প্ৰধানমন্ত্ৰী শ্ৰী নৰেন্দ্ৰ মোদীয়ে ২০২৬ চনৰ ৪ জুলাইত ৰাজস্থান আৰু গুজৰাট ভ্ৰমণ কৰিব। পুৱা প্ৰায় ১০.৪৫ বজাত প্ৰধানমন্ত্ৰীয়ে যোধপুৰ বিমানবন্দৰৰ টাৰ্মিনেল ভৱন উদ্বোধন কৰিব আৰু যোধপুৰত ত্বৰান্বিত উড়ান আঁচনিৰ শুভাৰম্ভ কৰিব। পৰৱৰ্তী সময়ত প্ৰায় ১২.১৫ বজাত তেওঁ প্ৰায় ১.০৬ লাখ কোটি টকাৰ উন্নয়নমূলক প্ৰকল্পৰ উৎসৰ্গা, উদ্বোধন আৰু আধাৰশিলা স্থাপনৰ বাবে বালোত্ৰালৈ যাত্ৰা কৰিব। এই উপলক্ষে তেওঁ এক ৰাজহুৱা সমাৱেশকো সম্বোধন কৰিব।
ইয়াৰ পাছতে প্ৰধানমন্ত্ৰীয়ে গুজৰাট ভ্ৰমণ কৰিব। সন্ধিয়া প্ৰায় ৪.৩০ বজাত প্ৰধানমন্ত্ৰীয়ে আহমেদাবাদৰ সানন্দত চিজি এছইএমআই আউটছ’ৰ্চ ছেমিকণ্ডাক্টৰ এছেম্বলি এণ্ড টেষ্ট (অ’এছএটি) প্ৰকল্প উদ্বোধন কৰিব। এই উপলক্ষে তেওঁ সমাৱেশকো সম্বোধন কৰিব।
যোধপুৰত প্ৰধানমন্ত্ৰী
আঞ্চলিক সংযোগৰ ওপৰত বিশেষ গুৰুত্ব দি বিমান পৰিবহণ খণ্ডক এক গুৰুত্বপূৰ্ণ অগ্ৰগতি প্ৰদান কৰি প্ৰধানমন্ত্ৰীয়ে যোধপুৰত ত্বৰান্বিত উড়ান আঁচনিৰ শুভাৰম্ভ কৰিব। ই ভাৰতৰ অসামৰিক বিমান পৰিবেশত এক গুৰুত্বপূৰ্ণ অগ্ৰগতি চিহ্নিত কৰাৰ লগতে ‘উড়ে দেশ কা আম নাগৰিক’ৰ দৃষ্টিভংগীক আৰু আগুৱাই নিব। পৰৱৰ্তী ১০ বছৰত ২৮,৮৪০ কোটি টকা আবণ্টনৰ সৈতে আঁচনিখনৰ লক্ষ্য হৈছে বিমান পৰিবহণ-নেতৃত্বাধীন উন্নয়নৰ পৰৱৰ্তী পৰ্যায় ত্বৰান্বিত কৰা। ই ব্যাপক আৰু বহনক্ষম সংযোগ নিশ্চিত কৰাৰ বাবে প্ৰস্তুত কৰা একাধিক কৌশলগত উপাদানৰ ওপৰত গুৰুত্ব আৰোপ কৰে।
সমগ্ৰ দেশতে বিমান পৰিবহণৰ আন্তঃগাঁথনি সম্প্ৰসাৰণৰ বাবে ১২,০০০ কোটি টকাতকৈও অধিক ব্যয়ৰ সহায়ত বৰ্তমান সেৱা অব্যাহত নথকা এয়াৰষ্ট্ৰিপৰ পৰা ১০০ টা বিমানঘাটীৰ বিকাশৰ ওপৰত গুৰুত্ব আৰোপ কৰা হৈছে। তদুপৰি আঞ্চলিক বিমানবন্দৰসমূহৰ কাৰ্য্যকৰীকৰণৰ প্ৰাৰম্ভিক বছৰবোৰত ইয়াৰ কাৰ্য্যকৰীতা নিশ্চিত কৰিবলৈ পৰিচালনা আৰু ৰক্ষণাবেক্ষণ (অ’এণ্ডএম) সমৰ্থনৰ বাবে ২,৫০০ কোটি টকাতকৈও অধিক ধন ধাৰ্য কৰা হৈছে। দূৰৱৰ্তী আৰু কঠিন ভূখণ্ডত সূচলতাৰ প্ৰত্যাহ্বানৰ মোকাবিলা কৰিবলৈ আঁচনিখনে ২০০ টা আধুনিক হেলিপেডৰ বিকাশৰো প্ৰস্তাৱ দিছে।
এই আঁচনিখনে বিমান পৰিবহণ সংস্থাসমূহৰ বাবে ১০,০০০ কোটি টকাৰো অধিক ভায়াবিলিটি গেপ ফাণ্ডিং (ভি জি এফ) সমৰ্থন অব্যাহত ৰখাৰ জৰিয়তে ক্ৰমান্বয়ে বাণিজ্যিক কাৰ্য্যকৰীকৰণক উৎসাহিত কৰাৰ লগতে বহনক্ষম আঞ্চলিক কাৰ্য্যকলাপ নিশ্চিত কৰিছে। আত্মনিৰ্ভৰ ভাৰতৰ দৃষ্টিভংগীক অধিক শক্তিশালী কৰি হাতত লোৱা এই পদক্ষেপৰ জৰিয়তে অৱহেলিত অঞ্চলসমূহত সংযোগ আৰু কাৰ্য্যকলাপ বৃদ্ধি কৰাৰ উদ্দেশ্যে এইচএএল ধ্ৰুৱ আৰু ডৰ্নিয়াৰ প্লেটফৰ্মৰ দৰে থলুৱা বিমান আৰু হেলিকপ্টাৰ ক্ৰয় কৰাৰ লক্ষ্য লোৱা হৈছে।
কাৰ্যসূচীৰ সময়ত প্ৰধানমন্ত্ৰীয়ে যোধপুৰ বিমানবন্দৰত নতুন টাৰ্মিনেল বিল্ডিঙো উদ্বোধন কৰিব। মুঠ ৪৮০ কোটি টকা ব্যয়েৰে এই প্ৰকল্পটো বিকশিত কৰা হৈছে। ২৩,০০০ বৰ্গমিটাৰতকৈও অধিক অঞ্চলত বিস্তৃত, নতুন টাৰ্মিনেল ভৱনটো বছৰি ২০ লাখ যাত্ৰী পৰিচালনা কৰিব পৰাকৈ তৈয়াৰ কৰা হৈছে। ই এক নিৰৱচ্ছিন্ন আৰু আৰামদায়ক ভ্ৰমণৰ অভিজ্ঞতা নিশ্চিত কৰিবলৈ আধুনিক যাত্ৰীৰ সুবিধাৰে সজ্জিত।
স্থাপত্যগতভাৱে ৰাজস্থানৰ ৰাজকীয় ঐতিহ্যৰ দ্বাৰা অনুপ্ৰাণিত এই টাৰ্মিনেলে সমসাময়িক শৈলীৰ সৈতে খিলান আৰু ঝাৰোখাৰ দৰে পৰম্পৰাগত উপাদানসমূহৰ নিৰৱচ্ছিন্নভাৱে সংমিশ্ৰণ ঘটাইছে। শক্তি-দক্ষ ব্যৱস্থা, পানী সংৰক্ষণ ব্যৱস্থা আৰু ৫-ষ্টাৰ গৃহ ৰেটিং প্ৰাপ্ত কৰাৰ লক্ষ্যৰে সেউজ নিৰ্মাণ অনুশীলনৰ দৰে বৈশিষ্ট্যৰ সৈতে টাৰ্মিনেলৰ শৈলী, বহনক্ষমতা সুনিশ্চিত কৰি প্ৰস্তুত কৰা হৈছে। যোধপুৰ বিমানবন্দৰত নতুন টাৰ্মিনেল ভৱনৰ উদ্বোধনৰ ফলত অঞ্চলটোত পৰ্যটন, বাণিজ্য আৰু নিযুক্তি সৃষ্টিৰ ক্ষেত্ৰত যথেষ্ট উৎসাহৰ সৃষ্টি হ’ব।
