মোজাম্বিক্কী রাস্ত্রপতি, শ্রী ফিলিপ ন্যুসী, তিমোর লেস্তেগী রাস্ত্রপতি, শ্রী হোজে রামোস হোর্তা, জেক রিপব্লিক্কী প্রধান মন্ত্রী, শ্রী পেতর ফ্যালা, ভিএৎনামগী উপ-প্রধান মন্ত্রী, শ্রী ত্রান লু ক্বাং, গুজরাতকী রাজ্যপাল শ্রী অচার্য়া দেবব্রত, গুজরাতকী মুখ্য মন্ত্রী, শ্রী ভুপেন্দ্র পতেলসু ঙসিগী থৌরম অসিদা অতোপ্পা মীথুংলেন কয়া অমদি ইবেম্মা অমসুং ইবুংঙোশিং!
ঐহাক্না ইং 2024 অসিগীদমক্তা পুম্নমক্কী মফমদা থম্মোই শেংনা য়াইফ পাউজেল পীজরি। ভারতনা হন্দক্তা মশাগী নিংতম্বগী চহি 75 মপুং ফাখ্রে অমসুং হৌজিক্না লৈবাক্না নিংতম্বা ফংবগী চহি চাম্মা মপুং ফারকপা ওইনা মথংগী চহি 25কী মনুংদা মশাগী পান্দমশিং ফংনবা থৱাই য়াওনা চঙশিল্লি। মসিগী চহি 25কী মতমসিদি ভারতকী অমৃত কালগী মতম্নি। মসিনা অনৌবা ৱারেপ, অপাম্বা অমসুং লেপ্তনা মায় পাকপা ঙম্বগী মতম অমা তাক্লি। অমৃত কালগী মনুংদা পাংথোকখিবা অহানবা ভাইব্রেন্ত গুজরাত সম্মিৎকী মরু ওইবা য়াম্না লৈখি। সম্মিৎ অসিদা ঐখোয়গা শরুক য়ামিন্নরিবা লৈবাক 100 হেনবগী মীহুৎশিং অসিদি ভারতকী চাউখৎ থৌরাংগী খোঙজেলগী মমল নাইদ্রবা খোঙলোইশিংনি। ঐহাক্না পুম্নমকপু তরাম্না ওকচবগা লোয়ননা থম্মোই শেংনা থাগৎচরি।
মরুপশিং,
য়ুনাইতেদ অরাব ইমিরেৎসকী রাস্ত্রপতি, ঐচ.আর.ঐচ. শৈখ মোহম্মদ বিন জায়েদ অল নাহ্যান্না সম্মিৎ অসিদা শরুক য়াবনা ঐখোয়দা য়াম্না নুংঙাইবা অমা ফাওহল্লি। মহাক্না থৌরম মপু ওইনা শরুক য়াবসিনা ভারত অমসুং UAEগী মরীনা মপাঙ্গল হেন্না কনখৎলকপগী ময়েক লারবা খুদম অমা ওইরি। ঐখোয়না ঙৈহাক্কী মমাংদা মহাক্কী ৱাখল্লোন তাখ্রে। মহাক্না ভারতকীদমক্তা খল্লিবা ৱাখল্লোন অমসুং শৌগৎলিবা অসিবু ঐখোয়না য়াম্না লুনা লৌজৈ। মহাক্না হায়খিবগী মতুং ইন্না, ভাইব্রেন্ত গুজরাত গ্লোবেল সম্মিৎ অসিনা মালেমগী শেন্মিৎলোনগী চাউখৎ থৌরাং অমসুং ইনভেস্তমেন্তকা মরী লৈনবা ৱারী-ৱাতাইগী মালেমগী ফম্বাক ওইরক্লি। সম্মিৎ অসিগী মনুংদা ভারত-UAEনা ফুদ পার্ক শেমগৎপা, রিন্যুএবল ইনর্জীগী লমদা তেংবাংনবা হেনগৎপা অমসুং ইন্নোভেতিব ওইবা