ভাৰতৰ প্ৰধানমন্ত্ৰী শ্ৰী নৰেন্দ্ৰ মোদীৰ আমন্ত্ৰণমৰ্মে নিউজিলেণ্ডৰ প্ৰধানমন্ত্ৰী শ্ৰী ক্ৰিষ্টোফাৰ লাক্সন ২০২৫ চনৰ ১৬মাৰ্চৰ পৰা ২০ মাৰ্চলৈ চৰকাৰী ভ্ৰমণসূচী লৈ ভাৰতলৈ আহিছে। প্ৰধানমন্ত্ৰী হিচাপে প্ৰথমবাৰৰ বাবে ভাৰত ভ্ৰমণলৈ অহা প্ৰধানমন্ত্ৰী লাক্সনে নতুন দিল্লী আৰু মুম্বাই ভ্ৰমণ কৰিছে। তেওঁৰ লগত পৰ্যটন আৰু আতিথ্য মন্ত্ৰী লুইছ আপষ্টন, খিলঞ্জীয়া সম্প্ৰদায় আৰু ক্ৰীড়া আৰু বিনোদন মন্ত্ৰী মাৰ্ক মিচেল, বাণিজ্য আৰু বিনিয়োগ, কৃষি আৰু বন মন্ত্ৰী টড মেকক্লে আৰু কেবাগৰাকীও বিষয়াৰ এটা উচ্চ পৰ্যায়ৰ প্ৰতিনিধি দল তথা ব্যৱসায়, সম্প্ৰদায়, সংবাদ মাধ্যম আৰু সাংস্কৃতিক গোটৰ প্ৰতিনিধি দলেও এই ভ্ৰমণত অংশগ্ৰহণ কৰিছে।
নতুন দিল্লীত প্ৰধানমন্ত্ৰী লাক্সনক উষ্ম আৰু পৰম্পৰাগতভাৱে আদৰণি জনোৱা হয়। প্ৰধানমন্ত্ৰী মোদীয়ে প্ৰধানমন্ত্ৰী লাক্সনৰ সৈতে দ্বিপাক্ষিক আলোচনা কৰে। প্ৰধানমন্ত্ৰী মোদীয়ে ২০২৫ চনৰ ১৭ মাৰ্চত নতুন দিল্লীত ‘ৰাইচিনা ডায়ালগ’ৰ দশম সংস্কৰণ উদ্বোধন কৰিব আৰু মুখ্য অতিথি হিচাপে প্ৰধানমন্ত্ৰী লাক্সনে উদ্বোধনী মূল ভাষণ আগবঢ়াব। প্ৰধানমন্ত্ৰীয়ে ৰাজঘাটত মহাত্মা গান্ধী স্মাৰকত শ্ৰদ্ধাঞ্জলি জ্ঞাপন কৰে আৰু ৰাষ্ট্ৰপতি দ্ৰৌপদী মুৰ্মুক সাক্ষাৎ কৰে।
প্ৰধানমন্ত্ৰীদ্বয়ে ভাৰত আৰু নিউজিলেণ্ডৰ মাজত গণতান্ত্ৰিক মূল্যবোধ আৰু জনসাধাৰণৰ মাজৰ শক্তিশালী সম্পৰ্কৰ আধাৰত বৰ্ধিত দ্বিপাক্ষিক সম্পৰ্ক অধিক শক্তিশালী কৰাৰ বাবে তেওঁলোকৰ উমৈহতীয়া ইচ্ছাক পুনৰ নিশ্চিত কৰে। দুয়োগৰাকী নেতাই দ্বিপাক্ষিক সম্পৰ্কত অধিক বিকাশৰ গুৰুত্বপূৰ্ণ সম্ভাৱনা আছে বুলি স্বীকাৰ কৰে আৰু বাণিজ্য আৰু বিনিয়োগ, প্ৰতিৰক্ষা আৰু নিৰাপত্তা, শিক্ষা আৰু গৱেষণা, বিজ্ঞান আৰু প্ৰযুক্তি, কৃষি-প্ৰযুক্তি, মহাকাশ, মানুহৰ গতিশীলতা আৰু ক্ৰীড়াকে ধৰি বিভিন্ন ক্ষেত্ৰত ঘনিষ্ঠভাৱে সহযোগিতা কৰিবলৈ সন্মত হয়।
প্ৰধানমন্ত্ৰীদ্বয়ে পাৰস্পৰিক স্বাৰ্থজড়িত আঞ্চলিক আৰু আন্তঃৰাষ্ট্ৰীয় উন্নয়ন সন্দৰ্ভত মত বিনিময় কৰে আৰু বহুপাক্ষিক সহযোগিতা শক্তিশালী কৰিবলৈ সন্মত হয়। প্ৰধানমন্ত্ৰীদ্বয়ে স্বীকাৰ কৰে যে আমি ক্ৰমান্বয়ে এক অনিশ্চিত আৰু বিপজ্জনক পৃথিৱীৰ সন্মুখীন হৈছো। তেওঁলোকে উল্লেখ কৰে যে সামুদ্ৰিক ৰাষ্ট্ৰ হিচাপে ভাৰত আৰু নিউজিলেণ্ডৰ এক মুকলি, অন্তৰ্ভুক্তিমূলক, সুস্থিৰ আৰু সমৃদ্ধিশালী ভাৰত-প্ৰশান্ত মহাসাগৰীয় ক্ষেত্ৰত এক শক্তিশালী আৰু উমৈহতীয়া স্বাৰ্থ আছে, য'ত নিয়ম-আধাৰিত আন্তঃৰাষ্ট্ৰীয় ব্যৱস্থা বজাই ৰখা হয়।
