موزمبیق کے صدر جناب فلپ نیوسی،تیمور لیستے کے صدرجناب راموس ہورتا ، چیک جمہوریہ کے وزیر اعظم جناب پیٹر فیالا، گجرات کے گورنر آچاریہ دیوورت جی، یہاں کے مقبول وزیر اعلی بھوپیندر بھائی پٹیل، ملک اور بیرون ملک سے آئے ہوئے تمام مہمانان خصوصی اور دیگر معززین، خواتین و حضرات!
آپ سبھی کو 2024 کے لیے بہت سی نیک خواہشات! حال ہی میں ہندوستان کی آزادی کے 75 سال مکمل ہوئے ہیں۔ اور اب بھارت اگلے 25 سال کے ہدف پر کام کر رہا ہے۔ ہم نے ہندوستان کو اس وقت تک ترقی یافتہ بنانے کا ہدف مقرر کیا ہے جب ہندوستان اپنی آزادی کے 100 سال کا جشن منائے گا۔ اور اس لیے یہ 25 سالہ دور ہندوستان کا امرت کال ہے۔ یہ نئے خوابوں، نئی قراردادوں اور ہمیشہ نئی کامیابیوں کا دور ہے۔ اس امرت کال میں یہ پہلا درخشاں گجرات گلوبل سمٹ منعقد ہو رہا ہے۔ اور اسی وجہ سے اس کی اہمیت مزید بڑھ گئی ہے۔ اس چوٹی کانفرنس میں آنے والے 100 سے زیادہ ممالک کے نمائندے ہندوستان کی ترقی کے سفر میں اہم معاون ہیں۔ میں آپ سب کو خوش آمدید کہتاہوں اور آپ کا استقبال کرتا ہوں۔
دوستو!
ہمارے لیے یہ بہت خوشی کی بات ہے کہ متحدہ عرب امارات کے صدر، میرے بھائی… عزت مآب شیخ محمد بن زاید اس تقریب میں شرکت کر رہے ہیں۔ درخشاں گجرات میں اس چوٹی کانفرنس میں مہمان خصوصی کے طور پر ان کی موجودگی ہندوستان اور متحدہ عرب امارات کے درمیان روز بروز مضبوط ہونے والے خوشگوار تعلقات کی علامت ہے۔ ہم نے کچھ عرصہ پہلے ان کے خیالات سنے۔ ہندوستان میں ان کا اعتماد، ان کی حمایت گرمجوشی پر مبنی ہے۔ جیسا کہ انہوں نے کہا – درخشاں گجرات سمٹ اقتصادی ترقی اور سرمایہ کاری سے متعلق معلومات اور تجربات کا تبادلہ کرنے کا عالمی پلیٹ فارم بن گیا ہے۔ اس چوٹی کانفرنس میں بھی ہندوستان اور متحدہ عرب امارات نے فوڈ پارکس کی ترقی، قابل تجدید توانائی کے شعبے میں تعاون بڑھانے اور صحت کی جدید دیکھ بھال میں سرمایہ کاری کے لیے کئی اہم معاہدوں پر دستخط کیے ہیں۔ ہندوستان کے بندرگاہ کے بنیادی ڈھانچے میں متحدہ عرب امارات کی کمپنیوں کے ذریعہ کئی ارب ڈالر کی تازہ سرمایہ کاری پر اتفاق کیا گیا ہے۔ گفٹ سٹی میں آپریشنز یو اے ای کے خودمختار ویلتھ فنڈ کے ذریعے شروع کیے جائیں گے۔ ٹرانس ورلڈ کمپنی یہاں ہوائی جہاز اور جہاز لیز پر دینے کی سرگرمیاں بھی شروع کرنے والی ہے۔ ہندوستان اور متحدہ عرب امارات نے جس طرح اپنے تعلقات کو ایک نئی بلندی پر پہنچایا ہے، اس کا بہت سا کریڈٹ میرے بھائی عزت مآب شیخ محمد بن زاید کو جاتا ہے۔
دوستو!
کل بھی موزمبیق کے صدر محترم نیوسی سے میری تفصیلی بات چیت ہوئی۔ ان کے لیے گجرات آنا پرانی یادوں کو تازہ کرنے جیسا ہے۔ صدر نیوسی آئی آئی ایم احمد آباد کے سابق طالب علم ہیں۔ یہ ہندوستان کے لیے فخر کی بات ہے کہ افریقی یونین کو ہماری جی20 صدارت کے دوران مستقل رکنیت ملی۔ صدر نیوسی کے دورہ ہندوستان سے نہ صرف ہمارے تعلقات مضبوط ہوئے ہیں بلکہ ہندوستان اور افریقہ کے درمیان اور زیادہ قربت پیدا ہوئی ہے۔
دوستو!
