মন্ত্ৰীমণ্ডলৰ মোৰ জ্যেষ্ঠ সহযোগী, দেশৰ প্ৰতিৰক্ষা মন্ত্ৰী শ্ৰীমান ৰাজনাথ সিংজী, শ্ৰী অৰ্জুন মুণ্ডাজী, শ্ৰী কিৰেণ ৰিজিজুজী, শ্ৰীমতী ৰেণুকা সিং সৰুটাজী আৰু দেশৰ বিভিন্ন প্ৰান্তৰ পৰা অহা মোৰ মৰমৰ যুৱবৃন্দসকল৷ ক’ৰোনাই সঁচাকৈয়ে বহুখিনি পৰিৱৰ্তন সাধন কৰিলে৷ মাস্ক, ক’ৰোনা টেষ্ট, দুই গজৰ দুৰত্ব, এতিয়া এইবোৰ যেন নিত্য নৈমিত্তিক কৰ্তব্য হৈ পৰিছে৷ প্ৰথমে যেতিয়া কেমেৰামেনে ফটো তুলিছিল তেতিয়া তেওঁ কৈছিল স্মাইল৷ এতিয়া মাস্কৰ বাবে সেয়াও নোকোৱা হৈছে৷ ইয়াতো আমি আসনৰ ব্যৱস্থা ভিন্ন ধৰণৰ কৰিবলগীয়া হৈছে৷ দূৰে দূৰে বহিবলগীয়া হৈছে৷ কিন্তু ইয়াৰ পিছতো আপোনালোকৰ উৎসাহ, আপোনালোকৰ উদ্দীপনা কোনো ধৰণে হ্ৰাস হোৱা নাই, একেই আছে৷
বন্ধুসকল,
আপোনালোক দেশ বিভিন্ন প্ৰান্তৰ পৰা ইয়ালৈ আহিছে৷ ইয়াত দেশৰ দূৰ-সুদূৰৰ জনজাতীয় ক্ষেত্ৰৰ পৰা অহা সতীৰ্থসকল আছে, এনচিচি-এনএছএছৰ উদ্বীপ্ত যুৱক-যুৱতীসকল আছে আৰু ৰাজপথত বিভিন্ন ৰাজ্যৰ বাৰ্তা কঢ়িয়াই অনা কলাকাৰ বন্ধুসকলো আছে৷ ৰাজপথত যেতিয়া আপোনালোকে উৎসাহৰ সৈতে কদমত কদম মিলাই আগবাঢ়ে তেতিয়া সমগ্ৰ দেশবাসী উৎসাহিত হৈ পৰে৷ যেতিয়া আপোনালোকে ভাৰতৰ সমৃদ্ধ কলা, সংস্কৃতি, পৰম্পৰা আৰু ঐতিহ্য প্ৰতিফলিত কৰে তেতিয়া সকলো দেশবাসীৰ শিৰ গৌৰৱেৰে সুউচ্চ হৈ পৰে৷ আৰু মই দেখিছো যে পেৰেডৰ সময়ত মোৰ কাষত যি অন্য দেশৰ অতিথিয়ে বহে, তেওঁ আচৰিত হৈ পৰে, তেওঁ বহু প্ৰশ্ন কৰে, জানিবলৈ প্ৰয়াস কৰে৷ দেশৰ কোন অংশত কি আছে, কিয় আছে৷ যেতিয়া আমাৰ আদিবাসী বন্ধুসকলে ৰাজপথত সংস্কৃতিৰ ৰং ছটিয়াই তেতিয়া সম্পূৰ্ণ ভাৰত সেই ৰঙত ৰঙীণ পৰে, নাচি উঠে৷ গণতন্ত্ৰ দিৱসৰ পেৰেডত ভাৰতৰ মহান সামাজিক-সাংস্কৃতিক ঐতিহ্যৰ লগতে আমাৰ সামৰিক সামৰ্থকো প্ৰতিফলিত কৰে৷ গণতন্ত্ৰ দিৱসৰ পেৰেড বিশ্বৰ সবাতোকৈ বৃহৎ গণতন্ত্ৰক জীৱন্ত কৰি তোলা আমাৰ সংবিধানক প্ৰতিফলিত