হেল্থকেয়রগী হীরমদা ইনভেস্ত তৌবগা মরী লৈনবা য়ানচে কয়া অমগী খুৎয়েক পীনখ্রে। ভারতকী পোর্ত ইনফ্রাস্ত্রকচরদা বিলিয়ন দোল্লর কয়া UAEগী কম্পেনী কয়ানা ইনভেস্ত তৌগনি হায়বগী ৱাফমসু য়াখ্রে। UAEগী সোভরেন ৱেল্থ ফন্দনা গিফ সিতীদা থবক পায়খৎপা হৌরগনি। ত্রান্সৱর্ল্দ কম্পেনীশিংনা এয়র্ক্রাফ অমসুং জহাজ লীজ তৌবগী থবকশিংসু হৌরগনি। ভারত অমসুং UAEগী মরী ফগৎলক্লিবা অসিদি ঐচ.আর.ঐচ. শৈখ মোহম্মদ বিন জায়েদ অল নাহ্যানগী হোৎনজমন্ননি হায়না ঐহাক্না অমুক্কা হন্না ফোংদোকচরি।
মরুপশিং,
ঐহাক্না ঙরাং মোজাম্বিক্কী রাস্ত্রপতি, হিস এক্সেলেন্সী শ্রী ফিলিপ ন্যুসিগা য়াম্না কুপ্না ৱারী শাজখি। মহাক্কী ওইনদি গুজরাত্তা লাকপসি হৌখিবা মতমগী থৌদোক কয়া অমা নীংশিংহল্লি। মহাক অসি IIM অহমেদবাদকী এলুম্নাই অমসু ওইরিবনি। ভারতকী G20 প্রসিদেন্সী মনুংদা অফ্রিকান য়ুনিয়ন্না G20গী পর্মানেন্ত মেম্বর ওইখিবসি য়াম্না চাউথোকচনীংঙাই ওইবা ৱাফম অমনি। রাস্ত্রপতি ন্যুসীগী খোঙচৎ অসিনা ঐখোয়গী বাইলেতরেল মরীবু হেন্না চেতশিলহনবতা নত্তনা ভারত অমসুং অফ্রিকাগী মরীবুসু হেন্না নকশিন্নহল্লে।
মরুপশিং,
ঐখোয়না জেক রিপব্লিক্কী প্রধান মন্ত্রী, হিস এক্সলেন্সী শ্রী পেতর ফ্যালাবু লৈবাক অসিদা প্রধান মন্ত্রী ওইনা লাকপা অহানবা খোঙচৎ অসিদা ঐখোয়না তরাম্না ওক্লি। মহাক্না ভারত্তা মমাংদসু লাক্লম্লে। অদুবু হন্দক্কী খোঙচৎ অসিনা প্রধান মন্ত্রী অমা ওইনা অহানবা ওইনা লাকপনি। জেক অমসুং ভাইব্রেন্ত গুজরাত সম্মিৎকী মরক্তা লৈনরিবা মরীনা তেক্নোলোজী অমসুং ওতোমোবিল সেক্তরদা মরু ওইনা তেংবাংনবগী মতৌ অমা উবা ফংলি। হিস এক্সেলেন্সী পেতর ফ্যালাগী খোঙচৎ অসিনা লৈবাক অনিগী মরী হেন্না চেৎশিলহনগনি হায়বগী ঐহাক্না থাজবা থম্মি। ঐখোয়গী মফমসিদা হায়নবা অমা লৈ – “অতিথী দেবো ভবা” অমসুং হন্দক্কী খোঙচৎ অসিনা প্রধান মন্ত্রী অমা ওইনা ভারতকী অহানবা খোঙচৎ ওইবসিদা, অদোম্না নুংঙাইরবা অমসুং নীংশিংনীংঙাই ওইরবা থৌওং কয়াগা লোয়ননা হনখিগনি হায়বগী থাজবা থম্লি।
মরুপশিং,
