ঐহাক্কী নুংশিজরবা ইরৈচাশিংবু খুরুমজরি।
ঙসি দেব-দীৱালীগী শেংলবা নুমীৎনি। ঙসি গুরু নানকজীগীসু পবিত্র ওইরবা শেংলবা মঙালগী নুমীৎনি। ঐহাক্না ঐহাক্না মালেমপুম্বগী মীশিং অমসুং ইরৈচাশিংদা য়াইফ-পাউজেল পীজরি। মসিসু য়াম্না নুংঙাই মদুদি চহী অমা মখাই লৈরবা মতুংদা সাবিহ কোরিদোর অসি অমুক হাংলে:
মরূপশা,
গুরু নানকজীনা হায়রি- 'ৱিচ্চ দুনিয়া সেৱ কমাএ তা দরগাহ বৈসন পাইএ'
হায়বদি তাইবং অসিদা থৌগল তৌবগী লম্বি অসি চৎপনা পুন্সি অসি মায় পাকপা ওই। ঐখোয়গী সরকারনা মসিগী থৌগল তৌবগী ৱাখল্লোন অসিগা লোয়ননা ইরৈচাশিংগী পুন্সি লাইনা হিংনবা হোৎনরি। মীরোল কয়ানা মশাগী মংলান অদু মপুং ফানবা হোৎনজরকপশিং অদুগুম্বা মংলান অদু মপুং ফাহনবা ঙম্নবা ঙসি ভারতনা য়াম্না কন্না হোৎনরি।
মরূপশা,
চহী য়াঙ্খৈ মীয়ামগী ওইরবা পুন্সি অসিদা ঐহাক্না লৌমীশিংগী অৱাবশিং, মখোয়গী লান্থেংশিং অদু য়াম্না নক্না উবা ফংখি, থম্মোয়দা ফাওখি। মরম অসিনা ২০১৪ দা ঐহাকপু লৈবাক অসিগী অথোইবা থৌগল্লোই ওইনা থৌগল তৌনবগী তাঞ্জা অসি পীনবিখিবা মতমদা ঐহাক্না লৌউ-শিংউ চাউখৎনবা, লৌমীগী য়াইফনবা অসিনা খ্বাইদগী লুম্না লৌখি।
মরূপশা,
মসিগী অচুম্বা অসি মী কয়ামদি খংদে মদুদি লৈবাক অসিগী মীওই ১০০গী মনুংদা ৮০ দি পীক্না লৌ উবশিংনি। মখোয়গী লম অসি লম হেক্তর অনী য়ৌদনা লৈ। অদোম খন্দুনা য়েংবীয়ু পীক্না লৌ উবা লৌমী মশিং অসি করোর ১০ দগী হেল্লি। মখোয়না পুন্সি চুপ্পা হিংনবগী পাম্বৈ অসি লৌ মচাদুননি। মসিনি মখোয়গী পুন্সি হায়বদো অমদি পীক্লবা লম মচাসিনা মখোয়গী ইমুং-মনুংনা হিংজরিবনি। মীরোল কয়া-কয়াদা অসুম য়েন্থোরকপনা লম অসি হেন্না পীকশিলহল্লে। মরম অসিনা লৈবাক के পীক্না লৌ উবা লৌমীশিংগী শিংনবশিং অসি কোকহন্নবগীদমক্তা কোকহন্নবগীদমক্তা ঐহাক্না মরু, ইন্সুরেন্স, কৈথেল অমসুং সেভিং পুম্নমকসিদা মায়কৈ মরি থোক্না থবক তৌখি।
সরকারনা অফবা মরুগা লোয়ননা লৌমীশিংদা নীম কোতেদ য়ুরিয়া, সোইল হেল্থ কার্দ, মাইক্রো ইরিগেসন্নচিংবা খুদোংচাবশিংসু হাপচিনখি। ঐহাক্না মীওই করোর ২২ দা সোইল হেল্থ কার্দ পীখি, লৌমীশিংদা পীখি। অদুনা মসিগী বৈজ্ঞানিক ওইবা কেম্পেন অসিনা লৌউ-শিংউগী পোত্থোকসু হেনগৎহনখি।
মরূপশা,