কৰে৷ মই আপোনালোকক ২৬ জানুৱাৰীৰ অপূৰ্ব প্ৰদৰ্শনৰ বাবে অশেষ শুভকামনা জনাইছো৷ আপোনালোকলৈ এটা আহ্বানো জনাইছো৷ এতিয়া দিল্লীত শীত নামিছে৷ যিসকল দক্ষিণৰ পৰা আহিছে তেওঁলোকৰ হয়তো সমস্যা হ’ব পাৰে আৰু আপোনালোক ইয়াত কেইবাদিনো হয়তো থাকিবলগীয়া হ’ব পাৰে৷ মই যে ক’লো আপোনালোকে এই শীতৰ বতৰ সহ্য কৰিব নোৱাৰিব পাৰে, ইমান ৰাতিপুৱাই উঠি ড্ৰিল কৰিবলগীয়া হয়, সেয়ে মই আপোনালোকক স্বাস্থ্যৰ প্ৰতি ধ্যান দিবলৈ আহ্বান জনাইছো৷
বন্ধুসকল,
এই বৰ্ষটোত আমাৰ দেশে স্বাধীনতাৰ ৭৫তম বৰ্ষত প্ৰৱেশ কৰিছে৷ এই বৰ্ষত গুৰু টেগ বাহাদুৰৰ ৪০০তম প্ৰকাশ পৰ্বও উদযাপন কৰা হ’ব৷ আৰু এই বৰ্ষটোতেই আমি নেতাজী সুভাষ চন্দ্ৰ বসুৰ ১২৫তম জন্মজয়ন্তীও পালন কৰিছো৷ এতিয়া দেশে এই সিদ্ধান্ত গ্ৰহণ কৰিছে যে নেতাজীৰ জন্মদিৱসক আমি পৰাক্ৰম দিৱস হিচাপে পালন কৰিম৷ কালি পৰাক্ৰম দিৱসত মই তেওঁৰ কৰ্মভূমি কলকাতাত আছিলো৷ স্বাধীনতাৰ ৭৫তম বৰ্ষ, গুৰু টেগ বাহাদুৰৰ জীৱন, নেতাজীৰ শৌৰ্য, তেওঁৰ উৎসাহ এই আটাইবোৰ আমাৰ বাবে অতিশয় প্ৰেৰণাদায়ী৷ আমি দেশৰ স্বাধীনতাৰ বাবে নিজৰ সৰ্বস্ব ত্যাগ কৰাৰ অৱকাশ নাপালো, কাৰণ আমাৰ অধিক সংখ্যক লোক স্বাধীনতাৰ পিছত জন্ম হৈছো৷ কিন্তু আমি দেশৰ বাবে নিজৰ সৰ্বশ্ৰেষ্ঠ অৰ্পিত কৰাৰ অৱকাশ নিশ্চিতভাৱে লাভ কৰিছো৷ আমি দেশৰ বাবে যি ভাল কাম কৰিব পাৰো, ভাৰতক শক্তিশালী কৰি তোলাৰ বাবে যি কৰিব পাৰো সেয়া কৰিব লাগে৷
বন্ধুসকল,
গণতন্ত্ৰ দিৱসৰ পেৰেডৰ প্ৰস্তুতি আপোনালোকেও অনুভৱ কৰিছে যে আমাৰ দেশ কেনে বৈচিত্ৰময়৷ অনেক ভাষা, অনেক মাত-কথা, অনেক খাদ্যাভাস৷ ইমান বৈচিত্ৰ, তথাপিও ভাৰত এক৷ ভাৰত অৰ্থাৎ কৌটি-কোটি সামান্য জনতাৰ তেজ-ঘাম, আকাংক্ষা আৰু আশাৰ সামূহিক শক্তি৷ ভাৰত অৰ্থাৎ ৰাজ্য অনেক, ৰাষ্ট্ৰ এক৷ ভাৰত অৰ্থাৎ সমাজ অনেক, ভাৱ এক৷ ভাৰত অৰ্থাৎ পন্থ অনেক, লক্ষ্য এক৷ ভাৰত অৰ্থাৎ পৰম্পৰা অনেক, মূল্য এক৷ ভাৰত অৰ্থাৎ ভাষা অনেক, অভিব্যক্তি এক৷ ভাৰত অৰ্থাৎ ৰং অনেক, ত্ৰিৰংগা এক৷ যদি এটা শাৰীত কোৱা হয় তেন্তে ভাৰতত পথ পৃথক হ’ব পাৰে কিন্তু গন্তব্যস্থল একেটাই, লক্ষ্য একেটাই৷ আৰু এই লক্ষ্য হ’ল এক ভাৰত, শ্ৰেষ্ঠ ভাৰত৷
