আমেৰিকা যুক্তৰাষ্ট্ৰৰ ৰাষ্ট্ৰপতি ড’নাল্ড জে ট্ৰাম্পে ভাৰতৰ প্ৰধানমন্ত্ৰী শ্ৰী নৰেন্দ্ৰ মোদীক ২০২৫ চনৰ ১৩ ফেব্ৰুৱাৰীত ৱাশ্বিংটন ডিচিত এক আনুষ্ঠানিক ভ্ৰমণৰ বাবে আদৰণি জনায়।
স্বাধীনতা, আইনৰ শাসন, মানৱ অধিকাৰ আৰু বহুত্ববাদক মূল্য দিয়া সাৰ্বভৌম আৰু জীৱন্ত গণতন্ত্ৰৰ নেতা হিচাপে ৰাষ্ট্ৰপতি ট্ৰাম্প আৰু প্ৰধানমন্ত্ৰী মোদীয়ে পাৰস্পৰিক বিশ্বাস, অংশীদাৰী স্বাৰ্থ, সদিচ্ছা আৰু তেওঁলোকৰ নাগৰিকসকলৰ শক্তিশালী সম্পৰ্কত আধাৰিত ভাৰত-আমেৰিকা যুক্তৰাষ্ট্ৰৰ ব্যাপক গোলকীয় কৌশলগত অংশীদাৰিত্বৰ শক্তি পুনৰ নিশ্চিত কৰে।
আজি ৰাষ্ট্ৰপতি ট্ৰাম্প আৰু প্ৰধানমন্ত্ৰী মোদীয়ে সহযোগিতাৰ মূল স্তম্ভসমূহত পৰিবৰ্তনমূলক পৰিবৰ্তনৰ বাবে একবিংশ শতিকাৰ বাবে ‘আমেৰিকা-ভাৰত কম্পেক্ট (সামৰিক অংশীদাৰিত্ব, ত্বৰান্বিত বাণিজ্য আৰু প্ৰযুক্তিৰ বাবে অনুঘটকৰ সুযোগ)’ শীৰ্ষক নতুন পদক্ষেপ আৰম্ভ কৰিছে। এই পদক্ষেপৰ অধীনত তেওঁলোকে পাৰস্পৰিকভাৱে লাভজনক অংশীদাৰিত্বৰ বাবে বিশ্বাসৰ স্তৰ প্ৰদৰ্শন কৰিবলৈ এই বছৰৰ প্ৰাৰম্ভিক ফলাফলৰ সৈতে এক ফলাফল-চালিত কার্যসূচীৰ বাবে প্ৰতিশ্ৰুতিবদ্ধ।
প্ৰতিৰক্ষা
আমেৰিকা-ভাৰতৰ কৌশলগত স্বাৰ্থৰ গভীৰ সংমিশ্ৰণৰ ওপৰত আলোকপাত কৰি নেতাদ্বয়ে একাধিক ক্ষেত্ৰত বিস্তৃত এক গতিশীল প্ৰতিৰক্ষা অংশীদাৰিত্বৰ প্ৰতি তেওঁলোকৰ অটল প্ৰতিশ্ৰুতি পুনৰ নিশ্চিত কৰিছে। প্ৰতিৰক্ষা সম্পৰ্ক অধিক আগুৱাই নিয়াৰ বাবে নেতাদ্বয়ে এই বছৰ একবিংশ শতিকাত আমেৰিকা-ভাৰত মুখ্য প্ৰতিৰক্ষা অংশীদাৰিত্বৰ বাবে এক নতুন দহ বছৰীয়া পৰিকাঠামোত স্বাক্ষৰ কৰাৰ পৰিকল্পনা ঘোষণা কৰে।
নেতাদ্বয়ে এতিয়ালৈকে ভাৰতৰ তালিকাভুক্ত আমেৰিকা যুক্তৰাষ্ট্ৰ মূলৰ প্ৰতিৰক্ষা সামগ্ৰীসমূহৰ গুৰুত্বপূৰ্ণ একত্ৰীকৰণক আদৰণি জনায়, যাৰ ভিতৰত আছে চি ১৩০ জে ছুপাৰ হাৰকিউলিছ, চি ১৭ গ্লোবমাষ্টাৰ তৃতীয়, পি-৮ আই প'চাইডন বিমান; চি এইচ ৪৭ এফ চিনুকছ, এম এইচ ৬০ আৰ ছিহকছ আৰু এ এইচ ৬৪ ই এপাচিছ; হাৰপুন এণ্টি-শ্বিপ মিছাইল; এম ৭৭৭ হোৱিটজাৰ আৰু এম কিউ ৯ বি। নেতাসকলে সিদ্ধান্ত লৈছিল যে আন্তঃব্যৱহাৰযোগ্যতা আৰু প্ৰতিৰক্ষা ঔদ্যোগিক সহযোগিতা শক্তিশালী কৰিবলৈ আমেৰিকা যুক্তৰাষ্ট্ৰই ভাৰতৰ সৈতে প্ৰতিৰক্ষা বিক্ৰী আৰু সহ-উৎপাদন সম্প্ৰসাৰণ কৰিব বুলি নেতাদ্বয়ে সিদ্ধান্ত গ্ৰহণ কৰে। তেওঁলোকে ভাৰতৰ প্ৰতিৰক্ষাৰ প্ৰয়োজনীয়তা দ্ৰুতগতিত পূৰণ কৰিবলৈ ভাৰতত ‘জেভেলিন’ এণ্টি-টেংক গাইডেড মিছাইল আৰু ‘ষ্ট্ৰাইকাৰ’ পদাতিক যুদ্ধ বাহনৰ বাবে এই বছৰ নতুন ক্ৰয় আৰু সহ-উৎপাদন ব্যৱস্থা অনুসৰণ কৰাৰ পৰিকল্পনাৰ বিষয়েও ঘোষণা কৰে। তেওঁলোকে বিক্ৰীৰ চৰ্তসমূহৰ চুক্তি অনুসৰি ভাৰত মহাসাগৰ অঞ্চলত ভাৰতৰ সামুদ্ৰিক নিৰীক্ষণৰ পৰিসৰ বৃদ্ধি কৰিবলৈ ৬ টা অতিৰিক্ত পি-৮ আই সামুদ্ৰিক টহল বিমানৰ ক্ৰয় সম্পূৰ্ণ হোৱাৰ আশা কৰিছে।
