ভাৰতৰ মুখ্য ন্যায়াধীশ ডি ওৱাই চন্দ্ৰচূড়জী, উচ্চতম ন্যায়ালয়ৰ ন্যায়াধীশসকল, বিভিন্ন উচ্চ ন্যায়ালয়ৰ মুখ্য ন্যায়াধীশবৃন্দ, বিদেশৰ আমাৰ অতিথি ন্যায়াধীশসকল, কেন্দ্ৰীয় আইন মন্ত্ৰী অৰ্জুন ৰাম মেঘৱালজী, ‘এটৰ্নী জেনেৰেল’ ভেংকটৰমণীজী, ‘বাৰ কাউন্সিল’ৰ অধ্যক্ষ মনন কুমাৰ মিশ্ৰজী, ‘উচ্চতম ন্যায়ালয় বাৰ এছ'চিয়েশ্যন’ৰ সভাপতি ড০ অদিশ আগৰৱালাজী, অন্যান্য গণ্যমান্য ব্যক্তি, মহিলা আৰু ভদ্ৰলোকসকল!
দুদিন আগতে ভাৰতৰ সংবিধানে ইয়াৰ ৭৫ সংখ্যক বছৰত প্ৰৱেশ কৰিছে। আজি ভাৰতৰ উচ্চতম ন্যায়ালয়ৰ ৭৫ সংখ্যক বৰ্ষৰ আৰম্ভণিও হৈছে। এই ঐতিহাসিক অনুষ্ঠানত আপোনালোক সকলোৰে মাজত উপস্থিত থাকিবলৈ পোৱাটো সঁচাকৈয়ে আনন্দৰ বিষয়, আৰু মই সকলো আইনবিদলৈ শুভেচ্ছা জ্ঞাপন কৰিছো।
বন্ধুসকল,
ভাৰতৰ সংবিধান প্ৰণেতাসকলে স্বাধীনতা, সমতা আৰু ন্যায়ৰ নীতি আধাৰিত কৰি এখন স্বাধীন ভাৰতৰ কল্পনা কৰিছিল। ভাৰতৰ উচ্চতম ন্যায়ালয়ে এই নীতিসমূহ বৰ্তাই ৰাখিবলৈ দৃঢ়তাৰে চেষ্টা কৰি আহিছে। মত প্ৰকাশৰ স্বাধীনতাই হওক, ব্যক্তিগত স্বাধীনতা কিম্বা সামাজিক ন্যায়েই হওক, উচ্চতম ন্যায়ালয়ে ভাৰতৰ উজ্জীৱিত গণতন্ত্ৰক ধাৰাবাহিক ভাৱে সুৰক্ষিত কৰি আহিছে। সাত দশকতকৈয়ো অধিক সময় ধৰি উচ্চতম ন্যায়ালয়ে ব্যক্তিৰ অধিকাৰ আৰু বাক স্বাধীনতা সন্দৰ্ভত অসংখ্য গুৰুত্বপূৰ্ণ সিদ্ধান্ত প্ৰদান কৰিছে, যি দেশৰ সামাজিক-ৰাজনৈতিক দৃশ্যপটক গুৰুত্বপূৰ্ণভাৱে প্ৰভাৱিত কৰি আহিছে।
বন্ধুসকল,
সম্প্ৰতি, ভাৰতৰ প্ৰতিটো প্ৰতিষ্ঠান আৰু সংগঠন, সেয়া লাগিলে কাৰ্যবাহীয়েই হওক বা আইনসভাই হওক, পৰৱৰ্তী ২৫টা বছৰৰ উদ্দেশ্যৰ কথা মনত ৰাখি কাম কৰি আছে। এই অগ্ৰগামী চিন্তাধাৰাৰ দৃষ্টিভংগীয়ে দেশত গুৰুত্বপূৰ্ণ সংস্কাৰ সাধন কৰিছে। আজিৰ অৰ্থনৈতিক নীতিয়ে ভৱিষ্যতৰ উজ্জ্বল ভাৰতখনক গঢ় দিব আৰু আজি প্ৰণয়ন কৰা আইনসমূহে আমাৰ দেশৰ উজ্জ্বল ভৱিষ্যতক শক্তিসমৃদ্ধ কৰিব। পৰিৱৰ্তনশীল গোলকীয় দৃশ্যপটত সকলোৰে দৃষ্টি ভাৰতৰ ওপৰত নিবদ্ধ হৈ আছে, আৰু