বন্ধুসকল,
আজি এক ভাৰত, শ্ৰেষ্ঠ ভাৰতৰ এই শ্বাস্বত ভাৱনা, দেশৰ প্ৰতিটো কোণত প্ৰকট হৈছে, শক্তিশালী হৈছে৷ আপোনালোকেও দেখিছে, শুনিছে যে মিজোৰামৰ ৪ বছৰীয়া এগৰাকী কন্যাই বন্দে মাতৰম গাই দেশক গৰ্বিত কৰি তুলিছে৷ কেৰালাৰ এখন বিদ্যালয়ৰ এগৰাকী কন্যাই যেতিয়া কঠোৰ পৰিশ্ৰমেৰে শিকি, এক হিমাচলী গীত অতিশয় উৎকৃষ্টতাৰে গায় তেতিয়া ৰাষ্ট্ৰৰ শক্তি তাত প্ৰতিফলিত হৈ উছে৷ তেলেগু ভাষাৰ এক কন্যাই যেতিয়া নিজৰ বিদ্যালয়ৰ প্ৰকল্পত অতিশয় সুন্দৰ ধৰণে হাৰিয়ানাৰ খাদ্যাভাসৰ পৰিচয় দিয়ে, তেতিয়া তাত ভাৰতৰ শ্ৰেষ্ঠত্ব প্ৰতিফলিত হয়৷
বন্ধুসকল,
ভাৰতৰ এই শক্তিক দেশ আৰু বিশ্বক পৰিচিত কৰোৱাৰ বাবে এক ভাৰত, শ্ৰেষ্ঠ ভাৰতৰ প’ৰ্টেল নিৰ্মাণ কৰা হৈছে আৰু আপোনালোক আটায়েই ডিজিটেল প্ৰজন্মৰ যেতিয়া, এই সন্দৰ্ভত ভালদৰেই জানিব৷ এই প’ৰ্টেলত ব্যঞ্জনৰ যি অংশ আছে, তাত সহস্ৰাধিক লোকে নিজৰ প্ৰদেশৰ ব্যঞ্জন সম্ভাৰ প্ৰকাশ কৰিছে৷ কেতিয়াবা সময় উলিয়াই আপোনালোকে এই প’ৰ্টেল চাব আৰু পৰিয়ালকো ক’ব সেয়া ৰন্ধন প্ৰকৰণ প্ৰস্তুত কৰিবলৈ, আপোনালোক খুব আনন্দিত হ’ব তেতিয়া৷
বন্ধুসকল,
বিগত দিনকেইটাত ক’ৰোনাৰ সময়ছোৱাত স্কুল-কলেজ বন্ধ হোৱাৰ পৰিপ্ৰেক্ষিতত দেশৰ যুৱক-যুৱতীসকলে ডিজিটেল মাধ্যমৰ জৰিয়তে অন্য ৰাজ্যৰ সৈতে ৱেবিনাৰ কৰিছে৷ এই ৱেবিনাৰত সংগীত, নৃত্য, খাদ্যাভাসৰ বিভিন্ন ৰাজ্যৰ বিভিন্ন শৈলীৰ ওপৰত আলোচনা কৰা হৈছে৷ আজি চৰকাৰেও এয়া প্ৰয়াস কৰিছে যে প্ৰতিটো প্ৰান্তত, প্ৰতি ক্ষেত্ৰৰ ভাষা, খাদ্যাভাসৰ কলা সম্পূৰ্ণ দেশতে প্ৰচাৰ হওক৷ দেশত ভাৰতৰ প্ৰতিখন ৰাজ্যৰ খাৱন-শোৱন, পৰম্পৰা, উৎসৱৰ বিষয়ে সজাগতা বৃদ্ধি হওক৷ বিশেষকৈ আমাৰ সমৃদ্ধ আদিবাসী পৰম্পৰা, কলাকৃতিৰ পৰা দেশবাসীয়ে বহু কথা শিকিব পাৰে৷ এই আটাইবোৰক আগুৱাই নিয়াৰ বাবে এক ভাৰত শ্ৰেষ্ঠ ভাৰত অভিযান অতিশয় সহায়ক বিবেচিত হৈছে৷
