পেহেলগামত সন্ত্ৰাসবাদী আক্ৰমণত নিৰীহ লোকৰ কৰুণ মৃত্যুত মৰ্মাহত হৈ পৰিছে। বিহাৰৰ মধুবানীত অনুষ্ঠিত ৰাষ্ট্ৰীয় পঞ্চায়তীৰাজ দিৱস উদযাপনত সমগ্ৰ দেশৰ হৈ প্ৰধানমন্ত্ৰী মোদীয়ে শোক প্ৰকাশ কৰাৰ লগতে গভীৰ দুখ আৰু ক্ষোভ প্ৰকাশ কৰে। এই উপলক্ষে পীড়িত লোকসকলৰ সন্মানাৰ্থে দুই মিনিট সময় মৌন প্ৰাৰ্থনা কৰি সমগ্ৰ দেশবাসী ঐক্যবদ্ধভাৱে ক্ষতিগ্ৰস্ত পৰিয়ালসমূহৰ কাষত থিয় দিছে।
বিহাৰৰ মধুবানীত এক জোৰদাৰ ভাষণত প্ৰধানমন্ত্ৰী মোদীয়ে সন্ত্ৰাসবাদৰ সন্মুখত ন্যায়, ঐক্য, সুস্থিৰতা আৰু ভাৰতৰ অমৰ মনোভাৱৰ বাবে স্পষ্ট আহ্বান জনায়। তেওঁ শেহতীয়াকৈ জম্মু-কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণক গৰিহণা দি ভাৰতৰ সাৰ্বভৌমত্ব আৰু মনোভাৱৰ প্ৰতি ভাবুকি কঢ়িয়াই অনাসকলক উচিত প্ৰত্যুত্তৰ দিব বুলি সদৰি কৰে।
২২ এপ্ৰিলত পেহেলগামত সংঘটিত ভয়ংকৰ আক্ৰমণ সন্দৰ্ভত প্ৰধানমন্ত্ৰী মোদীয়ে গভীৰ শোক প্ৰকাশ কৰি কয় যে, “নিৰীহ নাগৰিকৰ নিৰ্মম হত্যাকাণ্ডই সমগ্ৰ দেশবাসীক যন্ত্ৰণা দিয়াৰ লগতে মৰ্মাহত কৰিছে। কাৰ্গিলৰ পৰা কন্যাকুমাৰীলৈকে সকলোৰে শোক আৰু ক্ষোভ একেই।” তেওঁ ক্ষতিগ্ৰস্ত পৰিয়ালসমূহৰ প্ৰতি সহানুভূতি প্ৰকাশ কৰি তেওঁলোকক আশ্বাস দিয়ে যে চৰকাৰে আহত আৰু চিকিৎসাধীন লোকসকলক সহায় কৰাৰ বাবে সকলো প্ৰচেষ্টা চলাইছে। প্ৰধানমন্ত্ৰীয়ে সন্ত্ৰাসবাদৰ বিৰুদ্ধে ১৪০ কোটি ভাৰতীয়ৰ ঐক্যবদ্ধ সংকল্পৰ ওপৰত গুৰুত্ব আৰোপ কৰে। তেওঁ ঘোষণা কৰে যে এইটো কেৱল নিৰস্ত্ৰ পৰ্যটকৰ ওপৰত কৰা আক্ৰমণ নাছিল বৰঞ্চ ভাৰতৰ আত্মাৰ ওপৰত এক প্ৰকাশ্য আক্ৰমণ আছিল।
অদম্য দৃঢ়তাৰে প্ৰধানমন্ত্ৰী মোদীয়ে দোষীক ন্যায়ৰ কাঠগৰাত উঠাবলৈ প্ৰতিজ্ঞা কৰি দৃঢ়তাৰে কয়, “যিসকলে এই আক্ৰমণ সংঘটিত কৰিছিল আৰু যিসকলে ষড়যন্ত্ৰ কৰিছিল তেওঁলোকে কল্পনা কৰাতকৈ বহু বেছি শাস্তিৰ সন্মুখীন হ’ব লাগিব।সন্ত্ৰাসবাদৰ অৱশিষ্ট মচি পেলোৱাৰ সময় আহি পৰিছে।ভাৰতৰ ইচ্ছাশক্তিয়ে সন্ত্ৰাসবাদৰ পৃষ্ঠপোষকসকলৰ মেৰুদণ্ড ভাঙি পেলাব।” তেওঁ ভাৰতৰ বৈশ্বিক স্থিতি আৰু অধিক শক্তিশালী কৰি বিহাৰৰ ভূমিৰ পৰা কয়, “ভাৰতে প্ৰতিটো সন্ত্ৰাসবাদী, তেওঁলোকৰ পৃষ্ঠপোষক আৰু সমৰ্থকক চিনাক্তৰণ, বিচাৰি উলিওৱাৰ লগতে শাস্তি প্ৰদান কৰিব।”
এই শোকৰ মুহূৰ্তত ভাৰতৰ কাষত থিয় দিয়া বিভিন্ন দেশ, তেওঁলোকৰ নেতা আৰু জনসাধাৰণৰ প্ৰতি কৃতজ্ঞতা জ্ঞাপন কৰি প্ৰধানমন্ত্ৰী মোদীয়ে এই কথাত গুৰুত্ব আৰোপ কৰি কয় যে “মানৱতাত বিশ্বাস কৰা সকলো আমাৰ লগত আছে।”