কৌশলগত বাণিজ্যিক অনুমোদন-১ (এছ টি এ ১) ৰ সৈতে ভাৰত এক মুখ্য প্ৰতিৰক্ষা অংশীদাৰ আৰু এক গুৰুত্বপূৰ্ণ কোৱাড অংশীদাৰ বুলি স্বীকাৰ কৰি, আমেৰিকা যুক্তৰাষ্ট্ৰ আৰু ভাৰতে প্ৰতিৰক্ষা বাণিজ্য, প্ৰযুক্তিৰ বিনিময় আৰু ৰক্ষণাবেক্ষণ তথা অতিৰিক্ত যোগান আৰু আমেৰিকা যুক্তৰাষ্ট্ৰই প্ৰদান কৰা প্ৰতিৰক্ষা ব্যৱস্থাৰ আভ্যন্তৰীণ মেৰামতি আৰু পৰিবৰ্তনৰ বাবে আন্তঃৰাষ্ট্ৰীয় অস্ত্ৰ সৰবৰাহ নিয়মাৱলী (আইটিএআৰ) সহ নিজ নিজ অস্ত্ৰ স্থানান্তৰৰ নিয়মাৱলীৰ পৰ্যালোচনা কৰিব। তেওঁলোকে এই বছৰ পাৰস্পৰিক প্ৰতিৰক্ষা ক্ৰয় (আৰডিপি) চুক্তিৰ বাবে আলোচনা আৰম্ভ কৰাৰ বাবেও আগ্ৰহ প্ৰকাশ কৰে, যাতে ক্ৰয় প্ৰণালী উন্নতভাৱে সংৰেখিত হয় আৰু প্ৰতিৰক্ষা সামগ্ৰী তথা সেৱাৰ পাৰস্পৰিক যোগান সক্ষম হৈ উঠে। নেতাদ্বয়ে মহাকাশ, বায়ু প্ৰতিৰক্ষা, মিছাইল, সামুদ্ৰিক আৰু সাগৰৰ তলৰ প্ৰযুক্তিত প্ৰতিৰক্ষা সহযোগিতা ত্বৰান্বিত কৰাৰ প্ৰতিশ্ৰুতি প্ৰদান কৰাৰ লগতে আমেৰিকা যুক্তৰাষ্ট্ৰই ভাৰতলৈ পঞ্চম প্ৰজন্মৰ যুঁজাৰু আৰু সাগৰৰ তলৰ প্ৰণালী মুকলি কৰাৰ নীতিৰ পৰ্যালোচনাৰ বিষয়ে ঘোষণা কৰে।
প্ৰতিৰক্ষা ঔদ্যোগিক সহযোগিতাৰ বাবে আমেৰিকা-ভাৰত ৰোডমেপৰ ওপৰত ভিত্তি কৰি আৰু স্বায়ত্তশাসিত ব্যৱস্থাৰ বৰ্ধিত গুৰুত্বক স্বীকাৰ কৰি নেতাদ্বয়ে ভাৰত-প্ৰশান্ত মহাসাগৰীয় উদ্যোগৰ অংশীদাৰিত্ব আৰু উৎপাদন বৃদ্ধিৰ বাবে স্বায়ত্তশাসিত ব্যৱস্থা উদ্যোগ মিত্ৰতা (এএছআইএ) নামৰ এক নতুন পদক্ষেপ ঘোষণা কৰে। নেতাদ্বয়ে এণ্ডুৰিল ইণ্ডাষ্ট্ৰীজ আৰু মহিন্দ্ৰা গ্ৰুপৰ মাজৰ আঞ্চলিক সুৰক্ষাক শক্তিশালী কৰিবলৈ অত্যাধুনিক সামুদ্ৰিক প্ৰণালী আৰু উন্নত কৃত্ৰিম বুদ্ধিমত্তা সক্ষম কাউণ্টাৰ মানৱবিহীন আকাশী প্ৰণালী (ইউএএছ)ৰ সহ-বিকাশ আৰু সহ-উৎপাদনৰ বাবে উন্নত স্বায়ত্তশাসিত প্ৰযুক্তিৰ ওপৰত এক নতুন অংশীদাৰিত্বক আদৰণি জনোৱাৰ লগতে সক্ৰিয় টোড এৰে’ প্ৰণালীৰ সহ-বিকাশৰ বাবে এল৩ হেৰিছ আৰু ভাৰত ইলেক্ট্ৰনিকছৰ মাজত এক নতুন অংশীদাৰিত্বক আদৰণি জনায়।
নেতাদ্বয়ে শেহতীয়া প্ৰযুক্তি অন্তৰ্ভুক্ত কৰি উন্নত প্ৰশিক্ষণ, অনুশীলন আৰু অপাৰেচনৰ জৰিয়তে বায়ু, সাগৰ, মহাকাশ আৰু চাইবাৰ স্পেচ-সকলো ক্ষেত্ৰতে সামৰিক সহযোগিতা বৃদ্ধি কৰাৰ প্ৰতিশ্ৰুতিও দিয়ে। তেওঁলোকে ভাৰতত অনুষ্ঠিত হ’বলগীয়া বৃহৎ পৰিসৰ আৰু জটিলতাৰ সৈতে আগন্তুক ‘টাইগাৰ ট্ৰায়াম্ফ’ ত্ৰি-সেৱা অনুশীলনক (২০১৯ চনত প্ৰথমবাৰৰ বাবে উদ্বোধন কৰা) আদৰণি জনায়।
অৱশেষত নেতাসকলে ভাৰত-প্ৰশান্ত মহাসাগৰীয় অঞ্চলত আমেৰিকা যুক্তৰাষ্ট্ৰ আৰু ভাৰতীয় সামৰিক বাহিনীৰ বিদেশত মোতায়েনক সমৰ্থন আৰু বহনক্ষম কৰি ৰাখিবলৈ নতুন ভিত্তি স্থাপন কৰিবলৈ প্ৰতিশ্ৰুতিবদ্ধ হয়, যাৰ ভিতৰত আছে উন্নত সামগ্ৰী আৰু চোৰাংচোৱাৰ আদান-প্ৰদানৰ লগতে অন্যান্য বিনিময় আৰু নিৰাপত্তা সহযোগিতাৰ সৈতে যুটীয়া মানৱীয় আৰু দুৰ্যোগ সাহায্য অভিযানৰ বাবে বাহিনীৰ গতিশীলতা উন্নত কৰাৰ ব্যৱস্থা।
বাণিজ্য আৰু বিনিয়োগ
নেতাদ্বয়ে তেওঁলোকৰ নাগৰিকসকলক অধিক সমৃদ্ধিশালী, ৰাষ্ট্ৰসমূহক শক্তিশালী, অৰ্থনীতি অধিক উদ্ভাৱনীমূলক আৰু যোগান শৃংখল অধিক স্থিতিস্থাপক কৰি তুলিবলৈ বাণিজ্য আৰু বিনিয়োগ সম্প্ৰসাৰণৰ সংকল্প লয়। তেওঁলোকে নিৰপেক্ষতা, ৰাষ্ট্ৰীয় নিৰাপত্তা আৰু চাকৰি সৃষ্টি নিশ্চিত কৰা বিকাশৰ প্ৰসাৰৰ বাবে আমেৰিকা-ভাৰতৰ বাণিজ্যিক সম্পৰ্ক গভীৰ কৰাৰ সংকল্প লয়। এই উদ্দেশ্যে, ২০৩০ চনৰ ভিতৰত মুঠ দ্বিপাক্ষিক বাণিজ্য দুগুণতকৈও অধিক অৰ্থাৎ ৫০০ বিলিয়ন ডলাৰলৈ বৃদ্ধি কৰাৰ লক্ষ্যৰে তেওঁলোকে দ্বিপাক্ষিক বাণিজ্যৰ বাবে এক নতুন লক্ষ্য ‘মিছন ৫০০’ নিৰ্ধাৰণ কৰে।