ঐখোয়না ক্রাপ ইন্সুরেন্স স্কীমসু হেন্না নিংথিনা তৌহনখি। মদুদা লৌমীশিংবু হাপচিনখি। অৱা-অনা তাবা মতমদা থোকপা মতমদা লৌমী কয়া-কয়া হেন্না-হেন্না কম্পেন্সেসন ফংনবা হান্নগী অরিবা চৎন-পথাপশিংসু হোংদোকখি। মরম অসিনা হৌখিবা চহী মরিসিদা লুপা করোর লাখ কয়া অমা ঐখোয়গী লৌমী ইচিল-ইনাওদা ফংখ্রিবনি। ঐখোয়না পীক্না লৌ উবা লৌমীশিং অমসুং লৌবুক্তা থবক শুরিবা শিন্মীশিংফাওবা ইন্সুরেন্স অমসুং পেন্সনগী খুদোংচাবশিংসু পুরকখি। পীক্না লৌ উবা লৌমীশিংগী মথৌ তাবশিং অসি ফংহনবা ঙম্নবা চুমদ্রিংনা লুপা করোর লাখ ৬২ বেঙ্ক একাউন্তা হাপখি।
মরূপশা,
লৌমীশিংগী হোৎনজমনগী মহুত্তা পোত্থোক্কী মমল মতিক চানা ফংনবগীসু থৌরাং কয়া পায়খৎখ্রে। লৈবাক অসিনা মহাক্কী রুরেল মার্কেৎ ইনফ্রাস্ত্রচর অসি হেন্না ফগৎহনখি। ঐহাক্না এম.এস.পি. অসিবু হেনগৎহনখিবগা লোয়ননা সরকারগী লৈবগী সেন্তরশিংসু শাখি। ঐখোয়গী সরকারনা লৈখিবা পোত্থোক অসি হৌখিবা চহী কয়াগী রেকোর্দ থুগাইখি। লৈবাক অসিগী মন্দি লিশিং হেনবদা ই-নামগী স্কীমগা শম্নহন্দুনা ঐখোয়গী লৌমীশিংনা মফম অমদা হেক্তা পোৎ য়োনবা য়ানবগী প্লেৎফোর্ম পীখি। অদুগা মসিগা লোয়ননা লৈবাক অসিগী লৌউ-শিংউগী কৈথেলশিং অসি অনৌবা মওংদা ওন্থোক্নবদসু লুপা করোর কয়া চংখি।
মরূপশা,
ঙসি কেন্দ্র সরকারনা লৌউ-শিংউগী বজেৎ অসি হান্নগা য়েংনবদা শরুক মঙা হেনগৎখ্রে। চহী খুদিংগী লুপা লাখ করোর অমগা মখাইদগী হেনবা অসি লৌউ-শিংউগীদমক্তা চাদিং তৌরি। লুপা করোর লাখ অমগী এগ্রিকলচরেল ইন্ফ্রাস্ত্রকচর ফন্দগী থোংদগী খুঙ্গং অমসুং লৌবুক্কী মনাক নকপা গোদাউন-মসিগী থৌরাং, লৌউ-শিংউগী খুৎলাইনচিংবশিংনবগী খুদোংচাবশিং চাউথোকহনবগুমবদা য়াম্না য়াংনা তৌরি। পীক্না লৌ উবা লৌমীশিংগী থৌনা হেনগৎনবগীদমক্তা এফ.পি.ও. লিশিং তরা, লৌমীগী পোত্থোক পুথোকপগী লুপ শেম্নবগী কেম্পেনসু চত্থখি। মসিদা চাউরাক্না লুপা করোর লিশিং তরেৎ চাদিং তৌখি। মাইক্রো ইরিগেসন ফন্দ পীবসু শরুক অনী হেনগত্তুনা করোর লিশিং তরা ওইহনখ্রে। ঐখোয়না ক্রোপ লোন অসিসু শরুক অনি ওইহনখিদুনা হন্দক্কী চহীসিদা লুপা করোর লাখ ১৬ ওইরগনি। হৌজিক শা য়োকপা অসি ঙা য়োকপশিংগা শম্ননবা লৌমীশিংসু কিসান ক্রেদিৎ কার্দকী খুদোংচাবা ফংবা হৌরে। হায়বদি ঐখোয়গী সরকারনা লৌমীশিংগী য়াইফনবা লৌখৎপা য়াবশিং মথং-মথং লৌখৎলি। লৌমীশিংগী শেলগী ফীভম ফগৎনবা, মখোয়গী ফীভম ফগৎনবগীদমক পুকচেল শেংনা থবক তৌরি।
