പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ഇന്ന് ചേർന്ന കേന്ദ്ര മന്ത്രിസഭായോഗം, 2026-27 മുതൽ 2030-31 വരെയുള്ള സാമ്പത്തിക വർഷങ്ങളിലേക്കുള്ള 'ചെറുകിട ജലവൈദ്യുത (SHP) വികസന പദ്ധതി'ക്ക് അംഗീകാരം നൽകി. ഏകദേശം 1500 മെഗാവാട്ട് ശേഷിയുള്ള ചെറു ജലവൈദ്യുത പദ്ധതികൾ സ്ഥാപിക്കുന്നതിനായി 2584.60 കോടി രൂപയുടെ സാമ്പത്തിക വിഹിതമാണ് അനുവദിച്ചിരിക്കുന്നത്.
വിവിധ സംസ്ഥാനങ്ങളിൽ 1 മുതൽ 25 മെഗാവാട്ട് വരെ ശേഷിയുള്ള ചെറുകിട ജലവൈദ്യുത പദ്ധതികൾ നടപ്പിലാക്കുന്നതിനെ ഈ പദ്ധതി പിന്തുണയ്ക്കുകയും, ഇത്തരം പദ്ധതികൾക്ക് വലിയ സാധ്യതകളുള്ള മലയോര മേഖലകൾക്കും വടക്കുകിഴക്കൻ സംസ്ഥാനങ്ങൾക്കും ഇത് പ്രത്യേക ഗുണഫലം നൽകുകയും ചെയ്യും. വടക്കുകിഴക്കൻ സംസ്ഥാനങ്ങളിലും അന്താരാഷ്ട്ര അതിർത്തിയോട് ചേർന്നുള്ള ജില്ലകളിലും ഒരു മെഗാവാട്ടിന് 3.6 കോടി രൂപ അല്ലെങ്കിൽ പദ്ധതി ചെലവിന്റെ 30 ശതമാനം (ഏതാണോ കുറവ് അത്, പരമാവധി 30 കോടി രൂപ വരെ) കേന്ദ്ര സാമ്പത്തിക സഹായമായി ലഭിക്കുമ്പോൾ, മറ്റ് സംസ്ഥാനങ്ങളിൽ ഇത് ഒരു മെഗാവാട്ടിന് 2.4 കോടി രൂപ അല്ലെങ്കിൽ പദ്ധതി ചെലവിന്റെ 20 ശതമാനം (ഏതാണോ കുറവ് അത്, പരമാവധി 20 കോടി രൂപ വരെ) എന്ന നിലയിലായിരിക്കും. ദുർഘടമായ ഉൾപ്രദേശങ്ങളിലെ ജലവൈദ്യുത സാധ്യതകൾ പ്രയോജനപ്പെടുത്താൻ സഹായിക്കുന്ന ഇത്തരം പദ്ധതികൾക്കായി 2,532 കോടി രൂപയാണ് മാറ്റിവെച്ചിരിക്കുന്നത്; ഇത് ചെറുകിട ജലവൈദ്യുത മേഖലയിൽ ഏകദേശം 15,000 കോടി രൂപയുടെ നിക്ഷേപം കൊണ്ടുവരുമെന്നും ശുദ്ധമായ ഊർജ്ജ സംരംഭങ്ങൾക്കും ഗ്രാമീണ വികസനത്തിനും വലിയ ഉത്തേജനം നൽകിക്കൊണ്ട് ധാരാളം തൊഴിലവസരങ്ങൾ സൃഷ്ടിക്കുമെന്നും പ്രതീക്ഷിക്കപ്പെടുന്നു. കൂടാതെ, പ്ലാന്റും യന്ത്രസാമഗ്രികളും 100 ശതമാനവും തദ്ദേശീയമായി ഉപയോഗിക്കുന്നതിലൂടെ 'ആത്മനിർഭർ ഭാരതം'(സ്വയംപര്യാപ്ത ഭാരതം) എന്ന ലക്ഷ്യം കൈവരിക്കാനും ഈ നിക്ഷേപം സഹായകമാകും.
