ಗುವಾಹಟಿಯ ಸರುಸಜೈ ಕ್ರೀಡಾಂಗಣದಲ್ಲಿ ಬೋಡೋ ಸಮುದಾಯದ ಶ್ರೀಮಂತ ಪರಂಪರೆಯನ್ನು ಆಚರಿಸುವ ಐತಿಹಾಸಿಕ ಸಾಂಸ್ಕೃತಿಕ ಕಾರ್ಯಕ್ರಮವಾದ "ಬಾಗುರೂಂಬಾ ದೊಹೊ 2026" ಕಾರ್ಯಕ್ರಮವನ್ನು ಉದ್ದೇಶಿಸಿ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಭಾಷಣ ಮಾಡಿದರು. ಈ ಸಂದರ್ಭದಲ್ಲಿ ಮಾತನಾಡಿದ ಪ್ರಧಾನಮಂತ್ರಿಯವರು, ಅಸ್ಸಾಂನ ಸಂಸ್ಕೃತಿಯನ್ನು ವೀಕ್ಷಿಸುವುದು ಮತ್ತು ಬೋಡೋ ಸಮುದಾಯದ ಸಂಪ್ರದಾಯಗಳನ್ನು ಸೂಕ್ಷ್ಮವಾಗಿ ಗಮನಿಸುವುದು ತಮ್ಮ ಸೌಭಾಗ್ಯ ಎಂದು ಹೇಳಿದರು. ಈ ಹಿಂದಿನ ಯಾವುದೇ ಪ್ರಧಾನಮಂತ್ರಿಗಳು, ಅಸ್ಸಾಂಗೆ ತಾವು ಭೇಟಿ ನೀಡಿದಷ್ಟು ಬಾರಿ ಭೇಟಿ ನೀಡಲಿಲ್ಲ ಎಂದು ಹೇಳಿದ ಶ್ರೀ ಮೋದಿ ಅವರು, ಅಸ್ಸಾಂನ ಕಲೆ ಮತ್ತು ಸಂಸ್ಕೃತಿ ದೊಡ್ಡ ವೇದಿಕೆಯನ್ನು ಪಡೆಯಬೇಕು ಮತ್ತು ಭವ್ಯ ಆಚರಣೆಗಳ ಮೂಲಕ ರಾಷ್ಟ್ರ ಮತ್ತು ಪ್ರಪಂಚದಾದ್ಯಂತ ಮನ್ನಣೆ ಪಡೆಯಬೇಕು ಎಂಬ ತಮ್ಮ ನಿರಂತರ ಆಶಯವನ್ನು ಒತ್ತಿ ಹೇಳಿದರು. ದೊಡ್ಡ ಪ್ರಮಾಣದ ಬಿಹು ಉತ್ಸವಗಳು, ಜುಮೋಯಿರ್ ಬಿನೋಂದಿನಿಯ ಅಭಿವ್ಯಕ್ತಿ, ಒಂದೂವರೆ ವರ್ಷಗಳ ಹಿಂದೆ ನವದೆಹಲಿಯಲ್ಲಿ ನಡೆದ ಭವ್ಯ ಬೋಡೋ ಮಹೋತ್ಸವ ಮತ್ತು ಇತರ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಉಲ್ಲೇಖಿಸಿ ಈ ದಿಕ್ಕಿನಲ್ಲಿ ನಿರಂತರ ಪ್ರಯತ್ನಗಳು ನಡೆದಿವೆ ಎಂದು ಪ್ರಧಾನಮಂತ್ರಿ ಅವರು ಹೇಳಿದರು. ಅಸ್ಸಾಂನ ಕಲೆ ಮತ್ತು ಸಂಸ್ಕೃತಿಯ ವಿಶಿಷ್ಟತೆ , ವೈವಿಧ್ಯತೆಗಳ ಆನಂದವನ್ನು ಅನುಭವಿಸುವ ಅವಕಾಶವನ್ನು ತಾವು ಎಂದಿಗೂ ಕಳೆದುಕೊಳ್ಳುವುದಿಲ್ಲ ಎಂದು ಪ್ರಧಾನಮಂತ್ರಿ ಅವರು ಹೇಳಿದರು. ಮತ್ತೊಮ್ಮೆ, "ಬಾಗುರುಂಬಾ ಉತ್ಸವ"ವನ್ನು ಆಯೋಜಿಸಲಾಗುತ್ತಿದೆ ಎಂದು ಅವರು ಹೇಳಿದರು, ಇದು ಅನನ್ಯ ಬೋಡೋ ಗುರುತಿನ ವೈವಿಧ್ಯಮಯ ಆಚರಣೆ ಮತ್ತು ಅಸ್ಸಾಂನ ಪರಂಪರೆಗೆ ಗೌರವ ತುಂಬುತ್ತದೆ ಎಂದು ಅವರು ಬಣ್ಣಿಸಿದರು. ಈ ಕಾರ್ಯಕ್ರಮದೊಂದಿಗೆ ಸಂಬಂಧ ಹೊಂದಿರುವ ಎಲ್ಲರಿಗೂ, ವಿಶೇಷವಾಗಿ ಕಲಾವಿದರಿಗೆ ಶ್ರೀ ಮೋದಿ ಅವರು ತಮ್ಮ ಶುಭಾಶಯಗಳು ಮತ್ತು ಅಭಿನಂದನೆಗಳನ್ನು ವ್ಯಕ್ತಪಡಿಸಿದರು.