এই স্তৰৰ বাবে নতুন, ন্যায্য-বাণিজ্য চৰ্তৰ প্ৰয়োজন হ’ব বুলি স্বীকাৰ কৰি নেতাদ্বয়ে ২০২৫ চনৰ শেষৰফালে পাৰস্পৰিকভাৱে লাভজনক, বহুক্ষেত্ৰীয় দ্বিপাক্ষিক বাণিজ্য চুক্তি (বি টি এ)ৰ প্ৰথম অংশৰ আলোচনা কৰাৰ পৰিকল্পনাৰ বিষয়ে ঘোষণা কৰে। তেওঁলোকে এই আলোচনা আগুৱাই নিয়াৰ বাবে জ্যেষ্ঠ প্ৰতিনিধিসকলক মনোনীত কৰিবলৈ আৰু বাণিজ্যিক সম্পৰ্কই যাতে কম্পেক্টৰ আকাংক্ষাক সম্পূৰ্ণৰূপে প্ৰতিফলিত কৰে সেয়া নিশ্চিত কৰিবলৈ প্ৰতিশ্ৰুতিবদ্ধ হয়। এই উদ্ভাৱনীমূলক বিস্তৃত দ্বিপাক্ষিক বাণিজ্য চুক্তিক আগুৱাই নিয়াৰ বাবে আমেৰিকা যুক্তৰাষ্ট্ৰ আৰু ভাৰতে সামগ্ৰী আৰু সেৱা খণ্ডত দ্বিপাক্ষিক বাণিজ্য শক্তিশালী আৰু গভীৰ কৰাৰ বাবে এক সংহত দৃষ্টিভংগী গ্ৰহণ কৰিব আৰু বজাৰ প্ৰৱেশাধিকাৰ বৃদ্ধি, শুল্ক আৰু অনা-শুল্ক বাধা হ্ৰাস কৰা, তথা যোগান শৃংখলৰ একত্ৰীকৰণ গভীৰ কৰাৰ দিশত কাম কৰিব।
নেতাদ্বয়ে দ্বিপাক্ষিক বাণিজ্যিক বাধা দূৰ কৰাৰ বাবে পাৰস্পৰিক দায়বদ্ধতা প্ৰদৰ্শনৰ প্ৰাৰম্ভিক পদক্ষেপসমূহক আদৰণি জনায়। আমেৰিকা যুক্তৰাষ্ট্ৰই বাৰ্বন, মটৰচাইকেল, আইচিটি সামগ্ৰী আৰু ধাতুৰ ক্ষেত্ৰত আমেৰিকা যুক্তৰাষ্ট্ৰৰ আগ্ৰহৰ সামগ্ৰীৰ ওপৰত শুল্ক হ্ৰাস কৰাৰ লগতে আলফালফা হে’ আৰু হাঁসৰ মাংসৰ দৰে আমেৰিকা যুক্তৰাষ্ট্ৰৰ কৃষিজাত সামগ্ৰী আৰু চিকিৎসা সঁজুলিৰ বাবে বজাৰ প্ৰৱেশাধিকাৰ বৃদ্ধি কৰাৰ বাবে ভাৰতৰ শেহতীয়া পদক্ষেপসমূহক আদৰণি জনায়। আমেৰিকা যুক্তৰাষ্ট্ৰলৈ ভাৰতীয় আম আৰু ডালিমৰ ৰপ্তানি বৃদ্ধিৰ বাবে আমেৰিকা যুক্তৰাষ্ট্ৰই গ্ৰহণ কৰা পদক্ষেপৰ বাবেও ভাৰতে প্ৰশংসা কৰে। দুয়োপক্ষই ভাৰতলৈ আমেৰিকা যুক্তৰাষ্ট্ৰৰ ঔদ্যোগিক সামগ্ৰীৰ ৰপ্তানি বৃদ্ধি কৰি আৰু আমেৰিকা যুক্তৰাষ্ট্ৰলৈ শ্ৰম-নিবিড় উৎপাদিত সামগ্ৰীৰ ভাৰতীয় ৰপ্তানি বৃদ্ধি কৰি দ্বিপাক্ষিক বাণিজ্য বৃদ্ধিৰ বাবে সহযোগিতা কৰাৰ প্ৰতিশ্ৰুতিও প্ৰদান কৰে। দুয়োপক্ষই কৃষিজাত সামগ্ৰীৰ বাণিজ্য বৃদ্ধিৰ বাবেও একেলগে কাম কৰিব।
অৱশেষত নেতাদ্বয়ে আমেৰিকা আৰু ভাৰতীয় কোম্পানীসমূহক পৰস্পৰৰ দেশত উচ্চ মূল্যৰ উদ্যোগত গ্ৰীনফিল্ড বিনিয়োগ কৰাৰ সুযোগ প্ৰদান কৰিবলৈ প্ৰতিশ্ৰুতিবদ্ধ হয়। এই সন্দৰ্ভত নেতাদ্বয়ে ভাৰতীয় কোম্পানীসমূহৰ দ্বাৰা চলি থকা প্ৰায় ৭.৩৫ বিলিয়ন ডলাৰৰ বিনিয়োগক আদৰণি জনায়। উদাহৰণস্বৰূপে আলাবামা আৰু কেনটুকীত থকা তেওঁলোকৰ অত্যাধুনিক সুবিধাসমূহত এলুমিনিয়াম সামগ্ৰীৰ ক্ষেত্ৰত হিণ্ডালকোৰ নভেলিছৰ বিনিয়োগ; টেক্সাছ আৰু ওহিঅ’ত ইস্পাত নিৰ্মাণ কাৰ্যকলাপৰ ক্ষেত্ৰত জেএছডব্লিউ; নৰ্থ কেৰোলিনাত গুৰুত্বপূৰ্ণ বেটাৰি সামগ্ৰী নিৰ্মাণৰ ক্ষেত্ৰত এছপিলন এডভান্সড মেটেৰিয়েলছ; আৰু ৱাশ্বিংটনত বেজী নিৰ্মাণৰ ক্ষেত্ৰত জুবিলিয়েণ্ট ফাৰ্মা। এই বিনিয়োগসমূহে স্থানীয় লোকসকলৰ বাবে ৩ হাজাৰৰো অধিক উচ্চ মানৰ চাকৰিক সমৰ্থন কৰে।
শক্তি সুৰক্ষা
দুয়োখন দেশৰ অৰ্থনৈতিক বিকাশ, সামাজিক কল্যাণ আৰু কাৰিকৰী উদ্ভাৱনৰ বাবে শক্তি সুৰক্ষা মৌলিক বুলি দুয়ো পক্ষই সন্মতি প্ৰকাশ কৰে। তেওঁলোকে শক্তিৰ ব্যয়সাধ্যতা, নিৰ্ভৰযোগ্যতা, উপলব্ধতা আৰু সুস্থিৰ শক্তি বজাৰ নিশ্চিত কৰাৰ বাবে আমেৰিকা-ভাৰতৰ সহযোগিতাৰ ওপৰত গুৰুত্ব আৰোপ কৰে। বিশ্ব শক্তি পৰিস্থিতিক চালিত কৰাৰ ক্ষেত্ৰত আগশাৰীৰ উৎপাদক আৰু গ্ৰাহক হিচাপে আমেৰিকা যুক্তৰাষ্ট্ৰ আৰু ভাৰতৰ পৰিণামমূলক ভূমিকাক উপলব্ধি কৰি নেতাসকলে তেল, গেছ আৰু অসামৰিক পাৰমাণৱিক শক্তিকে ধৰি আমেৰিকা-ভাৰত শক্তি সুৰক্ষা অংশীদাৰিত্বৰ বাবে পুনৰ প্ৰতিশ্ৰুতিবদ্ধ হয়।
