লৈবাক্কীদমক থৱায় থাখ্রবা অথৌবশিং ইকায়খুম্নবা উৎলদুনা প্রধান মন্ত্রীনা হায়খি চৌরি চৌরাদা থৱায় থাখিবা অদুনা লৈবাক্কী নিংতম ইহৌদা অনৌবা মাইওন অমা পীখি। চহি ১০০গী মমাঙদা চৌরি চৌরাদা থোকখিবা থৌদোক অদু শুপ্নগী য়ুম মৈ থাবগী থৌদোক অমা নত্তে, চৌরি চৌরাগী পাউজেল অসি মফম কয়াদা য়ৌখি। ফিবম কয়াদগী য়ুম মৈ থাবগী থৌদোক অদু থোকখ্রবশু, মদুগী মরমশিং অদু য়াম্না মরুওই।
মহাক্না হায়খি ঐখোয়গী লৈবাক্কী পুৱারিদা হৌজিক চৌরি চৌরাগী পুৱারিগী ইহৌ অসি মরুওইনা লৌরে। ঙসিদগী হৌরগা চৌরি চৌরাগা লোয়ন্না খুঙ্গং খুদিংমক্না থৌনা ফনা কৎথোকখিবা থৌদোকশিং অদু নিংশিংনবা চহি চুপ্পা থৌরমশিং পাংথোক্লগনি। লৈবাক অসিনা নিংতম্বা চহি ৭৫ শুরকপগা লোয়ন্না অসিগুম্বা থৌরমশিং পাংথোকপা অসিনা হেন্না চুনগনি। চৌরি চৌরাগী অথৌবশিংগী মরমদা ৱা খন্নবা ৱাৎলিবা অসি নুংনাঙবা ফাওই। পুৱারিগী লমায়শিংদা অথৌবশিংগী মরমদা নিংথিনা য়াওদে অদুবু নিংতম্বা ফংনবা মখোয়দগী তাখিবা ঈ অদু লৈবাক অসিগী লৈবাক-লৈহাওদা মতম চুপ্পা লৈহৌরগনি।
প্রধান মন্ত্রীনা হায়খি অখন্নবা নুমিৎ অসিদা নিংতম লান্মী ১৫০ থৌরি য়ানবদগী কনখিবগীদমক মীয়াম্না বাবা রাগাবদাস অমসুং মহামানা মদন মোহন মালভিয়াগী থবকশিং নিংশিংগদবনি। নিংতম ইহৌগী খঙদ্রিবা থৌদোকশিং মখোয়না খঙনবা মসিগী থৌরম অসিদা মহৈরোয়শিং শরুক য়াবা অসিদা হরাওই। নিংতম্বা চহি ৭৫ মপুংফারকপদা নিংতম ইহৌগী শকখঙবীদ্রবা অথৌবশিংগী মরমদা লাইরিক অমা ইনবা ইজুকেসন মিনিস্ত্রিনা নহা ওইরিবা অইবশিংদা চেবাউ পীখ্রে। ঐখোয়গী নিংতম লান্মীশিংদা ইকায়খুম্নবা উৎপা ওইনা মফম অসিগী কলা অমসুং কলচরগী থৌরমশিং পাংথোকপগীদমক মহাক্না উত্তর প্রদেস সরকারগী থবকশিং থাগৎখি।
প্রধান মন্ত্রীনা হায়খি অপুনবগী পাঙ্গলনা মীনাইগী অৱাবদগী কোক্লে অমসুং মসিনা ভারত মালেমগী খ্বাইদগী চাউবা শক্তি অমা ওইবা ঙমহনগনি।মসিগী অপুনবগী থৌনা অসি অত্মানির্ভর ভারত খোঙজংগী য়ুম্ফম থোল্লে। কোরোনাগী অৱাবা মনুংদা লৈবাক ১৫০ হেন্নবগী মীয়াম মতেং পাংনবা ভারতনা তঙাইফদবা হিদাক-লাংথকশিং থাখি। মীওইবগী থৱায় কয়া কন্নবা ভারতনা লৈবাক কয়াদা তিকাশিং পীরি অমসুং মসিনা ঐখোয়গী নিংতম লান্মিশিং চাউথোকচরে।
হন্দক পাংথোকখিবা বজেতকী মতাংদা প্রধান মন্ত্রীনা হায়খি লাইচৎনা থোকহনবা খুদোংচাদবশিং কোকহন্নবা থবকশিংদা বজেতনা অনৌবা ইথিল পীরগনি। অনৌবা তেক্সশিংনা মীয়াম মীয়াম পোৎলুম ওইরগনি হায়না অখঙ-অহৈশিংনা চিংনরম্বশিং বজেতনা অরেম্বা তাহনখ্রে। লৈবাক অসি য়াংনা চাউখৎনবা শেন য়াম্না চাদিং তৌনবা সরকারনা ৱারেপ লৌরে। লম্বীশিং, থোঙশিং, রেলৱে লাইনশিং, অনৌবা ত্রেনশিং, বসশিং অমসুং কৈথেলশিং অমসুং মন্দিশিং শম্নবা লম্বীশিং শেমগৎনবা শেনফমশিং চাদিং তৌগনি।