"ಬಾಗುರೂಂಬಾ ದೊಹೊ" ಕೇವಲ ಹಬ್ಬವಲ್ಲ, ಆದರೆ ಶ್ರೇಷ್ಠ ಬೋಡೋ ಸಂಪ್ರದಾಯವನ್ನು ಗೌರವಿಸಲು ಮತ್ತು ಬೋಡೋ ಸಮಾಜದ ಶ್ರೇಷ್ಠ ವ್ಯಕ್ತಿಗಳನ್ನು ಸ್ಮರಿಸುವ ಮಾಧ್ಯಮವಾಗಿದೆ ಎಂದು ಪ್ರಧಾನಮಂತ್ರಿ ಅವರು ಹೇಳಿದರು. ಬೋಡೋಫಾ ಉಪೇಂದ್ರ ನಾಥ್ ಬ್ರಹ್ಮ, ಗುರುದೇವ್ ಕಾಲಿಚರಣ್ ಬ್ರಹ್ಮ, ರೂಪನಾಥ್ ಬ್ರಹ್ಮ, ಸತೀಶ್ ಚಂದ್ರ ಬಸುಮತರಿ, ಮೊರದಮ್ ಬ್ರಹ್ಮ ಮತ್ತು ಕನಕೇಶ್ವರ ನರ್ಜರಿ ಅವರಂತಹ ಹೆಸರುಗಳನ್ನು ಅವರು ನೆನಪಿಸಿಕೊಂಡರು, ಸಾಮಾಜಿಕ ಸುಧಾರಣೆ, ಸಾಂಸ್ಕೃತಿಕ ಪುನರುಜ್ಜೀವನ ಮತ್ತು ರಾಜಕೀಯ ಜಾಗೃತಿಗೆ ಅವರ ಕೊಡುಗೆಗಳನ್ನು ಗಮನಿಸಿದರು. ಬೋಡೋ ಸಮುದಾಯದ ಗತ ವೈಭವ ಸಾರಿ ಹೇಳುವ ಎಲ್ಲಾ ಮಹಾನ್ ವ್ಯಕ್ತಿಗಳಿಗೆ ಪ್ರಧಾನಮಂತ್ರಿ ಅವರು ಗೌರವ ನಮನ ಸಲ್ಲಿಸಿದರು. ತಮ್ಮ ಪಕ್ಷವು ಅಸ್ಸಾಂನ ಸಂಸ್ಕೃತಿಯನ್ನು ಇಡೀ ರಾಷ್ಟ್ರದ ಹೆಮ್ಮೆ ಎಂದು ಪರಿಗಣಿಸುತ್ತದೆ ಮತ್ತು ಅಸ್ಸಾಂನ ಭೂತಕಾಲ ಮತ್ತು ಪರಂಪರೆಯಿಲ್ಲದೆ ಭಾರತದ ಇತಿಹಾಸ ಅಪೂರ್ಣ ಎಂದು ಅವರು ಹೇಳಿದರು. ತಮ್ಮ ಸರ್ಕಾರದ ಅಡಿಯಲ್ಲಿ, "ಬಾಗುರೂಂಬಾ ದೊಹೊ" ನಂತಹ ಭವ್ಯ ಹಬ್ಬಗಳನ್ನು ಆಯೋಜಿಸಲಾಗಿದೆ, ಬಿಹುಗೆ ರಾಷ್ಟ್ರೀಯ ಮನ್ನಣೆ ನೀಡಲಾಗಿದೆ ಮತ್ತು ಪ್ರಯತ್ನಗಳು ಚರೈಡಿಯೋ ಮೊಯಿದಮ್ ಅನ್ನು ಯುನೆಸ್ಕೋದ ವಿಶ್ವ ಪರಂಪರೆಯ ಪಟ್ಟಿಯಲ್ಲಿ ಸೇರಿಸಲು ಕಾರಣವಾಗಿವೆ ಎಂದು ಶ್ರೀ ಮೋದಿ ಅವರು ವಿವರಿಸಿದರು. "ಅಸ್ಸಾಮಿ" ಭಾಷೆಗೆ ಶಾಸ್ತ್ರೀಯ ಸ್ಥಾನಮಾನ ನೀಡಲಾಗಿದೆ ಮತ್ತು ಬೋಡೋ ಭಾಷೆಯನ್ನು ಅಸ್ಸಾಂನ ಸಹಾಯಕ ಅಧಿಕೃತ ಭಾಷೆಯಾಗಿ ಗುರುತಿಸಲಾಗಿದೆ ಮತ್ತು ಬೋಡೋದಲ್ಲಿ ಶಿಕ್ಷಣವನ್ನು ಬಲಪಡಿಸಲು ಪ್ರತ್ಯೇಕ ನಿರ್ದೇಶನಾಲಯವನ್ನು ಸ್ಥಾಪಿಸಲಾಗಿದೆ ಎಂದು ಅವರು ಹೇಳಿದರು. ಈ ಬದ್ಧತೆಯಿಂದಾಗಿ, ಬಥೌ ಧರ್ಮಕ್ಕೆ ಸಂಪೂರ್ಣ ಗೌರವ ಮತ್ತು ಮನ್ನಣೆ ನೀಡಲಾಗಿದೆ ಮತ್ತು ಬಥೌ ಪೂಜೆಯನ್ನು ರಾಜ್ಯ ರಜಾದಿನವೆಂದು ಘೋಷಿಸಲಾಗಿದೆ ಎಂದು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರು ಹೇಳಿದರು. ಯೋಧ ಲಚಿತ್ ಬೋರ್ಫುಕನ್ ಅವರ ಭವ್ಯ ಪ್ರತಿಮೆಯನ್ನು ಸ್ಥಾಪಿಸಲಾಗಿದೆ ಮತ್ತು ಬೋಡೋಫಾ ಉಪೇಂದ್ರ ನಾಥ್ ಬ್ರಹ್ಮ ಅವರ ಪ್ರತಿಮೆಯನ್ನು ಅನಾವರಣಗೊಳಿಸಲಾಗಿದೆ ಎಂದು ಅವರು ಸಭಿಕರ ಗಮನಸೆಳೆದರು. ಶ್ರೀಮಂತ ಶಂಕರದೇವರ ಭಕ್ತಿ ಮತ್ತು ಸಾಮಾಜಿಕ ಸಾಮರಸ್ಯದ ಸಂಪ್ರದಾಯಗಳು ಮತ್ತು ಜ್ಯೋತಿ ಪ್ರಸಾದ್ ಅಗರ್ ವಾಲರ ಕಲೆ ಮತ್ತು ಪ್ರಜ್ಞೆಯನ್ನು ಅಸ್ಸಾಂನ ಪರಂಪರೆಯ ಭಾಗವಾಗಿ ಗೌರವಿಸಲಾಗುತ್ತದೆ ಎಂದು ಅವರು ಹೇಳಿದರು. ಇಂದು ಜ್ಯೋತಿ ಪ್ರಸಾದ್ ಅಗರ್ ವಾಲ ಅವರ ಪುಣ್ಯತಿಥಿಯಾಗಿದೆ ಎಂದು ಪ್ರಧಾನಮಂತ್ರಿ ಅವರು ಉಲ್ಲೇಖಿಸಿದರು ಹಾಗೂ ಅವರಿಗೆ ಗೌರವ ನಮನ ಸಲ್ಲಿಸಿದರು.
