প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রী মন্দলনা ঙসি প্রধান মন্ত্রী গ্রাম সরক যোজনা-III (PMGSY-III) মার্চ ২০২৫ গী ৱাংমদা মার্চ ২০২৮ ফাওবা মখা চত্থনবা অয়াবা পীখ্রে। মসিদা গ্রামিণ এগ্রিকলচরেল মার্কেতশিং (GrAMs), হায়র সেকেন্দরী স্কুলশিং অমসুং হোস্পিতালশিংগা খুঙ্গঙগী লমদমশিংগা শম্নহনগদবা থ্রু রুতশিং অমসুং মরুওইবা খুঙ্গঙগী লম্বীশিং শেমগৎপা য়াওরি। স্কীম অসিগী নৌনা লেপথোক্লবা অপুনবা শেনফম অসি লুপা করোর ৮৩,৯৭৭ ওইগনি।
মন্ত্রী মন্দলনা মখা তানা অতৈ ৱাফম কয়াগা লোয়ননা মখাগীশিং অসিসু অয়াবা পীখি:
তম্পাক লমদমগী লম্বী-থোংশিং অমসুং চীংগী লমদমগী লম্বীশিং শেমবা লোইশিনবগী মতম মার্চ ২০২৮ ফাওবা শাংদোকপা।
চীংগী লমদমগী থোংশিং শেমবা লোইশিনবগী মতম মার্চ ২০২৯ ফাওবা শাংদোকপা।
৩১.০৩.২০২৫ গী মমাঙদা অয়াবা পীখ্রবা অমসুং হৌজিক ফাওবা পীথোক্ত্রিবা থবকশিং অসি তেন্দর নত্ত্রগা থবক পীথোকপগী থৌরম লৌখৎপা য়াগনি।
অয়াবা পীগদবা ৱাৎলিবা অমসুং হান্ননা অয়াবা পীরবা লম্বীশিংগী পরিংদা লৈরিবা লোং স্পান থোংশিং (LSBs) (লুপা করোর ৯৬১ রোম ওইগনি হায়না পারিবা মশীং ১৬১) অয়াবা পীবা অমসুং তেন্দর নত্ত্রগা থবক পীথোকপা য়াগনি।
স্কিম অসিগী অহানবা শেনফম লুপা করোর ৮০,২৫০ দগী লুপা করোর ৮৩,৯৭৭ দা হেনগৎহনবা।
কান্নবশিং:
PMGSY-III গী মতম শাংদোকপা অসিনা পান্দম থম্লিবা খুঙ্গঙগী লম্বীশিং শেমগৎপা লোইশিন্দুনা মসিগী মথৌ তাবা খুন্নাই-শেন্মিৎলোনগী কান্নবশিং মপুং ফানা ফংহনগনি। মসিনা লৌউ-শিংউ অমসুং লৌউ-শিংউ নত্তবা পোত্থোকশিংগী কৈথেল ফংহনবদা মতেং পাংদুনা, চত্থোক-চৎশিনগী মতম অমসুং শেঞ্জং হন্থহন্দুনা খুঙ্গঙগী শেন্মিৎলোন অমসুং ললোন-ইতিক চাওখৎহনগনি অমসুং মসিনা খুঙ্গঙগী শেন্থোক হেনগৎহনগনি। লম্বী-থোং ফগৎলকপা অসিনা অৱাংবা থাক্কী মহৈ-তম্ফম অমসুং হকশেলগী ইনস্তিত্যুসনশিংদা হেন্না লায়না চত্থোক-চৎশিন তৌবা য়াহনগনি, মসিনা মরুওইনা মনুং হঞ্জিনবা অমসুং য়ৌশিনবা ঙমদবা মফমশিংদা তঙাইফদবা সর্ভিসশিং মতম চানা ফংহনগনি।
মখা চত্থনা থবক পায়খৎপা অসিনা লম্বী শেম্বগী থবকশিংদগী হকথেংননা অমসুং খুঙ্গঙগী এন্তরপ্রাইজশিং অমসুং সর্ভিসশিং য়োকখৎপগী খুত্থাঙদা নাকোয়ননা থবক পীবগী খুদোংচাবা চাউনা ফংহনগনি। মপুং ওইনা, মতম শাংদোকপা অসিনা খুঙ্গঙ অমসুং ময়োল্লমগী মরক্তা লৈরিবা অহোবা অসি মেনশিন্দুনা অমসুং বিকসিৎ ভারত 2047 গী মঙলান অসি মাঙলোমদা পুখত্তুনা পুম্নমক কোনশিনবা অমসুং তুং কোইগদবা চাওখৎপা পুরকপদা মতেং পাংগনি।