ঐহাক্না নোবেল ফংলবা অমসুং তিমোর লেস্তেগী রাস্ত্রপতি, শ্রী হোজে রামোসপু ভারত্তা তরাম্না ওকচরি। মহাক্কী গান্ধীনগর খোঙচৎ অসি য়াম্না অখন্নবা অমা ওইরি, মসিগী মরমদি মহাক্কী লৈবাক্কী নিংতম ইহৌদা মহাক্না মহাত্মা গান্ধীগী হিংশা তৌদবা হায়বা ৱাখল্লোনবু খুৎলায় ওইনা শিজিন্নখিবননি। তিমোর লেস্তেগা ঐখোয়গা লৈনরিবা মরী অসিদি ASEAN অমসুং ইন্দো-পেসিফিক লমদমগী ওইনা য়াম্না মরু ওইরি।
মরুপশিং,
ভাইব্রেন্ত গুজরাত সম্মিৎ অসিনা হন্দক্তা চহি 20 মপুং ফাখ্রে। হৌখিবা চহি 20সিদা সম্মিৎ অসিনা অনৌবা ৱাখল্লোন কয়া পুথোকখি। মসিনা ইনভেস্তমেন্ত অমসুং রিতর্ন্সকী অনৌবা থোঙ কয়াসু হাংখি। হন্দক্কী চহিগী সম্মিৎ অসিগী থীম্না “গেতৱে তু দি ফ্যুচর” ওইরি। 21শুবা চহি-চাগী য়াইফরবা মতমদি ঐখোয়না পুন্না হোৎনমিন্নদুনা ফংবা ঙমগনি। ভারতনা মখোয়গী G20 প্রসিদেন্সী মনুংদা, মালেমগী তুংগী মতমগী থৌরাং অমা লান্থোকখ্রবনি অমসুং মসিবু হন্দক্কী ভাইব্রেন্ত গুজরাত গ্লোবেল সম্মিৎ অসিনা অমুক্কা হন্না শাফু পীরি। ভারতনা I2U2 অমসুং অতোপ্পা মলতিলেতরেল ওর্গনাইজেসনশিংগী মরক্কী মরী হেন্না চেৎশিনহল্লি। মালেমগী য়াইফ য়ুম্বালগী ওইনদি ‘ৱান ৱর্ল্দ, ৱান ফেমিলী, ৱান ফ্যুচর’গী ৱাখল্লোন অসিনা তঙাই ফদবা মচং অমা হৌজিক ওইরি।
মরুপশিং,
খোঙজেল য়াঙনা হোংলক্লিবা হৌজিক্কী ৱর্ল্দ ওর্দর অসিদা ভারতনা ‘মালেমগী মরুপ’ অমগী থৌদাং লৌদুনা তুংলমচত্তা চঙশিল্লি। ঙসিদি, মান্ননা পাম্বা পান্দমশিং থমদুনা ফংবা ঙমগনি হায়বগী থাজবা মালেমদা ফাওহল্লে। ভারতনা মালেমগী য়াইফ য়ুম্বালগীদমক্তা খোঙফম চেৎপা অমসুং কন্না হোৎনবা অসিনা মালেম্বু তেক কায়দবা অমসুং নুংঙাই য়াইফবা অমা ওইহল্লে। মালেম্না ভারতপু তংদু লৈতানা লৈবগী মরু ওইবা য়ুম্বী অমগুম্বা য়েংলি। থাজবা য়াবা মরুপ অমা, মীয়ামদা য়ুম্ফম ওইবা চাউখৎ থৌরাং পুরকপদা থাজবা থম্বা মরুপ অমা, মালেমগী য়াইফ য়ুম্বালদা থাজবা থম্বা খোঞ্জেল অমা, মালেমগী শেন্মিৎলোনগী শাহৌ লৌনবা ইঞ্জিন অমা, ৱারোইশিন কয়া পুরকপা ঙম্বা তেক্নোলোজী হব অমা, তেলেন্ত লৈবা নহাশিংগী পাৱরহাউস অমা অমসুং মীয়ামগী অপাম্বা পীবা ঙম্বা গনতন্ত্রা অমা ওইনা মালেম্না ঐখোয়বু উরি।