ಅಸ್ಸಾಂಗೆ ಭೇಟಿ ನೀಡಿದ ಬಗ್ಗೆ ತಮ್ಮ ಭಾವನೆಗಳನ್ನು ವ್ಯಕ್ತಪಡಿಸಿದ ಶ್ರೀ ಮೋದಿಯವರು, ರಾಜ್ಯವು ಎಷ್ಟರ ಮಟ್ಟಿಗೆ ಪ್ರಗತಿ ಸಾಧಿಸಿದೆ ಎಂಬುದನ್ನು ನೋಡಿ ತಾವು ತುಂಬಾ ಭಾವುಕರಾಗಿರುವುದಾಗಿ ಹೇಳಿದರು. ರಕ್ತಪಾತ ಆಗಾಗ್ಗೆ ಆಗುತ್ತಿದ್ದ ಕಾಲವಿತ್ತು, ಆದರೆ ಇಂದು ಸಂಸ್ಕೃತಿಯ ಬಣ್ಣಗಳು ಹೊಳೆಯುತ್ತಿವೆ ಎಂದು ಅವರು ನೆನಪಿಸಿಕೊಂಡರು; ಗುಂಡಿನ ದಾಳಿ ಪ್ರತಿಧ್ವನಿಸುವ ಕಾಲವಿತ್ತು, ಆದರೆ ಈಗ ಖಾಮ್ ಮತ್ತು ಸಿಫುಂಗ್ ನ ಮಧುರ ಶಬ್ದಗಳು ಮೇಲುಗೈ ಸಾಧಿಸುತ್ತಿದ್ದ ಕಾಲವಿತ್ತು; ಕರ್ಫ್ಯೂ ಮೌನ ತಂದ ಸಮಯ, ಆದರೆ ಈಗ ಸಂಗೀತ ಪ್ರತಿಧ್ವನಿಸುತ್ತಿದೆ; ಅಶಾಂತಿ ಮತ್ತು ಅಸ್ಥಿರತೆಯ ಸಮಯ, ಆದರೆ ಈಗ ಬಗುರುಂಬಾ ಅವರ ಆಕರ್ಷಕ ಪ್ರದರ್ಶನಗಳು ನಡೆಯುತ್ತಿವೆ. ಇಂತಹ ಭವ್ಯ ಆಚರಣೆಯು ಅಸ್ಸಾಂನ ಸಾಧನೆ ಮಾತ್ರವಲ್ಲ, ಭಾರತದ ಸಾಧನೆಯಾಗಿದೆ ಮತ್ತು ದೇಶದ ಪ್ರತಿಯೊಬ್ಬ ನಾಗರಿಕನು ಅಸ್ಸಾಂನ ರೂಪಾಂತರದ ಬಗ್ಗೆ ಹೆಮ್ಮೆಪಡುತ್ತಾನೆ ಎಂದು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರು ವಿಷಯ ಉಲ್ಲೇಖಿಸಿ ಹೇಳಿದರು.