বন্ধুসকল,
আজিকালি আপোনালোকে হয়তো শুনিছে, চৌদিশে ভ’কেল ফ’ৰ লোকেল শুনা যায়৷ আপোনালোকৰ ঘৰৰ কাষত যি সামগ্ৰী প্ৰস্তুত হৈছে, স্থানীয় পৰ্যায়ত যি প্ৰস্তুত হৈছে, সেইসমূহক মান দিয়া, সেইসমূহৰ গৌৰৱ কৰা, উৎসাহিত কৰা, এয়াই হ’ল ভ’কেল ফ’ৰ লোকেল৷ কিন্তু ভ’কেল ফ’ৰ লোকেলৰ ভাৱনা তেতিয়াহে শক্তিশালী হ’ব যেতিয়া ই এক ভাৰত-শ্ৰেষ্ঠ ভাৰতৰ ভাৱনাৰ দ্বাৰা সশক্ত হ’ব৷ হাৰিয়ানাৰ যিকোনো সামগ্ৰীৰ সম্বন্ধত, মই তামিলনাডুত থাকিলেও গৰ্ব হ’ব লাগিব৷ কেৰালাৰ সামগ্ৰীৰ বাবে মই হিমাচলত থাকিলেও গৰ্ব হ’ব লাগিব৷ এটা স্থানৰ সামগ্ৰীৰ বাবে আন এটা স্থানে গৰ্ব কৰিব লাগিব, উৎসাহিত কৰিব লাগিব, তেতিয়াহে থলুৱা সামগ্ৰী দেশৰ বিভিন্ন প্ৰান্তত উপলব্ধ হ’ব, সেয়া এক বিশ্বজনীন সামগ্ৰী হৈ উঠিব৷
বন্ধুসকল,
এই ভ’কেল ফ’ৰ লোকেল, এই আত্মনিৰ্ভৰ ভাৰতৰ অভিযান, ইয়াৰ সফলতা আপোনালোকৰ দৰে যুৱচামৰ ওপৰত নিৰ্ভৰ কৰিছে আৰু আজি মোৰ সন্মুখত যি এনচিচি আৰু এনএছএছৰ যুৱক-যুৱতীসকল বহি আছে, তেওঁলোকক এই শিক্ষা-দীক্ষা প্ৰদান কৰা হয়েই৷ মই আজি আপোনালোকক এটা সৰু কাম দিবলৈ বিচাৰিছো৷ আৰু দেশৰ আমাৰ এনচিচিৰ সদস্যসকলে মোৰ এই কামটোত নিশ্চয়কৈ সহায় কৰিব৷ আপোনালোকে এটা কাম কৰিব, ৰাতিপুৱা শুই উঠাৰ পৰা ৰাতি শোৱালৈ যিসমূহ সামগ্ৰী আপোনালোকে ব্যৱহাৰ কৰে, সেয়া লাগিলে টুথপেষ্টেই হওক, ব্ৰাশ্বেই হওক, ফণীয়েই হওক- যিকোনো, ঘৰত এচিয়েই হওক, ম’বাইল ফোনেই হওক, যিবোৰ সামগ্ৰী দৈনন্দিন ব্যৱহৃত হয়, য’ত আমাৰ দেশৰ শ্ৰমিকৰ ঘামৰ সুঘ্ৰাণ আছে, যিবোৰত আমাৰ এই মহান দেশৰ ভূমিৰ সুঘ্ৰাণ আছে সেয়া