আর্জেন্তিনাগী ব্যুনোস আইরিসতা পাংথোকপা জি-২০ সমিৎকী নাকলদা ২০১৮গী নবেম্বর ৩০দা, ঐখোয়, ব্রাজিল, রুসিয়ান ফেদেরেসন, ইন্দিয়া, চাইনা অমসুং খা-অফ্রিকাগী লৈবাক্কী অমসুং সরকারগী লুচীংবশিং উনরে। ২০১৮গী জি-২০দা আর্জেন্তিনানা প্রসিদেন্দ ওইবা অসিদা ঐখোয়না শৌগৎলি অমসুং থাগৎলি অমসুং তরাম্না ওকপগীদমক ঐখোয়না থাগৎলি।
মালেমগী রাজনিতীগী, ঙাকশেন অমসুং মালেমগী শেন-থুমগী ৱাথোকশিংগী অমসুং তুংকোইনা চৎনগদবা চাউখৎ-থৌরাংগী থবকশিং পায়খৎপদা থেংনরিবা খুদোংচাদবশিংগী মতাংদা ঐখোয়না ৱাখল্লোনশিং শরুক য়ামিন্নখি। শান্তি লৈবা মালেম অমা, য়ুনাইতেদ নেসন্সকী মরুওইবা থৌদাং, য়ু এন চার্তরগী শীজিন্নফম অমসুং প্রিন্সিপলশিং, মালেমগী আইনশিং ইকায়খুম্নবা, গনতন্ত্র য়োকখৎপা অমসুং আইনগী কাংলোন ইনবগী মতাংদা ঐখোয়না অমুক হন্না অচেৎপা ফিরেপ লৌখি। মালেমগী লৈবাকশিংগী মরুপ-মপাং ওইবগী মরি কনখৎহন্নবা অমসুং ফজবা, মরম চাবা অমসুং গনতন্ত্রিক ওইবা অমসুং মালেমগী কাংলোনশিং য়োকখৎনবা ঐখোয়না অমুক হন্না থাজবা পীখি।
ব্রিক্স লৈবাক খর য়াওনা লেপ্তনা তেরোরিস্তশিংনা খুৎথারকপগী থৌদোকশিং ঐখোয়না য়ানিংদবা ফোঙদোক্লি। মফম অমদা কনাগুম্বা খরনা পাংথোক্লিবা মখল খুদিংমক্কী তেরোরিজমগী থবকশিং ঐখোয়না য়ানিংদবা ফোংদোক্লি। মালেমগী আইনগী অচেৎপা অমদা য়ু এনগী মখাদা তেরোরিজম থেংননবা ঐখোয়না তকশিল্লি। জোহেননেসবার্গ দিক্লারেসনদা য়ানখিবা ৱাফমশিং য়াওনা তেরোরিজম থেংননবা অকনবা থৌরাং অমা পায়খৎনবা ঐখোয়না লৈবাক খুদিংমক্তা খঙহল্লি।
অরোনবা লৈতবা, মীচং-মীখাই নাইদবা, মনিং তম্বা অমসুং পুন্না কোনশিনবা মালেমগী ললোন-ইতিক্কী থবক লৈহন্নবা দবল্যু তি ওগী মখাদা কাংলোনগী মখা পোনবা মালেমগী লৈবাকশিংগী ললোন-ইতিক্কী থবক ঐখোয়না অমুক হন্না শৌগৎলি। দব্ল্যু তি ও থবক তৌবা হেনগৎনবা পান্দমদা দব্ল্যু তি ওগী অতৈ মেম্বরশিংগা মহৈ চাগদবা মখলগী ৱারি শানবা ঐখোয়না থৌরাং তৌদুনা লৈরি।
দব্ল্যু তি ওগী ৱাখল্লোন অমসুং নিয়মশিং অসি মশা মতোমতগী খনবা অমসুং ঙাথোকতুনা লৈবা থবকশিংগী মায়োক্তনি। দব্ল্যু তি ওগী মখাদা মখোয়গী ফিরেপশিং লেংদনা লৈদুনা, দব্ল্যু তি ওগী মায়োক্তা লৈবা অসিগুম্বা থবকশিং অসি থেংননবা ঐখোয়না খঙহল্লি অমসুং অসিগুম্বা মীচং-মীখাই নাইবা অমসুং পুনবা য়াদবা থবকশিং অসি হন্দোক্কদবনি।