ಅಸ್ಸಾಂನ ಜನರು ಮತ್ತು ಅವರ ಬೋಡೋ ಸಹೋದರ ಸಹೋದರಿಯರು ತಮ್ಮ ಮೇಲೆ ನಂಬಿಕೆ ಇಟ್ಟಿದ್ದಾರೆ ಎಂದು ಪ್ರಧಾನಮಂತ್ರಿ ಅವರು ತೃಪ್ತಿ ವ್ಯಕ್ತಪಡಿಸಿದರು. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳಿಗೆ ಶಾಂತಿ ಮತ್ತು ಅಭಿವೃದ್ಧಿಯ ಜವಾಬ್ದಾರಿಯನ್ನು ವಹಿಸಲಾಗಿದೆ ಮತ್ತು ಜನರ ಆಶೀರ್ವಾದದೊಂದಿಗೆ ಆ ಜವಾಬ್ದಾರಿಯನ್ನು ಪೂರೈಸಲಾಗಿದೆ ಎಂದು ಅವರು ಹೇಳಿದರು. 2020 ರ ಬೋಡೋ ಶಾಂತಿ ಒಪ್ಪಂದವು ದಶಕಗಳ ಸಂಘರ್ಷವನ್ನು ಕೊನೆಗೊಳಿಸಿತು, ವಿಶ್ವಾಸವನ್ನು ಪುನಃಸ್ಥಾಪಿಸಿತು ಮತ್ತು ಸಾವಿರಾರು ಯುವಕರು ಹಿಂಸಾಚಾರವನ್ನು ತ್ಯಜಿಸಿ ಮುಖ್ಯವಾಹಿನಿಗೆ ಸೇರಲು ಅನುವು ಮಾಡಿಕೊಟ್ಟಿತು ಎಂದು ಶ್ರೀ ಮೋದಿ ಅವರು ವಿವರಿಸಿದರು. ಐತಿಹಾಸಿಕ ಒಪ್ಪಂದದ ನಂತರ, ಬೋಡೋ ಪ್ರದೇಶದಲ್ಲಿ ಶಿಕ್ಷಣ ಮತ್ತು ಅಭಿವೃದ್ಧಿಯಲ್ಲಿ ಹೊಸ ಅವಕಾಶಗಳು ಹೊರಹೊಮ್ಮಿದವು ಮತ್ತು ಶಾಂತಿ ದೈನಂದಿನ ಜೀವನದ ಒಂದು ಭಾಗವಾಯಿತು, ಜನರ ಪ್ರಯತ್ನಗಳು ಅತ್ಯಂತ ಮಹತ್ವದ ಪಾತ್ರವನ್ನು ವಹಿಸಿದವು ಎಂದು ಅವರು ಗಮನಿಸಿದರು.
ಅಸ್ಸಾಂನ ಶಾಂತಿ, ಅಭಿವೃದ್ಧಿ ಮತ್ತು ಹೆಮ್ಮೆಯು ಶಾಂತಿಯ ಮಾರ್ಗವನ್ನು ಆರಿಸಿಕೊಂಡಿರುವ ಯುವಕರ ಸುತ್ತ ಕೇಂದ್ರೀಕೃತವಾಗಿದೆ ಎಂದು ಒತ್ತಿ ಹೇಳಿದ ಶ್ರೀ ಮೋದಿ ಅವರು, ಅದನ್ನು ಉಜ್ವಲ ಭವಿಷ್ಯಕ್ಕೆ ಕೊಂಡೊಯ್ಯಬೇಕು ಎಂದು ಒತ್ತಿ ಹೇಳಿದರು. ಶಾಂತಿ ಒಪ್ಪಂದದ ನಂತರ, ಕೇಂದ್ರ ಸರ್ಕಾರವು ಬೋಡೋಲ್ಯಾಂಡ್ ಪ್ರದೇಶದ ಅಭಿವೃದ್ಧಿಗಾಗಿ ನಿರಂತರವಾಗಿ ಕೆಲಸ ಮಾಡುತ್ತಿದೆ, ಪುನರ್ವಸತಿ ಪ್ರಕ್ರಿಯೆಯನ್ನು ವೇಗಗೊಳಿಸುತ್ತಿದೆ ಮತ್ತು ಸಾವಿರಾರು ಯುವಕರಿಗೆ ಹೊಸದಾಗಿ ಪ್ರಾರಂಭಿಸಲು ಸಹಾಯ ಮಾಡಲು ಕೋಟ್ಯಂತರ ರೂಪಾಯಿ ಆರ್ಥಿಕ ಸಹಾಯವನ್ನು ಒದಗಿಸುತ್ತಿದೆ ಎಂದು ಅವರು ಹೇಳಿದರು.
ತಮ್ಮ ಸರ್ಕಾರದ ಪ್ರಯತ್ನಗಳ ಫಲಿತಾಂಶಗಳು ಇಂದು ಗೋಚರಿಸುತ್ತಿವೆ ಎಂದು ಒತ್ತಿ ಹೇಳಿದ ಪ್ರಧಾನಮಂತ್ರಿಯವರು, ಪ್ರತಿಭಾನ್ವಿತ ಬೋಡೋ ಯುವಕರು ಅಸ್ಸಾಂನ ಸಾಂಸ್ಕೃತಿಕ ರಾಯಭಾರಿಗಳಾಗುತ್ತಿದ್ದಾರೆ, ಕ್ರೀಡೆಗಳಲ್ಲಿ ಶ್ರೇಷ್ಠರಾಗಿದ್ದಾರೆ, ಹೊಸ ಆತ್ಮವಿಶ್ವಾಸದಿಂದ ಕನಸು ಕಾಣುತ್ತಿದ್ದಾರೆ, ಆ ಕನಸುಗಳನ್ನು ನನಸಾಗಿಸುತ್ತಾರೆ ಮತ್ತು ಅಸ್ಸಾಂನ ಪ್ರಗತಿಗೆ ಚಾಲನೆ ನೀಡುತ್ತಾರೆ ಎಂದು ಹೇಳಿದರು.