বিশ্বজুৰি ভাৰতৰ ওপৰত আস্থা বৃদ্ধি পাইছে। এনে পৰিস্থিতিত, ভাৰতৰ বাবে প্ৰতিটো সুযোগ গ্ৰহণ কৰা আৰু কোনো সুযোগেই যাতে হাতৰ পৰা পিছলি নাযায় সেয়া নিশ্চিত কৰাটো অতিকে গুৰুত্বপূৰ্ণ হ’ব। আজি ভাৰতৰ প্ৰাথমিকতাসমূহৰ ভিতৰত আছে স্বাচ্ছন্দ্যৰে জীৱন ধাৰণ কৰা, স্বাচ্ছন্দ্যৰে ব্যৱসায় কৰা, স্বাচ্ছন্দ্যৰে ভ্ৰমণ কৰা, স্বাচ্ছন্যৰে যোগাযোগ কৰা আৰু গুৰুত্বপূৰ্ণভাৱে, স্বাচ্ছন্দ্যৰে ন্যায় লাভৰ সুযোগ পোৱা। ভাৰতৰ প্ৰতিগৰাকী নাগৰিকেই ন্যায়ৰ স্বাচ্ছন্দ্য লাভ কৰাৰ অধিকাৰ আছে, আৰু উচ্চতম ন্যায়ালয়ে ইয়াক লাভ কৰাৰ বাবে প্ৰাথমিক মাধ্যম হিচাপে কাম কৰে।
বন্ধুসকল,
দেশৰ সমগ্ৰ ন্যায় ব্যৱস্থাই উচ্চতম ন্যায়ালয়ে প্ৰদান কৰা দিক-দৰ্শন আৰু নিৰ্দেশনাৰ ওপৰত ভৰসা কৰে। সেয়ে প্ৰতিগৰাকী ভাৰতীয়ৰ প্ৰয়োজনীয়তা পূৰণ কৰিব পৰাকৈ এই আদালতখনক ভাৰতৰ প্ৰতিটো কোণত উপলব্ধ কৰোৱাৰ নিশ্চয়তা প্ৰদান কৰাটো হৈছে আমাৰ কৰ্তব্য। এই উদ্দেশ্যকে সাৰোগত কৰা ‘ই-আদালত মিছন’ প্ৰকল্পৰ তৃতীয়টো পৰ্যায়য়ে শেহতীয়াকৈ অনুমোদন লাভ কৰিছে। ইয়াৰ বাবে দ্বিতীয় পৰ্যায়তকৈ চাৰিগুণ অধিক পুঁজি আৱণ্টন কৰা হৈছে। এয়া হৈছে আপোনালোকৰ আগ্ৰহৰ বিষয়; আপোনালোকে প্ৰশংসা কৰিব পাৰে। মই বুজি পাওঁ যে এয়া আপোনাৰ বাবে এক প্ৰত্যাহ্বানপূৰ্ণ কাম আছিল, শ্ৰী মনন মিশ্ৰ। মই এই সত্যটোক প্ৰশংসা কৰোঁ যে মুখ্য ন্যায়াধীশ চন্দ্ৰচূড়ে নিজেই সমগ্ৰ দেশৰ আদালতৰ ‘ডিজিটাইজেশ্যন প্ৰক্ৰিয়া’টো নিৰীক্ষণ কৰি আছে। ন্যায়ৰ স্বাচ্ছন্দ্যৰ দিশত তেওঁৰ এই প্ৰচেষ্টাৰ বাবে মই তেওঁক অভিনন্দন জনাইছো।
বন্ধুসকল,
আমাৰ চৰকাৰ আদালতৰ ভৌতিক আন্তঃগাঁথনি সম্প্ৰসাৰিত কৰিবলৈ প্ৰতিশ্ৰুতিবদ্ধ। ২০১৪ চনৰ পৰা এই উদ্দেশ্যৰ বাবে ৭ হাজাৰ কোটি টকা আৱণ্টন দিয়া হৈছে। উচ্চতম ন্যায়ালয়ৰ বৰ্তমানৰ ভৱনত আপোনালোক সকলোৱে অনুভৱ কৰা প্ৰত্যাহ্বানসমূহৰ বিষয়ে মই জ্ঞাত। যোৱা সপ্তাহতে চৰকাৰে উচ্চতম ন্যায়ালয়ৰ ভৱন চৌহদ সম্প্ৰসাৰণৰ বাবে ৮০০ কোটি টকা মঞ্জুৰ কৰিছে। মই আশা কৰিম যে নতুন সংসদ ভৱনে সন্মুখীন হোৱা কেতবোৰ সমালোচনাৰ দৰেই ইয়াক অপব্যয় বুলি গণ্য কৰি ইয়াৰ বিৰুদ্ধে কোনো আপত্তি উত্থাপন কৰা নহ'ব।