বালোত্ৰাত প্ৰধানমন্ত্ৰী
প্ৰধানমন্ত্ৰীয়ে বালোত্ৰাত প্ৰায় ১.০৬ লাখ কোটি টকাৰ বিভিন্ন উন্নয়নমূলক প্ৰকল্পৰ আধাৰশিলা স্থাপন আৰু উদ্বোধন কৰিব। এই প্ৰকল্পসমূহ পেট্ৰ’কেমিকেলছ, নগৰীয়া পৰিবহণ, ৰে’লপথ, পথ, নৱীকৰণযোগ্য শক্তি আৰু বিদ্যুৎ সঞ্চালনকে ধৰি একাধিক খণ্ডত বিস্তৃত।
প্ৰধানমন্ত্ৰীয়ে দেশৰ শক্তি আৰু পেট্ৰ’কেমিকেল খণ্ডত এক যুগান্তকাৰী সাফল্য হিচাপে চিহ্নিত কৰি বালোত্ৰাৰ পাচপদ্ৰাত ভাৰতৰ প্ৰথমটো গ্ৰীনফিল্ড সংহত শোধনাগাৰ তথা পেট্ৰ’কেমিকেল চৌহদ ৰাষ্ট্ৰলৈ উৎসৰ্গা কৰিব।
হিন্দুস্তান পেট্ৰ’লিয়াম কৰ্পোৰেচন লিমিটেড (এইচ পি চি এল) আৰু ৰাজস্থান চৰকাৰৰ মাজত যৌথ উদ্যোগ হিচাপে বিকশিত হোৱা প্ৰতি বছৰে ৯ মিলিয়ন মেট্ৰিক টন সামৰ্থ্যৰ (এম এম টি পি এ) গ্ৰীনফিল্ড শোধনাগাৰ তথা পেট্ৰ’কেমিকেল চৌহদ ৭৯,৪৫০ কোটি টকাৰো অধিক বিনিয়োগৰে স্থাপন কৰা হৈছে।
অত্যাধুনিক চৌহদটোৱে ২.৪ এমএমটিপিএ পেট্ৰ’কেমিকেল ক্ষমতাৰ সৈতে শোধন আৰু পেট্ৰ’কেমিকেল উৎপাদন একত্ৰিত কৰে। দক্ষতা আৰু বহনক্ষমতাৰ বাবে বিশ্বব্যাপী মানৰ সৈতে সংগতি ৰাখি এই শোধনাগাৰটোত উচ্চ নেলছন জটিলতা সূচক ১৭.০ আৰু পেট্ৰ’কেমিকেল উৎপাদন ২৬ শতাংশতকৈ অধিক।
এই প্ৰকল্পটোৱে ভাৰতৰ শক্তি সুৰক্ষাক শক্তিশালী কৰা, পেট্ৰ’কেমিকেল আত্মনিৰ্ভৰশীলতা বৃদ্ধি কৰা আৰু ঔদ্যোগিক বিকাশত এক গুৰুত্বপূৰ্ণ ভূমিকা পালন কৰিব বুলি আশা কৰা হৈছে। ই অঞ্চলটোত পেট্ৰ’কেমিকেল আৰু প্লাষ্টিক পাৰ্কৰ বিকাশৰ বাবে এক পথ প্ৰদৰ্শন কৰা উদ্যোগ হিচাপে কাম কৰাৰ লগতে যোগান শৃংখলাৰ শেষ প্ৰান্তৰ উদ্যোগ আৰু আনুষংগিক খণ্ডৰ প্ৰচাৰ কৰিব। তদুপৰি শোধনাগাৰটোৱে অঞ্চলটোৰ আৰ্থ-সামাজিক উন্নয়নত অৰিহণা যোগোৱাৰ লগতে উল্লেখযোগ্য নিয়োগৰ সুযোগ সৃষ্টি কৰিবলৈ সাজু।