ব্যৱহাৰ কৰক৷ আপোনালোক আচৰিত হ’ব- জানি-নাজানি ইমানবোৰ বিদেশী সামগ্ৰী আমাৰ ঘৰত সোমাই পৰিছে আমি গমেই নাপাও৷ এবাৰ আপোনালোকে প্ৰত্যক্ষ কৰিলে গম পাব যে আত্মনিৰ্ভৰ ভাৰত হৈ উঠাৰ প্ৰথমটো কৰ্তব্য ইয়াৰ পৰাই আৰম্ভ হ’ব লাগে৷ ইয়াৰ অৰ্থ মই এইটো কোৱা নাই যে আপোনালোকৰ সৈতে যিবোৰ বিদেশী সামগ্ৰী আছে সেয়া কাইলৈৰ পৰা বৰ্জন কৰক৷ মই এয়াও কোৱা নাই যে বিশ্বত কোনোবাটো ভাল সামগ্ৰী যদি আমাৰ ইয়াত উপলব্ধ নহয়, সেয়া নল’বলৈ মই নকও৷ কিন্তু আমি গমেই পোৱা নাই যে এনেবোৰ সামগ্ৰীয়ে আমাৰ দৈনন্দিন জীৱনত, আমাক এক প্ৰকাৰে দাস কৰি তুলিছে, মানসিক দাস কৰি তুলিছে৷ মোৰ যুৱ বন্ধুসকলক আহ্বান জনাম৷ এনচিচি-এনএছছৰ যুৱ বন্ধুসকলক আহ্বান জনাম৷ আপোনালোকে নিজৰ পৰিয়ালৰ সৈতে বহি এক সূচী প্ৰস্তুত কৰক, এবাৰ চাওক, আপোনালোকে কেতিয়াও মোৰ কথা স্মৰণ কৰিব নালাগিব, আপোনালোকৰ আত্মাই ক’ব যে আমি দেশৰ কিমান লোকচান কৰিছো৷
বন্ধুসকল,
ভাৰত আত্মনিৰ্ভৰ কেৱল ক’লেই নহ’ব, মই যিদৰে ক’লো যে আপোনালোকৰ দৰে যুৱ বন্ধু সকলে কৰিলেহে হ’ব৷ আৰু আপোনালোকে এয়া তেতিয়াহে উন্নত ধৰণে কৰিব পাৰিব যেতিয়া আপোনালোকৰ ওচৰত আৱশ্যকীয় দক্ষতা থাকিব৷
বন্ধুসকল,
দক্ষতাৰ এই গুৰুত্ব অনুধাৱন কৰি ২০১৪ চনত আমাৰ চৰকাৰ গঠন হোৱাৰ লগে লগেই দক্ষতা বিকাশৰ বাবে এক বিশেষ মন্ত্ৰালয় গঠন কৰা হৈছিল৷ এই অভিযানৰ অধীনত এই পৰ্যন্ত চাৰে পাঁচ কোটিতকৈও অধিক যুৱক-যুৱতীয়ে বিভিন্ন বিষয়ত দক্ষতা অৰ্জন কৰিছে৷ কৌশল বিকাশৰ এই কাৰ্যসূচীৰ অধীনত কেৱল প্ৰশিক্ষণেই নহয় বৰঞ্চ লক্ষাধিক যুৱক-যুৱতীক ৰোজগাৰ আৰু স্বৰোজগাৰৰ সুবিধাও প্ৰদান কৰা হয়৷ লক্ষ্য এয়াই যে ভাৰতৰ যুৱচাম দক্ষসম্পন্ন হওক আৰু দক্ষতাৰ ভিত্তিত তেওঁলোকে ৰোজগাৰৰ সুবিধা লাভ কৰক৷
বন্ধুসকল,