প্ৰধানমন্ত্ৰীদ্বয়ে আন্তঃৰাষ্ট্ৰীয় আইন, বিশেষকৈ ১৯৮২ চনৰ ‘সাগৰীয় আইন সন্দৰ্ভত ৰাষ্ট্ৰসংঘৰ সন্মিলন’ (ইউ এন চি এল অ' এছ) অনুসৰি নৌ পৰিবহণ আৰু উৰণৰ স্বাধীনতা আৰু সাগৰৰ অন্যান্য আইনী ব্যৱহাৰৰ অধিকাৰক পুনৰ নিশ্চিত কৰে। প্ৰধানমন্ত্ৰীদ্বয়ে আন্তঃৰাষ্ট্ৰীয় আইন, বিশেষকৈ ‘ইউ এন চি এল অ' এছ’ অনুসৰি বিবাদৰ শান্তিপূৰ্ণ সমাধানৰ প্ৰয়োজনীয়তাৰ কথা পুনৰ দোহাৰে।
নিউজিলেণ্ডৰ জনসংখ্যাৰ প্ৰায় ছয় শতাংশ ভাৰতীয় মূলৰ লোকৰ লগতে দুয়োখন দেশৰ জনসাধাৰণৰ মাজত থকা শক্তিশালী সম্পৰ্কক লৈ প্ৰধানমন্ত্ৰীদ্বয়ে সন্তোষ প্ৰকাশ কৰে। তেওঁলোকে নিউজিলেণ্ডত থকা প্ৰবাসী ভাৰতীয়সকলৰ গুৰুত্বপূৰ্ণ অৱদান আৰু দুয়োখন দেশৰ মাজত জনসাধাৰণৰ মাজৰ সম্পৰ্ক সহজ কৰি তোলাত ভাৰতীয় সম্প্ৰদায়ৰ লোকসকলৰ ইতিবাচক ভূমিকাক প্ৰশংসা কৰে। দুয়োগৰাকী নেতাই নিউজিলেণ্ডত থকা শিক্ষাৰ্থী, ভাৰতত থকা নিউজিলেণ্ডৰ নাগৰিক আৰু ভাৰতলৈ অহা ভ্ৰমণকাৰীসহ ভাৰতীয় সম্প্ৰদায়ৰ সুৰক্ষা আৰু নিৰাপত্তা নিশ্চিত কৰাৰ গুৰুত্ব সন্দৰ্ভত সন্মতি প্ৰকাশ কৰে।
বাণিজ্য, বিনিয়োগ আৰু বিত্তীয় বিষয়ত সহযোগিতাঃ
প্ৰধানমন্ত্ৰীদ্বয়ে ভাৰত আৰু নিউজিলেণ্ডৰ মাজত ধাৰাবাহিক বাণিজ্য আৰু বিনিয়োগৰ প্ৰবাহক আদৰণি জনায় আৰু দ্বিপাক্ষিক বাণিজ্য সম্প্ৰসাৰণৰ সম্ভাৱনা অধিক অন্বেষণ কৰিবলৈ আহ্বান জনায়। তেওঁলোকে দুয়োপক্ষৰ ব্যৱসায়িক গোষ্ঠীসমূহক সম্পৰ্ক গঢ়ি তুলিবলৈ উৎসাহিত কৰাৰ লগতে দুয়োখন দেশৰ অৰ্থনীতিৰ পৰিপূৰকতাৰ ওপৰত ভিত্তি কৰি উদীয়মান অৰ্থনৈতিক আৰু বিনিয়োগৰ সুযোগ অন্বেষণ কৰাৰ পোষকতা কৰে।
নেতাদ্বয়ে দ্বিপাক্ষিক সহযোগিতাৰ ক্ষেত্ৰত চলি থকা শক্তিশালী গতিৰ প্ৰতিফলন হিচাপে অধিক দ্বিপাক্ষিক বিনিয়োগৰ বাবে আহ্বান জনায়।
প্ৰধানমন্ত্ৰীদ্বয়ে অব্যৱহৃত সম্ভাৱনা মুকলি কৰাৰ লগতে তথা অন্তৰ্ভুক্তিমূলক আৰু বহনক্ষম অৰ্থনৈতিক বিকাশত অৰিহণা যোগোৱাৰ উদ্দেশ্যে ভাৰত আৰু নিউজিলেণ্ডৰ মাজত বাণিজ্যিক আৰু বিনিয়োগ সম্পৰ্ক বৃদ্ধি কৰিবলৈ সন্মত হয়।