মরূপশা,
লৌমীশিংগী ফীভম অসি ফগৎহন্নবগীদমক্তা অচৌবা কেম্পেন্দা লৈবাক অসিগী ৱায়েল পথাপ অহুম পুথোকখি। মসিগী পান্দমদি লৈবাক অসিগা লৌমীশিংদা মরুওইনা পীক্না লৌ উবা লৌমীশিংদা হেন্না থৌনা লৈহন্নবনি, মখোয়বু মখোয়গী পোত্থোক্কী মমল মতিক চানা ফংনবা অমসুং পোত্থোক য়োন্নবগী ওপ্সন অসি হেন্না ফংনবনি। চহী কয়াদগী মসি লৈবাক অসিগী লৌউ-শিংউগী অখং-অহৈ, লৈবাক অসিগী লৌমী লুপ্না লেপ্তনা তান্দুনা লাকখি। হন্দকসু সংসদতা খন্নখি, তান্নখি অমদি মসিগী ৱায়েল-পথাপ অসি পুরকখি। লৈবাক অসিগী কাচিন-কোয়াদা লৌমী কোতী-কোতি-কোতিনা, লৌমী লুপ কয়ানা মসিবু তরাম্না ওকখি, শৌগৎখি।
ঐহাক্না ঙসি মসি পুম্নমক অসিগীদমক্তা তৌবিমল খংবা উৎচরি, থাগৎপা ফোংদোকচরি।
মরূপশা,
ঐখোয়গী সরকারনা লৌমীশিংগী য়াইফনবগীদমক্তা মরুওইনা লৌমীশিংগী য়াইফনবগীদমক্তা লৈবাক অসিগী লৌউ-শিংউগীদমক্তা, খুঙ্গংগী লায়রবশিংগী অফবা তুংলমচৎকীদমক্তা মপুং ফানা খনবিবগা লোয়ননা লৌমীশিংগী মফমদা কত্থোকপগী ৱাখল্লোনগা লোয়ননা পুকচেল তিংনা মসিগী ৱায়েল-পথাপ অসি পুরকখিব। লৌমীশিংগী কাংবু অমনা য়ানিংদবা ফোংদোক্নরম্লগসু মসি ঐখোয়গীদমক্তদি য়াম্না অফবনি। এগ্রিকলচরেল ইকোনোমিস্তশিং, বৈজ্ঞানিকশিংনা, হোৎনবা কনবা লৌমীশিংনসু মখোয়দা মসিগী অফবা অসি খংহন্নবা ফনা কন্না হোৎনখি। ঐখোয়না য়াম্না ইংনা, থম্মোয় শেংনা মখোয়বু গ্যান তাহন্নবা হোৎনখি। পাম্বৈ কয়া অমা তৌদুনা মশাদা অমসুং পুন্না লেপ্তনা ৱারী শান্নখি। ঐখোয়না লৌমীশিংগী ৱাফম, মখোয়গী লোজিক খংনবসু অরৈবা থাদুনা হোৎনখি।
মখোয়না য়ানিংদ্রিবা প্রোবিজনশিং অদুসু ওন্থোক্নবা সরকারনা ওন্থোক্নবা শেম-শাদুনা লৈখি। চহী অনীফাওবা ঐখোয়না মসিগী ৱায়েল-পথাপশিং অসি সসপেন্দ তৌনবসু ৱাফম থমখি। মরকসিদা মসিগী হীরম অসি সুপ্রীম কোর্তা চৎখিরম্মী। মসিগী ৱাফমশিংসি লৈরে, মরম অসিনা ঐহাক্না য়াম্না পাক-শন্না হায়ররোই।
মরূপশা,