ಅಸ್ಸಾಂನ ಕಲೆ, ಸಂಸ್ಕೃತಿ ಮತ್ತು ಗುರುತನ್ನು ಗೌರವಿಸಿದಾಗಲೆಲ್ಲಾ ಕೆಲವರು ತೊಂದರೆ ಅನುಭವಿಸುತ್ತಾರೆ ಎಂದು ಶ್ರೀ ಮೋದಿಯವರು ಹೇಳಿದರು. ಅಸ್ಸಾಂನ ಗೌರವವನ್ನು ಯಾರು ಮೆಚ್ಚುವುದಿಲ್ಲ ಎಂದು ಕೇಳಿದ ಶ್ರೀ ಮೋದಿಯವರು, ಭೂಪೇನ್ ಹಜಾರಿಕಾ ಅವರಿಗೆ ಭಾರತ ರತ್ನ ನೀಡುವುದನ್ನು ವಿರೋಧಿಸಿದ್ದು ವಿರೋಧ ಪಕ್ಷವೇ ಮತ್ತು ಅಸ್ಸಾಂನಲ್ಲಿ ಸೆಮಿಕಂಡಕ್ಟರ್ ಘಟಕವನ್ನು ವಿರೋಧಿಸಿದವರು ಅವರೇ ಎಂದು ಸಭಿಕರ ಗಮನಸೆಳೆದರು. ಶ್ರೀ ಮೋದಿ ಅವರು ಇಂದಿಗೂ ಅಸ್ಸಾಂನ ಸಂಸ್ಕೃತಿಗೆ ಸಂಬಂಧಿಸಿದ ಏನನ್ನಾದರೂ ಧರಿಸಿದಾಗ, ಅದನ್ನು ಅಪಹಾಸ್ಯ ಮಾಡುವುದು ವಿರೋಧ ಪಕ್ಷಗಳ ಕೆಲಸವಾಗಿದೆ ಎಂದು ಹೇಳಿದರು.
ವಿರೋಧ ಪಕ್ಷಗಳ ವಿರೋಧದಿಂದಾಗಿಯೇ ಅಸ್ಸಾಂ ಮತ್ತು ಬೋಡೋಲ್ಯಾಂಡ್ ದಶಕಗಳ ಕಾಲ ಮುಖ್ಯವಾಹಿನಿಯಿಂದ ದೂರ ಉಳಿದಿವೆ ಎಂದು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಪ್ರತಿಪಾದಿಸಿದರು. ವಿರೋಧ ಪಕ್ಷಗಳು ತಮ್ಮ ರಾಜಕೀಯ ಲಾಭಕ್ಕಾಗಿ ಅಸ್ಸಾಂನಲ್ಲಿ ಅಸ್ಥಿರತೆಯನ್ನು ಸೃಷ್ಟಿಸಿದರು ಮತ್ತು ರಾಜ್ಯವನ್ನು ಹಿಂಸಾಚಾರದ ಬೆಂಕಿಗೆ ತಳ್ಳಿದರು ಎಂದು ಅವರು ಹೇಳಿದರು. ಸ್ವಾತಂತ್ರ್ಯದ ನಂತರ, ಅಸ್ಸಾಂ ಸವಾಲುಗಳನ್ನು ಎದುರಿಸಿತು, ಆದರೆ ಪರಿಹಾರಗಳನ್ನು ಕಂಡುಕೊಳ್ಳುವ ಬದಲು, ಆಗಿನ ಆಡಳಿತ ವ್ಯವಸ್ಥೆಯು ರಾಜಕೀಯ ಲಾಭಕ್ಕಾಗಿ ಆ ಸಮಸ್ಯೆಗಳನ್ನು ಬಳಸಿಕೊಂಡಿತು ಎಂದು ಅವರು ನೆನಪಿಸಿಕೊಂಡರು. ವಿರೋಧ ಪಕ್ಷವನ್ನು ಟೀಕಿಸಿದ ಶ್ರೀ ಮೋದಿಯವರು, ನಂಬಿಕೆ ಅಗತ್ಯವಿದ್ದಾಗ, ಅವರು ವಿಭಜನೆಯನ್ನು ಬಿತ್ತಿದರು; ಸಂಭಾಷಣೆ ಅಗತ್ಯವಿದ್ದಾಗ, ಅವರು ಅದನ್ನು ನಿರ್ಲಕ್ಷಿಸಿದರು ಮತ್ತು ಸಂವಹನದ ಬಾಗಿಲುಗಳನ್ನು ಮುಚ್ಚಿದರು ಎಂದು ಹಲವಾರು ಸಂದರ್ಭಗಳನ್ನು ಒತ್ತಿ ಹೇಳಿದರು. ಬೋಡೋಲ್ಯಾಂಡ್ ನ ಧ್ವನಿಯನ್ನು ಎಂದಿಗೂ ಸರಿಯಾಗಿ ಕೇಳಲಾಗುವುದಿಲ್ಲ ಎಂದು ಅವರು ಎತ್ತಿ ತೋರಿಸಿದರು. ಅಸ್ಸಾಂಗೆ ಚಿಕಿತ್ಸೆ ಮತ್ತು ಸೇವೆ ಅಗತ್ಯವಿದ್ದಾಗ, ಅವರು ಒಳನುಸುಳುವವರಿಗೆ ಬಾಗಿಲು ತೆರೆದರು ಮತ್ತು ಅವರನ್ನು ಸ್ವಾಗತಿಸುವತ್ತ ಗಮನಹರಿಸಿದರು ಎಂದು ಅವರು ಹೇಳಿದರು.
