মিনাক্ষী-সুন্দৰেশ্বৰা মন্দিৰৰ বাবে বিখ্যাত মাডুৰাইত উপস্থিত থাকি আজি মই অত্যন্ত উৎফুল্লিত৷
দেশবাসীয়ে কালি ব্যাপক উলহ-মালহেৰে গণৰাজ্য দিৱস উদযাপন কৰিলে৷ আজি মাডুৰাইত এইমছৰ আধাৰশিলা স্থাপনে চৰকাৰৰ ‘এক ভাৰত, শ্ৰেষ্ঠ ভাৰত’ নীতিক প্ৰতিফলিত কৰিছে৷
বন্ধুসকল, আমি সকলোৱে জানো যে দিল্লীৰ এইমছ প্ৰতিষ্ঠানে স্বাস্থ্যসেৱা খণ্ডত এক ব্ৰেণ্ড নাম হিচাপে পৰিচিত হৈছে৷ মাডুৰাইত এইমছৰ আধাৰশিলা স্থাপন কৰি আমি ক’ব পাৰো স্বাস্থ্যখণ্ডৰ এই ব্ৰেণ্ড কাশ্মীৰৰ পৰা মাডুৰাই, গুৱাহাটীৰ পৰা গুজৰাটলৈ—দেশৰ প্ৰতিটো প্ৰান্তলৈ লৈ যোৱা হ’ব৷ মাডুৰাইৰ এইমছ প্ৰতিষ্ঠান ১৬হাজাৰ কোটি টকা ব্যয় সাপেক্ষে নিৰ্মাণ কৰা হ’ব৷ ইয়ে সমগ্ৰ তামিলনাডুৰ জনসাধাৰণক উপকৃত কৰিব৷
বন্ধুসকল,
এনডিএ চৰকাৰে দেশৰ স্বাস্থ্য খণ্ডত অত্যন্ত গুৰুত্ব প্ৰদান কৰিছে, যাতে প্ৰতিগৰাকী ব্যক্তি স্বাস্থ্যৱান হৈ থাকে আৰু সকলোৰে বাবে স্বাস্থ্যসেৱা সুলভ হয়৷
প্ৰধানমন্ত্ৰী স্বাস্থ্য সুৰক্ষা যোজনাৰ অধীনত আমি দেশৰ ভিন্ন প্ৰান্তৰ চৰকাৰী চিকিৎসা মহাবিদ্যালয়ৰ উন্নীতকৰণৰ পদক্ষেপ গ্ৰহণ কৰিছো৷ আজি মই মাডুৰাই, থানঝাভুৰ আৰু তিৰুনেলভেলি মেডিকেল কলেজত ছুপাৰ স্পেচিয়েলিটী ব্ল’ক উদ্বোধন কৰি গভীৰ সন্তুষ্টি অনুভৱ কৰিছো৷
মিছন ইন্দ্ৰধনুষে ক্ষিপ্ৰ গতিৰে কাম কৰি স্বাস্থ্যসেৱা খণ্ডত এক নতুন দৃষ্টান্ত দাঙি ধৰিছে৷ প্ৰধানমন্ত্ৰী মাতৃ মাতৃত্ব বন্দনা যোজনা আৰু প্ৰধানমন্ত্ৰী সুৰক্ষিত মাতৃত্ব অভিযানে নিৰাপদ অন্তঃসত্ত্বা নিশ্চিত কৰিছে৷
যোৱা চাৰি বছৰত দেশত মেডিকেল আসনৰ সংখ্যা ৩০%লৈ বৃদ্ধি পাইছে৷
আয়ুস্মান ভাৰতৰ মুকলিও এক বৃহৎ পদক্ষেপ৷ এই আঁচনিৰ অধীনত তামিলনাডুৰ ১ কোটি ৫৭লাখ লোক জড়িত হৈছে৷ মাত্ৰ তিনি মাহৰ ভিতৰতে তামিলনাডুৰ প্ৰায় ৮৯০০ লোকে আঁচনিখনৰদ্বাৰা উপকৃত হৈছে আৰু চিকিৎসালয়ত ভৰ্তি হোৱা ৰাজ্যখনৰ ৰোগীৰ বাবে ২০০ কোটিৰো অধিক ধন মুকলি কৰি দিয়া হৈছে৷ তামিলনাডুত ইতিমধ্যে ১৩২০ টা স্বাস্থ্য আৰু আৰোগ্য কেন্দ্ৰ মুকলি হোৱাক লৈ মই সন্তুষ্টি৷
প্ৰধানমন্ত্ৰী জন আৰোগ্য যোজনাই প্ৰায় ১০ কোটি দৰিদ্ৰ পৰিয়ালক চিকিৎসালয়ত ভৰ্তি কৰাৰ ক্ষেত্ৰত ৫ লাখ টকাৰ আৰ্থিক নিৰাপত্তা প্ৰদান কৰিছে৷
এয়া হ’ল বিশ্বৰ সৰ্ববৃহৎ স্বাস্থ্য বীমা যোজনা৷
ৰোগ প্ৰতিৰোধৰ ক্ষেত্ৰত আমি ৰাজ্য চৰকাৰসমূহক কাৰিকৰী আৰু বিত্তীয় সাহায্য আগবঢ়াও৷ ২০২৫ৰ ভিতৰত আমাৰ চৰকাৰে দেশক টিবি মুক্ত কৰাৰ লক্ষ্য লৈছে৷ মই জানিব পাৰি সুখী হৈছো যে, ৰাজ্য চৰকাৰে টিবি মুক্ত চেন্নাই অভিযান আৰম্ভ কৰিছে আৰু ২০২৩ৰ ভিতৰত ৰাজ্যখনক টিবি মুক্ত কৰাৰ লক্ষ্য লৈছে৷
তামিলনাডুত আজি ১২ টা ডাকঘৰ পাছপ’ৰ্ট সেৱা কেন্দ্ৰ মুকলি কৰিও মই অত্যন্ত সুখ অনুভৱ কৰিছো৷
জনসাধাৰণৰ জীৱন-ধাৰণৰ মান উন্নত কৰিবলৈ চৰকাৰে লোৱা পদক্ষেপৰ ই এটা অন্যতম উদাহৰণ৷
জয় হিন্দ !!!!
