ঐহাক্কী মরুপ, ঐচ.ই. দোক্তর পেত্রিক হর্মিনী, রিপব্লিক ওফ সেচেল্লসকী রাস্ত্রপতিনা চেবাউ পীরকপদগী অথোইবা মীথুংলেন ওইনা ঐহাক্না সেশেল্সকী নেস্নেল দেগী গোল্দন জুবিলীগী পালন থৌরমদা শরুক য়ানবা ২০২৬গী জুন ২৭-২৯ ফাওবা সেশেল্সতা স্তেত ভিজিৎ অমা চৎকনি।
সেশেল্স অসি মরুওইবা সমুদ্রগী য়ুম্লোন্নরিবা লমদম অমনি অমসুং ঐখোয়গী ভিজন মহাসাগর অমসুং গ্লোবেল সাউথকীদমক ঐখোয়গী মান্নবা ফিরেপ অসিদা মরুওইবা মপাং অমা ওইরি। চহি অসিদা, ঐখোয়না ঐখোয়গী দিপ্লোমেতিক রিলেসনশিং থম্লকখিবগী চহি ৫০শুবা থৌরমসু পাংথোক্লি। হায়রিবা অসি নাকল অনিগী থাজনবা, মান্নবা দেমোক্রেতিক ভেল্যুশিং, দাইভর্সিতীগীদমক ইকায় খুম্নবা অমসুং ঐখোয়গী মীয়ামগী মরক্তা লৈনরিবা অচেৎপা মরিদা য়ুম্ফম ওইরি।
২০২৬কী ফেব্রুৱারীদা রাস্ত্রপতি হর্মিনীগী ভারত খোঙচৎ মায় পাক্না পাংথোকখিবা অদুদা য়ুম্ফম ওইদুনা, ঐখোয়গী অচেৎপা মরুপ-মপাং ওইবগী মরী অসি হেন্না মপাঙ্গল কনখৎহন্নবা ঐখোয়না খন্ন-নৈনবা পাংথোক্কদৌরিবা অদুবু ঐহাক্না খৌরাংনা ঙাইজরি। ঐখোয়গী মীয়ামগী চাউখৎ-থৌরাং অমসুং ভারত মহাসাগর লমদমদা সেক্যুরিতী অমসুং চাউখৎপা পুরক্নবা ঐখোয় পুন্না থবক তৌমিন্নগনি।
খোঙচৎ অসিগী মনুংদা, ঐহাক্না সেশেল্সকী নেস্নেল এসেমব্লীদা ৱা ঙাংবা অহানবা ভারতকী প্রধান মন্ত্রী ওইবগী ইকাই খুম্নবা ফংলগনি। মসিগী পুৱারী ওইরবা খুদোংচাবা অসিনা ঐখোয়গী লৈবাক অনিমকপু পুনশিন্নরিবা মপাঙ্গল কনবা দেমোক্রেতিক ভেল্যুশিং অমসুং পার্লিয়ামেন্তরী ত্রেদিসনশিং উৎলি।
ভারত অমসুং সেশেল্সকী মরক্তা চহি কয়াদগী অখন্নবা মরী লৈনদুনা লাক্লবা অমসুং ঐখোয়গী লৈবাক অনিগী মরক্তা থোং অমা ওইনা থবক তৌরিবা সেশেল্সকী চাউরবা ভারত মচাশিংগা ৱারী শানবা ঐহাক্না খৌরাংনা ঙাইজরি।
ঐহাক্না থাজবা থম্লি মদুদি ঐহাক্কী খোঙচৎ অসিনা লৈবাক অনিগী মরক্তা লৈরিবা মতম শাংনা লৈরক্লবা মরী অসি হেন্না চেৎশিলহল্লগনি। ভারত মহাসাগর লমদমদা মেরিতাইম কোওপরেসন হেনগৎহল্লগনি অমসুং ভারত মহাসাগর লমদমদা সেক্যুরিতী, শান্তি অমসুং চাউখৎপা পুরক্নবা ঐখোয়গী অপুনবা মীৎয়েং অসি মাংলোমদা পুখৎলগনি।
