প্ৰধানমন্ত্ৰী শ্ৰী নৰেন্দ্ৰ মোদীয়ে ২০জুনত ওড়িশা ভ্ৰমণ কৰিব। ভাৰতৰ ৰাষ্ট্ৰপতি শ্ৰীমতী দ্ৰৌপদী মুৰ্মুৱে এই ভ্ৰমণৰ সময়ত প্ৰধানমন্ত্ৰীক সংগ দিব, সেয়েহে ই ৰাজ্যখনৰ বাবে এক বিৰল আৰু গুৰুত্বপূৰ্ণ উপলক্ষ হৈ পৰিব।
সেইদিনা দিনৰ ১১.১৫ বজাত ৰাষ্ট্ৰপতি আৰু প্ৰধানমন্ত্ৰীয়ে ময়ূৰভঞ্জ জিলাৰ পাহাড়পুৰ গাঁও ভ্ৰমণ কৰিব। ৰাষ্ট্ৰপতি আৰু প্ৰধানমন্ত্ৰীয়ে চাওতালী জাহেৰা আৰু হো জাহেৰা পবিত্ৰ উপবন, দক্ষতা কেন্দ্ৰ আৰু পাহাড়পুৰ বিদ্যালয়ত প্ৰাৰ্থনা কৰিব। এই ভ্ৰমণে জনজাতীয় আৰু গ্ৰাম্য অঞ্চলত শৈক্ষিক সুযোগ, দক্ষতা বিকাশ আৰু আৰ্থ-সামাজিক সবলীকৰণ শক্তিশালী কৰাৰ বাবে চলি থকা প্ৰচেষ্টাৰ ওপৰত আলোকপাত কৰিব।
দিনৰ প্ৰায় ১ বজাত ৰাষ্ট্ৰপতি আৰু প্ৰধানমন্ত্ৰীয়ে ওড়িশা চৰকাৰৰ দুবছৰ সম্পূৰ্ণ হোৱা উপলক্ষে ময়ূৰভঞ্জ জিলাৰ ৰায়ৰংগপুৰত আয়োজন কৰা এক কাৰ্যসূচীত অংশগ্ৰহণ কৰিব। কাৰ্যসূচীৰ বিষয় হৈছে "বিকাশ ৰা ধাৰা, ওড়িশা সাৰা"। কাৰ্যসূচীৰ সময়ত ৪৭,৬০০ কোটি টকাৰো অধিক ব্যয়ৰ বিভিন্ন উন্নয়নমূলক প্ৰকল্পৰ উদ্বোধন আৰু আধাৰশিলা স্থাপন কৰা হ'ব। এই উপলক্ষে প্ৰধানমন্ত্ৰীয়ে এক সমাৱেশকো সম্বোধন কৰিব।
কাৰ্যসূচীৰ সময়ত শক্তি, ঔদ্যোগিক আন্তঃগাঁথনি, পথ সংযোগ, খোৱা পানী, স্বাস্থ্য, শিক্ষা, পৰ্যটন আৰু জলসিঞ্চনকে ধৰি মূল খণ্ডসমূহৰ প্ৰকল্পসমূহৰ উদ্বোধন আৰু আধাৰশিলা স্থাপন কৰা হ’ব। এই প্ৰকল্পসমূহে সমগ্ৰ ওড়িশাত আন্তঃগাঁথনি শক্তিশালী কৰিব, সংযোগ উন্নত কৰিব, শক্তি সুৰক্ষা বৃদ্ধি কৰিব আৰু নিয়োগৰ সুযোগ সৃষ্টি কৰিব বুলি আশা কৰা হৈছে। প্ৰধানমন্ত্ৰীৰ সামগ্ৰিক আৰু সকলোকে সামৰি উন্নয়নৰ দৃষ্টিভংগী প্ৰতিফলিত কৰি এই পদক্ষেপসমূহে জনজাতীয় আৰু গ্ৰাম্য অঞ্চলৰ বিকাশক আৰু ত্বৰান্বিত কৰিব তথা ৰাজ্যখনৰ প্ৰতিটো কোণলৈ উন্নয়নৰ লাভালাভ সম্প্ৰসাৰিত কৰিব।