ঐহাক্না ঙসি ইরৈচাশিংদা লাল্লে হায়জরদুনা পুকচেল শেংনা অমসুং থম্মোয় শেংনা হায়জরি মদুদি ঐহাক্কী কত্থোকচবা অসিদা করিগুম্বা অৱাৎপা অমা লৈরম্লগনি মসিগী মরম অসিনা প্রকাশকুম্বা লৌমী ইচিল-ইনাওবু ঐহাক্না খংবা ঙম্লুদ্রে।
ঙসি গুরু নানকজীগী শেংলবা মঙালগী নুমীৎনি। মসিগী মতম অসিদা কনাদা দোষ লংজফদে। ঙসি ঐহাক্না অদোমদা, লৈবাক পুম্বদা, ফার্ম বীল অসি লৌথোক্নবগী ৱারেপ লৌরে হায়না হায়বা লাক্লিবনি। হন্দক্কী থাসিগী অরোইবদা হৌগদোরিবা পার্লিয়ামেন্ত সেসন অসিদা ঐখোয়না মসিগী ফার্ম বীল অহুম অসি রিপীল তৌনবগী কন্সতিত্যুস্নেল প্রোসেস অদু লোইশিল্লগনি
মরূপশা,
ঐহাক্না ঙসি অন্দোলন তৌরিবা ঐহাক্কী লৌমী মরূপশিংদা হায়জরি। ঙসি গুরুগী শেংলবা নুমীৎনি। হৌজিক অদোম ইশা-ইশাগী য়ুমদা হনবীরো, অদোমগী লৌবুক্তা হনবীরো, অদোমগী ইমুংগী মরক্তা হনবীরো। অনৌবা অমমুক হৌদোক্লসি। অমুক নৌনা মাংলোমদা চংশিল্লসি।
মরূপশা,
ঙসিসিমক সরকারনা লৌউ-শিংউবগী লমগা মরি লৈনবা মরুওইবা ৱারেপ অমগা অমুক লৌরে। জীরো বজেৎ ফার্মিং হায়বসি নেচরেল ফার্মিং অসি হেন্না ফগৎহন্নবগীদমক্তনি, লৈবাক অসিগী হোংলক্লিবা মথৌতাবশিং অসিগী য়েংলগা ক্রোপ পেতর্ন অসিবু বৈজ্ঞানিক ওইবা মওংদা হোংহন্নবগীদমক্তনি, এম.এস.পি. অসি হেন্না ফগৎহন্নবা অমসুং নুং-পান ফাওনা উবা ওইহন্নবগীদমক্তনি, অসিগুম্বা হীরমশিংসিদা, তুংলমচৎকী খল্লগা ৱারেপ লৌনবগীদমক্তা কমিতী অমা শেমগনি। কমিতী অসিদা কেন্দ্র সরকার, রাজ্য সরকারশিংগী মীহুৎশিংনা মীহুৎ ওইগনি, লৌমী ওইগনি, এগ্রিকলচরেল সাইন্তিস্ত ওইগনি, এগ্রিকলচরেল ইকোনোমিস্ত ওইগনি।
মরূপশা,
ঐখোয়গী সরকার লৌমীশিংগী য়াইফনবা থবক তৌদুনা লৈরি অমসুং মখা তানা তৌখিগনি। ঐহাক্না গুরু গোবিন্দ সিংহজীগী ৱাখল্লোনগা লোয়ননা ৱা ঙাংবা লোইশিনজগে-
‘দেহ সিৱা বরু মোহি ইহৈ সুভ করমন তে কবহুং ন টরোং।‘
অসিুম্বা অফবা থবক অসি তৌবদা নিংহন্নহনবীগনু হায়না দেবী ইমা ইবেম্মনা থৌজাল অসি পীনবীয়ু। তৌখিবশিং অদু লৌমীশিংগীদমক্তা তৌখিবনি, তৌজরিবশিং অসিসু লৈবাক্কীদমক্তনি। অদোম পুম্নমক্কী থৌজালনা ঐহাক্না হোৎনজবা অসিদা হান্নসু করিগুম্বা অৱাৎপা অমত্তা লৈখিদ্রি। ঙসি ঐহাক্না অদোমদা থাজবা পীজরি মদুদি অদোমগী মংলান অদু মপুং ফানবা, লৈবাক অসিগী মংলান মপুং ফানবা হেন্না হোৎনগনি। অদোম্বু হন্না-হন্না থাগৎচরি! খুরুমজরি!