ವಿರೋಧ ಪಕ್ಷವು ಅಸ್ಸಾಂನ ಜನರನ್ನು ತಮ್ಮದೇ ಎಂದು ಪರಿಗಣಿಸುವುದಿಲ್ಲ, ಬದಲಾಗಿ ವಿದೇಶಿ ಒಳನುಸುಳುವವರನ್ನು ಆದ್ಯತೆ ನೀಡಿ ಸತ್ಕರಿಸುತ್ತದೆ ಎಂದು ಶ್ರೀ ಮೋದಿ ಅವರು ಪ್ರತಿಪಾದಿಸಿದರು, ಹಾಗೂ ಆನಂತರ, ಈ ಒಳನುಸುಳಿದವರು ವಿರೋಧ ಪಕ್ಷಗಳಿಗೆ ತಮ್ಮ ನಿಷ್ಠಾವಂತ ಮತಬ್ಯಾಂಕ್ ಆಗುತ್ತಾರೆ ಎಂದು ಅವರು ಹೇಳಿದರು. ವಿರೋಧ ಪಕ್ಷದ ಆಳ್ವಿಕೆಯಲ್ಲಿ, ಒಳನುಸುಳುವವರು ಬರುತ್ತಲೇ ಇದ್ದರು, ಲಕ್ಷಾಂತರ ಬಿಘಾ ಭೂಮಿಯನ್ನು ಆಕ್ರಮಿಸಿಕೊಂಡರು ಮತ್ತು ಸರ್ಕಾರಗಳು ಅವರಿಗೆ ಸಹಾಯ ಮಾಡಿದವು ಎಂದು ಅವರು ಹೇಳಿದರು. ಶ್ರೀ ಹಿಮಂತ ಬಿಸ್ವಾ ಶರ್ಮಾ ಅವರ ನೇತೃತ್ವದಲ್ಲಿ, ಸರ್ಕಾರವು ಇಂದು ಲಕ್ಷಾಂತರ ಬಿಘಾ ಭೂಮಿಯನ್ನು ನುಸುಳುಕೋರರಿಂದ ಮುಕ್ತಗೊಳಿಸುತ್ತಿದೆ ಮತ್ತು ಅಸ್ಸಾಂನ ಸರಿಯಾದ ಜನರಿಗೆ ಅದನ್ನು ಹಿಂದಿರುಗಿಸುತ್ತಿದೆ ಎಂದು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರು ಸಂತೋಷ ವ್ಯಕ್ತಪಡಿಸಿದರು. ವಿರೋಧ ಪಕ್ಷವು ಯಾವಾಗಲೂ ಅಸ್ಸಾಂ ಮತ್ತು ಇಡೀ ಈಶಾನ್ಯವನ್ನು ನಿರ್ಲಕ್ಷ್ಯದಿಂದ ನೋಡುತ್ತಿತ್ತು, ಅದರ ಅಭಿವೃದ್ಧಿಯನ್ನು ಎಂದಿಗೂ ಮುಖ್ಯವೆಂದು ಪರಿಗಣಿಸಲಿಲ್ಲ ಮತ್ತು ಉದ್ದೇಶಪೂರ್ವಕವಾಗಿ ಪ್ರದೇಶವನ್ನು ತೊಂದರೆಗಳಿಗೆ ತಳ್ಳಿತು ಎಂದು ಅವರು ಹೇಳಿದರು .
ವಿರೋಧ ಪಕ್ಷದ ಪಾಪಗಳನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಸ್ವಚ್ಛಗೊಳಿಸುತ್ತಿವೆ ಮತ್ತು ಇಂದು ಗೋಚರಿಸುವ ಅಭಿವೃದ್ಧಿಯ ವೇಗವು ಇದಕ್ಕೆ ಸಾಕ್ಷಿಯಾಗಿದೆ ಎಂದು ಪ್ರಧಾನಮಂತ್ರಿ ಅವರು ಒತ್ತಿ ಹೇಳಿದರು. ಬೋಡೋ-ಕಚಾರಿ ಕಲ್ಯಾಣ ಸ್ವಾಯತ್ತ ಮಂಡಳಿಯ ರಚನೆ, ಬೋಡೋಲ್ಯಾಂಡ್ ಗೆ ₹1500 ಕೋಟಿ ವಿಶೇಷ ಅಭಿವೃದ್ಧಿ ಪ್ಯಾಕೇಜ್ ಹಂಚಿಕೆ, ಕೊಕ್ರಜಾರ್ನಲ್ಲಿ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆ ಸ್ಥಾಪನೆ ಮತ್ತು ತಮುಲ್ ಪುರದಲ್ಲಿ ವೈದ್ಯಕೀಯ ಕಾಲೇಜಿನ ನಿರ್ಮಾಣದ ವೇಗವನ್ನು ಅವರು ಈ ಸಂದರ್ಭದಲ್ಲಿ ಶ್ಲಾಘಿಸಿದರು. ನರ್ಸಿಂಗ್ ಕಾಲೇಜುಗಳು ಮತ್ತು ಪ್ಯಾರಾಮೆಡಿಕಲ್ ಸಂಸ್ಥೆಗಳು ಯುವಕರಿಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತಿವೆ. ಗೋಬರ್ಧಾನ, ಪರ್ಬತ್ಜೋರಾ ಮತ್ತು ಹೊರಿಂಗಿಗಳಲ್ಲಿ ಪಾಲಿಟೆಕ್ನಿಕ್ ಮತ್ತು ತರಬೇತಿ ಸಂಸ್ಥೆಗಳನ್ನು ಸ್ಥಾಪಿಸಲಾಗಿದೆ ಎಂದು ಅವರು ಹೇಳಿದರು.