আত্মনিৰ্ভ ভাৰতৰ বাবে যুৱচামৰ কৌশলৰ ওপৰত এই গুৰুত্বও নতুন ৰাষ্ট্ৰীয় শিক্ষা নীতিত প্ৰস্তুত কৰা হৈছে৷ আপোনালোকেও এয়া প্ৰত্যক্ষ কৰিব পাৰিব৷ ইয়াত অধ্যয়নৰ সৈতে অন্যান্য এপ্লিকেচনৰ ওপৰতো গুৰুত্ব প্ৰদান কৰা হৈছে৷ ৰাষ্ট্ৰীয় শিক্ষা নীতিৰ প্ৰয়াস এয়াই যে যুৱচামক তেওঁলোকৰ ৰুচি অনুসৰি বিষয় বাচনি কৰাৰ সুযোগ প্ৰদান কৰা হৈছে৷ তেওঁলোকে কেতিয়া পঢ়িব, কেতিয়া পঢ়া এৰিব, পুনৰ কেতিয়া আৰম্ভ কৰিব, ইয়াৰ বাবেও নমনীয়তা প্ৰদান কৰা হৈছে৷ আমাৰ বিদ্যাৰ্থীসকলে নিজে যি কৰিবলৈ বিচাৰিছে, তাত যাতে আগবাঢ়িব পাৰে, তাৰ বাবে প্ৰয়াস কৰা হৈছে৷
বন্ধুসকল,
নতুন ৰাষ্ট্ৰীয় শিক্ষা নীতিত প্ৰথমবাৰলৈ কাৰিকৰী শিক্ষাক শিক্ষাৰ মুখ্যধাৰাৰ সৈতে সংলগ্ন কৰাৰ প্ৰয়াস কৰা হৈছে৷ ষষ্ঠ শ্ৰেণীৰ পৰাই বিদ্যাৰ্থীসকলক স্থানীয় আৱশ্যকতা আৰু স্থানীয় ব্যৱসায়ৰ সৈতে জড়িত নিজৰ ৰুচি অনুসৰি যিকোনো বিষয় বাচনি কৰাৰ বিকল্প প্ৰদান কৰা হৈছে৷ এয়া কেৱল অধ্যয়নৰ পাঠ্যক্ৰমেই নহ’ব, বৰঞ্চ শিকা আৰু শিকোৱাৰ পাঠ্যক্ৰমো হ’ব৷ ইয়াত স্থানীয় কুশল কাৰিকৰৰ সৈতে ব্যৱহাৰিক অভিজ্ঞতাও প্ৰদান কৰা হ’ব৷ ইয়াৰ পিছত পৰ্যায়ক্ৰমে সকলো মাধ্যমিক বিদ্যালয়ৰ শৈক্ষিক বিষয়ত ব্যৱসায়িক শিক্ষাক সংলগ্ন কৰাৰো লক্ষ্য নিৰ্ধাৰণ কৰা হৈছে৷ মই আজি আপোনালোকক এয়া বিস্তাৰিতভাৱে এইবাবেই কৈছো কিয়নো আপোনালোক যিমানেই সজাগ হ’ব, সিমানেই আপোনালোকৰ ভৱিষ্যতো উজ্বল হ’ব৷
বন্ধুসকল,
আপোনালোক আটায়েই আত্মনিৰ্ভৰ ভাৰতৰ প্ৰকৃত কৰ্ণধাৰ৷ এনচিচি-য়েই হওক অথবা এনএছএছ-য়েই হওক অথবা অন্য সংগঠনেই হওক, আপোনালোকে দেশৰ প্ৰতিটো প্ৰত্যাহ্বানৰ সময়ত নিজৰ ভূমিকা পালন কৰিছে৷ ক’ৰোনাৰ সময়ছোৱাতো আপোনালোকে যি কাম কৰিছে, স্বেচ্ছাসেৱীৰ ৰূপত যিমান কাম কৰিছে, আপোনালোকৰ যিমানেই প্ৰশংসা কৰা হয় সিমানেই কম হ’ব৷ যেতিয়া দেশক, শাসন-প্ৰশাসনক সবাতোকৈ অধিক প্ৰয়োজন হয় তেতিয়া আপোনালোকে স্বেচ্ছাসেৱীৰ ৰূপত আগবাঢ়ি ব্যৱস্থাসমূহ প্ৰণালীৱদ্ধ কৰাত সহায় কৰিছে৷ আৰোগ্য সেতু জনসাধাৰণৰ মাজত প্ৰচাৰ কৰা অথবা ক’ৰোনা সংক্ৰমণৰ সৈতে জড়িত অন্যান্য তথ্যক লৈ সজাগতা প্ৰদান কৰাত আপোনালোকে প্ৰশংসনীয় কাম কৰিছে৷ ক’ৰোনাৰ এই সময়ছোৱাত ফিট ইণ্ডিয়া অভিযানৰ জৰিয়তে ফিটনেছৰ প্ৰতি সজাগতা বৃদ্ধি কৰাতো আপোনালোকে গুৰুত্বপূৰ্ণ ভূমিকা পালন কৰিছে৷
বন্ধুসকল,
আপোনালোকে এই পৰ্যন্ত যি কাম কৰিলে সেয়া আগন্তুক পৰ্যায়লৈ লৈ যোৱাৰ সময় আহি পৰিছে৷ আৰু মই আপোনালোকক এইবাবেই কৈছো কিয়নো আপোনালোক দেশৰ বিভিন্ন প্ৰান্তত ব্যাপি আছে৷ মই আপোনালোকক আহ্বান জনাইছো যে দেশত প্ৰণয়ন হোৱা ক’ৰোনা প্ৰতিষেধক অভিযানত আপোনালোকেও সহায়ৰ হাত আগবঢ়াব লাগিব৷ আপোনালোকে প্ৰতিষেধকক লৈ উপযুক্ত তথ্যসমূহ দেশ দৰিদ্ৰতম ব্যক্তিক, সাধাৰণ জনতাক সজাগ কৰিব লাগিব৷ ক’ৰোনাৰ প্ৰতিষেধক ভাৰতত প্ৰস্তুত কৰি, ভাৰতৰ বৈজ্ঞানিকসকলে নিজৰ কৰ্তব্য সুন্দৰ ধৰণে পালন কৰিছে৷ এতিয়া আমি আমাৰ কৰ্তব্য পালন কৰিব লাগিব৷ ভ্ৰম আৰু মিছা কথা বিয়পোৱা লোকসকলক আমি পৰাস্ত কৰিব লাগিব৷ আমি এয়া মনত ৰাখিব লাগিব যে আমাৰ গণতন্ত্ৰ এই কাৰণেই শক্তিশালী কিয়নো ই কৰ্তব্যৰ ভাৱনাৰে সংকল্পিত৷ এই ভাৱনাক আমি সশক্ত কৰিব লাগিব৷ ইয়াৰ দ্বাৰাই আমাৰ গণতন্ত্ৰও শক্তিশালী হ’ব আৰু আত্মনিৰ্ভৰতাৰ সংকল্পও সিদ্ধ হ’ব৷ আপোনালোক সকলোৱে এই মহত্বপূৰ্ণ পৰ্বত উপস্থিত থকাৰ অৱকাশ লাভ কৰিছে৷ মন গঢ়াৰ, দেশক জনাৰ আৰু দেশৰ বাবে কিবা এটা কৰাৰ, ইয়াতকৈ ডাঙৰ সংস্কাৰ আৰু আন একো হ’ব নোৱাৰে৷ এই সৌভাগ্য আপোনালোকে লাভ কৰিছে৷ মোৰ বিশ্বাস যে ২৬ জানুৱাৰীৰ এই ভব্য সমাৰোহৰ পিছত যেতিয়া আপোনালোক ঘৰলৈ উভতিব তেতিয়া এই আটাইবোৰ কথা আপোনালোকে স্মৰণ কৰিব৷ কিন্তু এয়াও পাহৰিব নালাগিব যে আমি দেশক আমাৰ সৰ্বশ্ৰেষ্ঠসমূহ অৰ্পণ কৰিব লাগিব আৰু কৰিবই লাগিব৷ আপোনালোক আটাইলৈ মোৰ আন্তৰিক শুভকামনা থাকিল৷
অশেষ ধন্যবাদ!
