ভারতকী শোইদ-ঙামদবা, ঙাক-শেল অমসুং লৈবাক অসিবু ঙাক-শেল্লিবশিংগী য়াইফ-থৌরাংদা প্রধান মন্ত্রীগী মিৎয়েং চংবগা লোইননা, প্রধান মন্ত্রী শ্রী নরেন্দ্র মোদীনা ওফিস পাইরকপগী অহানবা ৱারেপ ওইনা নেস্নেল দিফেন্স ফন্দগী মখাদা ‘প্রধান মন্ত্রীগী স্কোলরশিপ স্কিম’দা চাউনা অহোংবা পুরকপদা অয়াবা পীখ্রে।
প্রধান মন্ত্রীনা মখাগী অহোংবশিং অসিদা অয়াবা পীখিঃ
- স্কোলরশিপকী চাং অসি থা অমদা নুপা মচাশিংগী লুপা ২০০০ ওইরম্বদগী লুপা ২৫০০ অমসুং নুপীমচাশিংগী লুপা ২২৫০ ওইরম্বদগী লুপা ৩০০০দা হেনগৎখ্রে।
- স্কোলরশিপ স্কিমগী ঙমখৈ অসি লালহৌবগী ইরাং/নক্সলাইৎশিংগী লান্দাদা থৱাইনা পোন্থা ওইখ্রবা অদুগুম্বা রাজ্যগী পুলিসকী মীওইশিংগী মখা পোনবা মীওই ফাওবা কোনশিনখ্রে। রাজ্যগী পুলিসকী মীওইশিংগী অনৌবা স্কোলরশিপশিংগী কোতা অসি চহিদা ৫০০ ওইগনি। মসিগা মরি লৈননা গৃহ মন্ত্রালয়না নোদল মন্ত্রালয় ওইগনি।
য়ুম্ফম:
নেস্নেল দিফেন্স ফন্দ (এন.দি.এফ.) অসি ১৯৬২দা লিংখৎখিবনি। মসিগী পান্দমদি লৈবাক অসিগী ঙাক-শেলগীদমক হোৎনবশিং অদুদা পুক্নীং থৌগৎপনি। মসিগীদমক শেলগী তেংবাং পীহল্লক্নবা অমসুং লৈবাক অসিগী ঙাক-শেলগীদমক হোৎনবশিং অদুবু পুক্নীং থৌগৎনবা অমদি মদুবু শিজিন্নবদা ৱারেপ লৌনবগীদমক্নি।
হৌজিক্কী ওইনা ফন্দ অসি লান্মীশিং, পেরা মিলিতরী ফোর্সশিং অমসুং রেলৱে প্রোতেক্সন ফোর্সশিং, লোইননা মখোয়গী মখা থাবশিংগী য়াইফ-থৌরাংগীদমক শিজিন্নৈ। ফন্দ অসি প্রধান মন্ত্রীনা চেয়রপার্সন ওইবা অমসুং শেল-থুম অমসুং গৃহ মন্ত্রালয়না মেম্বর ওইবা এগজিক্যুতিব কমিতী অমনা পান্নরি।
নেস্নেল দিফেন্স ফন্দগী মখাদা ‘প্রধান মন্ত্রীগী স্কোলরশিপ স্কিম (পি.এম.এস.এস.)’কী অচৌবা স্কিম অসি লান্মীশিং অমসুং পেরা মিলিতরী ফোর্সশিং অমসুং রেলৱে প্রোতেক্সন ফোর্সশিংগী লৈখিদ্রবা/থবক্তগী পোৎথারবা শিনমীশিংগী লুখ্রাবী অমসুং মখা পোনবশিংগীদমক্তা তেক্নিকেল অমসুং পোস্ত-গ্রেজুএৎকী মহৈ-মশিং তম্বদা পুক্নীং থৌগৎনবগীদমক পাইখৎলি। স্কোলরশিপ অসি তেক্নিকেলগী ইন্সতিত্যুৎশিং (মেদিকেল, দেন্তেল, ভেতিরিনরী, এঞ্জিনীয়রিং, এম.বি.এ., এম.সি.এ. অমসুং মতিক চারবা এ.আই.সি.তি.ই./য়ু.জি.সি.না অয়াবা পীরবা মান্নবা তেক্নিকেলকী শিফমশিং)দা পীরি।
পি.এম.এস.এস.কী মখাদা, চহি খুদিংগী অনৌবা স্কোলরশিপ অসি ঙাকশেল মন্ত্রালয়গী মখাদা লৈবা লান্মীশিংগী মখা পোন্না হিংবা মীওই ৫৫০০, গৃহ মন্ত্রালয়গী মখাদা লৈবা পেরা মিলিতরী ফোর্সশিংগী মখা পোন্না হিংবা মীওই ২০০০ অমসুং রেলৱে মন্ত্রালয়গী মখাদা লৈবা ফোর্সশিংগী মখা পোন্না হিংবা মীওই ১৫০দা পীরি।
নেস্নেল দিফেন্স ফন্দ অসি ৱেবসাইৎ ndf.gov.in.গী থোংদা ওনলাইন ভোলুন্তিয়র কনত্রিব্যুসন ওইনা লৌশিল্লি।
ঐখোয়গী খুন্নাই অসিবু হেন্না শোইদ–ঙামদবা ওইহল্লিবশিংবু শৌগৎলিঃ
প্রধান মন্ত্রীনা ঐখোয়গী পুলিসকী মীওইশিংগী কাওঙমলরোইদবা থৌদাংশিং অদুগী মতাংদা শাংনা ঙাংখি। অকনবা নুংশাগী মৈশা, কা হেন্না ইংবা নত্তরগা অকনবা নোংজুগী মতমদা ঐখোয়গী পুলিসকী মীওইশিংনা মপুক্নীং চংবগা লোইননা মশাগী মথৌ পাংথোক্লি। অচৌ অচৌবা কুম্মৈগী মতম অদু ফাওবদসু, ঐখোয়গী পুলিসকী শিন্মীশিংনা মখোয়গী মথৌ তৌদুনা লৈ অদুগা অতৈ লৈবাক মচাশিংনা কুম্মৈ অদু পাংথোকই।
জাতি অমা ওইনা, শুপ্নগী মখোয়দা তৌবীমল খঙবা উৎপদা নত্তনা পুলিসকী শিন্মীশিং অমসুং মখোয়গী ইমুং-মনুংশিংগী য়াইফনবগীদমক করিগুম্বা খরা তৌবা হায়বসি ঐখোয়গী ইথৌনি। অসিগুম্বা ইথিল অসিদনি প্রধান মন্ত্রীনা ৱারেপ অসি লৌখিবা। ফংলিবা স্কোলরশিপ অসিনা পুলিসকী ইমুং-মনুংগী নহা কয়ামরুম্বু তোঙান তোঙানবা লমশিংদা মহৈ-মশিং তম্বা ঙমহল্লগনি। মসিনা মঙাল নাইবা নহা ওইরিবা কয়াগী ৱাখলদা পাঙ্গল হাপ্লগনি।
নীংশিংবা য়াই মদুদি প্রধান মন্ত্রী মোদীনা অহানবা থবক পাইবগী মতমদা নেস্নেল পুলিস মেমোরিয়েল অমা লিংখৎতুনা মদু লৈবাক মীয়ামদা কৎথোকখ্রবনি। নীংশিং খুবম অসি ঐখোয়গী পুলিসকী শিন্মীশিংগী থৌনা অমসুং কৎথোকপশিং অদুগী খুদম অমা ওইনা লেপ্লি অমসুং ভারত মচা ক্রোর কয়াদা থৌনা হাপ্লি।