ಬೋಡೋ ಸಮುದಾಯದ ಕಲ್ಯಾಣಕ್ಕಾಗಿ ಉತ್ತಮ ನೀತಿ ನಿರೂಪಣೆಗೆ ಅನುವು ಮಾಡಿಕೊಡುವ ಪ್ರತ್ಯೇಕ ಕಲ್ಯಾಣ ಇಲಾಖೆ ಮತ್ತು ಬೋಡೋಲ್ಯಾಂಡ್ ಆಡಳಿತ ಸಿಬ್ಬಂದಿ ಕಾಲೇಜುಗಳನ್ನು ಸಹ ಸ್ಥಾಪಿಸಲಾಗಿದೆ ಎಂದು ಶ್ರೀ ಮೋದಿ ಅವರು ಹೇಳಿದರು. ತಮ್ಮ ಸರ್ಕಾರವು ಕೇಂದ್ರ ಮತ್ತು ರಾಜ್ಯದ ನಡುವಿನ ಅಂತರವನ್ನು ಕಡಿಮೆ ಮಾಡಲು ಪ್ರಯತ್ನಿಸಿದೆ - ಅಸ್ಸಾಂ ಮತ್ತು ದೆಹಲಿಯ ನಡುವೆ ಮತ್ತು ಅಸ್ಸಾಂನೊಳಗೆ ಸುಧಾರಿತ ಮೂಲಸೌಕರ್ಯಗಳ ಮೂಲಕ ಸೇತುವೆ ಮಾಡಿದೆ ಎಂದು ಅವರು ಹೇಳಿದರು. ಒಂದು ಕಾಲದಲ್ಲಿ ತಲುಪಲು ಕಷ್ಟಕರವಾದ ಪ್ರದೇಶಗಳು ಈಗ ಹೆದ್ದಾರಿಗಳನ್ನು ಹೊಂದಿವೆ ಮತ್ತು ಹೊಸ ರಸ್ತೆಗಳು ಅವಕಾಶಗಳನ್ನು ತೆರೆಯುತ್ತಿವೆ. ಕೋಕ್ರಜಾರ್ ಅನ್ನು ಭೂತಾನ್ ಗಡಿಗೆ ಸಂಪರ್ಕಿಸುವ ಬಿಷ್ಮುರಿ-ಸರಲ್ಪಾರ ರಸ್ತೆ ಯೋಜನೆ ಮತ್ತು ಪ್ರಸ್ತಾವಿತ ಕೊಕ್ರಜಾರ್-ಗೆಲೆಫು ರೈಲು ಯೋಜನೆಯನ್ನು ಅವರು ಉಲ್ಲೇಖಿಸಿದರು, ಇದು ವಿಶೇಷ ರೈಲ್ವೆ ಯೋಜನೆಯನ್ನು ಘೋಷಿಸಿತು ಮತ್ತು ವ್ಯಾಪಾರ ಮತ್ತು ಪ್ರವಾಸೋದ್ಯಮವನ್ನು ಉತ್ತೇಜಿಸುವ ಆಕ್ಟ್ ಈಸ್ಟ್ ನೀತಿಯ ಭಾಗವಾಗಿಸಿತು ಎಂದು ಹೇಳಿದರು.
ಸಮಾಜವು ತನ್ನ ಬೇರುಗಳೊಂದಿಗೆ ಸಂಪರ್ಕದಲ್ಲಿರುವಾಗ, ಸಂವಾದ ಮತ್ತು ವಿಶ್ವಾಸವು ಬಲವಾಗಿದ್ದಾಗ ಮತ್ತು ಸಮಾನ ಅವಕಾಶಗಳು ಎಲ್ಲಾ ವರ್ಗಗಳನ್ನು ತಲುಪಿದಾಗ, ಸಕಾರಾತ್ಮಕ ಬದಲಾವಣೆ ಗೋಚರಿಸುತ್ತದೆ ಎಂದು ಪ್ರಧಾನಮಂತ್ರಿ ಅವರು ಹೇಳಿದರು. ಅಸ್ಸಾಂ ಮತ್ತು ಬೋಡೋಲ್ಯಾಂಡ್ ಈ ದಿಕ್ಕಿನಲ್ಲಿ ಪ್ರಗತಿ ಸಾಧಿಸುತ್ತಿವೆ, ಅಸ್ಸಾಂನ ವಿಶ್ವಾಸ, ಸಾಮರ್ಥ್ಯ ಮತ್ತು ಪ್ರಗತಿಯು ಭಾರತದ ಬೆಳವಣಿಗೆಯ ಕಥೆಗೆ ಹೊಸ ಶಕ್ತಿಯನ್ನು ಸೇರಿಸುತ್ತಿದೆ ಎಂದು ಅವರು ಹೇಳಿದರು. ಅಸ್ಸಾಂ ವೇಗವಾಗಿ ಬೆಳೆಯುತ್ತಿರುವ ರಾಜ್ಯಗಳಲ್ಲಿ ಒಂದಾಗಿ ತನ್ನನ್ನು ತಾನು ಸ್ಥಾಪಿಸಿಕೊಳ್ಳುತ್ತಿದೆ, ಅದರ ಆರ್ಥಿಕತೆಯು ವೇಗವನ್ನು ಪಡೆಯುತ್ತಿದೆ ಮತ್ತು ಬೋಡೋಲ್ಯಾಂಡ್ ಮತ್ತು ಅದರ ಜನರು ಈ ಪರಿವರ್ತನೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತಿದ್ದಾರೆ ಎಂದು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಹೇಳಿದರು. ಪ್ರಧಾನಮಂತ್ರಿ ಅವರು ಮತ್ತೊಮ್ಮೆ ಈ ದಿನದ ಭವ್ಯ ಆಚರಣೆಗೆ ಎಲ್ಲರಿಗೂ ಶುಭಾಶಯಗಳನ್ನು ಕೋರಿದರು.