اس حیثیت سے چیک کے وزیر اعظم عزت مآب پیٹر فیالا کا ہندوستان کا یہ پہلا دورہ ہے، اگرچہ وہ اس سے پہلے بھی ہندوستان کا دورہ کر چکے ہیں۔ چیک ایک طویل عرصے سے درخشاں گجرات سمٹ سے منسلک ہے۔ ٹیکنالوجی، آٹوموبائل، مینوفیکچرنگ جیسے شعبوں میں ہندوستان اور چیک کے درمیان تعاون میں لگاتار اضافہ ہورہا ہے۔ عزت مآب پیٹر فیالا، مجھے یقین ہے کہ آپ کا دورہ دونوں ملکوں کے درمیان تعلقات کو مزید مستحکم کرے گا۔ ہمارے یہاں کہا جاتا ہے – اتیتھی دیوو بھو… اور یہ بطور وزیر اعظم آپ کا ہندوستان کا پہلا دورہ ہے۔ امید ہے کہ آپ یہاں سے نہایت شاندار یادیں لے کر جائیں گے۔
دوست،
میں نوبیل انعام یافتہ اور تیمور لیستے کے صدر عزت مآب راموس ہورتا کا بھی ہندوستان میں خیرمقدم کرتا ہوں۔ عزت مآب راموس ہورتا کا گاندھی نگر کا دورہ اور بھی خاص ہے۔ آپ نے مہاتما گاندھی کے عدم تشدد کے اصول کو اپنے ملک کی آزادی کی جدوجہد سے وابستہ کیا ہے۔ تیمور-لیستے کے ساتھ ہمارا تعاون آسیان اور ہند-بحرالکاہل خطے میں بہت اہم ہے۔
دوستو
حال ہی میں درخشاں گجرات گلوبل سمٹ کے 20 سال مکمل ہوئے ہیں۔ پچھلے 20 سال میں اس سربراہ اجلاس سے نئے خیالات کو ایک پلیٹ فارم ملا ہے۔ اس کی وجہ سے سرمایہ کاری اور منافع کے نئے باب وضع ہوئے ہیں اور اب اس بار درخشاں گجرات گلوبل سمٹ کا تھیم ہے - گیٹ وے ٹو دی فیوچر... 21ویں صدی کی دنیا کا مستقبل ہماری مشترکہ کوششوں سے ہی روشن ہوگا۔ ہندوستان نے اپنی جی--20 صدارت کے دوران دنیا کے مستقبل کے لیے ایک خاکہ بھی فراہم کیا ہے۔ ہم درخشاں گجرات گلوبل سمٹ کے اس ایڈیشن میں بھی اس وژن کو مزید آگے لے جا رہے ہیں۔ ہندوستان آئی –ٹو-یو-ٹو اور دیگر کثیر جہتی تنظیموں کے ساتھ شراکت داری کو لگاتارمستحکم بنارہا ہے ۔ ایک کرہ ارض ، ایک کنبہ، ایک مستقبل کا اصول، عالمی فلاح و بہبود کا لازمی تقاضا ہے۔
دوستو
آج تیزی سے بدلتے ہوئے عالمی نظام میں ہندوستان ‘عالمی دوست’ کے کردار کے ساتھ آگے بڑھ رہا ہے۔ آج ہندوستان نے دنیا کو یہ اعتماد دیا ہے کہ ہم مشترکہ نشانے طے کر سکتے ہیں اور اپنے مقاصد حاصل کر سکتے ہیں۔ عالمی بہبود کے تئیں ہندوستان کا عزم، ہندوستان کی وفاداری، ہندوستان کی کوششیں اور ہندوستان کی محنت آج کی دنیا کو زیادہ محفوظ اور خوشحال بنا رہی ہے۔ دنیا ہندوستان کو اس طرح دیکھتی ہے: استحکام کا ایک اہم ستون، ایک ایسا دوست جس پر بھروسہ کیا جا سکتا ہے۔ ایک ایسا شراکت دار جو عوام پر مرکوز ترقی پر یقین رکھتا ہو۔ ایک آواز جو عالمی بھلائی پر یقین رکھتی ہے۔ عالمی جنوب کی آواز؛ عالمی معیشت میں ترقی کا ایک انجن۔ حل تلاش کرنے کے لیے ٹیکنالوجی کا مرکز۔ باصلاحیت نوجوانوں کا پاور ہاؤس۔ اور، ایک جمہوریت جو فراہمی کی ضامن ہے۔
دوستو