তেওঁলোকে উন্নত বৈশ্বিক শক্তিৰ মূল্য নিশ্চিত কৰিবলৈ আৰু নাগৰিকসকলৰ বাবে সুলভ আৰু নিৰ্ভৰযোগ্য শক্তিৰ উপলব্ধতা সুৰক্ষিত কৰিবলৈ হাইড্ৰ’কাৰ্বনৰ উৎপাদন বৃদ্ধিৰ ওপৰত গুৰুত্ব আৰোপ কৰে। নেতাদ্বয়ে সংকটৰ সময়ত অৰ্থনৈতিক সুস্থিৰতা ৰক্ষাৰ বাবে কৌশলগত পেট্ৰ’লিয়াম ভাণ্ডাৰৰ মূল্যৰ ওপৰতো গুৰুত্ব আৰোপ কৰে আৰু কৌশলগত তেল ভাণ্ডাৰ ব্যৱস্থা সম্প্ৰসাৰণৰ বাবে মুখ্য অংশীদাৰসকলৰ সৈতে কাম কৰাৰ সংকল্প লয়। এই সন্দৰ্ভত আমেৰিকা যুক্তৰাষ্ট্ৰৰ পক্ষই ভাৰতক আন্তঃৰাষ্ট্ৰীয় শক্তি সংস্থাত সম্পূৰ্ণ সদস্য হিচাপে যোগদান কৰাৰ বাবে দৃঢ় সমৰ্থন আগবঢ়ায়।
নেতাদ্বয়ে শক্তি সুৰক্ষা নিশ্চিত কৰাৰ প্ৰচেষ্টাৰ অংশ হিচাপে শক্তি বাণিজ্য বৃদ্ধি কৰাৰ প্ৰতিশ্ৰুতি দোহাৰে, আৰু আমাৰ গতিশীল অৰ্থনীতিৰ বৰ্ধিত প্ৰয়োজনীয়তা তথা অগ্ৰাধিকাৰৰ সৈতে সংগতি ৰাখি ভাৰতৰ খাৰুৱা তেল আৰু পেট্ৰ’লিয়াম সামগ্ৰী আৰু তৰলীকৃত প্ৰাকৃতিক গেছৰ এক আগশাৰীৰ যোগানদাতা হিচাপে আমেৰিকা যুক্তৰাষ্ট্ৰক প্ৰতিষ্ঠা কৰে। তেওঁলোকে যোগান বৈচিত্ৰতা আৰু শক্তি সুৰক্ষা নিশ্চিত কৰাৰ প্ৰচেষ্টাৰ অংশ হিচাপে প্ৰাকৃতিক গেছ, ইথেন আৰু পেট্ৰ’লিয়াম সামগ্ৰীসহ হাইড্ৰ’কাৰ্বন খণ্ডত বাণিজ্য বৃদ্ধিৰ অপৰিসীম পৰিসৰ আৰু সুযোগৰ ওপৰত গুৰুত্ব আৰোপ কৰে। বিশেষকৈ তেল আৰু গেছ আন্তঃগাঁথনিৰ ক্ষেত্ৰত বিনিয়োগ বৃদ্ধি কৰিবলৈ আৰু দুয়োখন দেশৰ শক্তি কোম্পানীসমূহৰ মাজত অধিক সহযোগিতাৰ সুবিধা প্ৰদান কৰিবলৈ তেওঁলোক প্ৰতিশ্ৰুতিবদ্ধ হয়।
নেতাদ্বয়ে বৃহৎ পৰিমাণৰ স্থানীয়কৰণ আৰু সম্ভাৱ্য প্ৰযুক্তি স্থানান্তৰৰ জৰিয়তে ভাৰতত আমেৰিকা যুক্তৰাষ্ট্ৰৰ দ্বাৰা ডিজাইন কৰা পাৰমাণৱিক ৰিয়েক্টৰ নিৰ্মাণৰ বাবে একেলগে কাম কৰাৰ পৰিকল্পনাৰ সৈতে আগবাঢ়ি গৈ আমেৰিকা-ভাৰত ১২৩ অসামৰিক পাৰমাণৱিক চুক্তিক সম্পূৰ্ণৰূপে উপলব্ধি কৰাৰ বাবে তেওঁলোকৰ প্ৰতিশ্ৰুতি ঘোষণা কৰে। দুয়োপক্ষই পাৰমাণৱিক ৰিয়েক্টৰৰ বাবে পাৰমাণৱিক শক্তি আইন আৰু পাৰমাণৱিক ক্ষতিৰ বাবে অসামৰিক দায়বদ্ধতা আইন (চি এল এন ডি এ)ৰ সংশোধনী গ্ৰহণৰ বাবে ভাৰত চৰকাৰৰ শেহতীয়া বাজেট ঘোষণাক আদৰণি জনায়, আৰু লগতে চি এল এন ডি এ অনুসৰি দ্বিপাক্ষিক ব্যৱস্থা স্থাপনৰ সিদ্ধান্ত লয়, যি অসামৰিক দায়বদ্ধতাৰ বিষয়টো সমাধান কৰিব আৰু পাৰমাণৱিক ৰিয়েক্টৰৰ উৎপাদন আৰু নিয়োজনত ভাৰত আৰু আমেৰিকা যুক্তৰাষ্ট্ৰৰ উদ্যোগৰ সহযোগিতা সহজ কৰি তুলিব। আগলৈ যোৱা এই পথে আমেৰিকা যুক্তৰাষ্ট্ৰৰ দ্বাৰা ডিজাইন কৰা বৃহৎ ৰিয়েক্টৰ নিৰ্মাণৰ পৰিকল্পনা মুকলি কৰিব আৰু উন্নত সূক্ষ্ম মডুলাৰ ৰিয়েক্টৰৰ সৈতে পাৰমাণৱিক শক্তি উৎপাদনৰ বিকাশ, প্ৰয়োগ আৰু পৰিসৰ বৃদ্ধিৰ বাবে সহযোগিতাক সক্ষম কৰিব।
প্ৰযুক্তি আৰু উদ্ভাৱন
নেতাদ্বয়ে আমেৰিকা যুক্তৰাষ্ট্ৰ-ভাৰত ট্ৰাষ্ট (‘কৌশলগত প্ৰযুক্তি ব্যৱহাৰ কৰি সম্পৰ্কৰ পৰিৱৰ্তন’) উদ্যোগ আৰম্ভ কৰাৰ কথা ঘোষণা কৰে, যি প্ৰতিৰক্ষা, কৃত্ৰিম বুদ্ধিমত্তা, ছেমিকণ্ডাক্টৰ, কোৱাণ্টাম, জৈৱ প্ৰযুক্তি, শক্তি আৰু মহাকাশৰ দৰে ক্ষেত্ৰত গুৰুত্বপূৰ্ণ আৰু উদীয়মান প্ৰযুক্তিৰ প্ৰয়োগৰ প্ৰচাৰৰ বাবে চৰকাৰ, শিক্ষা আৰু ব্যক্তিগত খণ্ডৰ সহযোগিতাক অনুঘটক কৰিব, লগতে প্ৰমাণিত প্ৰযুক্তি বিক্ৰেতাসকলৰ ব্যৱহাৰক উৎসাহিত কৰিব আৰু সংবেদনশীল প্ৰযুক্তি সুৰক্ষিত হোৱাটো নিশ্চিত কৰিব।
