ঐহাক্না রসিয়ান ফেদরেসনদা ২২শুবা চহিগী সম্মিৎকীদমক অমসুং রিপব্লিক ওব ওস্ত্রিয়াগী ঐহাক্কী ইহান হানবা ওফিসিএল ওইবা খোঙচৎ ওইনা নুমিৎ হুম্নি চৎকনি।
ভারত অমসুং রসিয়াগী মরক্তা লৈরিবা অখন্নবা অমসুং কান্নবা কয়া পীরিবা মপাং অসি হৌখিবা চহি তরারোম অসিদা এনর্জী, সেক্যুরিতী, লল্লোন ইতীক, ইনভেস্তমেন্ত, হকশেল, এজুকেসন, নাৎ, তুরিজম অমসুং মীয়ামগী মরক্তা লৈরিবা মরী অসি হেন্না খুমাং চাউশিল্লক্লি। ঐহাক্না ঐহাক্কী মরুপ রাস্ত্রপতি ভ্লাদিমির পুতিনগা লোইননা লৈবাক অনিগী মরক্তা লৈনরিবা মরী অসি নৌনা য়েংশিনগনিওমসুং লমদমশিংগী অমসুং মালেমগী ওইবা সমশ্যাশিংদা লান্থোক্নগনি। ঐখোয়না শান্তি লৈবা অমসুং তংদু লৈতাবা লমদম অমা ওইহন্নবা শৌগৎনিংঙাই ওইবা থৌদাং লৌনবা হোৎনরি। খোঙচৎ অসিনা ঐহাক্কী ইফমদা রসিয়াদা লৈরিবা ভারতকী মশক থোক্লবা কম্ম্যুনিতীশিংগা উনবগী খুদোংচাবসু ফংলগনি।
ওস্ত্রিয়াদা ঐহাক্না রাস্ত্রপতি এলেকজেন্দর ভান দর বেল্লেন অমসুং চান্সেলর কার্ল নেহামর উনবগী খুদোংচাবা ফংগনি। ওস্ত্রিয়া অসি ঐখোয়গী খুমাং চাউশিল্লিবা অমসুং থাজনরিবা লৈবাক অমনি অমসুং ঐখোয়না গনতন্ত্র অমসুং প্লুরেলিজমগী মতাংদা মান্নবা ৱাখল্লোন লৈ। মসিনা চহি ৪০গী মতুংদা ভারতকী প্রধান মন্ত্রী অমনা চৎপা অহানবা খোঙচৎ ওইগনি। ঐহাক্না ঐখোয়গী মরক্তা লৈনরিবা মরী অসিবু হৌরক্লিবা অনৌবা ইন্নোভেসন, তেক্নোলোজী অমসুং তুং কোইনা চৎপা য়াবা চাউখৎ থৌরাংশিংদা হেন্না মাঙজিল থানা পুখৎনবা খন্ননিংবগী অপাম্বা লৈ। ঐহাক্না নাকল অনিমক্কী লল্লোন ইতীক্কী লুচিংবশিংগা লোইননা লল্লোন ইতীক অমসুং ইনভেস্তমেন্তকী খুদোংচাবা য়েংনবা মোৎ ফোংদোক্নগনি হায়না পারি। ঐহাক্না ওস্ত্রিয়াদা লৈবা মখোয়গী শিনফম অমসুং থবকশিংগীদমক ৱাংনা খন্নরিবা ভারত মচাশিংগসু ৱারী শানগনি।