ہندوستان کے 1.4 ارب لوگوں کی ترجیحات اور خواہشات، انسان پر مرکوز ترقی میں ان کا یقین، اور شمولیت اور مساوات کے لیے ہماری وابستگی عالمی خوشحالی اور ترقی کی بنیاد ہیں۔ آج ہندوستان دنیا کی پانچویں بڑی معیشت ہے۔ 10 سال پہلے ہندوستان گیارہویں نمبر پر تھا۔ آج دنیا کی ہر بڑی ریٹنگ ایجنسی کا اندازہ ہے کہ اگلے چند سال میں ہندوستان دنیا کی سرکردہ تیسری معیشت بن جائے گا۔ دنیا کے لوگوں، تم جو چاہو تجزیہ کرتے رہو، میں گارنٹی دیتا ہوں کہ وہ ہو جائے گا۔ ایک ایسے وقت میں جب دنیا کئی غیر یقینی صورتحال میں گھری ہوئی ہے، ہندوستان دنیا میں امید کی ایک نئی کرن بن کر ابھرا ہے۔ بھارت کی ترجیحات بالکل واضح ہیں۔ آج ہندوستان کی ترجیح ہے ، پائیدار صنعت، بنیادی ڈھانچہ اور مینوفیکچرنگ۔ آج ہندوستان کی ترجیح ہے - نئے دور کے ہنر، مستقبل کی ٹیکنالوجی، اے آئی اور اختراع۔ آج ہندوستان کی ترجیح ہے - گرین ہائیڈروجن، قابل تجدید توانائی، سیمی کنڈکٹر۔ اس کا پورا ایکو سسٹم ہے۔ ہم درخشاں گجرات گلوبل ٹریڈ شو میں بھی ایک جھلک دیکھ سکتے ہیں۔ اور میں آپ سے گزارش کرتا ہوں کہ تجارتی شو ضرور دیکھیں۔ گجرات کے اسکول اور کالج کے طلباء بھی ضرور تشریف لائیں۔ میں نے کل اس تجارتی شو میں عزت مآب نیوسی اور عزت مآب ، راموس ہورتا کے ساتھ کافی وقت گزارا۔ اس تجارتی نمائش میں کمپنیوں نے عالمی معیار کی جدید ترین ٹیکنالوجی سے تیار کردہ مصنوعات کی نمائش کی۔ ای موبلٹی، اسٹارٹ اپس، سمندری معیشت، ماحول کے لئے ساز گار توانائی اور اسمارٹ بنیادی ڈھانچے جیسے تجارتی شوز کافی نمایاں ہیں۔ ان تمام شعبوں میں، آپ کے لیے ان میں سرمایہ کاری کرنے کے لگاتار نئے موقع پیدا ہورہے ہیں۔
دوستو
آپ سب عالمی حالات سے بخوبی واقف ہیں۔ ایسے میں، اگر آج ہندوستان کی معیشت اتنی لچک داری کا مظاہرہ کر رہی ہے، اگر آج ہندوستان کی ترقی اتنی رفتار دکھا رہی ہے، تو اس کی بڑی وجہ پچھلے 10 سال میں ڈھانچہ جاتی اصلاحات پر ہماری توجہ ہے! ان اصلاحات نے ہندوستان کی معاشی صلاحیت، استعداد اور مسابقت کو بڑھانے میں بہت اچھا کام کیا ہے۔
دوبارہ اثاثہ بندی اور آئی بی سی کے ساتھ، ہم نے ہندوستان کے بینکنگ نظام کو دنیا کے مضبوط ترین نظاموں میں سے ایک بنا دیا ہے۔ کاروبار کرنے میں آسانی پر زور دیتے ہوئے ہم نے 40 ہزار سے زیادہ تعمیلات کو ختم کر دیا ہے۔ جی ایس ٹی نے ہندوستان میں ٹیکس کے غیر ضروری جال کو ختم کردیا ہے۔ ہندوستان میں، ہم نے عالمی سپلائی چین کو متنوع بنانے کے لیے ایک بہتر ماحول بنایا ہے۔ حال ہی میں ہم نے 3 ایف ٹی اے پر دستخط کیے ہیں، تاکہ ہندوستان عالمی کاروبار کے لیے زیادہ پرکشش مقام بن سکے۔ ان میں سے ایک ایف ٹی اے پر صرف متحدہ عرب امارات کے ساتھ دستخط کیے گئے ہیں۔ ہم نے خودکار راستے سے ایف ڈی آئی کے لیے بہت سے شعبے کھولے ہیں۔ آج ہندوستان انفراسٹرکچر پر ریکارڈ سرمایہ کاری کر رہا ہے۔ پچھلے 10 سال میں ہندوستان کی سرمایہ کاری میں 5 گنا اضافہ ہوا ہے۔
دوستو،