‘ট্ৰাষ্ট’ পদক্ষেপৰ এক কেন্দ্ৰীয় স্তম্ভ হিচাপে তেওঁলোকে আমেৰিকা যুক্তৰাষ্ট্ৰ আৰু ভাৰতীয় ব্যক্তিগত উদ্যোগৰ সৈতে কাম কৰিবলৈ প্ৰতিশ্ৰুতিবদ্ধ হয় যাতে বছৰৰ শেষৰ ফালে কৃত্ৰিম বুদ্ধিমত্তা আন্তঃগাঁথনি ত্বৰান্বিত কৰাৰ বাবে আমেৰিকা-ভাৰত ৰোডমেপ প্ৰস্তুত কৰিব পাৰি লগতে বিত্তীয় সাহায্য, নিৰ্মাণ, শক্তি প্ৰদান, আৰু ভাৰতত বৃহৎ পৰিমাণৰ আমেৰিকা-মূলৰ কৃত্ৰিম বুদ্ধিমত্তা আন্তঃগাঁথনি আৰু ভৱিষ্যতৰ কাৰ্য্যৰ সৈতে সংযোগ কৰাৰ ক্ষেত্ৰত বাধা চিনাক্ত কৰিব পাৰি। আমেৰিকা যুক্তৰাষ্ট্ৰ আৰু ভাৰতে পৰৱৰ্তী প্ৰজন্মৰ তথ্য কেন্দ্ৰসমূহত উদ্যোগৰ অংশীদাৰিত্ব আৰু বিনিয়োগ, কৃত্ৰিম বুদ্ধিমত্তাৰ বাবে গণনা আৰু প্ৰচেছৰৰ বিকাশ আৰু প্ৰৱেশাধিকাৰৰ ক্ষেত্ৰত সহযোগিতা, , কৃত্ৰিম বুদ্ধিমত্তা মডেলৰ উদ্ভাৱন আৰু সামাজিক প্ৰত্যাহ্বান সমাধানৰ বাবে কৃত্ৰিম বুদ্ধিমত্তা এপ্লিকেচন নিৰ্মাণৰ বাবে একেলগে কাম কৰিব আৰু এই প্ৰযুক্তিবোৰ সুৰক্ষিত কৰাৰ বাবে প্ৰয়োজনীয় সুৰক্ষা আৰু নিয়ন্ত্ৰণৰ মোকাবিলা কৰিব তথা নিয়ামক বাধা হ্ৰাস কৰিব।
নেতাদ্বয়ে সফল ইণ্ডাছ-এক্স প্লেটফৰ্মৰ আদৰ্শৰ এক নতুন উদ্ভাৱন সেতু ইণ্ডাছ উদ্ভাৱন আৰম্ভ কৰাৰ কথা ঘোষণা কৰে, যিয়ে আমেৰিকা যুক্তৰাষ্ট্ৰ-ভাৰত উদ্যোগ আৰু শৈক্ষিক অংশীদাৰিত্বক আগুৱাই নিব আৰু মহাকাশ, শক্তি তথা অন্যান্য উদীয়মান প্ৰযুক্তিত বিনিয়োগ বৃদ্ধি কৰি আমেৰিকা যুক্তৰাষ্ট্ৰ আৰু ভাৰতৰ নেতৃত্ব বজাই ৰাখি একবিংশ শতিকাৰ প্ৰয়োজনীয়তা পূৰণ কৰিব। তেওঁলোকে ইণ্ডাছ-এক্স উদ্যোগৰ প্ৰতি তেওঁলোকৰ প্ৰতিশ্ৰুতিও শক্তিশালী কৰে, যিয়ে আমেৰিকা যুক্তৰাষ্ট্ৰ আৰু ভাৰতীয় প্ৰতিৰক্ষা কোম্পানী, বিনিয়োগকাৰী আৰু বিশ্ববিদ্যালয়সমূহৰ মাজত অংশীদাৰিত্বৰ সুবিধা প্ৰদান কৰি আমাৰ সামৰিক বাহিনীৰ বাবে গুৰুত্বপূৰ্ণ সামৰ্থ্য প্ৰস্তুত কৰে। ২০২৫ চনত পৰৱৰ্তী সন্মিলনখনকো তেওঁলোকে আদৰণি জনায়।
দুয়োপক্ষ ট্ৰাষ্ট উদ্যোগৰ অংশ হিচাপে ছেমিকণ্ডাক্টৰ, গুৰুত্বপূৰ্ণ খনিজ পদাৰ্থ, উন্নত সামগ্ৰী আৰু ফাৰ্মাচিউটিকেলছকে ধৰি বিশ্বস্ত আৰু স্থিতিস্থাপক যোগান শৃংখল গঢ়ি তোলাৰ বাবেও প্ৰতিশ্ৰুতিবদ্ধ। এই প্ৰচেষ্টাৰ অংশ হিচাপে নেতাসকলে গুৰুত্বপূৰ্ণ ঔষধৰ সক্ৰিয় ফাৰ্মাচিউটিকেল উপাদানৰ বাবে আমেৰিকা যুক্তৰাষ্ট্ৰকে ধৰি ভাৰতীয় উৎপাদন ক্ষমতা সম্প্ৰসাৰণৰ অৰ্থে ৰাজহুৱা আৰু ব্যক্তিগত বিনিয়োগক উৎসাহিত কৰাৰ পৰিকল্পনা কৰিছে। এই বিনিয়োগসমূহে ভাল চাকৰি সৃষ্টি কৰিব, গুৰুত্বপূৰ্ণ যোগান শৃংখলত বৈচিত্ৰ্য আনিব, আৰু আমেৰিকা যুক্তৰাষ্ট্ৰ তথা ভাৰত উভয়ৰে জীৱন ৰক্ষক ঔষধৰ অভাৱৰ আশংকা হ্ৰাস কৰিব।
উদীয়মান প্ৰযুক্তি আৰু উন্নত উৎপাদনৰ বাবে গুৰুত্বপূৰ্ণ খনিজ পদাৰ্থৰ কৌশলগত গুৰুত্ব স্বীকাৰ কৰি, ভাৰত আৰু আমেৰিকা যুক্তৰাষ্ট্ৰই গৱেষণা আৰু উন্নয়নত সহযোগিতা ত্বৰান্বিত কৰিব আৰু খনিজ সুৰক্ষা অংশীদাৰিত্বৰ জৰিয়তে সমগ্ৰ গুৰুত্বপূৰ্ণ খনিজ মূল্য শৃংখলত বিনিয়োগৰ প্ৰচাৰ কৰিব, যাৰ আমেৰিকা যুক্তৰাষ্ট্ৰ আৰু ভাৰত উভয়ে সদস্য। দুয়োখন দেশে গুৰুত্বপূৰ্ণ খনিজ পদাৰ্থৰ অন্বেষণ, লাভালাভ আৰু প্ৰক্ৰিয়াকৰণৰ লগতে পুনৰ্ব্যৱহাৰ প্ৰযুক্তিৰ ক্ষেত্ৰত সহযোগিতা গভীৰ কৰাৰ প্ৰচেষ্টা তীব্ৰ কৰিবলৈ প্ৰতিশ্ৰুতিবদ্ধ। এই উদ্দেশ্যে নেতাসকলে এলুমিনিয়াম, কয়লা খনন তথা তেল আৰু গেছৰ দৰে গধুৰ উদ্যোগৰ পৰা গুৰুত্বপূৰ্ণ খনিজ পদাৰ্থ উদ্ধাৰ আৰু প্ৰক্ৰিয়াকৰণৰ বাবে এক নতুন আমেৰিকা-ভাৰত কাৰ্যসূচী-কৌশলগত খনিজ পুনৰুদ্ধাৰৰ পদক্ষেপ আৰম্ভ কৰাৰ কথা ঘোষণা কৰে।