প্ৰধানমন্ত্ৰীদ্বয়ে গভীৰ অৰ্থনৈতিক একত্ৰীকৰণৰ লক্ষ্যত উপনীত হ’বলৈ এক সন্তুলিত, উচ্চাকাংক্ষী, ব্যাপক আৰু পাৰস্পৰিকভাৱে লাভজনক বাণিজ্য চুক্তিৰ বাবে এফটিএ আলোচনাৰ শুভাৰম্ভক আদৰণি জনায়। এক ব্যাপক বাণিজ্য চুক্তিয়ে বাণিজ্য আৰু অৰ্থনৈতিক সহযোগিতা বৃদ্ধিৰ বাবে এক গুৰুত্বপূৰ্ণ সুযোগ প্ৰদান কৰা সন্দৰ্ভত নেতাসকলে সহমত পোষণ কৰে। প্ৰতিখন দেশৰ শক্তিৰ সদ্ব্যৱহাৰ কৰি, তেওঁলোকৰ নিজ নিজ উদ্বেগৰ সমাধান কৰি আৰু প্ৰত্যাহ্বানৰ মোকাবিলা কৰি, এখন দ্বিপাক্ষিক বাণিজ্য চুক্তিয়ে পাৰস্পৰিকভাৱে লাভজনক বাণিজ্য আৰু বিনিয়োগৰ বিকাশক উৎসাহিত কৰিব পাৰে, যাৰ ফলত দুয়োপক্ষৰ বাবে ন্যায়সংগত লাভ আৰু পৰিপূৰকতা নিশ্চিত হয়। নেতাসকলে এই আলোচনাবোৰ যিমান সোনকালে সম্ভৱ যুক্তিসংগতভাৱে সমাধানৰ দিশে লৈ যোৱাৰ বাবে জ্যেষ্ঠ প্ৰতিনিধিসকলক মনোনীত কৰিবলৈ প্ৰতিশ্ৰুতিবদ্ধ হয়।
‘এফটিএ’ আলোচনাৰ পৰিপ্ৰেক্ষিতত, নেতাদ্বয়ে ‘ডিজিটেল পেমেণ্ট খণ্ড’ত সহযোগিতা শীঘ্ৰে ৰূপায়ণৰ অন্বেষণ কৰিবলৈ দুয়ো পক্ষৰ সংশ্লিষ্ট কৰ্তৃপক্ষৰ মাজত আলোচনা কৰিবলৈ সন্মত হয়।
প্ৰধানমন্ত্ৰীদ্বয়ে ২০২৪ চনত স্বাক্ষৰিত ‘শুল্ক সহযোগিতা ব্যৱস্থা’(চিচিএ)ৰ অধীনত ‘অনুমোদিত অৰ্থনৈতিক অপাৰেটৰ পাৰস্পৰিক স্বীকৃতি ব্যৱস্থা’ (এইঅ’-এমআৰএ) স্বাক্ষৰক আদৰণি জনায়। ইয়াৰ ফলত শুল্ক কৰ্তৃপক্ষৰ মাজত ঘনিষ্ঠ সহযোগিতাৰ জৰিয়তে দুয়ো দেশৰ নিজ নিজ বিশ্বাসী ব্যৱসায়ীসকলৰ দ্বাৰা দুয়োখন দেশৰ মাজত সামগ্ৰীৰ চলাচল সহজ হৈ উঠাৰ লগতে দ্বিপাক্ষিক বাণিজ্য বৃদ্ধি পাব।
নেতাদ্বয়ে উদ্যান পালন আৰু বনবিদ্যাৰ ক্ষেত্ৰত নতুন সহযোগিতাক আদৰণি জনায়, যাৰ ভিতৰত আছেঃ জ্ঞান আৰু গৱেষণাৰ আদান-প্ৰদান, শস্য চপোৱাৰ পিছৰ আৰু বিপণন আন্তঃগাঁথনিৰ বিকাশৰ জৰিয়তে দ্বিপাক্ষিক সহযোগিতা বৃদ্ধি কৰাৰ উদ্দেশ্য উদ্যান বিদ্যা সন্দৰ্ভত বুজাবুজিৰ চুক্তিত স্বাক্ষৰ কৰা আৰু নীতি সংলাপ আৰু কাৰিকৰী আদান-প্ৰদানক উৎসাহিত কৰা বনবিদ্যা সহযোগিতাৰ ওপৰত এক অভিপ্ৰায় পত্ৰ স্বাক্ষৰ কৰা।
নেতাদ্বয়ে অৰ্থনৈতিক বিকাশ সৃষ্টি কৰা, ব্যৱসায়িক সম্পৰ্ক বৃদ্ধি কৰা আৰু দুয়োখন দেশৰ জনসাধাৰণৰ মাজত অধিক বুজাবুজি সৃষ্টি কৰাৰ ক্ষেত্ৰত পৰ্যটনৰ ইতিবাচক ভূমিকাক স্বীকৃতি দিয়ে। তেওঁলোকে ভাৰত আৰু নিউজিলেণ্ডৰ মাজত পৰ্যটকৰ বৰ্ধিত প্ৰবাহক আদৰণি জনায়। তেওঁলোকে ‘ভাৰত-নিউজিলেণ্ড বিমান সেৱা চুক্তি’ৰ শেহতীয়া অৱস্থিতিক প্ৰশংসা কৰে আৰু দুয়োখন দেশৰ মাজত পোনপটীয়া (নন-ষ্টপ) বিমান সেৱা আৰম্ভ কৰাৰ বাবে তেওঁলোকৰ বিমান সংস্থাক উৎসাহিত কৰিবলৈ সন্মত হয়।
