ഉത്തർപ്രദേശിലെ വാരാണസി നഗരത്തിൽ ഗതാഗതക്കുരുക്ക് കുറയ്ക്കുന്നതിനായി വരുണാ നദിക്ക് സമാന്തരമായി NH-31-നെയും വാരാണസി റിംഗ് റോഡിനെയും ബന്ധിപ്പിക്കുന്ന 43.218 കിലോമീറ്റർ നീളമുള്ള ലിങ്ക്/കണക്ടർ കോറിഡോർ വികസിപ്പിക്കുന്നതിന് പ്രധാനമന്ത്രി ശ്രീ നരേന്ദ്ര മോദിയുടെ അധ്യക്ഷതയിൽ ചേർന്ന സാമ്പത്തിക കാര്യ മന്ത്രിസഭാ സമിതി ഇന്ന് അംഗീകാരം നൽകി. പ്രധാന ക്യാരേജ് വേ, ഫ്ലൈഓവറുകൾ, ലൂപ്പുകൾ, റാംപുകൾ, സർവീസ് റോഡുകൾ എന്നിവ ഉൾപ്പെടെ പ്രധാനമായും 6/4 വരിയിൽ ഒരു എലിവേറ്റഡ് കോറിഡോറാണ് ഈ പദ്ധതിയിൽ ഉൾപ്പെടുന്നത്. നിർമ്മാണച്ചെലവായ 4,565.33 കോടി രൂപയും ഭൂമി ഏറ്റെടുക്കൽ ചെലവായ 934.91 കോടി രൂപയും ഉൾപ്പെടെ ആകെ 10,998.32 കോടി രൂപ ചെലവിൽ നാഷണൽ ഹൈവേ അതോറിറ്റി ഓഫ് ഇന്ത്യ (NHAI) ഹൈബ്രിഡ് ആന്വിറ്റി മോഡലിൽ (HAM) ആയിരിക്കും ഈ പദ്ധതി നടപ്പിലാക്കുക.
വാരാണസിയിലെ ഗതാഗതക്കുരുക്ക് ലഘൂകരണ പദ്ധതിയുടെ ഒരു പ്രധാന ഘടകമായ ഈ ഇടനാഴി NH-31 ഉം കാശി റെയിൽവേ സ്റ്റേഷനും തമ്മിൽ തടസ്സമില്ലാത്ത കണക്റ്റിവിറ്റി നൽകും. അതോടൊപ്പം വാരാണസി റിംഗ് റോഡ്, വാരാണസി എയർപോർട്ട്, കാശി റെയിൽവേ സ്റ്റേഷൻ, വാരാണസി സിറ്റി റെയിൽവേ സ്റ്റേഷൻ, വാരാണസി ജംഗ്ഷൻ, ദീൻ ദയാൽ ഉപാധ്യായ ജംഗ്ഷൻ, രാംനഗർ പോർട്ട്, സമ്പൂർണ്ണാനന്ദ് സംസ്കൃത സർവകലാശാല, വാരാണസിയിലെ ഘാട്ടുകൾ, അതിനോട് ചേർന്നുള്ള ചന്ദൗലി പ്രദേശം എന്നിവയിലേക്കുള്ള പ്രവേശനം ഗണ്യമായി മെച്ചപ്പെടുത്തുകയും ചെയ്യും.
മണിക്കൂറിൽ 80–100 കിലോമീറ്റർ വേഗതയിൽ സഞ്ചരിക്കാൻ തക്കവണ്ണം രൂപകൽപ്പന ചെയ്തിട്ടുള്ള ഈ പദ്ധതി NH-31 നും കാശി റെയിൽവേ സ്റ്റേഷനും ഇടയിലുള്ള യാത്രാ സമയം ഏതാണ്ട് 40 മിനിറ്റിൽ നിന്ന് 20 മിനിറ്റായി കുറയ്ക്കും. ഇത് ഏകദേശം 50 ശതമാനത്തോളം കുറവാണ് രേഖപ്പെടുത്തുന്നത്. ഇത് നഗരത്തിലെ റോഡ് ഗതാഗതക്കുരുക്ക് ഗണ്യമായി കുറയ്ക്കുകയും റോഡ് സുരക്ഷ മെച്ചപ്പെടുത്തുകയും വാഹനങ്ങളുടെ പ്രവർത്തനച്ചെലവ് കുറയ്ക്കുകയും യാത്രക്കാരുടെയും ചരക്കുഗതാഗതത്തിന്റെയും വേഗതയേറിയതും തടസ്സമില്ലാത്തതുമായ നീക്കത്തിന് സൗകര്യമൊരുക്കുകയും ചെയ്യും.
ഒരു സാമ്പത്തിക നോഡിലേക്കും (ചന്ദൗലി സോഷ്യൽ ഇക്കണോമിക് സോൺ) ഒരു സാമൂഹിക നോഡിലേക്കും (ചന്ദൗലി) ആറ് പ്രധാന ലോജിസ്റ്റിക്സ് നോഡുകളിലേക്കുമുള്ള പ്രവേശന സൗകര്യം മെച്ചപ്പെടുത്തുന്നതിലൂടെ ഈ പദ്ധതി പ്രാദേശിക കണക്റ്റിവിറ്റിയെ ശക്തിപ്പെടുത്തും. അതുവഴി പിഎം ഗതി ശക്തി നാഷണൽ മാസ്റ്റർ പ്ലാനിന് അനുസൃതമായി മൾട്ടിമോഡൽ സംയോജനം വർധിപ്പിക്കുകയും ചെയ്യും. ഇത് കാർഷിക ഉൽപ്പന്നങ്ങൾ, വ്യാവസായിക സാധനങ്ങൾ, നിർമ്മാണ സാമഗ്രികൾ, ധാതുക്കൾ എന്നിവയുടെ കാര്യക്ഷമമായ നീക്കത്തിന് സൗകര്യമൊരുക്കും, അതുവഴി ലോജിസ്റ്റിക്സ് കാര്യക്ഷമത മെച്ചപ്പെടുത്തുകയും കിഴക്കൻ ഉത്തർപ്രദേശിലുടനീളം സുസ്ഥിരമായ സാമ്പത്തിക വളർച്ചയെ പിന്തുണയ്ക്കുകയും ചെയ്യും.
മൊത്തത്തിൽ, ഈ പദ്ധതി കണക്റ്റിവിറ്റി വർധിപ്പിക്കുകയും മൾട്ടിമോഡൽ ഗതാഗത സംയോജനം ശക്തിപ്പെടുത്തുകയും ടൂറിസവും സാമ്പത്തിക വികസനവും പ്രോത്സാഹിപ്പിക്കുകയും വാരാണസിയിലെ താമസക്കാരുടെയും സന്ദർശകരുടെയും ജീവിതനിലവാരം മെച്ചപ്പെടുത്തുകയും ചെയ്യുന്ന ആധുനികവും പ്രവേശന നിയന്ത്രിതവുമായ ഒരു നഗര ഗതാഗത ഇടനാഴി സൃഷ്ടിക്കും.