নেতাদ্বয়ে ২০২৫ বৰ্ষক আমেৰিকা-ভাৰত অসামৰিক মহাকাশ সহযোগিতাৰ বাবে এক অগ্ৰণী বছৰ হিচাপে প্ৰশংসা কৰে, য’ত প্ৰথমগৰাকী ভাৰতীয় মহাকাশচাৰীক আন্তঃৰাষ্ট্ৰীয় মহাকাশ কেন্দ্ৰ (আইএছএছ) লৈ অনাৰ বাবে এক্সিঅ’মৰ জৰিয়তে নাছা-আইএছআৰঅ’ প্ৰচেষ্টাৰ পৰিকল্পনা কৰা হৈছে, আৰু যুটীয়া ‘নিছাৰ’ অভিযানৰ আৰম্ভণি কৰা হৈছে। ই হৈছে দ্বৈত ৰাডাৰ ব্যৱহাৰ কৰি পৃথিৱীৰ পৃষ্ঠত প্ৰণালীবদ্ধভাৱে পৰিবৰ্তনৰ মানচিত্ৰ প্ৰস্তুত কৰা প্ৰথমটো অভিযান। নেতাদ্বয়ে দীৰ্ঘম্যাদী মানৱ মহাকাশ ভ্ৰমণ অভিযান, মহাকাশ ভ্ৰমণ সুৰক্ষা আৰু গ্ৰহ সুৰক্ষাকে ধৰি উদীয়মান ক্ষেত্ৰত দক্ষতা আৰু পেছাদাৰী বিনিময়ৰ আদান-প্ৰদানকে ধৰি মহাকাশ অন্বেষণত অধিক সহযোগিতাৰ বাবে আহ্বান জনায়। তেওঁলোকে যোগাযোগ, উন্নত মহাকাশ উৰণ, উপগ্ৰহ আৰু মহাকাশ উৎক্ষেপণ প্ৰণালী, মহাকাশ স্থায়িত্ব, মহাকাশ পৰ্যটন আৰু উন্নত মহাকাশ নিৰ্মাণৰ দৰে পৰম্পৰাগত তথা উদীয়মান ক্ষেত্ৰত উদ্যোগৰ সৈতে জড়িত হৈ অধিক বাণিজ্যিক মহাকাশ সহযোগিতাৰ বাবে প্ৰতিশ্ৰুতিবদ্ধ হয়।
তেওঁলোকে গুৰুত্বপূৰ্ণ আৰু উদীয়মান প্ৰযুক্তিৰ গৱেষণাৰ ক্ষেত্ৰত আমেৰিকা যুক্তৰাষ্ট্ৰ ৰাষ্ট্ৰীয় বিজ্ঞান ফাউণ্ডেশ্যন আৰু ভাৰতীয় অনুসন্ধান ৰাষ্ট্ৰীয় গৱেষণা ফাউণ্ডেশ্যনৰ মাজত এক নতুন অংশীদাৰিত্ব ঘোষণা কৰি আমেৰিকা যুক্তৰাষ্ট্ৰ আৰু ভাৰতীয় বৈজ্ঞানিক গৱেষণা সম্প্ৰদায়ৰ মাজত সম্পৰ্ক গভীৰ কৰাৰ মূল্যৰ ওপৰত গুৰুত্ব আৰোপ কৰে। এই অংশীদাৰিত্বই আমেৰিকা যুক্তৰাষ্ট্ৰৰ নেচনেল ছায়েন্স ফাউণ্ডেশ্যন আৰু কেইবাটাও ভাৰতীয় বিজ্ঞান সংস্থাৰ মাজত চলি থকা সহযোগিতাৰ ওপৰত ভিত্তি কৰি ছেমিকণ্ডাক্টৰ, সংযুক্ত বাহন, যন্ত্ৰ শিক্ষণ, পৰৱৰ্তী প্ৰজন্মৰ দূৰসংযোগ, বুদ্ধিমান পৰিবহণ ব্যৱস্থা আৰু ভৱিষ্যতৰ জৈৱ উৎপাদনৰ ক্ষেত্ৰত যুটীয়া গৱেষণা সক্ষম কৰে।
দুয়ো পক্ষই পৰস্পৰৰ চৰকাৰে প্ৰযুক্তি সুৰক্ষাক সম্বোধন কৰাৰ সময়ত ৰপ্তানি নিয়ন্ত্ৰণ, উচ্চ প্ৰযুক্তি বাণিজ্য বৃদ্ধি, আৰু আমাৰ দুয়োখন দেশৰ মাজত প্ৰযুক্তি স্থানান্তৰত বাধা হ্ৰাস কৰাৰ বাবে প্ৰচেষ্টা দুগুণ কৰিব বুলি সিদ্ধান্ত গ্ৰহণ কৰে। নেতাসকলে গুৰুত্বপূৰ্ণ যোগান শৃংখলৰ অত্যাধিক কেন্দ্রীকৰণৰ সুযোগ ল’বলৈ বিচৰা তৃতীয় পক্ষৰ ৰপ্তানি নিয়ন্ত্ৰণত অন্যায় অনুশীলনৰ সাধাৰণ প্ৰত্যাহ্বান প্ৰতিহত কৰিবলৈ একেলগে কাম কৰাৰ সংকল্প লয়।
বহুপাক্ষিক সহযোগিতা
নেতাদ্বয়ে পুনৰ দৃঢ়তাৰে কয় যে আমেৰিকা যুক্তৰাষ্ট্ৰ আৰু ভাৰতৰ মাজৰ ঘনিষ্ঠ অংশীদাৰিত্ব এক মুক্ত, মুকলি, শান্তিপূৰ্ণ আৰু সমৃদ্ধিশালী ভাৰত-প্ৰশান্ত মহাসাগৰীয় অঞ্চলৰ কেন্দ্ৰবিন্দু। কোৱাড অংশীদাৰ হিচাপে, তেওঁলোকে পুনৰ কয় যে এই অংশীদাৰিত্ব আছিয়ান কেন্দ্ৰীয়তাক স্বীকৃতি দিয়াৰ ওপৰত আধাৰিত; আন্তঃৰাষ্ট্ৰীয় আইন আৰু সুশাসনৰ অনুগত। সুৰক্ষা আৰু নৌ পৰিবহণৰ স্বাধীনতা, উৰণ আৰু সাগৰৰ অন্যান্য আইনী ব্যৱহাৰৰ বাবে সমৰ্থন তথা বাধাহীন আইনী বাণিজ্য আৰু আন্তঃৰাষ্ট্ৰীয় আইন অনুসৰি সামুদ্ৰিক বিবাদৰ শান্তিপূৰ্ণ সমাধানৰ বাবে সমৰ্থন কৰা।