ৰাজনৈতিক, প্ৰতিৰক্ষা আৰু নিৰাপত্তা সহযোগিতা:
প্ৰধানমন্ত্ৰীদ্বয়ে সংসদীয় আদান-প্ৰদানৰ তাৎপৰ্যক স্বীকৃতি দিয়ে আৰু দুয়োখন দেশৰ মাজত সংসদীয় প্ৰতিনিধি দলৰ নিয়মীয়া ভ্ৰমণক উৎসাহিত কৰে।
প্ৰধানমন্ত্ৰীদ্বয়ে বিগত শতিকাত সমগ্ৰ বিশ্বতে পৰস্পৰৰ সৈতে যুঁজ দিয়া আৰু সেৱা আগবঢ়োৱা ভাৰতীয় আৰু নিউজিলেণ্ডৰ সেনাবাহিনীৰ কৰ্মীসকলৰ ত্যাগৰ অংশীদাৰী ইতিহাসৰ কথা স্বীকাৰ কৰে।
প্ৰধানমন্ত্ৰীদ্বয়ে সামৰিক অনুশীলন, প্ৰাধিকাৰী মহাবিদ্যালয়ৰ বিনিময়, নৌ-জাহাজৰ নিয়মীয়া ‘পৰ্ট কল’ আৰু প্ৰতিৰক্ষা বাহিনীৰ উচ্চ পৰ্যায়ৰ প্ৰতিনিধি দলৰ মত-বিনিময়কে ধৰি প্ৰতিৰক্ষাৰ ক্ষেত্ৰত নিৰন্তৰ অগ্ৰগতিক আদৰণি জনায়। তেওঁলোকে স্মৰণ কৰে যে ভাৰতীয় নৌ সেনাৰ জাহাজ ‘তাৰিনী’য়ে ২০২৪ চনৰ ডিচেম্বৰ মাহত নিউজিলেণ্ডৰ ক্ৰিষ্টচাৰ্চৰ লিটলটনত এটা ‘পৰ্ট কল’ কৰিছিল। তেওঁলোকে ৰয়েল নিউজিলেণ্ড নৌসেনাৰ জাহাজ ‘এইচএমএনজেডএছ তে কাহা’ই মুম্বাইত আগন্তুক কৰিব লগা ‘পৰ্ট কল’ৰ কথাও উল্লেখ কৰে।
দুয়োগৰাকী নেতাই প্ৰতিৰক্ষা সহযোগিতাৰ বাবে ‘ভাৰত-নিউজিলেণ্ড বুজাবুজিচুক্তি’ স্বাক্ষৰিত হোৱা কথাক আদৰণি জনায়। ই দ্বিপাক্ষিক প্ৰতিৰক্ষা সহযোগিতা অধিক শক্তিশালী কৰিব আৰু নিয়মীয়া দ্বিপাক্ষিক প্ৰতিৰক্ষা সম্পৰ্ক স্থাপন কৰিব। দুয়োপক্ষই যোগাযোগৰ সাগৰীয় পথসমূহৰ সুৰক্ষা আৰু নিৰাপত্তা নিশ্চিত কৰাৰ প্ৰয়োজনীয়তাৰ কথা উল্লেখ কৰে আৰু সামুদ্ৰিক সুৰক্ষা বৃদ্ধিৰ বিষয়ে আলোচনা কৰাৰ বাবে নিয়মীয়া আলোচনাৰ প্ৰয়োজনীয়তা সম্পৰ্কে সন্মত হয়।
নিউজিলেণ্ডে ভাৰতৰ ‘সংযুক্ত সামুদ্ৰিক বাহিনী’ত যোগদান কৰাৰ সিদ্ধান্তক আদৰণি জনায়। দুয়োগৰাকী নেতাই ‘কমাণ্ড টাস্ক ফ'ৰ্চ ১৫০’ৰ ‘নিউজিলেণ্ড কমাণ্ড’ৰ সময়ত প্ৰতিৰক্ষা সম্পৰ্কৰ অগ্ৰগতিক আদৰণি জনায়।
দুয়োগৰাকী নেতাই পাৰস্পৰিক ভিত্তিত প্ৰতিৰক্ষা মহাবিদ্যালয়কে ধৰি বিষয়াসকলৰ নিয়মীয়া প্ৰশিক্ষণ কাৰ্যসূচীৰ বিনিময়ৰ প্ৰশংসা কৰে। দুয়োপক্ষই বৰ্ধিত সামৰ্থ্য নিৰ্মাণত সহযোগিতা কৰাৰ বাবে সন্মতি প্ৰকাশ কৰে।
