প্রধান মন্ত্রী শ্রী নরেন্দ্র মোদী অমসুং মোঙ্গোলিয়াগী রাস্ত্রপতি শ্রী খাল্তমাগিন বাত্তুলগানা উলানবাতরগী পুৱারী ওইরবা গন্দান তেগচিনলিং মোনাস্ত্রিদা ভগবান বুদ্ধ অমসুং মহাক্কী তুংইনবা অনিগী মীতম মায়খুম হাংদোকখ্রে।
প্রধান মন্ত্রীনা ২০১৫দা মহাক্কী মোঙ্গোলিয়া খোংচৎ মনুংদা গন্দান তেগচিনলিং মোনাস্ত্রিদা পুজা তৌখি অমদি মোনাস্ত্রি অসিদা ভগবান বুদ্ধগী মীতম অমা খুদোল তম্নবা লাউথোকখি।
মীতম অসিদা ভগবান বুদ্ধনা মহাক্কী তুংইনবা অনিগা লোয়ননা ফমদুনা শান্তি অমসুং মীনুংশিগী পাউজেল পীরি। মীতম অসি থা অসিগী হৌরকপদা ২০১৯গী সেপ্তেম্বর ৬তগী ৭ফাওবা উলানবাতরদা পাংথোকখিবা সম্বাদ দাইলোগকী অহুমশুবা এদিসন মনুংদা গন্দান তেগচিনলিং মোনাস্ত্রিদা খিনখি। সম্বাদ দাইলোগকী অহুমশুবা এদিসন্না তোঙান তোঙানবা লৈবাকশিংদগী বুদ্ধ ধর্মগী লুচিংবশিং, খং–হৈরবশিং অমসুং ওজাশিংবু পুল্লপ পুন্সিন্দুনা বুদ্ধ ধর্মগা মরী লৈনবা হিরমশিং খন্ন–নৈনখি।
গন্দান তেগচিনলিং মোনাস্ত্রি অসি মোঙ্গোলিয়াগী বুদ্ধ ধর্ম চৎপশিংগী মরুওইবা সেন্তর অমনি অমদি বুদ্ধিস্ত হেরিতেজকী মমল য়াম্লবা লনগৈ অমনি। মসিনা ২০১৯গী জুন ২১দগী ২৩ ফাওবা পাংথোকখিবা এসিয়ান বুদ্ধিস্ত কনফরেন্স ফোর পিছ (এ.বি.সি.পি.)গী ১১শুবা জেনরেল এসেমব্লিগী য়ুম্বু ওইদুনা কনফরেন্স অসিগী ৫০শুব কুমওন পাংথোকখি। থৌরম অদুদা ভারত, খা কোরিয়া, রসিয়া, শ্রী লঙ্কা, বঙ্গলাদেশ, ভুতান, নেপাল, অৱাং কোরিয়া, এল.পি.দি.আর., থাইলেন্দ, জপান য়াওনা লৈবাক ১৪দগী মীথুংলেন ১৫০ হেনবনা শরুক য়াখি।
প্রধান মন্ত্রী অমসুং মোঙ্গোলিয়াগী রাস্ত্রপতি শ্রী খাল্তমাগিন বাত্তুলগানা ঙসি মায়খুম হাংদোকখিবা মীতম অসি ভগবান বুদ্ধনা মালেমদা পীরিবা পাউজেল অদু ঐখোয়গী লৈবাক অনিমক্না পুন্না ইকায় খুম্নবগী খুদম্নি।