প্ৰধানমন্ত্ৰী মোদীয়ে নতুন দিল্লীত কোৱাড নেতাসকলৰ সন্মিলনৰ বাবে ৰাষ্ট্ৰপতি ট্ৰাম্পক আতিথ্য দিবলৈ আগ্ৰহী, যাৰ পূৰ্বে তেওঁলোকে আন্তঃব্যৱহাৰযোগ্যতা উন্নত কৰাৰ বাবে প্ৰাকৃতিক দুৰ্যোগ আৰু সামুদ্ৰিক টহলৰ প্ৰতি অসামৰিক সঁহাৰি সমৰ্থন কৰিবলৈ অংশীদাৰী এয়াৰলিফ্ট ক্ষমতাৰ ওপৰত নতুন কোৱাড পদক্ষেপ সক্ৰিয় কৰিব।
নেতাদ্বয়ে সহযোগিতা বৃদ্ধি কৰা, কূটনৈতিক আলোচনা বৃদ্ধি কৰা আৰু মধ্য প্ৰাচ্যৰ অংশীদাৰসকলৰ সৈতে স্পষ্ট সহযোগিতা বৃদ্ধি কৰাৰ সংকল্প লয়। তেওঁলোকে অঞ্চলটোত শান্তি আৰু নিৰাপত্তাক আগুৱাই নিয়াৰ বাবে গুৰুত্বপূৰ্ণ আন্তঃগাঁথনি আৰু অৰ্থনৈতিক কৰিডৰত বিনিয়োগৰ গুৰুত্বৰ ওপৰত আলোকপাত কৰে। দুয়ো পক্ষই ২০২৫ চনত নতুন পদক্ষেপ ঘোষণা কৰাৰ বাবে অহা ছমাহৰ ভিতৰত ভাৰত-মধ্য প্ৰাচ্য-ইউৰোপ কৰিডৰ আৰু আই২ইউ২ গোটৰ অংশীদাৰসকলক আহ্বান কৰাৰ পৰিকল্পনা কৰিছে।
ভাৰত মহাসাগৰ অঞ্চলত উন্নয়নমূলক, মানৱীয় সহায় আৰু সুৰক্ষা প্ৰদানকাৰী হিচাপে ভাৰতৰ ভূমিকাক আমেৰিকা যুক্তৰাষ্ট্ৰই প্ৰশংসা কৰে। এই সন্দৰ্ভত তেওঁলোকে বিশাল ভাৰত মহাসাগৰ অঞ্চলত দ্বিপাক্ষিক আলোচনা আৰু সহযোগিতা গভীৰ কৰাৰ প্ৰতিশ্ৰুতি প্ৰদান কৰে আৰু অৰ্থনৈতিক সংযোগ তথা বাণিজ্যৰ ক্ষেত্ৰত সমন্বিত বিনিয়োগ আগবঢ়াই নিয়াৰ বাবে এক নতুন দ্বিপাক্ষিক, সম্পূৰ্ণ চৰকাৰী মঞ্চ- ভাৰত মহাসাগৰ কৌশলগত উদ্যোগ আৰম্ভ কৰে। বৃহত্তৰ ভাৰত মহাসাগৰ সংযোগক সমৰ্থন কৰি নেতাসকলে এই বছৰ কাম আৰম্ভ কৰা আৰু অৱশেষত পাঁচখন মহাদেশক সংযোগ কৰিবলৈ আৰু ভাৰত মহাসাগৰ অঞ্চল আৰু ইয়াৰ বাহিৰত বিশ্বব্যাপী ডিজিটেল ঘাইপথ শক্তিশালী কৰিবলৈ ৫০,০০০ কিলোমিটাৰতকৈও অধিক বিস্তাৰিত এক সাগৰৰ তলৰ কেবল প্ৰকল্পত বহু-বিলিয়ন, বহু-বছৰীয়া বিনিয়োগৰ ঘোষণাক আদৰণি জনায়। ভাৰতে বিশ্বাসী বিক্ৰেতাসকলক ব্যৱহাৰ কৰি ভাৰত মহাসাগৰত সাগৰৰ তলৰ কেবলসমূহৰ ৰক্ষণাবেক্ষণ, মেৰামতি আৰু বিত্তীয় সাহায্যৰ ক্ষেত্ৰত বিনিয়োগ কৰিব বিচাৰে।
নেতাদ্বয়ে পশ্চিম ভাৰত মহাসাগৰ, মধ্য প্ৰাচ্য আৰু ভাৰত-প্ৰশান্ত মহাসাগৰীয় অঞ্চলত প্ৰতিৰক্ষা, প্ৰযুক্তি, শক্তি আৰু গুৰুত্বপূৰ্ণ খনিজ পদাৰ্থৰ ক্ষেত্ৰত সম্পৰ্ক, বাণিজ্য আৰু সহযোগিতা বৃদ্ধিৰ বাবে নতুন বহুপক্ষীয় অংশীদাৰিত্ব গঢ়ি তোলাৰ প্ৰয়োজনীয়তাৰ কথা স্বীকাৰ কৰে। তেওঁলোকে ২০২৫ চনৰ শেষৰফালে এই উপ-অঞ্চলসমূহত নতুন অংশীদাৰিত্বৰ পদক্ষেপ ঘোষণা কৰাৰ বিষয়ে আশা কৰে।
দুয়ো পক্ষই বিশ্ব শান্তি আৰু নিৰাপত্তাক আগুৱাই নিয়াৰ বাবে বহুজাতিক পৰিৱেশত সামৰিক সহযোগিতা আগবঢ়াই নিয়াৰ সংকল্পও গ্ৰহণ কৰে। নেতাসকলে আৰৱ সাগৰত সাগৰীয় পথ সুৰক্ষিত কৰাত সহায় কৰিবলৈ কম্বাইণ্ড মেৰিটাইম ফ’ৰ্চেছ নেভেল টাস্ক ফ’ৰ্চত ভৱিষ্যতৰ নেতৃত্বৰ ভূমিকা গ্ৰহণ কৰাৰ ভাৰতৰ সিদ্ধান্তক প্ৰশংসা কৰে।
নেতাদ্বয়ে পুনৰ দৃঢ়তাৰে কয় যে সন্ত্ৰাসবাদৰ বৈশ্বিক অভিশাপৰ বিৰুদ্ধে যুঁজ দিব লাগিব আৰু বিশ্বৰ প্ৰতিটো কোণৰ পৰা সন্ত্ৰাসবাদীৰ সুৰক্ষিত আশ্ৰয়স্থলসমূহ নিৰ্মূল কৰিব লাগিব। তেওঁলোকে আল-কায়দা, আইএছআইএছ, জইছ-ই মহম্মদ আৰু লষ্কৰ-ই-তৈবাকে ধৰি সন্ত্ৰাসবাদী দলসমূহৰ পৰা অহা ভাবুকিৰ বিৰুদ্ধে সহযোগিতা শক্তিশালী কৰাৰ প্ৰতিশ্ৰুতি প্ৰদান কৰে যাতে মুম্বাইত ২৬/১১ত হোৱা আক্ৰমণ আৰু ২০২১ চনৰ ২৬ আগষ্টত আফগানিস্তানত এব্বে গেট বোমা বিস্ফোৰণৰ দৰে জঘন্য কাৰ্য্য প্ৰতিৰোধ কৰিব পাৰি। আমাৰ নাগৰিকসকলৰ ক্ষতি কৰিব পৰাসকলক বিচাৰৰ সন্মুখীন কৰাৰ এক যৌথ ইচ্ছাক স্বীকাৰ কৰি আমেৰিকা