প্ৰধানমন্ত্ৰী লাক্সনে ‘ভাৰত-প্ৰশান্ত মহাসাগৰীয় উদ্যোগ’ (আইপিঅ'আই)ত যোগদান কৰিবলৈ নিউজিলেণ্ডৰ আগ্ৰহ ব্যক্ত কৰে। প্ৰধানমন্ত্ৰী মোদীয়ে সামুদ্ৰিক ক্ষেত্ৰখন পৰিচালনা, সংৰক্ষণ আৰু ধৰাবাহিকতা বৰ্তাই ৰখাৰ চেষ্টা কৰা সমমনস্ক দেশসমূহৰ সৈতে এই অংশীদাৰিত্বলৈ নিউজিলেণ্ডক আদৰণি জনায়। গুজৰাটৰ লোথালত স্থাপিত ‘ৰাষ্ট্ৰীয় সামুদ্ৰিক ঐতিহ্য চৌহদ’ (এনএমএইচচি)ৰ বিশেষজ্ঞসকলৰ মাজত আলোচনাৰ সৈতে ভাৰত আৰু নিউজিলেণ্ডৰ মাজত সামুদ্ৰিক ৰাষ্ট্ৰ হিচাপে অধিক সহযোগিতাৰ অন্বেষণ কৰা হৈছে।
বিজ্ঞান আৰু প্ৰযুক্তি আৰু দুৰ্যোগ ব্যৱস্থাপনাত সহযোগিতাঃ
দুয়োগৰাকী নেতাই দ্বিপাক্ষিক অংশীদাৰিত্বৰ এক গুৰুত্বপূৰ্ণ স্তম্ভ হিচাপে গৱেষণা, বৈজ্ঞানিক সংযোগ, প্ৰযুক্তি অংশীদাৰিত্ব আৰু উদ্ভাৱনৰ তাৎপৰ্য উল্লেখ কৰে আৰু পাৰস্পৰিক স্বাৰ্থত এনে সুযোগসমূহ অন্বেষণ কৰিবলৈ আহ্বান জনায়। দুয়োপক্ষই ব্যৱসায় আৰু উদ্যোগসমূহৰ মাজত ঘনিষ্ঠ সহযোগিতাৰ জৰিয়তে চিনাক্ত ক্ষেত্ৰত প্ৰযুক্তিৰ বিকাশ আৰু বাণিজ্যিকীকৰণৰ বাবে শক্তিশালী সহযোগিতাৰ প্ৰয়োজনীয়তাত গুৰুত্ব আৰোপ কৰে। দুয়োপক্ষই জলবায়ু পৰিৱৰ্তন আৰু কাৰ্বনৰ নিম্ন নিৰ্গমন জলবায়ু স্থিতিস্থাপক অৰ্থনীতিলৈ পৰিৱৰ্তনৰ দ্বাৰা উপস্থাপন কৰা তেওঁলোকৰ অৰ্থনীতিৰ বাবে প্ৰত্যাহ্বানসমূহক স্বীকৃতি দিয়ে। প্ৰধানমন্ত্ৰী লাক্সনে ‘আন্তঃৰাষ্ট্ৰীয় সৌৰ মিত্ৰজোঁট’ (আইএছএ)ত ভাৰতৰ নেতৃত্বক আদৰণি জনায় আৰু ২০২৪ চনৰ পৰা সদস্য হিচাপে নিউজিলেণ্ডৰ শক্তিশালী সমৰ্থনৰ কথা দোহাৰে। প্ৰধানমন্ত্ৰী মোদীয়ে নিউজিলেণ্ডক দুৰ্যোগ স্থিতিস্থাপক আন্তঃগাঁথনিৰ বাবে মিত্ৰজোঁটত যোগদান কৰাৰ সিদ্ধান্তক আদৰণি জনায়, যাৰ উদ্দেশ্য হৈছে ‘বহনক্ষম উন্নয়ন লক্ষ্য’ (এছডিজি), পেৰিছ জলবায়ু চুক্তি আৰু দুৰ্যোগ বিপদাশংকা হ্ৰাসৰ বাবে ‘চেন্দাই ফ্ৰেমৱৰ্ক’ৰ উদ্দেশ্য আহৰণ কৰাৰ বাবে প্ৰণালী আৰু আন্তঃগাঁথনিসমূহ স্থিতিস্থাপক কৰি তোলা।
দুয়োগৰাকী নেতাই ভাৰত আৰু নিউজিলেণ্ডৰ প্ৰাসংগিক কৰ্তৃপক্ষৰ মাজত ভূমিকম্পৰ ক্ষতি প্ৰশমিতকৰণৰ ক্ষেত্ৰত সহযোগিতা চুক্তিৰ দিশত আগবঢ়া কামক আদৰণি জনায়, যাৰ ফলত ভূমিকম্পৰ প্ৰস্তুতি, জৰুৰীকালীন সঁহাৰি প্ৰণালী আৰু সামৰ্থ্য নিৰ্মাণৰ ক্ষেত্ৰত অভিজ্ঞতাৰ আদান-প্ৰদানত সহায়ক হ'ব।
শিক্ষা, গতিশীলতা, ক্ৰীড়া আৰু মানুহৰ সৈতে সম্পৰ্ক:
দুয়োগৰাকী প্ৰধানমন্ত্ৰীয়ে সন্মত হয় যে ভাৰত আৰু নিউজিলেণ্ডৰ মাজত বৰ্ধিত শিক্ষা আৰু সামূহিক সম্পৰ্ক অধিক শক্তিশালী কৰাৰ যথেষ্ট সম্ভাৱনা আছে। তেওঁলোকে বিজ্ঞান, উদ্ভাৱন, নতুন আৰু উদীয়মান প্ৰযুক্তিৰ ক্ষেত্ৰতো পাৰস্পৰিক স্বাৰ্থৰ ক্ষেত্ৰত গুৰুত্ব দি ভৱিষ্যতমুখী অংশীদাৰিত্ব গঢ়ি তুলিবলৈ দুয়োখন দেশৰ শৈক্ষিক প্ৰতিষ্ঠানসমূহক উৎসাহিত কৰে।