آج، ہندوستان ماحول کے لئے سازگار توانائی اور متبادل توانائی کے ذرائع پر بھی بے مثال رفتار سے کام کر رہا ہے۔ ہندوستان کی قابل تجدید توانائی کی صلاحیت میں 3 گنا اور شمسی توانائی کی صلاحیت میں 20 گنا اضافہ ہوا ہے۔ ڈیجیٹل انڈیا مشن کی وجہ سے ہندوستان میں زندگی اور کاروبار دونوں میں تبدیلی آگئی ہے۔ پچھلے 10 سال میں، سستے فون اور سستے ڈیٹا کے ساتھ ڈیجیٹل شمولیت کا ایک نیا انقلاب آیا ہے۔ ہر گاؤں کو آپٹیکل فائبر فراہم کرنے کی مہم، 5جی کا تیزی سے پھیلاؤکے سبب عام ہندوستانیوں کی زندگی میں تبدیلی آرہی ہے۔آج ہم دنیا کا تیسرا سب سے بڑا اسٹارٹ اپ ایکو سسٹم ہیں۔ 10 سال پہلے تک ہندوستان میں تقریباً 100 اسٹارٹ اپس تھے۔ آج ہندوستان میں 1 لاکھ 15 ہزار رجسٹرڈ اسٹارٹ اپس ہیں۔ ہندوستان کی مجموعی برآمدات میں بھی ریکارڈ اضافہ ہوا ہے۔
دوستو
ہندوستان میں آنے والی یہ تبدیلی ہندوستان کے شہریوں کے رہن سہن کو بھی بہتر بنا رہی ہے اور انہیں بااختیار بنا رہی ہے۔ ہماری حکومت کے گزشتہ 5 سال میں 13.5 کروڑ سے زیادہ لوگ غربت سے باہر آئے ہیں۔ ہندوستان میں متوسط طبقے کی اوسط آمدنی مسلسل بڑھ رہی ہے۔ ہندوستان میں کام کاج کرنے والی خواتین کی تعداد میں بھی ریکارڈ اضافہ ہوا ہے۔ یہ ہندوستان کے مستقبل کے لیے بہت اچھے اشارے ہیں۔ اور اس لیے میں آپ سب سے اپیل کروں گا کہ ہندوستان کے اس ترقی کے سفر میں شامل ہوں، ہمارے ساتھ چلیں۔
دوستو
ہندوستان میں لاجسٹک اور نقل و حمل میں آسانی کے حوالے سے جدید پالیسیوں پر بھی کام کیا جا رہا ہے۔ 10 سال پہلے ہندوستان میں 74 ہوائی اڈے تھے۔ آج ہندوستان میں 149 ہوائی اڈے ہیں۔ ہندوستان کا قومی شاہراہ کا نیٹ ورک پچھلے 10 سال میں تقریباً دوگنا ہو گیا ہے۔ ہمارے میٹرو ٹرین نیٹ ورک نے 10 سال میں 3 بار سے زیادہ توسیع کی ہے۔ چاہے وہ گجرات ہو، مہاراشٹر ہو یا ہماری مشرقی ساحلی پٹی، آج انہیں مال بردار راہداریوں کے ذریعے جوڑا جا رہا ہے۔ آج ہندوستان میں کئی قومی آبی راستوں پر بیک وقت کام چل رہا ہے۔ ہندوستانی بندرگاہوں کے کام کاج کا وقت بھی آج بہت مسابقتی ہو گیا ہے۔ ہندوستان-مشرق وسطی-یورپ اقتصادی راہداری جس کا اعلان جی-20 کے دوران کیا گیا تھا، آپ سبھی سرمایہ کاروں کے لیے بھی ایک بہت بڑا کاروباری موقع ہے۔
دوستو
ہندوستان کے ہر کونے میں آپ کے لیے نئے امکانات ہیں۔ درخشاں گجرات سمٹ اس کے لیے بھی ایک گیٹ وے کی طرح ہے – گیٹ وے ٹو دی فیوچر اور آپ نہ صرف ہندوستان میں سرمایہ کاری کر رہے ہیں بلکہ نوجوان تخلیق کاروں اور صارفین کی ایک نئی نسل کو بھی تشکیل دے رہے ہیں۔ ہندوستان کی خواہش مند نوجوان نسل کے ساتھ آپ کی شراکت داری ایسے نتائج لاسکتی ہے جس کا آپ نے کبھی تصور بھی نہیں کیا ہوگا۔ اور اس یقین کے ساتھ، میں ایک بار پھر درخشاں گجرات سمٹ میں شامل ہونے پر آپ سب کا تہہ دل سے شکریہ ادا کرتا ہوں۔ اور میں آپ کو یقین دلاتا ہوں کہ آپ کے خواب 'یہ مودی کا عزم ہے'۔ تمہارے خواب جتنے بڑے ہوں گے میرا عزم اتنا ہی بڑا ہو گا۔ آؤ، خواب دیکھنے کے بہت موقع ہیں، قرارداد کو پورا کرنے کی طاقت بھی موجود ہے۔
بہت بہت شکریہ !