মরুপশিং,
ভারতকী মীওই বিলিয়ন 1.4গী প্রাইওরিতী অমসুং মঙলান অমসুং মখোয়না মীওইবদা য়ুম্ফম ওইদুনা চাউখৎ থৌরাং পাংথোকপগী থৌওংদা থাজবা অমসুং ইনক্লুসিব অমসুং মান্নবা থাক্তা সরকারনা খোঙফম চেৎলিবা মতৌ অসিগা লোয়নদুনা মসিনা মালেমগী নুংঙাই য়াইফ অমসুং চাউখৎ থৌরাংগী মরু ওইবা ৱাফম অমা ওইরি। ঙসিদি, ভারতনা মালেমগী খ্বাইদগী মঙাশুবা চাউবা শেন্মিৎলোন অমা ওইরে, অদুবু চহি 11গী মমাংদা ঐখয়না তরাশুবা থাক্তা লৈরম্বনি। মালেমগী অচৌবা রেতিং এজেন্সী কয়ানা ভারতনা চহি খরগী মনুংদা মালেমগী খ্বাইদগী অহুমশুবা চাউবা শেন্মিৎলোন অমা ওইরগনি হায়না য়েৎনবা লৈতনা হায়নরি। তংদু লৈতাদবগী ফিভম কয়া লৈরবসু, ঐখোয়না পান্দম অসি শোইদনা ফংগনি হায়না থাজবা পীজরি। মালেম্না ভারতপু থাজবগী মঙাল অমা ওইনা উনরি। ভারতকী পারিওরিতী ময়েক য়াম্না শেংলে। ঙসিগী ভারতকী প্রাইওরিতীশিংদি সস্তেনেবল ইন্দস্ত্রী, মেন্যুফেকচরিং অমসুং ইনফ্রাস্ত্রকচর, ন্যু এজ স্কিল, ফ্যুচরিস্তিক তেক্নোলোজী, AI অমসুং ইন্নোভেসন, গ্রীন হাইদ্রোজেন, রিন্যুএবল ইনর্জী অমসুং সেমিকন্দক্তরনি। ভাইব্রেন্ত গুজরাত গ্লোবেল ত্রেদ শোদা মসিগুম্বা অপুনবা ইকোসীস্তেম অসিগী শক্তম অমসু ঐখোয়না উবা ফংগনি। মীয়াম্না মসি য়েংবীয়ু হায়না ঐহাক্না হায়জরি। গুজরাতকী স্কুল অমসুং কোলেজকী মহৈরোইশিংনা মসিগী খুদোংচাবা অসি মাঙহনবীগনি। ত্রেদ শো অসিদা ঙরাং হিস এক্সেলেন্সী ন্যুসী অমসুং হিস এক্সলেন্সী রামোস হোর্তাগা ঐহাক্কা মগুন লৈরবা মতম খরা লেনমিন্নখি। ত্রেদ শো অসিদা ই-মোবিলিতী, স্তার্তঅপ, ব্লু ইকোনোমী, গ্রীন ইনর্জী অমসুং স্মার্ত ইনফ্রাস্ত্রকচরগুম্বা সেক্তর কয়াদা মালেমগী অৱাংবা থাক্কী তেক্নোলোজী শিজিন্নদুনা পুথোকপা পোত্থোক কয়া অমা উৎলি। সেক্তরশিং অসিদা ইনভেস্ত তৌবগী খুদোংচাবা কয়া ত্রেদ শো অসিনা পীরি।
মরুপশিং,