নেতাদ্বয়ে নিউজিলেণ্ডত মান সম্পন্ন শিক্ষা কাৰ্যসূচী বিচৰা ভাৰতীয় শিক্ষাৰ্থীসকলৰ বাবে অধিক সুযোগ সৃষ্টিত উদগনি দিয়ে। তেওঁলোকে বিজ্ঞান, উদ্ভাৱন আৰু নতুন আৰু উদীয়মান প্ৰযুক্তিকে ধৰি খণ্ডসমূহত সম্প্ৰসাৰিত ব্যস্ততাক সমৰ্থন কৰাৰ বাবে দক্ষ কৰ্মচাৰীৰ দক্ষতা বিকাশ আৰু গতিশীলতাৰ তাৎপৰ্যৰ কথা উল্লেখ কৰে। দুয়োগৰাকী নেতাই বাণিজ্য চুক্তিৰ আলোচনাৰ পৰিপ্ৰেক্ষিতত সন্মত হয়, যিটো নেতাদ্বয়ে আৰম্ভ কৰিবলৈ সন্মত হৈছে, লগতে দুয়োখন দেশৰ মাজত পেছাদাৰী আৰু দক্ষ শ্ৰমিকসকলৰ গতিশীলতা সহজ কৰি তোলাৰ ব্যৱস্থাত আলোচনা আৰম্ভ কৰাৰ লগতে অনিয়মীয়া প্ৰব্ৰজনৰ বিষয়টো সমাধান কৰা হয়।
নেতাদ্বয়ে ভাৰতীয় শিক্ষা মন্ত্ৰালয় আৰু নিউজিলেণ্ডৰ শিক্ষা মন্ত্ৰালয়ৰ মাজত পুনশ্চৰ্যাকৃত শিক্ষা সহযোগিতা ব্যৱস্থাপনা স্বাক্ষৰিত কৰা কাৰ্যক আদৰণি জনায়। এই ব্যৱস্থাই দ্বিপাক্ষিক শিক্ষা সম্পৰ্ক শক্তিশালী কৰাৰ আধাৰ হিচাপে ভাৰত আৰু নিউজিলেণ্ডৰ সংশ্লিষ্ট শিক্ষা ব্যৱস্থা সম্পৰ্কীয় তথ্যৰ নিৰন্তৰ আদান-প্ৰদানত সহায় কৰিব। নেতাদ্বয়ে উল্লেখ কৰে যে ভাৰত আৰু নিউজিলেণ্ডে বিশেষকৈ ক্ৰিকেট, হকী আৰু অন্যান্য অলিম্পিক ক্ৰীড়াত ঘনিষ্ঠ ক্ৰীড়া সম্পৰ্ক উপভোগ কৰে। তেওঁলোকে দেশসমূহৰ মাজত অধিক ক্ৰীড়া সম্পৰ্ক আৰু সহযোগিতা বৃদ্ধিৰ বাবে ক্ৰীড়া ক্ষেত্ৰত সহযোগিতা চুক্তি স্বাক্ষৰিতকৰণক আদৰণি জনায়। তেওঁলোকে ভাৰত আৰু নিউজিলেণ্ডৰ মাজত ১০০ বছৰৰ ক্ৰীড়া সম্পৰ্কক স্বীকৃতি আৰু উদযাপন কৰাৰ বাবে ২০২৬ চনত পৰিকল্পনা কৰা "ক্ৰীড়া একতা" শীৰ্ষক অনুষ্ঠানসমূহকো আদৰণি জনায়।
প্ৰধানমন্ত্ৰীয়ে ভাৰত আৰু নিউজিলেণ্ডত পৰম্পৰাগত ঔষধৰ শক্তিশালী প্ৰণালীৰ গুৰুত্বৰ কথা স্বীকাৰ কৰে আৰু তথ্য আদান-প্ৰদান আৰু সৰ্বশ্ৰেষ্ঠ পদ্ধতি আৰু বিশেষজ্ঞসকলৰ ভ্ৰমণকে ধৰি সহযোগিতাৰ সাম্ভাব্য ক্ষেত্ৰসমূহ বুজিবলৈ আৰু অন্বেষণ কৰিবলৈ বিজ্ঞান আৰু গৱেষণা বিশেষজ্ঞকে ধৰি বিশেষজ্ঞসকলৰ মাজত হোৱা আলোচনাক আদৰণি জনায়।
দুয়োগৰাকী প্ৰধানমন্ত্ৰীয়ে যোগ আৰু ভাৰতীয় সংগীত আৰু নৃত্যৰ ক্ষেত্ৰত নিউজিলেণ্ডবাসীৰ মাজত বৰ্ধিত আগ্ৰহৰ লগতে ভাৰতীয় উৎসৱসমূহ মুকলিমূৰীয়াকৈ পালন কৰাত গুৰুত্ব প্ৰদান কৰে। তেওঁলোকে সংগীত, নৃত্য, থিয়েটাৰ, চলচ্চিত্ৰ আৰু উৎসৱকে ধৰি দ্বিপাক্ষিক সম্পৰ্কৰ অধিক প্ৰসাৰক উৎসাহিত কৰে।
