میں اپنے دوست، جمہوریہ سیشلز کے صدر عزت مآب ڈاکٹر پیٹرک ہرمینی کی دعوت پر 27 تا 29 جون 2026 کے دوران سیشلز کے سرکاری دورے پر روانہ ہو رہا ہوں، جہاں مجھے سیشلز کے قومی دن کی گولڈن جوبلی (پچاسویں سالگرہ) کی تقریبات میں مہمانِ خصوصی کی حیثیت سے شرکت کا شرف حاصل ہوگا۔
سیشلز ہمارا قابلِ قدر بحری ہمسایہ اور ہمارے ویژن مہاساگر کا ایک اہم شراکت دار ہے۔ اسی طرح عالمی جنوب کے لیے ہمارے مشترکہ عزم میں بھی وہ کلیدی حیثیت رکھتا ہے۔ اس سال ہم اپنے سفارتی تعلقات کے قیام کی پچاسویں سالگرہ بھی منا رہے ہیں، جو باہمی اعتماد، مشترکہ جمہوری اقدار، تنوع کے احترام اور دونوں ممالک کے عوام کے درمیان گہری قربت پر استوار ہیں۔
فروری 2026 میں صدر ہرمینی کے کامیاب دورۂ بھارت کے بعد، میں ان کے ساتھ ہونے والی بات چیت کا منتظر ہوں، جس کا مقصد ہماری پائیدار دوستی کو مزید مستحکم بنانا ہے۔ ہم مل کر اپنے عوام کی ترقی کو آگے بڑھانے اور بحرِ ہند کے خطے میں امن، سلامتی اور خوشحالی کے فروغ کے لیے کام کریں گے۔
اس دورے کے دوران مجھے یہ اعزاز بھی حاصل ہوگا کہ میں سیشلز کی قومی اسمبلی سے خطاب کرنے والا بھارت کا پہلا وزیرِ اعظم بنوں۔ یہ تاریخی موقع ان مضبوط جمہوری اقدار اور پارلیمانی روایات کا مظہر ہے جو ہمارے دونوں ممالک کو ایک دوسرے سے جوڑتی ہیں۔
میں سیشلز میں مقیم فعال اور باصلاحیت بھارتی برادری سے ملاقات کا بھی مشتاق ہوں، جو نسل در نسل بھارت اور سیشلز کے درمیان خصوصی دوستی کو فروغ دیتی آئی ہے اور دونوں ممالک کے درمیان ایک زندہ پل کا کردار ادا کر رہی ہے۔
مجھے پورا یقین ہے کہ میرا یہ دورہ دونوں ممالک کے دیرینہ تعلقات کو مزید مضبوط بنائے گا، بحرِ ہند کے خطے میں بحری تعاون کو وسعت دے گا اور ایک محفوظ، پُرامن اور خوشحال بحرِ ہند کے مشترکہ ویژن کو مزید آگے بڑھانے میں معاون ثابت ہوگا۔