প্ৰধানমন্ত্ৰীয়ে ১৩,০০০ কোটি টকাৰো অধিক ব্যয়সাপেক্ষে জয়পুৰ মেট্ৰ’ ৰেল প্ৰকল্পৰ দ্বিতীয় পৰ্যায়ৰ আধাৰশিলা স্থাপন কৰিব। দ্বিতীয় পৰ্যায়ৰ অধীনত প্ৰহ্লাদপুৰাৰ পৰা টোডি মোডলৈ ৪১ কিলোমিটাৰ উত্তৰ-দক্ষিণ মেট্ৰ’ কৰিডৰ বিকশিত কৰাৰ জৰিয়তে ৩৬ টা ষ্টেচনে সীতাপুৰা আৰু বিশ্বকৰ্মা ঔদ্যোগিক অঞ্চল (ভি কে আই)ৰ ঔদ্যোগিক আৰু আবাসিক অঞ্চলক সংযোগ কৰিব। এই কৰিডৰটোৱে সীতাপুৰা ঔদ্যোগিক অঞ্চল, ভি কে আই, জয়পুৰ বিমানবন্দৰ, টংক ৰোড, এছ এম এছ চিকিৎসালয়, এছ এম এছ ষ্টেডিয়াম, অম্বাবাৰী আৰু বিদ্যাধৰ নগৰকে ধৰি মূল স্থানসমূহলৈ নিৰৱচ্ছিন্ন সংযোগ প্ৰদান কৰিব। এই প্ৰকল্পটোৱে জয়পুৰৰ প্ৰধান ঔদ্যোগিক আৰু আবাসিক অঞ্চলসমূহৰ সৈতে সংযোগ যথেষ্ট উন্নত কৰাৰ লগতে বাসিন্দাসকলক দ্ৰুত, নিৰাপদ আৰু অধিক সুবিধাজনক ৰাজহুৱা পৰিবহণ প্ৰদান কৰিব। প্ৰথম পৰ্যায়ৰ অধীনত ১১ টা ষ্টেচনৰ সৈতে ১১.৬৪ কিলোমিটাৰ দৈৰ্ঘ্যৰ মেট্ৰ’ কৰিডৰ ইতিমধ্যে কাৰ্যক্ষম হৈ আছে।
প্ৰধানমন্ত্ৰীয়ে প্ৰায় ৯০০ কোটি টকা ব্যয়েৰে নিৰ্মাণ কৰা চুৰু-সাদুলপুৰ (৫৮ কিলোমিটাৰ) আৰু চুৰু-ৰতনগড় (৪৬ কিলোমিটাৰ) ৰে’লপথ দ্বৈতকৰণ কৰা প্ৰকল্পসমূহ দেশলৈ উৎসৰ্গা কৰিব। মুঠ ১০৪ কিলোমিটাৰ দৈৰ্ঘ্যৰ এই প্ৰকল্পসমূহে উত্তৰ-পশ্চিম ৰাজস্থানত ৰে’ল সংযোগ শক্তিশালী কৰিব। এইবোৰে ৰে’ল লাইনৰ ক্ষমতা বৃদ্ধি কৰাৰ লগতে যাত্ৰীবাহী আৰু মালবাহী ৰে’লৰ মসৃণ, নিৰাপদ আৰু অধিক সময়ানুক্ৰমিক সঞ্চালন সক্ষম কৰাৰ উপৰি ৰে’ল নেটৱৰ্কত যান-জঁট হ্ৰাস কৰিব। এই প্ৰকল্পসমূহে অঞ্চলটোত বিনিয়োগ, নিযুক্তি সৃষ্টি আৰু ঔদ্যোগিক উন্নয়নকো গতি প্ৰদান কৰিব।