ഭാവിയിൽ ചെറു ജലവൈദ്യുത പദ്ധതികളുടെ ഒരു ശൃംഖല തന്നെ സൃഷ്ടിക്കുന്നതിനായി, ഏകദേശം 200 പദ്ധതികളുടെ വിശദമായ പ്രോജക്ട് റിപ്പോർട്ട് തയ്യാറാക്കാൻ ഈ പദ്ധതി സംസ്ഥാനങ്ങളെ പ്രോത്സാഹിപ്പിക്കും. ഇത്തരം റിപ്പോർട്ടുകൾ തയ്യാറാക്കുന്നതിന് സംസ്ഥാന-കേന്ദ്ര സർക്കാർ ഏജൻസികളെ സഹായിക്കുന്നതിനായി 30 കോടി രൂപ നീക്കിവെച്ചിട്ടുണ്ട്.
പദ്ധതിയുടെ നിർമ്മാണ വേളയിൽ 51 ലക്ഷം തൊഴിൽ ദിനങ്ങൾ സൃഷ്ടിക്കാൻ ഈ പദ്ധതിക്ക് സാധിക്കും; കൂടാതെ, ഗ്രാമീണ-ദുർഘട മേഖലകളിൽ സ്ഥാപിക്കപ്പെടുന്ന ഈ ചെറുകിട ജലവൈദ്യുത നിലയങ്ങളുടെ പരിപാലനത്തിലും പ്രവർത്തനത്തിലും നിരവധി തൊഴിലവസരങ്ങൾ ഇത് ലഭ്യമാക്കും. വികേന്ദ്രീകൃത സ്വഭാവമുള്ള പദ്ധതികളായതിനാൽ, ഇവയ്ക്ക് നീളമേറിയ ട്രാൻസ്മിഷൻ ലൈനുകളുടെ ആവശ്യം കുറവാണ്, ഇത് വൈദ്യുതി പ്രസരണ വേളയിലുണ്ടാകുന്ന നഷ്ടം കുറയ്ക്കാനും സഹായിക്കുന്നു.
ഈ പദ്ധതിയുടെ സമാരംഭം ചെറുകിട ജലവൈദ്യുത മേഖലയ്ക്ക് പുതുജീവൻ പകരുകയും നിലവിലുള്ള സാധ്യതകൾ അതിവേഗം പ്രയോജനപ്പെടുത്താൻ സഹായിക്കുകയും ചെയ്യും. വൻതോതിലുള്ള ഭൂമി ഏറ്റെടുക്കൽ, വനനശീകരണം, ജനങ്ങളുടെ കുടിയൊഴിപ്പിക്കൽ എന്നിവ ഒഴിവാക്കുന്നു എന്നതിനാൽ ചെറുകിട ജലവൈദ്യുത പദ്ധതികൾ പരിസ്ഥിതി സൗഹൃദമാണ്. പ്രാദേശിക നിക്ഷേപം വർദ്ധിപ്പിക്കുന്നതിലൂടെ ഉൾപ്രദേശങ്ങളുടെ സാമൂഹിക-സാമ്പത്തിക വികസനത്തിന് ഇത് ആക്കം കൂട്ടും. കൂടാതെ, സാധാരണയായി 40 മുതൽ 60 വർഷം വരെ നീണ്ടുനിൽക്കുന്ന ഇത്തരം പദ്ധതികൾ ദീർഘകാലാടിസ്ഥാനത്തിലുള്ള തൊഴിലവസരങ്ങൾ സൃഷ്ടിക്കാനും സഹായിക്കുന്നു.
The Union Cabinet has approved the Small Hydro Power Development Scheme, which will boost clean energy, attract investments and create employment across rural and remote regions. The Northeast in particular will gain significantly from the scheme.https://t.co/h3OHcxtmwZ
— Narendra Modi (@narendramodi) March 18, 2026