মালেমগী ফিভমগী মতাংদা অদোম পুম্নমক্না খঙলবনি। মসিগুম্বা শিংনবা কয়া অসিগী মাইয়োক্তা, ভারতনা হৌখিবা দিকেদশিংদা পায়খৎখিবা রিফোর্ম কয়ানা মরম ওইরগা ভারতকী শেন্মিৎলোন্না নীংহন্নবা লৈতবা মতৌ অমসুং শাহৌ লৌবগী থৌওং লেপ্তনা পাংথোকখি। রিফোর্মশিং অসিনা ভারতকী শেন্মিৎলোনগী মতিক, তৌবা ঙম্বগী মতৌ অমসুং চাংয়েংনবগী মতৌবুসু হেনগৎহল্লে।
রিকেপিতেলাইজেসন অমসুং IBCগী মতেংদগী ভারতনা মশাগী বেঙ্কিং সীস্তেম্বু মালেমগী খ্বাইদগী মপাঙ্গল লৈবা অমা ওইহল্লে। ইজ ওফ ব্যুজিনেস্তা অহেনবা মিৎয়েং চঙবদগী, ঐখোয়না কমপ্লাইএন্স লিশিং 40 লৌথোক্তুনা কারবার তৌবদা লাইথোকহল্লে। GSTনা তেক্সেসনগী অৱাবা কয়া কোকহল্লে। ঐখোয়না ভারত্তা গ্লোবাই সপ্লাই চেনবু মখল য়ামহনবগী অফবা ফিভম অমা শেম্লে। ঐখোয়না হন্দক্তা FTA 3গী খুৎয়েক পীনখ্রে অমসুং মসিনা ভারতপু মালেমগী কারবারগী খ্বাইদগী পাম্নবা পন্থুংফম অমসু ওইহল্লে। FTAশিং অসিগী মরক্তগী অমদি UAEগা খুৎয়েক পীনখিবনি। ঐখোয়না ওতোমেতিক রুতকী খুত্থাংদা সেক্তর কয়া অমা FDIগীদমক্তা হাংদোক্লে। ঙসিসি ভারতনা ইনফাস্ত্রকচরদা রেকোর্দ ওইরবা ইনভেস্তমেন্ত তৌরি। ভারতকী কেপেক্স অসিসু মমাংগী চহি 10দা শরুক 5 হেনগৎলে।
মরুপশিং,
ভারতনা গ্রীন অমসুং ইনর্জীগী অতোপ্পা মহুৎ শিনবা য়াবা থৌওংশিংগী মতাংদা খোঙফম হন্দনা থবক পায়খৎলি। লৈবাক্কী রিন্যুএবল ইনর্জী কেপাসিতীদা শরুক অহুম হেনগৎলে। দিজিতেল ইন্দিয়া মিসন্না পুন্সি অমসুং কারবার কয়াবু নুংঙাইহল্লে। হৌখিবা চহি 10 অসিদা অহোঙবা মোবাইল অমসুং দেতানা মরম ওইরগা দিজিতেল ইনক্লুজনগী অনৌবা ইহৌ অমা লাকখ্রে। খুঙ্গংশিংদা ওপ্তিকেল ফাইবর য়ৌহনবা অমসুং 5G খোঙজেল য়াঙনা শন্দোকপনা ভারত মচাশিংগী পুন্সি য়াম্না নুংঙাইহল্লে। ঙসিদি, ঐখোয়না মালেমগী স্তার্তঅপকী খ্বাইদগী অহুমশুবা চাউবা ইকোসীস্তেম অমা ওইরে। ঙসিদি ভারত্তা রেজিস্তর তৌরবা স্তার্তঅপ লাক্ষ 1.15 লৈরে অমসুং ভারতকী অপুনবা এক্সপোর্ত্তসু রেকোর্দ ইবা মশিংদা হেনগৎখ্রে।
মরুপশিং,