প্ৰধানমন্ত্ৰীয়ে ৰাষ্ট্ৰীয় ঘাইপথ-১২৫এ, যোধপুৰ ৰিং ৰোড শাখা-২ (কাৰৱাৰ-ডাংগিয়াৱাস) চাৰিশৰীয়াকৰণৰ কামো উদ্বোধন কৰিব। প্ৰায় ৭৪০ কোটি টকা ব্যয়েৰে বিকশিত এই প্ৰকল্পটোৱে যোধপুৰৰ চাৰিওফালে আঞ্চলিক সংযোগ উন্নত কৰিব আৰু ভ্ৰমণ সহজ তথা নিৰাপদ কৰি তুলিব।
তদুপৰি প্ৰধানমন্ত্ৰীয়ে প্ৰায় ৫,৫০০ কোটি টকাৰ বিনিয়োগত বিকশিত এছজেভিএন লিমিটেডৰ ১,০০০ মেগাৱাট সামৰ্থ্যৰ বিকানেৰ সৌৰ শক্তি প্ৰকল্প ৰাষ্ট্ৰলৈ উৎসৰ্গা কৰিব। এই প্ৰকল্পটোত ২৪ লাখ ২২ হাজাৰ ঘৰুৱাভাৱে নিৰ্মিত সৌৰ মডিউল ব্যৱহাৰ কৰা হৈছে। প্ৰধানমন্ত্ৰীয়ে এন এইচ পি চিৰ ৩০০ মেগাৱাট ক্ষমতাৰ কৰ্নিছাৰ বিকানেৰ সৌৰ শক্তি প্ৰকল্পও উৎসৰ্গা কৰিব। এই প্ৰকল্পটোত প্ৰায় ৭.৭৫ লাখ ঘৰুৱাভাৱে নিৰ্মিত সৌৰ পিভি কোষ আৰু মডিউল ব্যৱহাৰ কৰা হৈছে।
প্ৰধানমন্ত্ৰীয়ে ৰাজস্থান নৱীকৰণযোগ্য শক্তি অঞ্চল (আৰইজেড)ৰ পৰা বিদ্যুৎ স্থানান্তৰৰ বাবে ১,৯০০ কোটি টকাতকৈও অধিক ব্যয়েৰে নিৰ্মিত ট্ৰেন্সমিছন লাইন উদ্বোধন কৰিব আৰু ৰাজস্থান আৰইজেডৰ বাবে ৫৩০ কিলোমিটাৰ দীঘল বিদ্যুৎ সঞ্চালন ব্যৱস্থাৰ আধাৰশিলা স্থাপন কৰিব। এই সঞ্চালন প্ৰণালীসমূহে ৰাজস্থানত উৎপাদিত নৱীকৰণযোগ্য শক্তি স্থানান্তৰ কৰাত সহায় কৰিব আৰু ৰাজ্যখনত নিৰৱচ্ছিন্ন বিদ্যুৎ যোগান নিশ্চিত কৰাত সহায় কৰিব।
প্ৰধানমন্ত্ৰীয়ে ৰাজস্থান চৰকাৰৰ বিভিন্ন বিভাগত নিযুক্তি পোৱা প্ৰায় ৫৪,০০০ যুৱক-যুৱতীৰ হাতত নিযুক্তিপত্ৰও অৰ্পণ কৰিব। নিযুক্তি পোৱাসকলৰ ভিতৰত আছে শিক্ষা, শক্তি, গৃহ, পঞ্চায়তীৰাজ, পৰিবহণ, উচ্চ শিক্ষা, দক্ষতা বিকাশ, পৰিকল্পনা, কৃষি, তথ্য প্ৰযুক্তি আৰু প্ৰশাসনিক সংস্কাৰ বিভাগৰ কৰ্মচাৰী।
