তামিলনাডুৰ ৰাজ্যপাল থিৰু আৰএন ৰবি জী, মুখ্যমন্ত্ৰী থিৰু এম কে ষ্টেলিন জী, ভাৰতীদছন বিশ্ববিদ্যালয়ৰ উপাচাৰ্য থিৰু এম ছেলভান জী, মোৰ যুৱ বন্ধুসকল আৰু বিশ্ববিদ্যালয়ৰ কৰ্মচাৰীসকল,
ৱনক্কম!
এণ্ডু মানৱ কুডুম্বম, ভাৰতীদাসন বিশ্ববিদ্যালয়
৩৮সংখ্যক সমাৱৰ্তন মোৰ বাবে এক বিশেষ দিন। ২০২৪ চনত ৰাজহুৱাভাৱে মোৰ এইটোৱেই প্ৰথম অনুষ্ঠান। তামিলনাডু আৰু ইয়াৰ যুৱক-যুৱতীসকলক লগ পাই সুখী অনুভৱ কৰিছো। মই জানি সুখী যে এই সমাৱৰ্তনত প্ৰথমবাৰৰ বাবে প্ৰধানমন্ত্ৰীয়ে অংশগ্ৰহণ কৰিছে। সকলো স্নাতক ছাত্ৰ-ছাত্ৰী, তেওঁলোকৰ অভিভাৱক আৰু শিক্ষক-শিক্ষয়িত্ৰীক অভিনন্দন জনাইছো।
এণ্ডু মানৱ কুডুম্বম, বিশ্ববিদ্যালয় স্থাপনৰ বাবে আইনী প্ৰক্ৰিয়াৰ মাজেৰে যাব লাগে। আইন প্ৰণয়ন হ’ল আৰু তাৰ পিছত বিশ্ববিদ্যালয়ৰ গঢ় দিয়া হ’ল। তাৰ পিছত ইয়াৰ অধীনত কলেজ স্থাপন আৰম্ভ হ’ল। অৱশ্যে ভাৰতীদাসন বিশ্ববিদ্যালয়ৰ ক্ষেত্ৰত কথাটো অলপ বেলেগ। ১৯৮২ চনত যেতিয়া এই বিশ্ববিদ্যালয় গঠন হৈছিল, তেতিয়া বহু সন্মানীয় মহাবিদ্যালয় ইয়াৰ অধীনলৈ অনা হৈছিল। এই মহাবিদ্যালয়সমূহৰ বহুতেই দেশক বহুতো উদাৰ সন্তান উপহাৰ দিয়াৰ ইতিহাস আছে। এই বিশ্ববিদ্যালয়ে এক সুদৃঢ় ভেটিত থিয় হৈ যাত্ৰা আৰম্ভ কৰিছিল। মানৱীয়, ভাষা, বিজ্ঞান বা উপগ্ৰহৰ ক্ষেত্ৰত এই বিশ্ববিদ্যালয়ৰ ছাত্ৰ-ছাত্ৰীৰ এক অনন্য ভূমিকা আছে।
এণ্ডু মানৱ কুডুম্বম, আমাৰ দেশ আৰু সভ্যতাই জ্ঞানৰ পথত সদায় আগবাঢ়ি আহিছে। নালন্দা, বিক্ৰমশিলাৰ দৰে কেইবাখনো প্ৰাচীন বিশ্ববিদ্যালয়ৰ বিশেষ সুনাম আছে। গংগোই-কোণ্ডা-চোলপুৰম আৰু মাদুৰাই হৈছে শিক্ষাৰ মহান কেন্দ্ৰ। পৃথিৱীৰ বিভিন্ন প্ৰান্তৰ পৰা শিক্ষাৰ্থীসকলে শিক্ষাৰ বাবে এই স্থানসমূহলৈ আহে।
