ഇന്ത്യയിലെ സെമികണ്ടക്ടർ ഡിസൈൻ, നിർമ്മാണ മേഖല വികസിപ്പിക്കുന്നതിനായി 1,27,500 കോടി രൂപയുടെ ബജറ്റ് വിഹിതത്തോടെയുള്ള സെമികോൺ 2.0-ന് പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗം അംഗീകാരം നൽകി.
ഇന്ത്യയിലെ സെമികണ്ടക്ടർ മേഖലയ്ക്ക് സുസ്ഥിരവും ദീർഘകാലത്തേക്കുള്ളതുമായ പിന്തുണ നൽകേണ്ടതിന്റെ ആവശ്യകത തിരിച്ചറിഞ്ഞും സെമികോൺ 1.0-ന് കീഴിലുണ്ടായ മുന്നേറ്റത്തിന് കരുത്തുപകരുന്നതിനുമായി നമ്മുടെ രാജ്യത്തെ ലോകത്തിന്റെ സെമികണ്ടക്ടർ ഭൂപടത്തിൽ എത്തിക്കുക എന്ന ഗവൺമെന്റിന്റെ പ്രതിജ്ഞാബദ്ധത കൂടുതൽ മുന്നോട്ട് കൊണ്ടുപോകാൻ സെമികോൺ 2.0 ലക്ഷ്യമിടുന്നു.
സെമികണ്ടക്ടർ മേഖലയെ ഇനിപ്പറയുന്ന ആറ് സ്തംഭങ്ങളിലായി സമഗ്രമായി കെട്ടിപ്പടുക്കാനാണ് സെമികോൺ 2.0 ലക്ഷ്യമിടുന്നത്:
ഒന്നാം സ്തംഭം: ഡിസൈൻ: ചിപ്പ് ഡിസൈനിൽ കൈവരിച്ച പ്രാരംഭ വിജയത്തിന്റെ ചുവടുപിടിച്ചായിരിക്കും സെമികോൺ 2.0 മുന്നോട്ട് പോവുക. 105 സ്റ്റാർട്ടപ്പുകൾ ഇതിനകം തന്നെ ചിപ്പുകൾ വികസിപ്പിക്കാൻ ആരംഭിച്ച സാഹചര്യത്തിൽ രൂപകൽപ്പനാ മേഖല കൂടുതൽ ആഴത്തിലാക്കുന്നതിലാണ് ഊന്നൽ നൽകുന്നത്. കൂടാതെ തന്ത്രപ്രധാനവും വാണിജ്യപരവുമായ ഉൽപ്പന്നങ്ങളുടെ വികസനത്തിനായുള്ള നിർമ്മാണ ഘടകങ്ങൾ നിർണ്ണയിച്ചിട്ടുണ്ട്. സെമികോൺ 2.0-ന് കീഴിൽ ഈ സമീപനത്തിലൂടെ IPകളും ചിപ്പുകളുടെയും സിസ്റ്റങ്ങളുടെയും രൂപകൽപ്പനകളും വികസിപ്പിക്കാനാണ് ലക്ഷ്യമിടുന്നത്. സെമികോൺ 2.0-ന് കീഴിലുള്ള പ്രവർത്തനങ്ങൾ ഇന്ത്യയെ ഒരു പ്രധാന സെമികണ്ടക്ടർ ചിപ്പ് ഡിസൈൻ IP രാജ്യമായി പ്രതിഷ്ഠിക്കും.
രണ്ടാം സ്തംഭം: യന്ത്രങ്ങളും അസംസ്കൃത വസ്തുക്കളും: സെമികണ്ടക്ടറുകളുടെ നിർമ്മാണത്തിന് ആവശ്യമായ യന്ത്രങ്ങളുടെ നിർമ്മാണത്തിലും ഗവേഷണ-വികസന പ്രവർത്തനങ്ങളിലും അതുപോലെ അസംസ്കൃത വസ്തുക്കൾ, രാസവസ്തുക്കൾ, വാതകങ്ങൾ എന്നിവയുടെ നിർമ്മാണത്തിലും ഏർപ്പെട്ടിരിക്കുന്ന കമ്പനികൾക്ക് ആനുകൂല്യങ്ങൾ നൽകും. ഇത് സെമികണ്ടക്ടർ വ്യവസായത്തിന്റെ സുസ്ഥിര വളർച്ചയ്ക്ക് അടിത്തറയിടും. നമ്മുടെ രാജ്യത്ത് പ്രിസിഷൻ മാനുഫാക്ചറിംഗ് (കൃത്യതയാർന്ന നിർമ്മാണ) വ്യവസായം വികസിപ്പിക്കുന്നതിനും ഇത് സഹായിക്കും.
മൂന്നാം സ്തംഭം: കൂടുതൽ ഫാബുകൾ സ്ഥാപിക്കൽ: ആദ്യത്തെ ഫാബ് (നിർമ്മാണ യൂണിറ്റ്) 2028-ൽ കമ്മീഷൻ ചെയ്യാൻ നിശ്ചയിച്ചിരിക്കുന്ന സാഹചര്യത്തിൽ ലോകം ഇന്ത്യയുടെ സെമികണ്ടക്ടർ തന്ത്രത്തിൽ കൂടുതൽ വിശ്വാസമർപ്പിക്കുന്നു. ഇന്ത്യയിലേക്ക് വരാനും ചിപ്പുകൾ നിർമ്മിക്കുന്നതിനായി ഫാബുകൾ സ്ഥാപിക്കാനും കൂടുതൽ നിർമ്മാതാക്കളെ ആകർഷിക്കുന്നതിനുള്ള ശ്രമങ്ങൾ നടത്തും. ഇതിൽ സിലിക്കൺ ഫാബുകൾ, കോമ്പൗണ്ട് സെമികണ്ടക്ടർ ഫാബുകൾ, ഡിസ്ക്രീറ്റ് കംപോണന്റ് ഫാബുകൾ, ഡിസ്പ്ലേ ഫാബുകൾ തുടങ്ങിയവ ഉൾപ്പെടും.
നാലാം സ്തംഭം: ATMP/OSAT വ്യവസായത്തെ കൂടുതൽ ശക്തിപ്പെടുത്തൽ: ATMP യൂണിറ്റുകളുടെ വിജയത്തോടെ ATMP/OSAT യൂണിറ്റുകൾ സ്ഥാപിക്കുന്നതിനുള്ള ഒരു ബദൽ കേന്ദ്രമായി ലോകം ഇപ്പോൾ ഇന്ത്യയെ നോക്കിക്കാണുന്നു. ഏറ്റവും ആധുനികമായ ചില ATMP സാങ്കേതികവിദ്യകൾ ഇന്ത്യയിലേക്ക് കൊണ്ടുവരുന്നതിൽ ശ്രദ്ധ കേന്ദ്രീകരിച്ചുകൊണ്ട് ഇവയെ സജീവമായി പ്രോത്സാഹിപ്പിക്കും.
അഞ്ചാം സ്തംഭം: ഗവേഷണവും വികസനവും: 28nm-110nm നോഡിലൂടെയാണ് സെമികണ്ടക്ടർ പ്രയാണം ആരംഭിച്ചത്. ഇപ്പോൾ ഇന്ത്യയ്ക്കകത്തും പുറത്തുമുള്ള പ്രമുഖ ഗവേഷണ-വികസന കേന്ദ്രങ്ങളുമായി സഹകരിച്ച് കൂടുതൽ ആധുനികമായ നോഡുകളും മറ്റ് നൂതന സാങ്കേതികവിദ്യകളും വികസിപ്പിക്കുന്നതിലായിരിക്കും ശ്രദ്ധ കേന്ദ്രീകരിക്കുന്നത്.
ആറാം സ്തംഭം: പ്രതിഭാ വിപുലീകരണം: ഏറ്റവും പുതിയ EDA ടൂളുകൾ ഉപയോഗിച്ച് സങ്കീർണ്ണമായ ചിപ്പ് രൂപകൽപ്പനയിൽ വിദ്യാർത്ഥികൾക്ക് പരിശീലനം നൽകുന്ന 315 സർവകലാശാലകളിലൂടെ ഇതിനകം തന്നെ ഏകദേശം 68,000 വിദ്യാർത്ഥികൾക്ക് പരിശീലനം നൽകിക്കഴിഞ്ഞു. ഇത് ഇനിയും വികസിപ്പിക്കുകയും കോളേജ് പഠനകാലത്ത് തന്നെ പരിശീലനത്തിന്റെ നിലവാരം കൂടുതൽ ആഴത്തിലുള്ളതാക്കുകയും ചെയ്യും. കൂടാതെ ക്ലീൻ റൂം, ഫാബ് നിർമ്മാണം, മറ്റ് അനുബന്ധ പരിശീലനങ്ങൾ എന്നിവ കൂടുതൽ ശക്തമാക്കുന്നതിൽ ഈ വ്യവസായ മേഖലയെ സജീവമായി പങ്കാളികളാക്കുകയും ചെയ്യും.
കൂടാതെ സെമികോൺ 2.0 എല്ലാ മേഖലകളിലുമുള്ള സാമ്പത്തിക വളർച്ചയെ പിന്തുണയ്ക്കുകയും മെച്ചപ്പെട്ട വിതരണ ശൃംഖലയുടെ പ്രതിരോധശേഷിയിലൂടെ ദേശീയ സുരക്ഷ ശക്തമാക്കുകയും നിർണായക മേഖലകളിൽ സാങ്കേതിക നേതൃത്വം സ്ഥാപിക്കാൻ സഹായിക്കുകയും ചെയ്യും. സമ്പൂർണ്ണ മേഖല കെട്ടിപ്പടുക്കുന്നതിനായുള്ള ഈ സമീപനം ഇന്ത്യയിലെ സെമികണ്ടക്ടർ രൂപകൽപ്പനയ്ക്കും നിർമ്മാണത്തിനും ഉത്തേജനം നൽകും.
ISM 1.0-ന്റെ പുരോഗതി:
- നിർമ്മാണം: ഇതുവരെ 1.64 ലക്ഷം കോടിയിലധികം രൂപയുടെ സഞ്ചിത നിക്ഷേപമുള്ള 12 നിർമ്മാണ യൂണിറ്റുകൾക്ക് അനുമതി നൽകിയിട്ടുണ്ട്. ഇതിൽ ഒരു സിലിക്കൺ ഫാബ്, ഒരു സിലിക്കൺ കാർബൈഡ് ഫാബ്, ഒരു സംയോജിത ഗാലിയം നൈട്രൈഡ് മൈക്രോ എൽഇഡി ഡിസ്പ്ലേ ഫാബ്, 9 പാക്കേജിംഗ് യൂണിറ്റുകൾ എന്നിവ ഉൾപ്പെടുന്നു. ഇവ ഉപഭോക്തൃ ഉപകരണങ്ങൾ, വ്യാവസായിക ഇലക്ട്രോണിക്സ്, ഓട്ടോമൊബൈലുകൾ, പവർ ഇലക്ട്രോണിക്സ്, ടെലികമ്മ്യൂണിക്കേഷൻസ്, എയ്റോസ്പേസ് തുടങ്ങിയ മേഖലകളിലെ ചിപ്പ് ആവശ്യങ്ങൾ നിറവേറ്റുമെന്ന് പ്രതീക്ഷിക്കുന്നു. അംഗീകാരം ലഭിച്ച 12 നിർദ്ദേശങ്ങളിൽ മൈക്രോൺ, കെയ്ൻസ്, CG സെമി എന്നീ മൂന്ന് കമ്പനികൾ വാണിജ്യ ഉൽപ്പാദനം ആരംഭിച്ചുകഴിഞ്ഞു, കൂടാതെ ഒരു കമ്പനി കൂടി 2026-ൽ പ്രവർത്തനം ആരംഭിക്കുമെന്ന് പ്രതീക്ഷിക്കുന്നു.
- ഡിസൈൻ: സ്റ്റാർട്ടപ്പുകളിൽ നിന്നും ചെറുകിട-ഇടത്തരം സംരംഭങ്ങളിൽ (MSME) നിന്നുമുള്ള 24 സെമികണ്ടക്ടർ ഡിസൈൻ പദ്ധതികൾക്ക് സാമ്പത്തിക സഹായത്തിനായി അംഗീകാരം നൽകിയിട്ടുണ്ട്. അതോടൊപ്പം 105 സ്റ്റാർട്ടപ്പുകൾക്കും/MSME-കൾക്കും വ്യാവസായിക നിലവാരത്തിലുള്ള ഇലക്ട്രോണിക് ഡിസൈൻ ഓട്ടോമേഷൻ (EDA) ടൂളുകൾ ഉപയോഗിക്കാനുള്ള അനുമതിയും നൽകി. സാറ്റലൈറ്റ് കമ്മ്യൂണിക്കേഷൻസ്, ഡ്രോണുകൾ, നിരീക്ഷണ ക്യാമറകൾ, ഇന്റർനെറ്റ് ഓഫ് തിങ്സ് (IoT) ഉപകരണങ്ങൾ, എൽഇഡി ഡ്രൈവറുകൾ, ആർട്ടിഫിഷ്യൽ ഇന്റലിജൻസ് (AI) സംവിധാനങ്ങൾ, ടെലികോം ഉപകരണങ്ങൾ, സ്മാർട്ട് മീറ്ററുകൾ എന്നിവയുൾപ്പെടെയുള്ള തന്ത്രപ്രധാനവും വാണിജ്യപരവുമായ വിവിധ ആവശ്യങ്ങൾക്കായുള്ള ചിപ്പുകളും SoCsകളും രൂപകൽപ്പന ചെയ്യുന്നതിൽ ഈ കമ്പനികൾ ഏർപ്പെട്ടിരിക്കുന്നു. രൂപകൽപ്പനയുടെയും വികാസത്തിന്റെയും വിവിധ ഘട്ടങ്ങളിലാണ് ഈ കമ്പനികൾ. വിജയകരമായ പ്രോട്ടോടൈപ്പിംഗിന് ശേഷം ഇവ വിന്യാസ ഘട്ടത്തിലേക്ക് പ്രവേശിക്കും.
