পুৱারিগী লমায়শিংদা চৌরি চৌরা থৌদোক্তা থৱায় কৎখ্রবা অথৌবশিং মতিক চাবা ইকায়খুম্নবা উৎপীদ্রে হায়না ঙসি প্রধান মন্ত্রীনা নুংঙাইতবা ফোঙদোকখ্রে। মহাক্না হায়খি শকখঙবীদ্রবা থৱায় কৎখ্রবা অথৌবশিং অমসুং নিংতম লান্মীশিংগী ৱারিশিং খঙহন্নবা ঐখোয়না পায়খৎলিবা থবকশিং অসি মখোয়গী মফমদা ইকায়খুম্নবা উৎপা ওইগনি। লৈবাক অসিনা নিংতম্বা চহি ৭৫ য়ৌরকপা অসিনা হেন্না চুনবা ওইরগনি। ঙসি ভিদিও কনফরেন্সকী খুৎথাংদা উত্তর প্রদেসকী গোরাখপুরদা ‘চৌরি চৌরা’ থৌদোক্কী চহি ১০০শুবা নিংশিং থৌরম হৌদোক্লবা মতুংদা প্রধান মন্ত্রীনা ৱা ঙাংখি।
প্রধান মন্ত্রীনা হায়খি চৌরি চৌরাগী থৌদোক্তা থৱায় কৎখ্রবশিংগী মরমদা খন্নদবা অসি লাইবক থিবনি। চৌরি চৌরা অসি মীচম মীয়াম মশা-মরোমদোম পুক্নিং থৌগৎখিবা ইহৌ ওইখি। পুৱারিগী লমায়শিংদা ইহৌ অসিগী য়াওল্লোইশিং মতিক চাবা ইকায়খুম্নবা উৎপীদ্রবশু মখোয়গী ঈ লমদম অসিগী লৈবাক লৈহাওদা তিনখ্রে।
প্রধান মন্ত্রীনা হায়খি নিংতম লালহৌগী থৌদোক অমদা নিংতম লান্মী ১৯ থৌরি য়ানখিবা তাঙ্কক অমা থিনবা হোৎনবা অসি অতাংবনি। মীওই ১৫০ থৌরি য়াল্লগা হাৎনবা হোৎনবদগী কনখিবা ববা রাগাবদাস অমসুং পন্দিৎ মদন মোহন মালভিয়াগী থবকশিং শ্রী মোদীনা নিংশিংখি।
প্রধান মন্ত্রীনা হায়খি নিংতম লালহৌগী মীয়াম্না নিংথিনা খঙনদ্রবা শরুকশিং খঙহন্নবা খোঙজং অসিদা নহারোলশিং অমসুং মহৈরোয়শিং শরুক য়াবদা হরাওই। নিংতম লান্মীশিংগী মরমদা লাইরিক অমা ইনবা ইজুকেসন মিনিস্ত্রিনা নহা ওইরিবা অইবশিংদা চেবাউ পীখ্রে। মসিনা চৌরি চৌরাগী নিংতম লান্মী কয়াগী পু্ন্সি ৱারিশিং লৈবাক মীয়াম মমাঙদা খঙহনগনি।
প্রধান মন্ত্রীনা হায়খি 'চৌরি চৌরা’গী চহি ১০০শুবা কুমওন থৌরম অসিগা মফম অদুগী কলা অমসুং কলচর অমসুং অত্মানির্ভরতাগা শম্নবা অসি ঐখোয়গী নিংতম লান্মীশিংদা উৎপা অশেংবা ইকায়খুম্নবনি। থৌরম অসি শীনবগীদমক মহাক্না উত্তর প্রদেসকী চীফ মিনিস্তর য়োগী অদিত্যনাথ অমসুং উত্তর প্রদেস সরকার থাগৎখি।