এণ্ডু মানৱ কুডুম্বম, একেদৰে সমাৱৰ্তনৰ ধাৰণাটো আমাৰ বাবে অতি পুৰণি আৰু চিনাকি। উদাহৰণ হিচাপে কবি আৰু বুদ্ধিজীৱীৰ সমাৱেশৰ কথা প্ৰাচীন তামিল সংগমমত উল্লেখ কৰিব পাৰি। গতিকে আপোনালোক মোৰ ডেকা বন্ধুসকল, জ্ঞানৰ এক মহান ঐতিহাসিক পৰম্পৰাৰ অংশীদাৰ।
এণ্ডু মানৱ কুডুম্বম, বিশ্ববিদ্যালয়সমূহে যিকোনো দেশক পথ প্ৰদৰ্শন কৰাত গুৰুত্বপূৰ্ণ ভূমিকা পালন কৰে। আমাৰ বিশ্ববিদ্যালয়বোৰ সজীৱ, আমাৰ দেশ আৰু সভ্যতাও সজীৱ। আমাৰ দেশত যেতিয়া আক্ৰমণ হৈছিল, তেতিয়া আমাৰ শিক্ষা ব্যৱস্থাও লক্ষ্য কৰি লোৱা হৈছিল। বিংশ শতিকাৰ আৰম্ভণিতে মহাত্মা গান্ধী, পণ্ডিত মদন মোহন মালব্য আৰু ছাৰ আন্নামলাই চেট্টিয়াৰৰ দৰে লোকে বিশ্ববিদ্যালয় আৰম্ভ কৰিছিল। স্বাধীনতা সংগ্ৰামৰ সময়ত এইবোৰ আছিল জ্ঞান আৰু জাতীয়তাবাদৰ কেন্দ্ৰ।
আজি ভাৰতৰ উত্থানৰ আঁৰৰ এটা কাৰক হ’ল আমাৰ বিশ্ববিদ্যালয়ৰ উত্থান। বিত্তীয় উন্নয়নৰ ক্ষেত্ৰত ভাৰতে অভিলেখ সৃষ্টি কৰি আহিছে। অৰ্থনীতিৰ ফালৰ পৰা ভাৰতবৰ্ষই দ্ৰুততম উন্নয়নশীল দেশ হিচাপে আত্মপ্ৰকাশ কৰিছে। লগতে আমাৰ বিশ্ববিদ্যালয়সমূহে আন্তঃৰাষ্ট্ৰীয় পৰ্যায়ত অভিলেখ সংখ্যক স্থান লাভ কৰিছে।
গুৰুদেৱ ৰবীন্দ্ৰনাথ ঠাকুৰে কৈছিল উচ্চ শিক্ষাই কেৱল আমাক তথ্য দিয়াই নহয়, ই আমাক সকলোৰে লগত মিলাপ্ৰীতিৰে জীয়াই থাকিবলৈ শিকাইছে। আপোনালোকৰ জীৱনত এই বিশেষ দিনটো আনিবলৈ সমাজ, দুখীয়াৰ ভিতৰত দুখীয়া মানুহৰো ভূমিকা আছে। গতিকে শিক্ষাৰ মূল লক্ষ্য হৈছে এখন উন্নত সমাজ আৰু দেশ গঢ়া। আজি ইয়াত স্নাতক হোৱাসকলে ২০৪৭ চনৰ ভিতৰত এখন উন্নত ভাৰত গঢ়ি তোলাত সহায় কৰিব পাৰিব।
এণ্ডু মানৱ কুডুম্বম, মোৰ দৃঢ় বিশ্বাস যে ২০৪৭ চনলৈকে আমাৰ দেশৰ ইতিহাসত নৱপ্ৰজন্মৰ সামৰ্থ্য অতি গুৰুত্বপূৰ্ণ হ’বলৈ গৈ আছে। আহক আমি এখন সাহসী পৃথিৱী গঢ়ি তোলোঁ। আমাৰ যুৱ বিজ্ঞানীসকলে ক’ভিডৰ সময়ত বিশ্ববাসীলৈ ভেকচিন প্ৰদান কৰাত সহায় কৰিছিল। ভাৰতীয় বিজ্ঞানীসকলে চন্দ্ৰযানৰ দৰে অভিযানৰ জৰিয়তে নিজকে বিশ্বৰ মানচিত্ৰত স্থান দিছে। আমাৰ বিজ্ঞানীসকলে ২০১৪ চনত পেটেণ্টৰ সংখ্যা ৪০০০ৰ পৰা আজি ৫০ হাজাৰলৈ বৃদ্ধি কৰিছে। আমাৰ সংগীত শিল্পীসকলে ধাৰাবাহিকভাৱে দেশৰ বাবে আন্তঃৰাষ্ট্ৰীয় বঁটা লৈ আহিছে। আমাৰ খেলুৱৈসকলে এছিয়ান গেমছ, এছিয়ান পেৰা গেমছ আদি প্ৰতিযোগিতাত অভিলেখ সংখ্যক পদক লাভ কৰিছে। যি সময়ত সকলোৱে প্ৰতিটো ক্ষেত্ৰতে নতুন আশাৰে আপোনালোকৰ ফালে চাই আছে সেই সময়ত আপুনি নতুন জগতত খোজ দিছে।
বিগত ১০ বছৰত দেশত বিমানবন্দৰৰ সংখ্যা ৭৪ৰ পৰা ১৫০লৈ দুগুণ বৃদ্ধি পাইছে। তামিলনাডুৰ এক সজীৱ উপকূল। আপুনি জানি সুখী হ’ব যে ২০১৪ চনৰ পৰা দেশৰ প্ৰধান বন্দৰসমূহৰ মুঠ মাল পৰিবহণৰ ক্ষমতা দুগুণ বৃদ্ধি পাইছে। যোৱা ১০ বছৰত দেশৰ পথ আৰু ঘাইপথৰ সংখ্যা দুগুণলৈ বৃদ্ধি পাইছে। দেশত ষ্টাৰ্টআপৰ সংখ্যা এতিয়া প্ৰায় ১ লাখ হৈছেগৈ, যিটো ২০১৪ চনত ১০০ টাতকৈও কম আছিল। ভাৰতে কেইবাটাও গুৰুত্বপূৰ্ণ বাণিজ্যিক চুক্তি স্বাক্ষৰ কৰিছে। এই চুক্তিসমূহে আমাৰ সামগ্ৰী আৰু সেৱাসমূহৰ বাবে নতুন বজাৰ সৃষ্টি কৰিব। লগতে যুৱ প্ৰজন্মৰ বাবে অসংখ্য সুযোগৰ সৃষ্টি কৰিব। বহু দিশৰ পৰা ভাৰতীয় যুৱক-যুৱতীসকলৰ বাবে এই সময়ছোৱা ঘৰুৱা আৰু আন্তঃৰাষ্ট্ৰীয় পৰ্যায়ত আগন্তুক উত্তম সময়। এই সুযোগ ব্যৱহাৰ কৰি আমাৰ দেশক নতুন উচ্চতালৈ লৈ যাওক।
এণ্ডু মানৱ কুডুম্বম, আপোনালোকৰ বহুতেই হয়তো অনুভৱ কৰিব যে আজি আপোনালোকৰ বিশ্ববিদ্যালয় জীৱনৰ অন্ত পৰিল। এক অৰ্থত সেয়া সঁচা হ’লেও শিকাৰ কোনো অন্ত নাই। আপোনাৰ অধ্যাপকসকলে হয়তো আৰু পঢ়াব নোৱাৰে, কিন্তু জীৱনটোৱেই আপোনাৰ শিক্ষক হ’ব। আজিৰ দ্ৰুত পৰিৱৰ্তিত বিশ্বত হয় আপোনালোকে পৰিৱৰ্তন আনে, নহয় পৰিৱৰ্তনে আপোনালোকক পৰিচালিত কৰে। আজি ইয়াত স্নাতক হোৱা সকলোকে পুনৰ অভিনন্দন।
সকলোৰে উজ্জ্বল ভৱিষ্যত কামনা কৰিলোঁ। মিক্ক ননৰী৷