আঞ্চলিক আৰু বহুপাক্ষিক ক্ষেত্ৰত সহযোগিতা:
দুয়োগৰাকী প্ৰধানমন্ত্ৰীয়ে এক মুক্ত, সামগ্ৰিক, স্থিৰ আৰু সমৃদ্ধিশালী ভাৰত-প্ৰশান্ত মহাসাগৰীয় অঞ্চলক সমৰ্থন কৰাৰ প্ৰতি তেওঁলোকৰ প্ৰতিশ্ৰুতিবদ্ধতা পুনৰ ব্যক্ত কৰে য'ত সাৰ্বভৌমত্ব আৰু আঞ্চলিক অখণ্ডতাক সন্মান জনোৱা হয়।
নেতাদ্বয়ে পূব এছিয়া সন্মিলন, আছিয়ান প্ৰতিৰক্ষা মন্ত্ৰীৰ আৰু আছিয়ান নেতৃত্বাধীন মঞ্চৰ দৰে ভাৰত আৰু নিউজিলেণ্ডৰ মাজত বিভিন্ন আঞ্চলিক মঞ্চত সহযোগিতাৰ কথা উল্লেখ কৰে। নেতাদ্বয়ে ‘ভাৰত-প্ৰশান্ত মহাসাগৰীয় অঞ্চল’ৰ নিৰাপত্তা আৰু সমৃদ্ধিৰ বাবে এই আঞ্চলিক সংস্থা আৰু আছিয়ান কেন্দ্ৰীয়তাৰ গুৰুত্ব পুনৰ নিশ্চিত কৰে আৰু অঞ্চলটোত শান্তি আৰু স্থিৰতা বৰ্তাই ৰখা সকলো পক্ষৰ ক্ষেত্ৰত গুৰুত্ব আৰোপ কৰে।
দুয়োগৰাকী নেতাই এক ৰাষ্ট্ৰসংঘত কেন্দ্ৰীভূত, সমসাময়িক বাস্তৱতাৰ প্ৰতিফলন, বিশ্বব্যাপী প্ৰত্যাহ্বানৰ মোকাবিলা কৰাৰ এক মুখ্য কাৰক হিচাপে এক কাৰ্যকৰী বহুপাক্ষিক ব্যৱস্থাত গুৰুত্ব আৰোপ কৰে। দুয়োপক্ষই ৰাষ্ট্ৰসংঘৰ সদস্যপদ সম্প্ৰসাৰণেৰে নিৰাপত্তা পৰিষদকে ধৰি ৰাষ্ট্ৰসংঘৰ সংস্কাৰৰ প্ৰয়োজনীয়তাত গুৰুত্ব আৰোপ কৰে, যাতে ইয়াক অধিক প্ৰতিনিধিত্বমূলক, বিশ্বাসযোগ্য আৰু প্ৰভাৱশালী কৰা হয়। নিউজিলেণ্ডে সংস্কাৰিত ৰাষ্ট্ৰসংঘৰ নিৰাপত্তা পৰিষদত স্থায়ী সদস্যপদৰ বাবে ভাৰতৰ প্ৰাৰ্থিত্বক সমৰ্থন জনায়। দুয়োপক্ষই বহুপাক্ষিক মঞ্চত পৰস্পৰৰ প্ৰাৰ্থিত্বৰ প্ৰতি পাৰস্পৰিক সমৰ্থন আগবঢ়াব পৰাৰ সম্ভাৱনা অন্বেষণ কৰিবলৈ সন্মত হয়।
দুয়োগৰাকী নেতাই বিশ্বজোৰা পাৰমাণৱিক নিৰস্ত্ৰীকৰণ আৰু অপ্ৰসাৰণ ব্যৱস্থা বৰ্তাই ৰখাত গুৰুত্ব আৰোপ কৰে আৰু ভাৰতৰ পৰিচ্ছন্ন শক্তি লক্ষ্য আৰু ইয়াৰ অপ্ৰসাৰণ প্ৰমাণপত্ৰৰ বাবে ভৱিষ্যতবাণীৰ পৰিপ্ৰেক্ষিতত পাৰমাণৱিক যোগানকৰ্তা গোটত যোগদান কৰাৰ ভাৰতৰ মূল্য স্বীকাৰ কৰে।
দুয়োগৰাকী নেতাই মধ্যপ্ৰাচ্যত শান্তি আৰু স্থিৰতাৰ বাবে তেওঁলোকৰ দৃঢ় সমৰ্থন পুনৰ নিশ্চিত কৰে আৰু ২০২৫ চনৰ জানুৱাৰীত বন্দীসকলৰ মুক্তি আৰু যুদ্ধবিৰতিৰ চুক্তিক আদৰণি জনায়। তেওঁলোকে সকলো বন্দীক মুক্তি দিয়া আৰু সমগ্ৰ গাজাত দ্ৰুত, সুৰক্ষিত আৰু বাধাহীন মানৱীয় প্ৰৱেশাধিকাৰকে ধৰি স্থায়ী শান্তি সুৰক্ষিত কৰাৰ বাবে