হৌজিক থেংনরিবা শিংনবশিং অসি মপুং ফানা মায়োক্নবা ঙম্নবা দব্ল্যু তি ও ফগৎহনবগী থবক্তা ঐখোয়না শৌগৎলি। মসিগী থবক অসিদা দব্ল্যু তি ওগী মরুওইবা পান্দমশিং অদু ঙাকতুনা থমগদবনি অমসুং চাউখৎলক্লিবা লৈবাকশিংগী অপাম্বশিং অদু খঙনা থবক তৌবীগদবনি।
য়ানদবা লাকপা মতমদা দব্ল্যু তি ওনা ৱায়েনবগী থবক অসি মসি ফজনা থবক তৌবগী য়াম্না মরুওইবা অমনি। মসিনা ফজনা মথৌ পাংথোকপা অসিনা তুংদা দব্ল্যু তি ওনা ৱায়েনবগী থবক চৎথরকপা মতমদা মেম্বরশিংদা থাজবা লৈহনগনি। দব্ল্যু তি ওগী ৱায়েনবগী থবক অসি লেংদনা অমসুং মপুং ফানা মথৌ পাংথোক্নবা এপ্পেলেত বোদি খনবগী থবক অথুবা মতমদা পাংথোক্নবা ঐখোয়না তকশিল্লি।
দব্ল্যু তি ওনা মতমগী হোংলক্লিবশিংগা চাননা থবক তৌবা ঙম্নবা, পুন্না চাউখৎমিন্ননবা, মালেমগী ললোন-ইতিক্কি থবকশিং লৈবাক খুদিংমক শরুক য়াবা ঙম্নবা অমসুং মালেমগী শেন-থুমগী থবকশিংদা মপুং ফাবা থৌদাং লৌবা ঙম্নবা অতোপ্পা মেম্বর লৈবাকশিংগা পাউ ফাউনবা হেনগৎহন্নবা ঐখোয়না অমুক হন্না ৱারেপ লৌরি।
আর্জেন্তিনানা য়ুম্বু ওইরিবা জি-২০গী পান্দম তুংকোইনা চাউখৎপা পুরক্নবা ৱাখল তামিন্নবা হায়বা অসি ঐখোয়না তরাম্না ওক্লি আমসুং মসিনা ইনফ্রাস্ত্রকচর শেমগৎপা, তুংদা চানবা মরাং কাইনা ফংহন্নবা হোৎনবা অমসুং থবক ফংহন্নবা হোৎনবনি।
ইনফ্রাস্ত্রকচর শেমগৎপগী মরুওইবা অদু ঐখোয়না খঙলে অমসুং মালেমগী ওইনা ইনফ্রাস্ত্রকচরগী অৱাৎপা লৈরিবশিং মেনগৎনবা মতেং পাংবা হায়না থাজবা পীরি অমসুং নিউ দিবলপমেন্ত বেঙ্ক য়াউনা অমাং-অতা থোক্লোইদবা তুংকোইনা চৎনগদবা ইনফ্রাস্ত্রকচর শেমগৎপগী তঙাইফদবা লৈরি।
ইন্তরনেসনেল মনিতরি ফন্দ(আই এম এফ)না ময়াইদা লৈদুনা মালেমগী ওইনা মপাঙ্গল কনবা ফিনান্সিয়েল সেফতি নেতৱার্ক অমা শেমগৎনবা ঐখোয়না তকশিল্লি। ২০১৯গী স্প্রিং মিতিং ফাউবগী মনুংদা অমসুং ২০১৯গী চহিগী মীফমদগী থেংদনা চাউখৎত্রিবা লৈবাকশিং ঙাকশেনবা য়াওনা আই এম এফগী ১৫সুবা জনরেল রিভিউ ক্বাতাআদা চাউখৎলক্লিবা ইকোনোমিশিং শোইদনা য়াওহন্নবা ঐখোয়না থাজবা পীখি।