কাৰ্যসূচীৰ সময়ত আধাৰশিলা স্থাপন কৰিবলগীয়া গুৰুত্বপূৰ্ণ প্ৰকল্পসমূহৰ ভিতৰত আছে ৬০০ মেগাৱাট ক্ষমতাসম্পন্ন আপাৰ ইন্দ্ৰাৱতী পাম্পড ষ্ট’ৰেজ প্ৰকল্প আৰু প্ৰতিটো গোটৰ ৬৬০ মেগাৱাট কৈ ক্ষমতাৰ আইবি থাৰ্মেল পাৱাৰ ষ্টেচনৰ দ্বিতীয় পৰ্যায়ৰ সম্প্ৰসাৰণ প্ৰকল্প। এই প্ৰকল্পসমূহে শক্তি সুৰক্ষা বৃদ্ধি কৰাৰ লগতে ওড়িশাৰ অৰ্থনৈতিক সমৃদ্ধিক সহায় কৰিব। ঝাৰছুগুড়া জিলাৰ লখনপুৰত ভাৰত ক’ল গেছিফিকেচন এণ্ড কেমিকেলছ লিমিটেড (বি চি জি চি এল) প্ৰকল্পৰ আধাৰশিলাও স্থাপন কৰা হ’ব। ই ঘৰুৱা কয়লা সম্পদৰ পৰিষ্কাৰ ব্যৱহাৰক উৎসাহিত কৰিব, আমদানিৰ ওপৰত নিৰ্ভৰশীলতা হ্ৰাস কৰিব আৰু অঞ্চলটোত নতুন ঔদ্যোগিক আৰু নিয়োগৰ সুযোগ সৃষ্টি কৰিব।
আধাৰশিলা স্থাপন কৰিবলগীয়া আন প্ৰকল্পসমূহৰ ভিতৰত আছে ভুৱনেশ্বৰত ৩০০ টিপিডি উৎস-পৃথক পৌৰ নিগমৰ কঠিন আৱৰ্জনা-আধাৰিত সংকুচিত জৈৱ গেছ প্ৰকল্প, কটক আৰু ভুৱনেশ্বৰৰ মাজত পোনপটীয়া সংযোগ প্ৰদান কৰা কাঠজোড়ী নদীৰ ওপৰত এখন দলং, বৌধ জিলাৰ ধলপুৰ-হাড়ভাঙা পথ বহল আৰু শক্তিশালীকৰণ, নুৱাপাড়াৰ পৰা ঘাটিপাড়ালৈ ৰাষ্ট্ৰীয় ঘাইপথ ৩৫৩ৰ এটা অংশ চাৰিলেনযুক্ত কৰা, কুসুমদিহি মেগালিফ্ট জলসিঞ্চন প্ৰকল্প, ইগনৌ আঞ্চলিক কেন্দ্ৰ আৰু ৰায়ৰংগপুৰত ইন্দোৰ বেডমিণ্টন কমপ্লেক্স।
বৌধত ৩০০ বিচনাযুক্ত জিলা সদৰ চিকিৎসালয় ভৱনৰ লগতে ওড়িশাৰ বিভিন্ন জিলাত ২৪টা অটল বাছ ষ্টেণ্ড আৰু নটা স্বয়ংক্ৰিয় পৰীক্ষা কেন্দ্ৰ মুকলি কৰা হ’ব। এই প্ৰকল্পসমূহে ৰাজ্যখনত স্বাস্থ্যসেৱা আৰু ৰাজহুৱা পৰিবহণ আন্তঃগাঁথনি শক্তিশালী কৰিব বুলি আশা কৰা হৈছে। উদ্বোধন কৰিবলগীয়া আন গুৰুত্বপূৰ্ণ প্ৰকল্পসমূহৰ ভিতৰত আছে ৫৭ নং ৰাষ্ট্ৰীয় ঘাইপথৰ নয়াগড় টাউন বাইপাছ, কুসুমি স্মাৰ্ট জলসিঞ্চন প্ৰকল্পৰ ভূগৰ্ভস্থ পাইপলাইন অংশ, জাখাপুৰা-জাজপুৰ কেওনঝাৰ ৰোড-বৈতৰণী ৰোড মাল্টি-ট্ৰেকিং প্ৰকল্প, হিন্দোল ৰোড-মেৰামাণ্ডালী মাল্টি-ট্ৰেকিং প্ৰকল্প, ক্ৰীড়া চৌহদ আৰু ৰায়ৰংগপুৰত জনজাতীয় গৱেষণা কেন্দ্ৰ ইত্যাদি।