আলোচনা অব্যাহত ৰখাৰ বাবে তেওঁলোকৰ আহ্বান পুনৰ দোহাৰে। দুয়োগৰাকী নেতাই এক মীমাংসামূলক দ্বি-দেশীয় সমাধানত গুৰুত্ব আৰোপ কৰে, যাৰ ফলত এক সাৰ্বভৌম, কাৰ্যকৰী আৰু স্বাধীন ৰাষ্ট্ৰ পেলেষ্টাইন স্থাপন কৰা হয়, আৰু ইজৰাইলৰ সৈতে শান্তি আৰু নিৰাপত্তাৰ সৈতে একেলগে সুৰক্ষিত আৰু পাৰস্পৰিক ভাৱে স্বীকৃত সীমাৰ ভিতৰত বাস কৰিব পাৰিব।
নেতাদ্বয়ে ইউক্ৰেইনৰ যুদ্ধ সন্দৰ্ভত মত বিনিময় কৰে আৰু আন্তৰ্জাতিক আইনৰ প্ৰতি সন্মান, ৰাষ্ট্ৰসংঘৰ চাৰ্টাৰৰ নীতি আৰু আঞ্চলিক অখণ্ডতা আৰু সাৰ্বভৌমত্বৰ ওপৰত আধাৰিত এক ন্যায়সঙ্গত আৰু স্থায়ী শান্তিৰ প্ৰতি সমৰ্থন ব্যক্ত কৰে।
দুয়োগৰাকী নেতাই সকলো ধৰণৰ সন্ত্ৰাসবাদক সম্পূৰ্ণ নিন্দা কৰাৰ লগতে সীমান্তপাৰৰ সন্ত্ৰাসবাদত ভেশচনকাৰীৰ ৰূপত সন্ত্ৰাসবাদীক ব্যৱহাৰৰ কথা দোহাৰে। দুয়োখন দেশে ৰাষ্ট্ৰসংঘৰ দ্বাৰা নিষিদ্ধ সন্ত্ৰাসবাদী সংগঠন আৰু ব্যক্তিবোৰৰ বিৰুদ্ধে তাৎক্ষণিক, নিৰন্তৰ, পৰিমাপযোগ্য আৰু দৃঢ় পদক্ষেপ লোৱাৰ জৰুৰী প্ৰয়োজনীয়তাত গুৰুত্ব আৰোপ কৰে। তেওঁলোকে সন্ত্ৰাসবাদৰ বিত্তীয় নেটৱৰ্ক আৰু সুৰক্ষিত আশ্ৰয়স্থলসমূহ ব্যাহত কৰা, অনলাইনকে ধৰি সন্ত্ৰাসবাদী আন্তঃগাঁথনি ধ্বংস কৰা আৰু সন্ত্ৰাসবাদৰ অপৰাধীসকলক দ্ৰুততাৰে ন্যায়ৰ সন্মুখীন কৰাৰ আহ্বান জনায়। দুয়োগৰাকী নেতাই দ্বিপাক্ষিক আৰু বহুপাক্ষিক প্ৰণালীৰ জৰিয়তে সন্ত্ৰাসবাদ আৰু হিংসাত্মক উগ্ৰবাদৰ বিৰুদ্ধে যুঁজ দিয়াৰ ক্ষেত্ৰত সহযোগিতা আগবঢ়াবলৈ সন্মত হয়।
দুয়োগৰাকী প্ৰধানমন্ত্ৰীয়ে চলিত দ্বিপাক্ষিক সহযোগিতাৰ অগ্ৰগতিৰ কথা সন্তোষজনকভাৱে উল্লেখ কৰে আৰু পাৰস্পৰিক লাভালাভৰ লগতে ভাৰত-প্ৰশান্ত মহাসাগৰীয় অঞ্চলৰ লাভৰ বাবে দ্বিপাক্ষিক অংশীদাৰিত্ব অধিক শক্তিশালী আৰু গভীৰ কৰাৰ বাবে তেওঁলোকৰ প্ৰতিশ্ৰুতিবদ্ধতা পুনৰ ব্যক্ত কৰে। তেওঁলোকে দ্বিপাক্ষিক সম্পৰ্ক গভীৰ কৰাৰ সম্ভাৱনা অন্বেষণ আৰু সেউজ আৰু কৃষি প্ৰযুক্তিৰ ক্ষেত্ৰতো সহযোগিতাৰ নতুন পথ অন্বেষণ কৰিবলৈ আহ্বান জনায়।
প্ৰধানমন্ত্ৰী লাক্সনে প্ৰধানমন্ত্ৰী মোদী, চৰকাৰ আৰু ভাৰতৰ জনসাধাৰণক তেওঁৰ চৰকাৰী ভাৰত ভ্ৰমণৰ সময়ত তেওঁৰ লগতে তেওঁৰ প্ৰতিনিধি দলৰ সদস্যসকলক আগবঢ়োৱা উষ্মতা আৰু আতিথ্যৰ বাবে ধন্যবাদ জ্ঞাপন কৰে। প্ৰধানমন্ত্ৰী লাক্সনে প্ৰধানমন্ত্ৰী মোদীক নিউজিলেণ্ডলৈ পাৰস্পৰিক ভ্ৰমণৰ বাবে আমন্ত্ৰণ জনায়।