সানন্দত প্ৰধানমন্ত্ৰী
প্ৰধানমন্ত্ৰীয়ে গুজৰাটৰ সানন্দত চিজি ছেমি আউটচ’ৰ্চ ছেমিকণ্ডাক্টৰ এছেম্বলি এণ্ড টেষ্ট (অ’এছএটি) প্ৰকল্প উদ্বোধন কৰিব। এই প্ৰকল্পটোত বাণিজ্যিক উৎপাদন আৰম্ভ হোৱাৰ লগে লগে এই উদ্বোধনৰ জৰিয়তে ভাৰতৰ ছেমিকণ্ডাক্টৰ নিৰ্মাণ যাত্ৰাত এক গুৰুত্বপূৰ্ণ মাইলৰ খুঁটি প্ৰতিফলিত হৈছে। ই আন্তৰ্জাতিক ছেমিকণ্ডাক্টৰ মূল্য শৃংখলাত ভাৰতৰ স্থিতি শক্তিশালী কৰাৰ দিশত এক গুৰুত্বপূৰ্ণ পদক্ষেপৰ প্ৰতিনিধিত্ব কৰে। এই প্ৰকল্পটো হৈছে ভাৰত ছেমিকণ্ডাক্টৰ মিছন (আইএছএম)ৰ অধীনত অনুমোদিত প্ৰথম চাৰিটা প্ৰকল্পৰ ভিতৰত অন্যতম আৰু ইয়াক মুঠ ৭,৫০০ কোটি টকাতকৈও অধিক বিনিয়োগৰ সৈতে বিকশিত কৰা হৈছে।
সম্পূৰ্ণৰূপে কাৰ্যক্ষম হোৱাৰ পাছত এই প্ৰকল্পত ৫ বিলিয়ন ছেমিকণ্ডাক্টৰ চিপৰ বাৰ্ষিক উৎপাদন ক্ষমতা থাকিব আৰু কৃত্ৰিম বুদ্ধিমত্তা (এআই) আৰু উচ্চ-কাৰ্য্যকৰী কম্পিউটাৰৰ দ্ৰুত অগ্ৰগতিৰ দ্বাৰা চালিত স্মৃতি তথা সংৰক্ষণ সমাধানৰ বাবে বৰ্ধিত আন্তৰ্জাতিক চাহিদা পূৰণ কৰাত সহায় কৰিব। এই প্ৰকল্পই অটোমোটিভ, ঔদ্যোগিক, দূৰসংযোগ, ৫জি আৰু ইণ্টাৰনেট অব থিংছ (আইঅ’টি) খণ্ডৰ গ্ৰাহকসকলৰ চাহিদা পূৰণ কৰিব। চিজি ছেমি সুবিধাই সৰ্বাত্মক ছেমিকণ্ডাক্টৰ এছেম্বলি আৰু পৰীক্ষা সেৱা প্ৰদান কৰে, যাৰ ভিতৰত আছে ৱেফাৰ ছাৰ্টিং, এছেম্বলি, পৰীক্ষা, পেকেজ ডিজাইন, বিফলতা বিশ্লেষণ, পৰীক্ষা কাৰ্যসূচীৰ বিকাশ, সামগ্ৰীৰ বৈশিষ্ট্য আৰু লজিষ্টিক সমৰ্থন।
এই প্ৰকল্পটোৰ কাৰ্য্যকৰীকৰণে ভাৰতৰ এক বিশ্বস্ত আৰু আত্মনিৰ্ভৰশীল ছেমিকণ্ডাক্টৰ নিৰ্মাণ গন্তব্যস্থান হিচাপে উত্থান প্ৰতিফলিত কৰাৰ লগতে দেশত এক স্থিতিস্থাপক তথা আত্মনিৰ্ভৰশীল প্ৰযুক্তি পৰিবেশতন্ত্ৰ গঢ়ি তোলাৰ প্ৰধানমন্ত্ৰীৰ দৃষ্টিভংগী উজলাই তুলিছে।