বন্ধুসকল,
আজি আপোনালোকে মোক উচ্চতম ন্যায়ালয়ৰ কিছুমান ‘ডিজিটেল পদক্ষেপ’ উন্মোচন কৰাৰ সুযোগ দিছে। ‘ডিজিটেল উচ্চতম ন্যায়ালয়ৰ প্ৰতিবেদন’ প্ৰৱৰ্তনৰ অৰ্থ হৈছে যে উচ্চতম ন্যায়ালয়ৰ সিদ্ধান্তসমূহ এতিয়া ‘ডিজিটেল বিন্যাস’তো উপলব্ধ হ'ব। মই লক্ষ্য কৰি আনন্দিত হৈছো যে উচ্চতম ন্যায়ালয়ৰ সিদ্ধান্তসমূহ স্থানীয় ভাষালৈ অনুবাদ কৰাৰ প্ৰক্ৰিয়াও আৰম্ভ হৈছে। মই বিশ্বাস কৰোঁ যে এনে ধৰণৰ ব্যৱস্থা শীঘ্ৰেই সমগ্ৰ দেশৰ আন আদালতসমূহতো কাৰ্যকৰী কৰা হ'ব।
বন্ধুসকল,
প্ৰযুক্তিয়ে আজি ন্যায়ৰ স্বাচ্ছন্দ্যত কেনেদৰে অৰিহণা যোগাব পাৰে এই অনুষ্ঠানটোৱে নিজেই তাৰ নিদৰ্শন দাঙি ধৰিছে। মই প্ৰদান কৰি থকা ভাষণটো এই মুহূৰ্ততে ‘এআই’ ব্যৱহাৰ কৰি ইংৰাজীলৈ অনুবাদ কৰা হৈছে, আৰু আপোনালোকৰ কিছু সংখ্যকে ‘ভষিনী এপ’ৰ জৰিয়তে ইয়াক শুনি আছে। যদিও প্ৰাৰম্ভিক পৰ্যায়ত কেতবোৰ প্ৰত্যাহ্বান থাকিব পাৰে তথাপি ই প্ৰযুক্তিৰ উল্লেখনীয় সামৰ্থ্যকে আলোকপাত কৰে। আমাৰ আদালতসমূহত একে ধৰণৰ প্ৰযুক্তি ব্যৱহাৰ কৰিলে সাধাৰণ নাগৰিকৰ জীৱন সহজসাধ্য হ'ব পাৰে। আপোনালোকৰ চাগৈ মনত আছে যে কিছু দিন আগতে মই সৰলীকৃত ভাষাত আইনৰ খচৰা প্ৰস্তুত কৰাৰ প্ৰয়োজনীয়তাত গুৰুত্ব আৰোপ কৰিছিলো। মই বিশ্বাস কৰোঁ যে সৰলীকৃত ভাষাত আদালতৰ আদেশ প্ৰদান কৰাটো সাধাৰণ ৰাইজৰ বাবে অধিক লাভজনক বুলি প্ৰমাণিত হ'ব।
বন্ধুসকল,
'অমৃত কাল'ৰ সময়ত আমাৰ আইনসমূহত ভাৰতীয়ত্ব আৰু আধুনিকতাৰ একেই পৰশ সংপৃক্ত কৰাটো হ’ব সমানেই গুৰুত্বপূৰ্ণ। চৰকাৰে সাম্প্ৰতিক প্ৰেক্ষাপট আৰু সৰ্বশ্ৰেষ্ঠ অনুশীলন পদ্ধতি অনুসৰি আইনৰ আধুনিকীকৰণৰ বাবে সক্ৰিয়ভাৱে কাম কৰি আছে। পুৰণি ঔপনিৱেশিক ‘অপৰাধ নিয়ন্ত্ৰণ আইন’সমূহ বাতিল কৰি চৰকাৰে ‘ভাৰতীয় নগৰিক সুৰক্ষা সংহিতা’, ‘ভাৰতীয় ন্যায় সংহিতা’ আৰু ‘ভাৰতীয় সাক্ষ্য আইন’ প্ৰৱৰ্তন কৰিছে। এই পৰিৱৰ্তনসমূহৰ ফলত, আমাৰ ন্যায়িক, নিয়ন্ত্ৰণ আৰু অনুসন্ধান প্ৰণালীয়ে এক নতুন যুগত প্ৰৱেশ কৰিছে, যাৰ ফলত এক বৃহৎ ৰূপান্তৰণ সম্ভৱ হৈছে। এয়া অত্যাৱশ্যকীয় যে আমি পুৰণি আইনৰ পৰা নতুন আইনলৈ মসৃণভাৱে সংক্ৰমণৰ দিহা কৰিব লাগিব। ইয়াৰ সুবিধাৰ বাবে, চৰকাৰী কৰ্মচাৰীসকলৰ প্ৰশিক্ষণ আৰু সামৰ্থ্য বৰ্দ্ধনৰ প্ৰক্ৰিয়া ইতিমধ্যে আৰম্ভ হৈছে। মই উচ্চতম ন্যায়ালয়ক সংশ্লিষ্ট সকলো অংশীদাৰৰ বাবে এনে সামৰ্থ্য বৰ্দ্ধনৰ পদক্ষেপত আগশাৰীৰ ভূমিকা ল'বলৈ অনুৰোধ কৰিম।
বন্ধুসকল,
এক শক্তিশালী ন্যায়িক ব্যৱস্থাই এক উন্নত ভাৰত গঢ়াৰ আধাৰশিলা হিচাপে কাম কৰে। চৰকাৰে এক নিৰ্ভৰযোগ্য ব্যৱস্থা স্থাপনৰ বাবে নিৰন্তৰ সিদ্ধান্ত লয়, আৰু ‘জন বিশ্বাস বিধেয়ক’ হৈছে এই দিশত এক গুৰুত্বপূৰ্ণ পদক্ষেপ। এই পদক্ষেপৰ উদ্দেশ্য হৈছে ভৱিষ্যতে ন্যায় ব্যৱস্থাৰ ওপৰত পৰিব পৰা অপ্ৰয়োজনীয় বোজা হ্ৰাস কৰা আৰু অমীমাংসিত গোচৰসমূহৰ বকেয়া হ্ৰাস কৰা। এয়া লক্ষণীয় যে চৰকাৰে বিবাদ নিষ্পত্তিৰ বাবে মধ্যস্থতাৰ আইনৰে বৈকল্পিক ব্যৱস্থাও আৰম্ভ কৰিছে, যাৰ ফলত আমাৰ ন্যায়পালিকা, বিশেষকৈ অধীনস্থ ন্যায়পালিকাৰ ওপৰত বোজা হ্ৰাস পাব।
বন্ধুসকল,
২০৪৭ চনৰ ভিতৰত উন্নত ভাৰত গঢ়াৰ লক্ষ্য বাস্তৱায়িত কৰাৰ বাবে সকলোৰে সামূহিক প্ৰচেষ্টাৰ প্ৰয়োজন। পৰৱৰ্তী ২৫টা বছৰত উচ্চতম ন্যায়ালয়ৰ ভূমিকাই নিঃসন্দেহে এই যাত্ৰাত এক গুৰুত্বপূৰ্ণ আৰু ইতিবাচক ভূমিকা পালন কৰিব। মোক ইয়ালৈ জনোৱা আমন্ত্ৰণৰ বাবে মই আকৌ এবাৰ কৃতজ্ঞতা জ্ঞাপন কৰিছো। মই এই বছৰ ‘পদ্ম বঁটা’ সম্পৰ্কীয় এটা দিশৰ প্ৰতি মনোযোগ আকৰ্ষণ কৰিব বিচাৰিছো। আমি উচ্চতম ন্যায়ালয়ৰ অৱসৰপ্ৰাপ্ত ন্যায়াধীশ আৰু এছিয়াৰ প্ৰথমগৰাকী উচ্চতম ন্যায়ালয়ৰ মুছলমান ন্যায়াধীশ ফাতিমা জীক ‘পদ্মভূষণ’ প্ৰদান কৰিছো। এই সাফল্যই মোক অপৰিসীম গৌৰৱেৰে ভৰাই তুলিছে। আকৌ এবাৰ, মই উচ্চতম ন্যায়ালয়ক ইয়াৰ ‘হীৰক জয়ন্তী’ৰ বাবে অভিনন্দন জনাইছো।
বহুত বহুত ধন্যবাদ।