ಅಸ್ಸಾಂ ರಾಜ್ಯಪಾಲ ಶ್ರೀ ಲಕ್ಷ್ಮಣ್ ಪ್ರಸಾದ್ ಆಚಾರ್ಯ, ಅಸ್ಸಾಂ ಮುಖ್ಯಮಂತ್ರಿ ಶ್ರೀ ಹಿಮಂತ ಬಿಸ್ವಾ ಶರ್ಮಾ, ಕೇಂದ್ರ ಸಚಿವರಾದ ಶ್ರೀ ಸರ್ಬಾನಂದ ಸೋನೋವಾಲ್, ಶ್ರೀ ಪಬಿತ್ರ ಮಾರ್ಗರಿಟಾ ಸೇರಿದಂತೆ ಇತರ ಗಣ್ಯರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
ಹಿನ್ನೆಲೆ
ಗುವಾಹತಿಯ ಸರುಸಜೈ ಕ್ರೀಡಾಂಗಣದಲ್ಲಿ ಬೋಡೋ ಸಮುದಾಯದ ಶ್ರೀಮಂತ ಪರಂಪರೆಯನ್ನು ಆಚರಿಸುವ ಐತಿಹಾಸಿಕ ಸಾಂಸ್ಕೃತಿಕ ಕಾರ್ಯಕ್ರಮವಾದ “ಬಾಗುರೂಂಬಾ ದೊಹೊ 2026” ನಲ್ಲಿ ಪ್ರಧಾನಮಂತ್ರಿ ಅವರು ಭಾಗವಹಿಸಿದರು.
ಈ ಸಂದರ್ಭದಲ್ಲಿ, ಬೋಡೋ ಸಮುದಾಯದ 10,000 ಕ್ಕೂ ಹೆಚ್ಚು ಕಲಾವಿದರು ಒಂದೇ ಬಾರಿಗೆ "ಬಾಗುರುಂಬಾ ನೃತ್ಯ"ವನ್ನು ಪ್ರದರ್ಶಿಸಿದರು. ರಾಜ್ಯದ 23 ಜಿಲ್ಲೆಗಳ 81 ವಿಧಾನಸಭಾ ಕ್ಷೇತ್ರಗಳ ಕಲಾವಿದರು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾರೆ.
"ಬಾಗುರೂಂಬಾ" ಬೋಡೋ ಸಮುದಾಯದ ಜಾನಪದ ನೃತ್ಯಗಳಲ್ಲಿ ಒಂದಾಗಿದೆ, ಇದು ಪ್ರಕೃತಿಯಿಂದ ಆಳವಾಗಿ ಪ್ರೇರಿತವಾಗಿದೆ. ಈ ನೃತ್ಯವು ಅರಳುವ ಹೂವುಗಳನ್ನು ಸಂಕೇತಿಸುತ್ತದೆ ಮತ್ತು ಮಾನವ ಜೀವನ ಮತ್ತು ನೈಸರ್ಗಿಕ ಪ್ರಪಂಚದ ನಡುವಿನ ಸಾಮರಸ್ಯವನ್ನು ಪ್ರತಿಬಿಂಬಿಸುತ್ತದೆ. ಸಾಂಪ್ರದಾಯಿಕವಾಗಿ ಯುವ ಬೋಡೋ ಮಹಿಳೆಯರು ಪ್ರದರ್ಶಿಸುತ್ತಾರೆ, ಪುರುಷರು ಸಂಗೀತಗಾರರಾಗಿ ಜೊತೆಗೂಡುತ್ತಾರೆ, ಈ ನೃತ್ಯವು ಚಿಟ್ಟೆಗಳು, ಪಕ್ಷಿಗಳು, ಎಲೆಗಳು ಮತ್ತು ಹೂವುಗಳನ್ನು ಅನುಕರಿಸುವ ಸೌಮ್ಯವಾದ, ಹರಿಯುವ ಚಲನೆಗಳನ್ನು ಒಳಗೊಂಡಿದೆ. ಪ್ರದರ್ಶನಗಳನ್ನು ಸಾಮಾನ್ಯವಾಗಿ ಗುಂಪುಗಳಲ್ಲಿ ಆಯೋಜಿಸಲಾಗುತ್ತದೆ, ಅದರ ದೃಶ್ಯ ಸೊಬಗನ್ನು ಹೆಚ್ಚಿಸುವ ವೃತ್ತಗಳು ಅಥವಾ ರೇಖೆಗಳನ್ನು ರೂಪಿಸುತ್ತದೆ.
"ಬಾಗುರೂಂಬಾ ನೃತ್ಯ"ವು ಬೋಡೋ ಜನರಿಗೆ ಆಳವಾದ ಸಾಂಸ್ಕೃತಿಕ ಮಹತ್ವವನ್ನು ಹೊಂದಿದೆ. ಇದು ಶಾಂತಿ, ಫಲವತ್ತತೆ, ಸಂತೋಷ ಮತ್ತು ಸಾಮೂಹಿಕ ಸಾಮರಸ್ಯವನ್ನು ಪ್ರತಿನಿಧಿಸುತ್ತದೆ ಮತ್ತು ಬ್ವಿಸಾಗು, ಬೋಡೋ ಹೊಸ ವರ್ಷ ಮತ್ತು ಡೊಮಸಿಯಂತಹ ಹಬ್ಬಗಳೊಂದಿಗೆ ನಿಕಟ ಸಂಬಂಧ ಕೂಡ ಹೊಂದಿದೆ.
ಭಾಷಣದ ಪೂರ್ಣ ಪಠ್ಯವನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Bagurumba Dwhou honours our great Bodo traditions. pic.twitter.com/OUDOLIR7Zh
— PMO India (@PMOIndia) January 17, 2026
The 2020 Bodo Peace Accord ended years of conflict.
— PMO India (@PMOIndia) January 17, 2026
After this, trust returned and thousands of youths gave up violence and joined the mainstream. pic.twitter.com/6rKkj45YO2
Talented Bodo youth are today emerging as cultural ambassadors of Assam. pic.twitter.com/7JQYrVYkwK
— PMO India (@PMOIndia) January 17, 2026
With Assam's growing confidence, strength and progress, India's growth story is accelerating. pic.twitter.com/GxDNvBeAsb
— PMO India (@PMOIndia) January 17, 2026