স্তেনেবল দিবলপমেন্ত এজেন্দা ২০৩০ অমসুং স্তেনেবল দিবলপমেন্ত গোল চৎনহন্নবা ঐখোয়গী থাজবা অমুক হন্না পীরি, মসিনা মনিং তম্না কালুপ খুদিংমক চাউখৎপা অমসুং ইকোনোমি, সোসিয়েল অমসুং ইনভাইরোনমেন্তগী মাইকৈ অহুমদা তুংকোইনা চৎনগদবা চাউখৎপা পুরকপা ঙমগনি লোয়ননা ২০৩০ ফাওবদা লায়রবা মুৎথৎপা হায়বা পান্দম অদু ফংনবা হোৎনবদা মতেং পাংগনি। অদিস অদাবা এক্সন এজেন্দাগী মতুংইন্না চাউখৎলবা লৈবাকশিংনা মখোয়গী ও দি এ অদু মপুং ফানা, মতম চানা চাউখৎলক্লিবা লৈবাকশিংদা য়ৌহন্নবা ঐখোয়না তকশিল্লি।
মালেমগী শেন-থুম পাকথোক-চাউথোরকপগী মতুংইন্না, থোং মান্নদবা অমসুং খুদোংথিবা কয়া হেনগৎলক্লি। চাউখৎলবা ইকোনোমিশিংনা চাউখৎলক্লিবা ইকোনোমিশিংদা চৈথেং পীরকপা ইকুই কুইদনা ঐখোয়না থেংনরে। জি-২০দা ইকোনোমিশিংনা মখোয়গী পোলিসি দাইলোগ অদু কনখৎহন্নবা অমসুং খুদোংথিবা য়াবশিং মখা তানা শন্দোরকপা থিংনবা ঐখোয়না তকশিল্লি।
ক্লাইমেত চেঞ্জগী মতাংদা, য়ু এন এফ সি সি সি গী প্রিন্সিপলশিংগী মখাদা পেরিস এগ্রিমেন্ত মপুং ফানা চৎনহন্নবা ঐখোয়না থাজবা পীরি। চাউখৎলক্লিবা লৈবাকশিংনা মায়োক্নবা ঙম্নবা চাউখৎলবা লৈবাকশিংনা মখোয়দা শেন-থুম, তেক্নোলোজি অমসুং ত্রেনিংগী তেংবাং পীনবা ঐখোয়না তকশিল্লি। পেরি এগ্রিমেন্ত মপুংফানা থবক ওইনা পাংথোক্নবা ঐখোয়না লৈবাকশিংদা খঙহল্লি। অহানবা গ্রিন ক্লাইমেত ফন্দ শেমগৎপগী মরুওইবা অমসুং তঙাইফদবা অদু ঐখোয়না তকশিল্লি ।
২০১৮গী জুলাই ২৫-২৭দা জোহাননেসবার্গতা ১০সুবা ব্রিক্স মীফম মাইপাক্না পাংথোকপগীদমক ঐখোয়না খা-অফ্রিকা তরাম্না ওক্লি অমসুং মীওইবগী য়াইফনবা ঐখোয়গী মরুপ-মপাং ওইবগী মরি মখা তানা ফগৎহনবা হায়না অমুক হন্না ৱারেপ লৌখি। খা-অফ্রিকানা চেয়রমেন ওইবা মতমদা শেন-থুম, শান্তি অমসুং ঙাকশেনগী লমদা মতেং পীনবা হেনগৎহনবদা ঐখোয় অপেনবা পোকই। ব্রিক্স পার্তনরশিপ ওন নিউ ইন্দস্ত্রিয়েল রিভোলুন(পার্তনির),ব্রিক্স ভেকশিন রিছাস এন্দ দিবলপমেন্ত সেন্তর, ব্রিক্স ইনর্জি রিছাস কোওপরেসন প্লেতফোর্ম শেমগৎলে অমসুং সাউ পাওলোদা নিউ দিবলপমেন্ত বেঙ্কগী অমেরিকাস রিজনেল ওফিস অমা হাংদোক্লে।
২০১৯দা ব্রাজিলনা য়ুম্বু ওইগদৌরিবা ১১সুবা ব্রিক্স সমিৎতা ঐখোয়না থাজবা থম্লি অমসুং লাক্কদৌরিবা ব্রিক্স চেয়র অসিদা ঐখোয়না ব্রাজিলদা মপুং ফানা শৌগৎকনি।
