প্ৰধানমন্ত্ৰী শ্ৰী নৰেন্দ্ৰ মোদীয়ে ২০ ছেপ্টেম্বৰত মহাৰাষ্ট্ৰৰ ৱাৰ্ধা ভ্ৰমণ কৰিব। পুৱা প্ৰায় ১১:৩০ বজাত তেওঁ পিএম বিশ্বকৰ্মা আঁচনিৰ প্ৰথম বৰ্ষপূৰ্তি উপলক্ষে ৰাষ্ট্ৰীয় ‘পিএম বিশ্বকৰ্মা’ কাৰ্যসূচীত অংশগ্ৰহণ কৰিব।
কাৰ্যসূচীৰ সময়ত প্ৰধানমন্ত্ৰীয়ে পিএম বিশ্বকৰ্মা হিতাধিকাৰীসকলক প্ৰমাণপত্ৰ আৰু ঋণপত্ৰ প্ৰদান কৰিব। এই আঁচনিৰ অধীনত শিল্পী-কাৰিকৰসকলৰ বাবে সম্প্ৰসাৰিত হোৱা স্পষ্ট সমৰ্থনৰ প্ৰতীক হিচাপে তেওঁ পিএম বিশ্বকৰ্মাৰ অধীনত ১৮টা শিতানৰ অধীনত ১৮জন হিতাধিকাৰীক ঋণপত্ৰ বিতৰণ কৰিব। সমাজলৈ তেওঁলোকৰ উত্তৰাধিকাৰ আৰু ইমানদিনে আগবঢ়োৱা অৱদানৰ প্ৰতি শ্ৰদ্ধা জনাই তেওঁ পিএম বিশ্বকৰ্মাৰ অধীনত এবছৰৰ অগ্ৰগতিৰ নামত উচৰ্গিত স্মাৰক ডাকটিকচ মুকলি কৰিব।
প্ৰধানমন্ত্ৰীয়ে মহাৰাষ্ট্ৰৰ অম্ৰাৱতীত পিএম মেগা ইণ্টিগ্ৰেটেড টেক্সটাইল ৰিজিঅ’ন এণ্ড এপাৰেল (পিএম মিত্ৰ) পাৰ্কৰ আধাৰশিলা স্থাপন কৰিব৷ ১০০০ একৰ উদ্যানখন মহাৰাষ্ট্ৰ ঔদ্যোগিক উন্নয়ন নিগমে (এমআইডিচি) ৰাজ্যিক ৰূপায়ণ সংস্থা হিচাপে নিৰ্মাণ কৰি আছে। ভাৰত চৰকাৰে বস্ত্ৰ উদ্যোগৰ বাবে ৭খন পিএম মিত্ৰ পাৰ্ক স্থাপনত অনুমোদন জনাইছে৷ ভাৰতক বস্ত্ৰ নিৰ্মাণ আৰু ৰপ্তানিৰ বাবে এক বিশ্ব কেন্দ্ৰ হিচাপে গঢ়ি তোলাৰ দৃষ্টিভংগী উপলব্ধি কৰাৰ ক্ষেত্ৰত পিএম মিত্ৰ পাৰ্কসমূহ এক ডাঙৰ পদক্ষেপ। ই বিশ্বমানৰ ঔদ্যোগিক আন্তঃগাঁথনি সৃষ্টি কৰাত সহায় কৰিব যিয়ে প্ৰত্যক্ষ বিদেশী বিনিয়োগ (এফডিআই)কে ধৰি বৃহৎ পৰিসৰৰ বিনিয়োগ আকৰ্ষণ কৰিব আৰু এই খণ্ডৰ ভিতৰত উদ্ভাৱন আৰু চাকৰি সৃষ্টিৰ বাবে উৎসাহিত কৰিব।
প্ৰধানমন্ত্ৰীয়ে মহাৰাষ্ট্ৰ চৰকাৰৰ "আচাৰ্য চানক্য দক্ষতা বিকাশ কেন্দ্ৰ" আঁচনি আৰম্ভ কৰিব। ৰাজ্যজুৰি প্ৰখ্যাত মহাবিদ্যালয়সমূহত দক্ষতা বিকাশৰ প্ৰশিক্ষণ কেন্দ্ৰ স্থাপন কৰা হ’ব যাতে ১৫ৰ পৰা ৪৫ বছৰ বয়সৰ যুৱক-যুৱতীসকলক প্ৰশিক্ষণ প্ৰদান কৰিব পৰা যায়, যাৰ ফলত তেওঁলোকে আত্মনিৰ্ভৰশীল হ’ব পাৰে আৰু বিভিন্ন নিয়োগৰ সুযোগ লাভ কৰিব পাৰে। সমগ্ৰ ৰাজ্যৰ প্ৰায় ১,৫০,০০০ যুৱক-যুৱতীয়ে প্ৰতি বছৰে বিনামূলীয়া দক্ষতা বিকাশৰ প্ৰশিক্ষণ লাভ কৰিব।
প্ৰধানমন্ত্ৰীয়ে লগতে “পুন্যাশ্লোক অহৈল্যা দেী হোলকাৰ মহিলা ষ্টাৰ্টআপ আঁচনি”ৰ শুভাৰম্ভ কৰিব। এই আঁচনিৰ অধীনত মহাৰাষ্ট্ৰৰ মহিলা নেতৃত্বাধীন ষ্টাৰ্টআপসমূহক প্ৰাৰম্ভিক পৰ্যায়ৰ সমৰ্থন দিয়া হ’ব। ইয়াৰ অধীনত ২৫ লাখ টকা পৰ্যন্ত আৰ্থিক সাহায্য প্ৰদান কৰা হ’ব। এই আঁচনিৰ অধীনত মুঠ বিধানৰ ২৫% চৰকাৰে উল্লেখ কৰা অনুসৰি পিছপৰা শ্ৰেণীৰ মহিলা আৰু অৰ্থনৈতিকভাৱে দুৰ্বল ধাৰাসমূহৰ বাবে সংৰক্ষিত কৰা হ’ব। ই মহিলা নেতৃত্বাধীন ষ্টাৰ্টআপসমূহ আত্মনিৰ্ভৰশীল আৰু স্বাধীন হোৱাত সহায় কৰিব।