ভারত্তা লাক্লিবা অচৌবা অওনবা অসিনা মীয়ামগী পুন্সি মহিং হেন্না নুংঙাইহনবতা নত্তনা মীয়ামদা মপাঙ্গলসু হাপ্লি। ঐখোয়গী সরকারগী মমাংগী চহি 5তা মীওই করোর 13.5 হেনবনা লাইরবগী খয়াত্তগী মপান থোক্লকখি অদুগা মিদ্দল ক্লাসশিংগী চাগাগী চাংচৎসু লেপ্তনা হেনগৎলক্লি। ভারত্তা নুপীগী ৱর্কফোর্স্না চাউখৎ থৌরাংগী লমদা শরুক য়াবগী মশিংনা রেকোর্দ ওইনা হেনগৎলক্লি। মসিগুম্বা ইথিল অসিগা লোয়ননা, ঐহাক্না অদোম খুদিংনা ভারতকী ইনভেস্তমেন্ত খোঙচৎ অসিগী শরুক ওইবীনবা হায়জরি।
মরুপশিং,
ভারতকী লোজিস্তিক্স অমসুং ত্রান্সপোর্তেসন লাইহনবগী থৌশিল থৌরাং কয়াবু মতমগা চুননবা ঐখোয়না কন্না হোৎনরি। লৈবাক্কী এয়রপোর্ত মশিংনা দিকেদ অমগী মনুংদা 74দগী 149দা হেনগৎখ্রে। ভারতকী ন্সেনল হাইৱে নেতৱর্ক অসিনা শরুক অনি থোক্না হেনগৎখ্রে, মেত্রো নেতৱর্ক্তা শরুক অহুম হেনগৎখ্রে, দেদিকেতেদ ফ্রৈত কোরিদোরশিংনা গুজরাত, মহারাস্ত্রা অমসুং নোংপোকথংবা সমুদ্র তোর্বানশিংবু শম্নহল্লি। চপ মান্নবা মতমসিদা, নেস্নেল ৱাতরৱেজ কয়াগী মতাংদা ভারত্তা থবক পায়খৎলি। পোর্ত তর্নঅরাওন্দ তাইম অসিদি ঙসিদি মতমদা অতোপ্পশিংগা মতিক চানা চাংয়েংনবা ঙম্লে। ভারত-মিদ্দল ইস্ত য়ুরোপ ইকোনোমিক কোরিদোর অসিনা অদোমগুম্বা ইনভেস্তরশিংগী মফমদা কারকারগী মশক থোকপা খুদোংচাবা কয়া পীগনি।
মরুপশিং,
ভারতকী কাচিন কোয়া খুদিংদা ইনভেস্তমেন্তকী অনৌবা খুদোংচাবা কয়া লৈরে। ভাইব্রেন্ত গুজরাত সম্মিৎ অসিনা মসিগী থোঙনি, তুংগী মতমদা চঙশিন্নবা থোঙনি। অদোম্না ভারত্তা ইনভেস্ত তৌবখক নত্তে, অদোম্না নহা ওইরিবা ক্রিএতর অমসুং কঞ্জ্যুমর কয়াগী তুংগী চারোন শুরোন অমসু শেম্লিবনি। অদোমগা ভারতকী মিৎয়েং শানবা নহা ওইরিবা চারোন শুরোনশিংগা তেংবাংনবনা অদোম্না খল্লুদবা মহৈ কয়া অমা ফংবা ঙমগনি। থাজবা অসিগা লোয়ননা, ঐহাক্না পুম্নমকপু ভাইব্রেন্ত গুজরাত গ্লোবেল সম্মিৎ অসিদা শরুক য়াবগীদমক্তা থম্মোই শেংনা অমুক্কা হন্না থাগৎচরি। ঐহাক্না থআজবা পীজরি, অদোমগী মঙলানগা ঐহাক্কী পান্দমগা মান্নৈ। অদোমগী মঙলান্না চাউরিবমখৈ, ঐহাক্কী পান্দমশু পাকথোক-চাউথোক্লক্কনি, লাকপীয়ু, মঙলান থম্বীয়ুঃ মসিগুম্বা মঙলান অসিবু মঙফাওনহন্নবা লৈবাক অসিদা মতিক চাবা খুদোংচাবা অমসুং তাঞ্জা কয়া লৈরি।