ঐখোয়গী নহারোলশিং হেন্না ফজনা লাইরিক তম্নবা অমসুং হেন্না ফবা খুদোংচাবশিং ফংনবা বজেত অসিনা লম্বী শেম্লে। হায়রিবা থবকশিং অসিনা নহারোল লাখ কয়া থবক পীগনি। মমাঙদা বজেত হায়বগী ৱাহন্থোক অসি কৈদৌঙৈদা থবক ওইনা পাংথোক্তবা স্কিমশিং লাউথোকপা হায়না খঙনরম্মী। বজেত অসি ভোৎ বেঙ্কগী অঙ্ক খোৎনবা বাহি-খাতা(লেজর) ওন্থোকখি…হৌজিক লৈবাক অসি অনৌবা মাইওন অমা হোংলে অমসুং মিৎয়েং হোংলে হায়না প্রধান মন্ত্রীনা হায়খি।
প্রধান মন্ত্রীনা হায়খি ভারতনা লাইচৎ লাকশিনবা অসি মালেমগী লৈবাকশিংনা থাগৎনরে, অপীকপা খুঙ্গংশিং অমসুং অপীকপা তাউনশিংদা অনা-লায়য়েংগী খুদোংচাবশিং ফগৎহন্নবা সরকারনা হোৎনরি। বজেত্তা হকশেলগী কাইথোকপা শেনফম য়াম্না চাউনা হেনগৎলে। জিলা থাক্তা অৱাংবা থাক্কী তেস্ত তৌনবা খুদোংচাবশিং ফংহন্নবা থবক পায়খৎলে।
লৌমীশিংগী য়াইফনবা হৌখিবা চহি ৬ অসি পায়খৎখিবা থবকশিং পল্লদুনা শ্রী মোদীনা হায়খি লাইচৎকী খুদোংচাদবা কয়া থেংনরবসু লৌমীশিংনা রেকোর্দ ওইনা পোৎথোক পুথোক্লে। লৌমীশিংগী ফিবম ফগৎনবা বজেতনা থবক কয়া পায়খৎলে। লৌমীশিংনা মখোয়গী মহৈ-মরোংশিং লাইনা য়োনবা ঙম্নবা মন্দি লিশিং ১ ই-নামগা শম্নরে।
প্রধান মন্ত্রীনা হায়খি রুরেল ইনফ্রাস্ত্রকচর ফন্দ লুপা কোতি লিশিং ৪০দা হেনগৎলে। হায়রিবা থবকশিং অসিনা লৌমীশিং অত্মানির্ভর ওইহনগনি অমসুং লৌউ-শিংউগী থবক শেন্দোং লৈগনি। শ্বামিতভা স্কিম্না খুঙ্গংগী মীয়ামদা লম অমসুং য়ুমগী মপু ওইনবা চে-চাংশিং পীরগনি। চে-চাংশিং ফজনা পায়বা অসিনা লমগী মমল হেনগৎলগনি অমসুং ইমুংশিংনা বেঙ্কতগী শেন পুবা য়ারগনি অমসুং অতোপ্পশিংনা লম খোপচিল্লকপদগী কনবা ঙম্লগনি।
প্রধান মন্ত্রীনা হায়খি থবকশিং অসিনা হৌজিক মিলশিং থোঙ লোনবা, লম্বী ফত্তবা অমসুং ফজনা লায়য়েংদবা হোস্পিতালশিংগী অৱাবা মায়োক্নরিবা গোরাখপুর কান্নবা ফংলগনি। হৌজিক মফম অসিগী হার ফেক্তরি অমা থবক অমুক হৌরে অমসুং মসিনা লৌমীশিং অমসুং নহারোলশিংদা কান্নবা পীরগনি। সহর অসিদা এ.আই.আই.এম.এস অমা লৈরে। মেদিকেল কোলেজ অসিনা অঙাং লিশিং কয়াগী থৱায়শিং কল্লে। দিওরিয়া, কুসিনাগর, বাস্তি মহারাজনাগর অমসুং সিধধার্থ নাগরদা অনৌবা মেদিকেল কোলেজশিং লৈরে। লেন মরি, লেন তরুক্কী লম্বীশিং লৈদুনা মফম অসিগী চৎথোক-চৎশিনগী খুদোংচাবশিং ফিবম ফগৎলে অমসুং গোরাখপুরদগী সহর ৮দা ফ্লাইতশিং পাইরে। হৌজিক শেমগৎলিবা কুসিনাগর ইন্তরনেসনেল এয়রপোর্ত অসিনা তুরিজম হেনগৎলগনি। অত্মানির্ভরতাগীদমক পুরক্লিবা অহোংবশিং অসি নিংতম লান্মীশিংদা উৎপা ইকায়খুম্নবা অমনি।
Click here to read PM's speech