যুক্তৰাষ্ট্ৰই ঘোষণা কৰে যে তহৱুৰ ৰাণাক ভাৰতলৈ প্ৰেৰণ কৰাৰ বাবে অনুমোদন জনোৱা হৈছে। নেতাসকলে তদুপৰি পাকিস্তানক মুম্বাই আৰু পাঠানকোট আক্ৰমণৰ অপৰাধীসকলক দ্ৰুতভাৱে বিচাৰৰ সন্মুখীন কৰিবলৈ আহ্বান জনায় আৰু ইয়াৰ সীমান্তৰ পাৰৰ ভূখণ্ড যাতে সন্ত্ৰাসবাদীক আক্ৰমণ কৰিবলৈ ব্যৱহাৰ কৰা নহয়, সেয়া নিশ্চিত কৰে। তেওঁলোকে লগতে ব্যাপক ধ্বংসাত্মক অস্ত্ৰ-শস্ত্ৰৰ প্ৰসাৰ আৰু সেইবোৰৰ বিতৰণ প্ৰণালী প্ৰতিৰোধ কৰিবলৈ আৰু সন্ত্ৰাসবাদী আৰু অ-ৰাষ্ট্ৰীয় অভিনেতাসকলৰ দ্বাৰা এনে অস্ত্ৰ-শস্ত্ৰৰ প্ৰৱেশাধিকাৰ অস্বীকাৰ কৰিবলৈ একেলগে কাম কৰাৰ প্ৰতিশ্ৰুতি দিয়ে।
জনসাধাৰণৰ মাজত সহযোগিতা
ৰাষ্ট্ৰপতি ট্ৰাম্প আৰু প্ৰধানমন্ত্ৰী মোদীয়ে দুয়োখন দেশৰ মাজত জনসাধাৰণৰ সম্পৰ্কক আগুৱাই নিয়াৰ গুৰুত্বৰ কথা উল্লেখ কৰে। এই সন্দৰ্ভত, তেওঁলোকে উল্লেখ কৰে যে ৩,০০,০০০তকৈও অধিক শক্তিশালী ভাৰতীয় শিক্ষাৰ্থী সম্প্ৰদায়ে আমেৰিকা যুক্তৰাষ্ট্ৰৰ অৰ্থনীতিত বছৰি ৪ বিলিয়ন ডলাৰৰো অধিক অৰিহণা যোগায় আৰু কেইবাটাও প্ৰত্যক্ষ আৰু পৰোক্ষ চাকৰি সৃষ্টি কৰাত সহায় কৰে। তেওঁলোকে স্বীকাৰ কৰে যে শিক্ষাৰ্থী, গৱেষক আৰু কৰ্মচাৰীসকলৰ প্ৰতিভাৰ প্ৰবাহ আৰু গতিবিধিয়ে দুয়োখন দেশক পাৰস্পৰিকভাৱে উপকৃত কৰিছে। উদ্ভাৱন বৃদ্ধি, শিক্ষাৰ ফলাফল উন্নত কৰা আৰু ভৱিষ্যতৰ বাবে সাজু কৰ্মশক্তিৰ বিকাশত আন্তঃৰাষ্ট্ৰীয় শৈক্ষিক সহযোগিতাৰ গুৰুত্ব স্বীকাৰ কৰি দুয়োগৰাকী নেতাই যুটীয়া/দ্বৈত ডিগ্ৰী, যুটীয়া উৎকৃষ্টতা কেন্দ্ৰ স্থাপন আৰু ভাৰতত আমেৰিকা যুক্তৰাষ্ট্ৰৰ প্ৰধান শিক্ষা প্ৰতিষ্ঠানসমূহৰ কেম্পাছ স্থাপনৰ দৰে প্ৰচেষ্টাৰ জৰিয়তে উচ্চ শিক্ষা প্ৰতিষ্ঠানসমূহৰ মাজত সহযোগিতা শক্তিশালী কৰাৰ সংকল্প লয়।
দুয়োগৰাকী নেতাই গুৰুত্ব আৰোপ কৰে যে বিশ্বক এক বিশ্বব্যাপী কৰ্মক্ষেত্ৰলৈ বিকশিত কৰাৰ বাবে উদ্ভাৱনীমূলক, পাৰস্পৰিকভাৱে লাভজনক আৰু সুৰক্ষিত গতিশীলতাৰ পৰিকাঠামো স্থাপন কৰাৰ প্ৰয়োজন। এইক্ষেত্ৰত দুয়ো পক্ষই শিক্ষাৰ্থী আৰু পেছাদাৰীসকলৰ আইনী চলাচলৰ পথবোৰ সুবিন্যস্ত কৰা আৰু হ্ৰস্বম্যাদী পৰ্যটক তথা ব্যৱসায়িক ভ্ৰমণৰ সুবিধা প্ৰদান কৰাৰ লগতে অপৰাধীক সুবিধা প্ৰদানকাৰী আৰু অবৈধ প্ৰব্ৰজন নেটৱৰ্কৰ বিৰুদ্ধে কঠোৰ ব্যৱস্থা গ্ৰহণ কৰি অবৈধ প্ৰব্ৰজন আৰু মানৱ সৰবৰাহৰ বিৰুদ্ধে আক্ৰমণাত্মকভাৱে মোকাবিলা কৰিবলৈ প্ৰতিশ্ৰুতিবদ্ধ হয়।
নেতাদ্বয়ে অবৈধ প্ৰব্ৰজন নেটৱৰ্ক, সংগঠিত অপৰাধ ছিণ্ডিকেট, যাৰ ভিতৰত আছে নাৰ্কো-সন্ত্ৰাসবাদী, মানৱ আৰু অস্ত্ৰ সৰবৰাহকাৰীৰ লগতে ৰাজহুৱা আৰু কূটনৈতিক সুৰক্ষা আৰু নিৰাপত্তা, উভয় ৰাষ্ট্ৰৰ সাৰ্বভৌমত্ব আৰু আঞ্চলিক অখণ্ডতাক ভাবুকি দিয়া অন্যান্য উপাদানৰ বিৰুদ্ধে নিৰ্ণায়ক ব্যৱস্থা গ্ৰহণৰ বাবে আইন প্ৰৱৰ্তনকাৰী সহযোগিতা শক্তিশালী কৰাৰ বাবেও প্ৰতিশ্ৰুতিবদ্ধ হয়।
ৰাষ্ট্ৰপতি ট্ৰাম্প আৰু প্ৰধানমন্ত্ৰী মোদীয়ে আমাৰ চৰকাৰ, উদ্যোগ আৰু শৈক্ষিক প্ৰতিষ্ঠানসমূহৰ মাজত উচ্চ পৰ্যায়ৰ সম্পৰ্ক বজাই ৰখাৰ প্ৰতিশ্ৰুতি দিয়ে আৰু এক দীৰ্ঘস্থায়ী ভাৰত-আমেৰিকাৰ অংশীদাৰিত্বৰ বাবে তেওঁলোকৰ উচ্চাভিলাষী দৃষ্টিভংগীক উপলব্ধি কৰে, যি এক উজ্জ্বল আৰু সমৃদ্ধিশালী ভৱিষ্যতৰ বাবে আমাৰ জনসাধাৰণৰ আকাংক্ষাক আগুৱাই লৈ যায় তথা এক মুক্ত আৰু মুকলি ভাৰত-প্ৰশান্ত মহাসাগৰীয় অঞ্চলত অৰিহণা যোগায়।
