং পেরিসকী পান্দমশিং ফংনবা লম্বীদা ঐখোয় চঙশিল্লে। জি.দি.পিগী মৈখু থাদোকপগী চাং ২০০৫গী চাং চাদা ৩৫দগী চাদা ৩৩দা হন্থহন্নবা ঐখোয়না থাজবা পীরে। লেন্দ দিগ্রেদেসন নিউত্রেলিতি(এল দি এন)দা ভারতনা পীখিবা থাজবশিং তপ্না তপ্না খুমাঙচাউশিল্লে। ভারত্তা রিনিউএবল ইনর্জিগী থবকশু ফিবম ফগৎলক্লি। ২০৩০ ফাওবগী মনুংদা গিগা ৱাত ৪৫০গী রিনিউএবল ইনর্জি পুথোক্নবা পান্দম ফংনবা লম্বীদা ঐখোয় চঙশিল্লি।
প্রধান মন্ত্রীনা হায়খি মী খুদিংমক খুদোংচাবা ফংহন্দ্রবদি সস্তেনেবল দিবলপমেন্ত মপুংফাদে। মাইকৈ অসিদশু ভারত খুমাঙচাউশিল্লে। মার্চ ২০১৯দা ভারতনা চাদা ১০০ মৈ ফংহনবা ঙমখ্রে। মসি সস্তেনেবল তেক্নোলোজিশিং অমসুং অনৌবা নমুনাশিংগী খুৎথাংদা পাংথোকখিবনি। উজালা য়োজনাগী মখাদা মীয়ামদা এল.ই.দি ব্লব মিল্লিয়ন ৩৬০ ফংহনখ্রে। মসিনা চহি অমদা কার্বোদাইওক্সাইদ তন মিল্লিয়ন ৩৮ হন্থহল্লে। জল জিবন মিসন্না থা ১৮গী মনুংদা য়ুমথোঙ মিল্লিয়ন ৩৮ তোতি ঈশিং ফংহনখ্রে। প্রধান মন্ত্রী উজৱালা য়োজনাগী মখাদা লায়রবগী পনখৈ মখাদা লৈবা ইমুং মিল্লিয়ন ৮০ হেন্না চাক থোঙনবা গ্যাস ফংখ্রে। ভারতকী ইনর্জি শীজিন্নবদা নেচরেল গ্যাসগী চাকথুং হৌজিক চাদা ৬ ওইরিবা অসি চাদা ১৫দা হেনগৎহন্নবা ঐখোয় থবক পায়খৎলি।
প্রধান মন্ত্রীনা হায়খি তুংকোইনা চাউখৎপা হায়বা অসি ফংনবা মৈখু চেন্দবা ইনর্জি অসি খক্তনা পাম্বৈ ওইরি। ঐখোয়না পাম্লিবা অসি হেন্না লু-নানবা মালেম অমনি। উমংশিং অমসুং অশং-অমানগী মফমশিং ইকায়খুম্নবা উৎপা ঐখোয়গী চৎনবী অসিনা মশক থোকপা ফলশিং উবা ফংলে। তুংকোইনা চৎনগদবা চাউখৎ-থৌরাংগী ঐখোয়গী পান্দম অসিদা শা-ষনশিং ঙাকশেনবা য়াওরি। হৌখিবা চহি ৫-৭ অসিদা নোংশাশিং, কৈশিং, কবো কৈশিং অমসুং গঙ্গা তুরেলগী দোলফিন মশিং হেনগৎলক্লে।
মহাক্না হায়খি অপুনবা থবকশিং খক্তনা তুংকোইনা চৎনগদবা চাউখৎপা পুরকপা ঙমগনি। মীওই অমনা লৈবাক্কী ফনবা খল্লবা, লৈবাক খুদিংমক্না মালেমগী ফনবা খল্লবা, অদু ওইরবদি তুংকোইনা চৎনগদবা চাউখৎপা পুরকপা ঙমগনি। ইন্তরনেসনেল সোলার এল্লাইন্সকী খুৎথাংদা মাইকৈ অসিদা ভারতনা থবক অমা পায়খৎলে। মালেম পুম্নমক্কী খ্বাইদগী ফবা থবকশিং পাংথোক্নবা শরুক য়ারিবশিং অমসুং লৈবাকশিংনা পুকচেল শেংবা দরকার ওই।
ইন্নোবেসনগী মখাদা মহাক্না হায়খি রিনিউএবল ইনর্জি অমসুং অকোয়বগী ফিবম শোকহন্দবা তেক্নোলোজিগী লমদা স্তার্দ-অপ কয়া থবক পায়খৎলি। মখোয়গী থবকশিং অসি ঐখোয়না মতেং পাংগদবনি। ঐখোয়গী লৈবাক্কী নহারোলশিংগী থৌনা অসিনা অফবা ফলশিং ফংবা ঙমগনি।
প্রধান মন্ত্রীনা হায়খি মহৌশানা থোকহনবা অৱা-অনা থেংন্নবা মীওইবগী পাঙ্গল-লৌশিং অমসুং তেক্নোলোজি দরকার ওই। মাইকৈ অসিদা ঐখোয়না কোলিএসন ফোর দিজাস্তার রিসিলিয়েন্ত ইনফ্রাস্ত্রকচরগী শরুক অমা ওইনা থবক পায়খৎলি। মখা তানা তুংকোইনা চৎনগদবা চাউখৎ-থৌরাংগী থবকশিংগী পাংথোকপা য়াবা থবকশিং পাংথোক্নবা ভারতনা থৌরাং তৌদুনা লৈরি। মীওইবা খুন্নাইগী খনবা ঐখোয়গী থবক অসি মালেমগী অফবা অমা ওইগনি।
থৌরম অদুদা গুয়ানাগী রাস্ত্রপতি দোক্তর মোহমদ ইরফান অলি, পাপুৱা নিউ গুইনিয়াগী প্রধান মন্ত্রী জেমস মারাপে, মালদিবসকী পিপলস মাজিলিসকী স্পিকর মোহমদ নসিদ, য়ুনাইতেদ নেসন্সকী দিপুতি সেক্রেতরি জেনেরেল অমিনা জে মোহমদ অমসুং ইনভাইরোনমেন্ত, ফোরেস্ত অমসুং ক্লাইমেত চেঞ্জগী য়ুনিয়ন মিনিস্তর শ্রী প্রকাস জাবরেকার শরুক য়াখি।
